Ñamombaʼeguasúkena Jehovápe koʼẽ koʼẽre
1. Mbaʼépa ikatu jajapo enterovéva, ha mbaʼérepa?
1 Rréi David heʼivaʼekue Jehovápe: “Ára koʼẽre romombaʼeguasúta, ha nde réra amombaʼéne opa ára” (Sal. 145:2, 7, 21). Añetehápe enterovéva ikatu ñamombaʼeguasu Jehovápe koʼẽ koʼẽre. Jahechamína mbaʼéichapa ikatu jajapo upéva (Sal. 37:10; 145:14, 18; 2 Ped. 3:13).
2. Mbaʼéichapa ikatu ñaikumby porãve Ñandejára Ñeʼẽ koʼẽ koʼẽre ñande rogapýpe?
2 Ñande rogapýpe. Jehová omeʼẽ ñandéve heta puvlikasión pe tembiguái jeroviaha rupive. Ha umíva jaiporu ñahesaʼỹijóvo ñande folléto Jajepyʼamongetáke ára ha ára, jajapóvo ñande Aty Jastudia Hag̃ua Ñande Rogayguándi ha ñañembosakoʼívo rreunionrã. Koʼã mbaʼe katuete ñanepytyvõta ñaikumby porãve hag̃ua Ñandejára Ñeʼẽ. Heta família ojepokuaáva okaru oñondivepa una vés al día jepe oñemongeta Ñandejárare omombaʼeguasu hag̃ua chupe. Iporãitereíta ningo tuvakuéra voi omomýiramo ifamíliape ojapo hag̃ua upéva. Péicha ikatúta ‘omongakuaa ha ohekomboʼe chupekuéra Jehová oipotaháicha’ (Efe. 6:4; Deu. 6:5-7).
3. Mbaʼéichapa ikatu ñamombaʼeguasu Jehovápe ñane ermanokuérandi?
3 Ñane ermanokuérandi. Japredika ha ñaime jave rreunionháme ikatu ñamombaʼeguasu Jehovápe ñane ermanokuérandi (Pro. 15:30; Fili. 4:8; Heb. 13:15). Pór ehémplo, ñañemongetávo hendivekuéra jahechaukavaʼerã jaagradeseha Jehovápe opaite mbaʼére ñane ñeʼãite guive (Sal. 106:1).
4. Mbaʼéichapa ñamombaʼeguasukuaa Jehovápe ndaikatúiramo jepe japredika meme ogahárupi?
4 Ambue tapichándi. Sapyʼánte ndaijái ñandéve japredika meme ogahárupi, upéicharamo jepe ikatu ñaipytyvõ umi ipyʼaporãvape oikuaa hag̃ua Jehová rembipota. Pór ehémplo, ikatu japredika umi ombaʼapóvape ñanendive, ñane kompañéro eskuéla ỹrõ kolehiopegua térã ambue tapichápe (Sal. 27:14; 1 Ped. 3:15). Péicha ojapovaʼekue peteĩ ermána oviahárõ guare aviónpe. Haʼe oaprovecha ha opredika peteĩ ijykereguápe, upe ohendúva chupe ovyaiterei ha omombeʼúma voi chupe moõpa oiko ikatu hag̃uáicha upe rire oñemongeta jey hikuái. Jaikuaaháicha ko múndo henyhẽ provlémagui ha oñesẽ rangue chugui haʼete ku ojehóva huguapeve. Upéicharamo jepe ñande ñamoherakuã oparupiete Ñandejára marandu porã ombovevýiva umi hénte rembiasa asy, ha ohesapeʼa chupekuéra ohechakuaa hag̃ua javyʼaveha ñamombaʼeguasúvo Jehovápe (Isa. 52:7; Rom. 15:11).
5. Mbaʼérepa ñamombaʼeguasu Jehovápe, ha mbaʼépa ikatu jahupyty upévare?
5 Jehová ningo ipyʼarory ñanderechávo ñamombaʼeguasu héra. Umi mbaʼe porãita oĩva ñande jerére ijehegui reínte omombaʼeguasu chupe, ha ñande avei jajapokuaa upéva ñande rogapýpe, kongregasiónpe ha ñamyerakuãvo pe marandu porã opárupi (Sal. 19:1-4).