Ikatúpa japredikave?
1. Mbaʼépa ojerure Jesús hemimboʼekuérape, ha mbaʼérepa ñande ñañehaʼãvaʼerã japredikave?
1 Jesús ohechávo mbaʼeichaitépa umi hénte ojapysaka porãiterei pe marandu porãre heʼi hemimboʼekuérape: ‘Pejerure pe kóga Járape tombouve mbaʼapohára omonoʼõ hag̃ua pe ñemitỹngue’ (Mat. 9:37, 38, JMP). Koʼág̃a ningo ñane rembiapo iñimportanteterei, ñamonoʼõmbapotaitéma rupi pe ñemitỹngue. Upévare jajerurékena Ñandejárape tañanepytyvõ ha jahecha ikatupañaína japredikave (Juan 14:13, 14).
2. Mbaʼéichapa ikatu ñamonoʼõ pyaʼeve pe ñemitỹngue?
2 Japredikavékena. Heta ermáno ha ermána ojapo iprekursorádo Jehová oipytyvõgui chupekuéra (Sal. 26:2, 3; Fili. 4:6). Oĩ ojapóva iprekursorádo auxiliar un més térã hetave un áñope, ha péicha oiporuve itiémpo Ñandejárape g̃uarã. Upéva omokyreʼỹ avei chupekuéra ojapo hag̃ua iprekursorádo regular (Hech. 20:35). Jehová ningo ñanepytyvõse ñamonoʼõ pyaʼeve hag̃ua pe ñemitỹngue, jaapovechákena.
3. Mbaʼépa ikatu rejapo oiméramo rehejáraʼe nde prekursorádo?
3 Ikatúpa oiko jey ñandehegui prekursór? Oiméramo rejapóraʼe nde prekursorádo katuete nemanduʼáne umi mbaʼe porãita rehasavaʼekuére. Eñehaʼãna emombeʼu Jehovápe ne remiandu ha ejerure chupe tanepytyvõ rejapo jey hag̃ua. Oiméramo umi mbaʼe ndejokovaʼekue opyta reíma ha ikatu rejapo jey ko tembiapo porãite, ejokantemavaʼerã hese (1 Juan 5:14, 15).
4. Mbaʼe oportunidápa jaaprovechavaʼerã?
4 Koʼẽrõitéma ningo oñemonoʼõmbáta pe ñemitỹngue (Juan 4:35, 36). Upévare tekotevẽ ñañeporandumi: “Ikatu piko apredikave michĩmi jepe? Oiméramo ndaikatúi, añehaʼãpa ajapo ikatúva guive asẽ jave?” (Mar. 12:41-44.) Ehejána Jehová tandeporu oñekotevẽhápe. Ha oiméramo ikatu rejapo nde prekursorádo, ani rembohasa rei ko oportunida porãite! (Sal. 110:3.)