Tekotevẽterei japredika umi kuimbaʼépe
1. Mbaʼépa oñekotevẽ Ñandejára organisasión okakuaa rupi?
1 Ñandejára organisasión okakuaave ohóvo koʼã ára pahápe, upévare oñekotevẽ kuimbaʼére omoakã hag̃ua (Mar. 4:30-32; Hech. 20:28; 1 Tim. 3:1-13). Péro hetave vése kuñanguéra ojapysaka porãve Ñandejára marandu porãre ha oñepyrũ oservi chupe. Oĩ katu lugár ojehejapaiteha kuña ári ohekomboʼe hag̃ua imembykuérape peteĩ rrelihión. Upéicharõ, mbaʼépa ikatu jajapo hetave kuimbaʼe oservi hag̃ua Jehovápe?
2. Mbaʼépa oiko Pablo ha Pedro opredika haguére umi kuimbaʼépe?
2 Jajeporeka hesekuéra. Sapyʼánte peteĩ kuimbaʼe omoakãva hogapy odesidíramo oservi Ñandejárape umi hogayguakuéra ojapo avei upéicha. Pór ehémplo, Pablo ha Silas oĩ aja kárselpe opredikavaʼekue peteĩ guárdia upepeguápe. Upe rire pe kuimbaʼe ha hogayguakuéra oñepyrũ omombaʼeguasu Ñandejárape (Hech. 16:25-34). Táva Coríntope, Pablo opredika ‘pe sinagóga mburuvichápe’ hérava Crispo. La Biblia heʼi hese ‘ojerovia hague Ñandejára rehe hogayguakuéra ndive’ (Hech. 18:8, BNP). Jehová omomyivaʼekue Pédrope opredika hag̃ua peteĩ soldádo Roma ehersitoyguápe hérava Cornélio. Upe rire ko ‘kuimbaʼe marangatu omombaʼeguasu Ñandejárape’. Cornelio, ihentekuéra ha umi iñamígo tee, ojavautisapaite (Hech. 10:1-48).
3. Ojapo haguéicha Felipe, mbaʼeichagua mburuvichápepa ikatu repredika?
3 Ñaimoʼãʼỹva ningo ikatu oiko japredikáramo umi ‘mburuvichápe’ (1 Tim. 2:1, 2). Peteĩ ánhel heʼivaʼekue Felípepe opredika hag̃ua peteĩ karai ipuésto yvatévape. Ko karai ‘Etiopia viru rerekua’ omoñeʼẽvaʼekue ohóvo “Isaías kuatiañeʼẽ”. Upémarõ Felipe omyesakã chupe pe marandu porã Jesucristo rehegua. Upéi pe mburuvicha ojevautisa ha omyerakuãne pe marandu porã hape pukukuére. Avei opredikáneraʼe Etiopiagua rréinape ha ambue mburuvicha upepeguápe. Upéicha omog̃uahẽ pe marandu porã umi ipuésto yvatévape (Hech. 8:26-39).
4. Mbaʼépa ikatu jajapo pe marandu porã og̃uahẽ hag̃ua hetave kuimbaʼépe?
4 Moõ ha mbaʼéichapa ikatu jajuhu hesekuéra. Arakue ningo kuimbaʼekuéra ombaʼapo meme jepi, upévare iporã ñamohenda ñane tiémpo ha japredika kaʼarukue, fín de semána, arete jave térã umi negosioháre. Kuimbaʼekuéra kongregasionpegua, peẽ ave ikatu pepredika umi ombaʼapóvape penendive. Avei, pesẽ vove pepredika ogahárupi iporãta peporandúramo omoakãvare ogapy, koʼýte ojepredika meméramo upe territóriope.
5. Mbaʼépa ojapovaʼerã peteĩ ermána opredikáramo peteĩ kuimbaʼépe oikuaasevéva Ñandejára Ñeʼẽgui?
5 Peteĩ ermána opredikáramo peteĩ kuimbaʼépe ha upe kuimbaʼe oikuaaseve Ñandejára Ñeʼẽgui, ndohoivaʼerã ovisita chupe haʼeño. Ohovaʼerã iménandi ỹrõ ambue ermáno térã ermánandi. Pe kuimbaʼe oho porãramo hese iporãvéta ojeʼéramo peteĩ kuimbaʼe ikatupyrývape ostudia hag̃ua hendive.
