Saʼípa añete ajapo Jehová servísiope?
1. Mbaʼéichapa sapyʼánte ikatu ñañeñandu?
1 Ndépa repensámava saʼi rejapoha Jehová servísiope? Ikatu oime nanemitãvéima, nderasykatu térã nerembiapo hetaiterei rupi ndaikatuvéi rembaʼapo Jehovápe g̃uarã nde rembaʼaposeháicha. Pór ehémplo, peteĩ ermána ombaʼaposevevaʼekue Jehovápe g̃uarã ha oñeñandu vai ndaikatúigui ojapo upéva. Haʼe mbohapy imemby ha oñatendevaʼerã hesekuéra, upéicha rupi saʼi itiémpo ha haʼete ku naikyreʼỹvéiva. Mbaʼépa ikatu jajapo ñañeñandúramo upéicha? Tekotevẽ jajepyʼamongeta ha jahecha añetehápepa ikatuhína jajapove Jehovápe g̃uarã.
2. Mbaʼépa Jehová ohaʼarõ ñandehegui?
2 Mbaʼépa Jehová ohaʼarõ ñandehegui. Enterove ningo katuete ñambaʼaposeve Jehovápe g̃uarã, upéicha ñapensávo jahechauka ndajapytaseiha jajekuʼakohína ótro ombaʼapo aja. Péro ñanemanduʼavaʼerã naentéroi peteĩchaha ha Jehová ndojeruremoʼãiha ñandéve ikatuʼỹva jajapo (Sal. 103:13, 14). Upéicharõ, mbaʼépa Jehová ohaʼarõ ñandehegui? Haʼe oipota jaservi chupe ñande pyʼaite guive (Col. 3:23).
3. Mbaʼéichapa jaikuaáta ikatúpa añete ñambaʼapove Jehovápe g̃uarã?
3 Mbaʼéichapa jaikuaáta ikatúpa añete ñambaʼapove Jehovápe g̃uarã? Iporã jajerure chupe tañanepytyvõ jahechakuaa hag̃ua upéva (Sal. 26:2). Avei peteĩ ñane amígo iñakãguapýva ha oservíva Ñandejárape, ikatu heʼi ñandéve mbaʼépepa ñambaʼapovevaʼerã. Haʼe ñandekuaa porã ha ndojeremoʼãi heʼi hag̃ua ñandéve ñaikotevẽva (Pro. 27:9). Péro ñanemanduʼavaʼerã avei ñane situasión ikatuha okambia ha iporãha jajepyʼamongeta mimi jepi upévare (Efe. 5:10).
4. Mbaʼéichapa jahechavaʼerã umi konsého omeʼẽva ñandéve Jehová?
4 Mbaʼéichapa jahechavaʼerã umi konsého. Oiko jave peteĩ karréra umi púvliko katuete oipota peteĩva ogana ha oñepyrũ osapukái chupe. Péro ndojapói upéva otaky hag̃ua upe ohaʼãvare, síno oipotágui ikyreʼỹve ha ogana. Upéicha avei ñane rreunionkuéra ha umi puvlikasión, akóinte ñanemboʼe ha ñanemomanduʼa tekotevẽtereiha ‘ñamombeʼu Ñandejára marandu’. Péro upéva ndeʼiséi umi konsého jahechavaʼerãha ku ojetaky memerõguáicha ñanderehe, síno Jehová omeʼẽ ñandéve ñanemokyreʼỹ hag̃ua (2 Tim. 4:2, JMP). Upéicharõ, jajapókena opa ikatúva iservísiope, haʼe ningo ndahesaraimoʼãi ñane ‘rembiapógui ha jahayhuha’ chupe (Heb. 6:10, JMP).