Japredikávo jahechauka jahayhuha Jehovápe
1. Mbaʼépa ojapo Jesús ohayhúgui Jehovápe?
1 Jesús ohayhuetereígui Jehovápe osẽ omyerakuã héra ha ojapo opa mbaʼe ojeruréva chupe. Haʼe voi omombeʼu maʼerãpa ojapo upéva: “Opavave oikuaa hag̃ua che ahayhuha che Rúpe, ha ajapoha pe haʼe heʼivaʼekue chéve” (Juan 14:31). Péicha avei ñande ñasẽvo ñamyerakuã Ñandejára réra jahechaukañaína jahayhuha chupe (Mat. 22:37; Efe. 5:1, 2).
2. Mbaʼépa jahechauka ñasẽvo japredika?
2 “Toñemomarangatu nde réra.” Japredikávo opavavépe jahechaukañaína jahayhuha Jehovápe ha péicha ñaipytyvõ oñemombaʼeguasu hag̃ua héra oparupiete (Sal. 83:18; Eze. 36:23; Mat. 6:9, BNP). Ha Jesús ojapo haguéicha ñande avei jahechauka ñane rembiapóre jaipotaitereiha ojejapo Jehová rembipota ha oñemomarangatu héra (Mat. 26:39).
3. Mbaʼéichapa ikatu jagueropuʼaka umi mbaʼe ñandejokoséva?
3 Ikatu jagueropuʼaka umi mbaʼe ñandejokoséva. Jahayhúramo Jehovápe ikatúta jagueropuʼaka oimeraẽ mbaʼe (1 Cor. 13:4, 7). Jesús ombohovaivaʼekue heta mbaʼe vai, upéicharamo jepe oropuʼakapa ohayhuetereígui Itúvape ha ojaposégui hembipota (Mar. 3:21; 1 Ped. 2:18-23). Ñande avei ñambohovaiñaína heta mbaʼe vai. Péro jahayhúramo Ñandejárape ikatúta jagueropuʼaka umi mbaʼe ñandejokoséva ha jajapóta hekopete ñane rembiapo, Jesucristo ojapo haguéicha. Sapyʼánte ningo ñanekangyse ñande rogaygua oñemoĩ haguére ñanderehe, ñandeeda térã ñanderasýgui ỹrõ umi hénte nañanerenduséi rupi predikasiónpe. Upéicharamo jepe jahechaukákena jahayhuha Jehovápe jajapóvo ikatúva guive japredika hag̃ua.
4. Mbaʼéichapa ikatu jahechauka jahayhuha Jehovápe?
4 Tuichaite mbaʼe ningo pe mborayhu, ha iporãveha katu jahechaukakuaa jahayhuha Jehovápe ñane predikasión rupive (1 Cor. 13:13). Upévare ñañehaʼãkena ‘ñane mborayhu tokakuaave ohóvo’ jaikuaágui koʼẽrõitéma oñemomarangatutaha Jehová réra (Fili. 1:9; Mat. 22:36-38).