6. Mbaʼépa jajapovaʼerã ‘ñañemoag̃ui hag̃ua opavave rehe’ Apóstol Pablo ojapo haguéicha?
6 Mbaʼéichapa ñaipytyvõkuaa chupekuéra. Apóstol Pablo oñemboja mboyve hapicháre okalkula raẽ vaʼekue mbaʼépa ojapovaʼerã “oñemoag̃ui hag̃ua opavave rehe” (1 Cor. 9:19-23, JMP). Péicha avei ñande jakalkula raẽ vaʼerã mbaʼe rehépa oñeʼẽseve kuimbaʼekuéra ha ñañembosakoʼi porã upearã. Pór ehémplo, pyʼỹinte ñahendu kuimbaʼe jurúpe: “ivai la pórte”, ỹrõ oñeʼẽse jepi goviérnore térã ojepyʼapy hogayguakuérare. Avei oikuaase jepi maʼerãpa jaikove, mbaʼépa oikóta ko yvýgui térã oikuaase mbaʼérepa Ñandejára oheja jahasa asy. Katuete ñanerendusevéta hikuái ñañeʼẽramo koʼã mbaʼére (Pro. 16:23).
7. Mbaʼéichapa opavave ñaiméva kongregasiónpe ikatu ñaipytyvõ umi ména ndahaʼéivape testígo?
7 Ména ndahaʼéiramo testígo. Heta ermána oservi Jehovápe iména ndahaʼéiramo jepe testígo, ha omoĩ ehémplo neporãva iménape heko marangatúvo. Opavave ñaiméva kongregasiónpe ikatu ñaipytyvõ umi kuimbaʼépe (1 Ped. 3:1-4). Mbaʼéichapa jajapokuaa upéva? Oúvo hembirekóndi salónpe torýpe ñamomaitei chupekuéra ha tohecha hikuái javyʼaha hesevekuéra. Péicha jajapóramo ikatu mbeguekatúpe ostudiase la Biblia.
8. Mbaʼépa ikatu ojapo ermanokuéra oipytyvõ hag̃ua umi ména ndahaʼéivape testígo?
8 Heta kuimbaʼépe ndogustaguasúi la Biblia omboʼéva. Péro ojogueraha porãramo peteĩ ermánondi ikatu mbeguekatúpe oñeʼẽ mimi la Bíbliare. Peteĩ kongregasiónpe oĩvaʼekue peteĩ família omombaʼeguasúva Jehovápe ha pe karai katu nahániri. Upémarõ umi ermáno oñepyrũ ovisita mimi upe famíliape ha oñemongeta ambue mbaʼe ogustávare pe karaípe. Mbeguekatúpe oñemongeta hikuái la Bíbliare, ha upeakuére koʼág̃a testígoma. Ambue ermáno katu oipytyvõvaʼekue peteĩ karai ndahaʼéivape testígo omboty hag̃ua ikorapy. Upe karai omombaʼeterei pe ermáno ojapóva hesehápe ha upévare ostudia la Biblia (Gál. 6:10; Fili. 2:4). Ermanokuéra, ikatu piko pejepyʼapyve umi ména ndahaʼéivare testígo?
9. Mbaʼépa ikatu oiko umi kuimbaʼégui ñaipytyvõramo chupekuéra?
9 Ñaipytyvõkena chupekuéra. Ñaipytyvõramo umi kuimbaʼe oikuaasevévape Ñandejárape ikatu oiko chuguikuéra jopói kongregasiónpe g̃uarã. Pór ehémplo, ikatu oservi ansiánoramo oipytyvõ hag̃ua kongregasiónpe (Efe. 4:8; Sal. 68:18). Ha vyʼapópe oñangareko hag̃ua Ñandejára ovechakuérare (1 Ped. 5:2, 3). Aje piko ideprovechoitéta Ñandejára organisasiónpe koʼãichagua kuimbaʼe!
10. Mbaʼéichapa oipytyvõ hetápe Ananías ojapovaʼekue?
10 Ñañeʼẽmi jeýna Saulo rehe. Haʼe heta ohundisevaʼekue umi kristiánope, ha upéicha rupi Ananías okyhyjémi opredika hag̃ua chupe. Péro amo ipahápe omog̃uahẽ Sáulope pe marandu porã Jesucristo omanda haguéicha ha oiko chugui “tetã ambuegua apóstol” (Rom. 11:13, ÑÑB). Upe rire Pablo oipytyvõ hetaitereípe oñemoag̃uive hag̃ua Jehováre, ha koʼag̃aite peve ou porãiterei ñandéve umi kuatiañeʼẽ ohaivaʼekue Ñandejára pytu marangatu rupive (Hech. 9:3-19; 2 Tim. 3:16, 17).
11. Mbaʼérepa jajapovaʼerã ikatúva guive japredika hag̃ua umi kuimbaʼépe?
11 Ñañehaʼãramo jajapo Jehová rembipota ha jajesareko porã imbaʼerepýre Haʼe katuete ñanderovasáta. Upévare japredikákena umi kuimbaʼépe, tove jepe ñakambiavaʼerã heta mbaʼe ñakumpli hag̃ua ko tembiapo iñimportantetéva.