Ñamboʼékena ñande rapichápe ohayhu hag̃ua Jehovápe
1. Mbaʼéichapa umi ipyʼaporãva oñepyrũ ohayhu Jehovápe?
1 Nemanduʼápa oñeñeʼẽ ypýrõ guare ndéve Jehováre? Mbaʼépa ndegustavevaʼekue hese? Heta umi ipyʼaporãva ikatu heʼi ogustave hague chupekuéra oikuaávo mbaʼeichaitépa Haʼe ñandeporiahuvereko ha ñanderayhu (1 Juan 4:8).
2, 3. Mbaʼéichapa ikatu jaiporu lívro Mbaʼépa omboʼe la Biblia? umi ostudiáva ñanendive ohayhuve hag̃ua Jehovápe?
2 ‘Kóva hína ore Jára.’ Pe lívro Mbaʼépa omboʼe la Biblia? ohechauka Jehová ñanderayhuetereiha ha mbaʼérepa tekotevẽ jaiko iñamígoramo. Mbaʼéichapa ikatu jaiporu ko lívro ñaipytyvõ hag̃ua ñande rapichápe ohayhuve hag̃ua Ñandejárape? Jastudia rire peteĩ párte hendivekuéra ikatu ñaporandu “Mbaʼépa ñanemboʼe Jehovágui ko párte jastudiavaʼekue?” térã mbaʼéichapa ohechauka ñandéve Jehová haʼeha pe Túva ñande jaipotáva?”, koʼã mbaʼe omopensáta chupekuéra. Ñande ningo jaipota umi ostudiáva ñanendive ohayhu Jehovápe oikove aja pukukue.
3 Umi ostudiáva ñanendive ohechakuaa vove tuichaiterei mbaʼeha jaikuaa Ñandejára teetépe, heʼíta avei proféta Isaías heʼi haguéicha: ‘Kóva hína ore Jára’ (Isa. 25:9). Ñamboʼévo Ñandejára Ñeʼẽme oĩva, jahechauka porã vaʼerã umi mbaʼe porãita jahupytýtava Ñandejára múndo pyahúpe (Isa. 9:6, 7).
4, 5. Mbaʼéichapa jahechauka jahayhuha Jehovápe?
4 Mbaʼéichapa jahechauka jahayhuha Jehovápe. Jahayhúramo Jehovápe ñande pyʼaite guive, ñane ánga rugua ha opa ñane arandukue reheve, jahecháta opa mbaʼe Ñandejára ohechaháicha ha jaikóta haʼe oipotaháicha (Sal. 97:10). Upéicha, jahayhúramo Ñandejárape ñaneñeʼẽrendúta chupe enteroite mbaʼépe. Ha jahechaukáta upéva ñanderekoporã ha nañamboykéiramo Jehovápe, jepe oĩ oñemoĩva ñanderehe térã jahasa asy jave (2 Ped. 3:11; 2 Juan 6).
5 Jahayhúramo Ñandejárape, javyʼaiterei jajapóvo hembipota (Sal. 40:8). Ikatu hag̃uáicha ovyʼa avei umi ostudiáva ñanendive ohechakuaa raẽ vaʼerã Ñandejára omoĩha umi léi ñanepytyvõ hag̃ua opa ára g̃uarã. Ha ontendevaʼerã avei jaikovaʼerãha Jehová oipotaháicha jahechauka hag̃ua jaagradeseha Chupe umi mbaʼe porãita ojapóvare (Deu. 10:12, 13). Jahechaukavaʼerã chupekuéra umi oikóva Jehová rape potĩre ojeiha heta akãrasy ha jehasa asýgui.
6. Mbaʼépa ohupyty umi ohayhúva Jehovápe?
6 Heta mbaʼe porã ohupyty umi ohayhúva Ñandejárape. Jehová omombaʼe umi chupe ohayhúvape, ha ohechauka upéva oikuaaukávo chupekuéra ‘umi mbaʼe ipypukuvéva’ oĩva Iñeʼẽme (1 Cor. 2:9, 10). Ha oikuaa rupi hikuái Ñandejára ojapótava ojerovia ohupytytaha heta mbaʼe porã (Jer. 29:11). Upéicha avei ohechakuaa hikuái jahayhúramo Jehovápe, haʼe imbaʼeporãitereiha ñanendive (Éxo. 20:6). Ha ohaʼarõkuaa avei oikovetaha opa ára g̃uarã, Jehová ohayhuetereígui chupekuéra (Juan 3:16).
7. Mbaʼéichapa reñeñandu ikatu haguére remboʼe ótrope ohayhu hag̃ua Jehovápe?
7 Jaikuaavévo jahávo ñande Ru Yvagapeguápe, hetave mbaʼe jareko ñamombeʼuvaʼerã ñande rapichakuérape (Mat. 13:52). Ajépa tuichaite mbaʼe ñandéve g̃uarã upéva! Ikatu hína ñamboʼe ótrope ohayhu hag̃ua Jehovápe, ha koʼýte ñamboʼevaʼerã ñane familiakuérape (Deu. 6:5-7). Javyʼavaʼerã ñande ha umi ostudiáva ñanendive ñamombaʼeguasu haguére Jehovápe, haʼe ningo imbaʼeporãiterei ñanendive (Sal. 145:7).