Ñamoherakuãkena ‘Ñandejára marandu porã hekoitépe’ umi edifisioha rupi
1. Moõpa avei ‘ñamoherakuãvaʼerã Ñandejára marandu porã’?
1 Apóstol Pablo ‘omoherakuãvaʼekue Ñandejára marandu porã hekoitépe’ (Hech. 20:24, JMP). Upéicha avei ñande ñañehaʼãmbaite ñamoherakuã pe marandu porã oparupiete, upévare japredika avei edifisioha rupi. Jaikuaaháicha umichahápe oiko heta hénte, ha ñag̃uahẽ hag̃ua hendapekuéra ijetuʼu jepi. Mbaʼérepa?
2. Mbaʼérepa ñañatende porã vaʼerã japredika hag̃ua edifisioha rupi?
2 Jaikuaa ningo koʼág̃a rupi hetaiterei mbaʼe vai oikoha, upévare heta edifísio ojellaveapa ha oñemoĩ guárdia térã cámara ojeasegurave hag̃ua (2 Tim. 3:1, 2). Ikatu avei ndojehejái oimeraẽvapente oike. Sapyʼánte katu ojejerure voi ñandéve ñasẽ hag̃ua upégui, koʼýte oĩramo vesíno ojeplageáva ñaime haguére upépe. Upévare ñañatende porã vaʼerã japredika hag̃ua umichaha rupi.
3. Mbaʼe órapa iporãvéta jaha japredika umi edifisioha rupi, ha mbaʼérepa?
3 Mbaʼe órapa ikatu jaha. Ñañehaʼãvaʼerã jaha umi óga jára oĩ jave, ani ág̃a ojeʼe ñanderehe jaikeseha ñamonda térã jajaposeha mbaʼe vai. Heta ermáno oho jepi kaʼarupytũ ha ótro katu sábado térã domingo kaʼarukue. Jaháramo pyharevete ikatu oĩ ojeplageáva pe edifísio járape ha nañanderejavéi ñag̃uahẽ upépe.
4, 5. Mbaʼéichapa ikatu japredika peteĩ edifísiope ojellaveáramo jepe?
4 Mbaʼéichapa ikatu jaike. Aníkena ñañepyrũ ñañeʼẽ pe guárdiandi ni avave oĩva pe edifísiope oñepyrũ mboyve ñane predikasión. Peteĩ edifísio ojellaveapárõ ha orekóramo intercomunicador jaiporuvaʼerã upéva ñañeʼẽ hag̃ua ñande rapichándi. Ñaporandu chupe ikatútapa jahasa hendápe ñañemongeta porãve hag̃ua. Ha ikatúramo, ñag̃uahẽntemavaʼerã avei umi ótro kotýpe. Péro ndaikatúirõ jajapo upéicha, jaguejy jeýnte ha ñañeʼẽ pe intercomunicador guive otrondiháma. Ha upéi ñandéntema jahechakuaáta mboýndipa ikatu ñañeʼẽ.
5 Ikatu oĩ oporandúva ñandéve pe intercomunicador guive mbaʼépa ñaikotevẽ. Upéicharõ jaʼekuaa chupe ñande réra, ha oiméramo pe intercomunicador ykére oĩ héra ñahenoikuaa chupe héra rupi avei. Ha ñamombeʼu mbykymi mbaʼe rehépa ñañemongetase hendive. Oĩ ermáno oleéva pe lívro Razonamiéntogui heʼihápe “Introducciones útiles para el ministerio en el campo”.
6. Mbaʼépa ikatu jajapo peteĩ guárdia ndoipotáiramo jaike?
6 Oĩramo peteĩ guárdia ha ndoipotái jaike japredika hag̃ua, ikatu chupe voi japredika. Sapyʼánte ningo haʼekuéra oleese ñane puvlikasionkuéra. Ha ikatu voi jastudia hendive pe oĩháme. Oiméramo pe guárdia oheja japredika peteĩ oikóvape upépe, aníkena jaha ñag̃uahẽ umi ótro kotykuérape avei.
