Ñandejára goviérno poguýpe, opárupi ojeiko vaʼekue pyʼaguapy ha vyʼápe
¿Mbaʼérepa ñaikotevẽ Ñandejára Rréino?
Ñande Apohare ningo héra Jehová, ha ojapo ypýrõ guare ñande tuakuéra ypykuépe haʼe añoite ogoverna vaʼekue opa mbaʼe mborayhúpe. Upévare ojapo vaʼekue peteĩ hardín neporãva Edénpe umi yvyporakuéra oiko hag̃ua pype. Avei omeʼẽ chupekuéra heta mbaʼe hoʼu vaʼerã ha umi traváho ombovyʼátava chupekuéra (Génesis 1:28, 29; 2:8, 15). Haʼekuéra oñemoĩrire Ñandejára goviérno poguýpe, koʼag̃aite peve jaiko vaʼerãmoʼã pyʼaguapýpe.
Ñande tuakuéra ypykue orrechasa vaʼekue Ñandejára goviérno
La Biblia omombeʼu peteĩ ánhel oñembohéra vaʼekue Satanás opuʼã hague Ñandejárare, ha heʼi Ñandejára ndorekoiha derécho ñanegovernávo. Haʼe ontendeka kuri javyʼavetaha ndahaʼéiramo Ñandejára upe ñanegovernáva. Ñambyasýramo jepe, ñande tuakuéra ypykue, Adán ha Eva, opena hese ha opuʼã avei Ñandejára goviérnore (Génesis 3:1-6; Apocalipsis 12:9).
Adán ha Eva orrechasa rire Ñandejárape igovernánteramo, operde la oportunida oiko porãvo pára siémpre pe paraísope (Génesis 3:17-19). Ha pe ojapo vaʼekue hikuái oafekta avei ifamiliakuérape. Upévare la Biblia heʼi Adán opeka rire, “pe pekádo oike ko múndope, ha pe ñemano oike pekádo rupive” (Romanos 5:12). Yvyporakuéragui oiko rire pekadór oñepyrũ avei ótro provléma ijetuʼuetereíva: “Yvypóra omanda hapicháre operhudika hag̃uánte chupe” (Eclesiastés 8:9). Upéva heʼise yvyporakuéra goviérno siémpre ogueruha heta provléma.
YVYPORAKUÉRA OÑEPYRŨ OGOVERNA
Nemrod opuʼã vaʼekue Jehováre
La Biblia heʼi pe primer governánte oĩ vaʼekue ko yvy ape ári héra hague Nemrod, ha haʼe avei oñemoĩ vaʼekue Jehová goviérnore. Upe tiémpo guive oĩ hetaiterei oipuru vaíva ijautorida. Ojapóma haimete 3.000 áñorupi rréi Salomón oskrivi hague: “Ahecha mbaʼéichapa umi osufríva oiko hesay hováre ha ndaipóri avave okonsola vaʼerã chupekuéra. Umi oporomaltratáva oreko autorida” (Eclesiastés 4:1).
Ha ñane tiémpope osegi gueteri oiko upéva. Peteĩ puvlikasión onohẽ vaʼekue pe ONU áño 2009-pe heʼi oĩha heta hetave hénte opensáva “umi provléma oĩva ko múndope, oñepyrũha umi goviérno ndojapoporãi rupi hembiapo”.
OÑEKOTEVẼ PETEĨ KÁMBIO
Enterovéva ñaikotevẽ peteĩ governánte ikatupyrýva, ha ojapo porãva la hembiapo. ¡Ha kavalete upéva haʼe la ñande Apohare oprometéva omeʼẽtaha ñandéve!
Ni umi goviérno iporãvéva ndaikatúi osolusiona umi provléma ivaivéva jaguerekóva
Ñandejára omoĩ peteĩ rréino, térã goviérno, ohundítava entéro umi goviérno koʼag̃agua ha “ko rréino añoite opytáta opa ára g̃uarã” (Daniel 2:44). Péva pe Rréino haʼe hína upe hetaite hénte ojeruréva pe padrenuéstrope (Mateo 6:9, 10). Péro Ñandejára ndahaʼemoʼãi upe ogovernátava ko Rréinope, upéva rangue haʼéta peteĩ persóna oikóma vaʼekue yvypóraicha. ¿Mávapepa oiporavo Ñandejára?