7. Mbaʼeichagua volsón térã kartérapa jaguerahavaʼerã, ha mbaʼérepa?
7 Mbaʼépa jaguerahakuaa ha mbaʼéicha jajeportavaʼerã. Jagueraha rangue volsón térã kartéra guasu, jaguerahavaʼerã peteĩ michĩvante. Upéicha avave ndahesahomoʼãi hese ha ndeʼimoʼãi ñañomihañaína peteĩ mbaʼe upépe. Heta ermáno omoĩ peteĩ karpétapente rrevísta ha folléto, ha ogueraha la Biblia ipópe térã ivolsíllope.
8. Éntre mboýpa jahavaʼerã japredika hag̃ua edifisioha rupi?
8 Ñañehaʼãvaʼerã jaha mbovymínte ponóike ojeʼe jajaposeha mbaʼe vai hesekuéra. Péro ñañatendevaʼerã avei ñandejehe koʼýte oĩramo upérupi heta mondaha (Pro. 22:3). Pór ehémplo ikatu ojupi cuatro térã seis ermáno peteĩ písope. Ha mokõi ombota aja peteĩ okẽme umi ótro ohaʼarõ, ha péicha ojopyru opa peve.
9. Mbaʼépa jajapovaʼerã ani hag̃ua oñeñeʼẽ vai ñanderehe, ha mbaʼérepa iñimportánte upéva?
9 Jaike mboyve peteĩ edifísiope jaityvyro porã vaʼerã ñande py ha mbeguekatúnte ñamboty pe okẽ. Upéicha jajapóramo ndaiporimoʼãi ojekeháva ñandehegui. Jaike vove jahavaʼerã pe píso japredikatahápentema, japyta rangue pe entrádape. Upéicha ndojekyhyjemoʼãi jajapóramo g̃uarã mbaʼe vai hesekuéra.
10. Mbaʼérepa iporãvéta ñañeʼẽ térã ñambota mbeguéramo okẽ?
10 Avei ñañatendevaʼerã ani ñañeʼẽ hatãiterei pe óga járandi. Ha avei ñañeʼẽvo ñane ermanokuérandi ani ñandeayvueterei, pórke ikatu oñehendu pe pasíllore. Upéva ndeʼiséi ñañeʼẽ ñemi vaʼerãha hendivekuéra, heʼise guei ñañeʼẽ mbeguentevaʼerãha. Oĩ ermáno oñepyrũva opredika pe koty oĩva pe pasíllo oñepyrũháme ha upéi ohasa pe ultimoitépe, ombota rangue káda okẽme. Upéicha jajapóramo nañambopochymoʼãi vesínope. Avei ñanemanduʼavaʼerã ñambota hatãitereírõ pe okẽ ikatuha umi oikóva upépe ipochy térã oñemondýi, ha nosẽi oñatende ñanderehe.
11. Mbaʼépa jajapovaʼerã peteĩ okẽ oguerekórõ pe kuaraʼi ñamaña hag̃ua?
11 Heta okẽ oguereko peteĩ kuaraʼi ñamaña hag̃ua. Oiméramo ñag̃uahẽháme oguereko upéva, ñañemoĩvaʼerã henondepete ikatu hag̃uáicha pe óga jára ñanderecha. Ha oñembojávo ñamomaitei chupe ha ñañepyrũma japredika. Iporãvéta ñamombeʼúramo chupe ñande ha ñane kompañéro réra, upéicharõ pe óga jára ikatu mbaʼe oavri ñandéve hokẽ. Péro ndojapóiramo upéva, lomímonte ikatu japredika chupe upe guive jepe.
12. Mbaʼépa jajapovaʼerã ndaipórirõ pe óga jára?
12 Mbaʼépa ikatu jajapo ndaipórirõ óga jára. Ndajatopáiramo pe óga járare ikatu jaheja chupekuéra ñane puvlikasión hokẽ guýpe. Péro ñañatende vaʼerã toike hyepýpe porã térã ojehechaʼỹ hag̃uáme. Pórke heta tapicha ojeplagea jepi jaha rire, otopágui pasillopepa ñane puvlikasionkuéra.
13. Mbaʼépa ikatu jajapo pe óga jára ijarhélramo?
13 Ijarhélramo óga jára. Peteĩ ogajára ijarhélramo, iporãvéta jahánte upégui ha ñag̃uahẽ ág̃a ótrope. Ha tekotevẽrõ ñasẽvaʼerã pe edifísiogui voi, ani ág̃a ipochy ñanderehe pe oñatendéva pe edifísiore. Ha pe óga jára ndeʼíriramo jepe ñandéve pono ñag̃uahẽve hendápe, ñaanotantevaʼerã pe tarhéta de territóriope nohenduséi hague ha avei ikoty número. Ikatu hag̃uáicha ñag̃uahẽ jey ág̃a ótrope, okambiárõ g̃uarã.
14, 15. Mbaʼépa ikatu jajapo ojeʼéramo ñandéve jaha hag̃ua pe edifísiogui?
14 Ojeʼéramo ñandéve ñasẽnte hag̃ua upégui. Peichahágui pe guárdia térã peteĩ ombaʼapóva edifísiope heʼíramo ñandéve ñasẽ hag̃ua upégui, jahantevaʼerã. Ani ág̃a ipochy ñanderehe ha ñanedemanda upévare. Umi guárdia ningo ndahaʼéi ku ndaijaʼéiva ñanderehe, haʼekuéra ojapónte itraváho.
15 Ñaneakãguapyvaʼerã ha jaʼe porã pe guárdiape maʼerãpa ñaguãhẽse pe edifísiope (1 Ped. 3:15). Jaikuaa ningo haʼekuéra oñangarekovaʼerãha umi oikóvare pe edifísiope, ha ñande ikatu jaguerohory chupekuéra ojapo porã haguére hembiapo. Upépe ikatu mbaʼe ñandereja jahasa, péro ndoikóiramo upéicha ñakirirĩntevaʼerã ha ñasẽ upégui. Ha ijáramo ñandéve jaʼekuaa pe guárdiape jaguerahaseha jepi ñane puvlikasión haʼe oĩháme voi térã lavanderíape (Col. 4:6). Ñanemanduʼákena koʼã mbaʼe ñamombeʼuvaʼerãha ñane superintendénte de servísiope.
16. Mbaʼépa jajapokuaa ndaikatúiramo japredika?peteĩ edifísiope
16 Tiémpo riremi ikatu ñañehaʼã jey japredika pe edifísiope. Péro ñandetrata vai jeýnterõ, umi ansianokuéra oñeʼẽvaʼerã sukursálpe ha ani oheja umi ermanokuérante osolusionase. Ha ni upeichavérõ ndaikatúiramo japredika pe edifísiope jahekavaʼerã chupe ládo. Ikatu ñahenói chupekuéra pór teléfono térã jaguerahauka chupekuéra kárta. Ikatu avei ñañemoĩ pe edifísio ypýpe térã henondépe voi japredika hag̃ua chupekuéra ohokuévo térã oukuévo itravahohágui.
17. Mbaʼérepa iñimportanteterei japredika edifisioha rupi avei?
17 Koʼẽrõitéma ningo oñehundíta ko múndo aña ha umi omombaʼeguasúva Ñandejára réra añoite ojesalváta. Péro, ‘mbaʼéicha piko omombaʼéta héra ndojeroviáiramo Hese? Ha mbaʼéicha piko ojeroviáta, nohendúiramo oñeñeʼẽ Hese?’ (Rom. 10:13, 14, BNP.) Heta tapicha “ojeporavovaʼekue ohupyty hag̃ua jeikove opaveʼỹva” oiko umi edifisioha rupi (Hech. 13:48). Ñanembaʼerechakuaáramo ha ñaneakãguapýramo ikatúta ñamoherakuã pe marandu porã umichaha rupi avei.