Ñaipytyvõve hag̃ua ñane famíliape

1. Mbaʼéichapa pe sábado oipytyvõ umi isrraelítape?

¹ Mbaʼérepa Jehová heʼivaʼekue umi isrraelítape ani hag̃ua ombaʼapo sabadokue? Omeʼẽ chupekuéra upe léi ikatu hag̃uáicha opytuʼu ha ojepyʼamongeta mbaʼéichapa oĩhína hikuái Jehová renondépe, ha ohechakuaa hag̃ua Haʼe ipyʼaporãha hendivekuéra. Upérõ umi sy ha túva ohekomboʼevaʼekue avei ifamíliape Ñandejára léi, ikatu hag̃uáicha opoko ikorasõre (Deu. 6:6, 7). Péicha peteĩ día káda semána umi isrraelíta oiporupaite itiémpo oñemoag̃uive hag̃ua Jehováre.

2. Mbaʼépa ñanemboʼe pe léi Jehová omeʼẽvaʼekue umi isrraelítape?

² Jaikuaaháicha koʼág̃a rupi Jehová ndeʼivéima ñandéve ñamboarete hag̃ua sabadokue. Upéicharamo jepe upe léi ñanemboʼe Ñandejára ymaite guive oipotaitereiha hembiguaikuéra oñemoag̃ui hese (Isa. 48:17, 18). Upévare koʼág̃a rupi oipota jajapo katuete pe Aty Jastudia Hag̃ua Ñande Rogayguándi.

3. Mbaʼérepa ojejapovaʼerã pe Aty Jastudia Hag̃ua Ñande Rogayguándi?

³ Mbaʼérepa ojejapovaʼerã pe Aty Jastudia Hag̃ua Ñande Rogayguándi? Enero 2009 guive ojejapo oñondivepa peteĩ árapente Ñandejára Ñeʼẽ Ñehesaʼỹijo, Eskuéla Jaiporukuaa Hag̃ua la Biblia ha Aty Ñanemboʼéva Japredika Hag̃ua. Mbaʼérepa ojejapo upéicha? Heta mbaʼére, umíva apytépe familiakuéra oñembyaty hag̃ua peteĩ pyhare káda semána ha omombaʼeguasu Jehovápe oñondivepa. Péicha haʼekuéra omombaretevéta ohóvo ijerovia. Upévare oñemokyreʼỹ opa ikatúvape ostudia hag̃ua hogayguándi ojejapo hague árape Ñandejára Ñeʼẽ Ñehesaʼỹijo. Ha upéicha oipyguara hag̃ua mbeguekatúpe porã la Biblia ha ambue mbaʼe oipytyvõtava chupekuéra.

4. Jajapovaʼerãpa una órapente pe estúdio? Emyesakã mbaʼérepa rembohovái upéicha.

⁴ Yma ningo jaiporuvaʼekue heta tiémpo jajeprepara ha jaha hag̃ua pe aty Ñandejára Ñeʼẽ Ñehesaʼỹijópe. Ha ojejapóramo jepe una órante ko rreunión, hetágui haimete oipeʼapa itiémpo upe pyharépe. Oñekambiáma rupi pe rreunión día, koʼág̃a ikatu jaaprovecha upe tiémpo ñamombaʼeguasu hag̃ua Ñandejárape ñande rogayguándi. Ha ndahaʼéi katuete una órapente jajapopavaʼerã, upéva rangue tekotevẽ jahecha mbaʼépa oikotevẽ ñane família ha upe rire jadesidi mboy tiémpopa ipukúta.

5. Tekotevẽ piko jastudia oñondivepa opa peve pe aty? Emyesakã.

⁵ Tekotevẽpa jastudia oñondivepa opa peve ñande aty? Opaichagua família, tahaʼe orekóva mitã térã nahániri, oñomokyreʼỹ ha ojoayhuvéta ohesaʼỹijóramo oñondivepa Ñandejára Ñeʼẽ (Rom. 1:12). Upéicha rupi iñimportanteterei familiakuéra ostudia umi mbaʼe oĩva la Bíbliape ojapóvo pe Aty Jastudia Hag̃ua Ñande Rogayguándi. Péro ikatu avei ojestudia rire oñondivepa káda uno osegi ostudia haʼeñoháme, tahaʼe ojepreparapa hag̃ua rreunionrã térã olee peteĩ rrevísta. Upévare oĩ heta família odesidíva nomyandýi téle upe pyharépe.

6. Mbaʼéichapa ikatu jajapo pe Aty Jastudia Hag̃ua Ñande Rogayguándi?

⁶ Mbaʼéichapa ikatu jajapo? Natekotevẽi katuete peteĩva oporandu ha umi ótro ombohovái. Oĩ família ostudiáva ojejapoháicha jepi pe rreunión éntre semanagua, ikatu hag̃uáicha igustove. Upearã oiporavo heta mbaʼe ostudia hag̃ua ha ndojapói peteĩchapa káda párte. Pór ehémplo olee la Biblia oñondivepa, upéi ojeprepara rreunionrã ha oñensaja predikasionrã. Páhina 6-pe ohechaukavehína mbaʼéichapa ikatu ojejapo.

7. Mbaʼépa ikatu ojapo tuvakuéra igustove hag̃ua pe estúdio?

⁷ Mbaʼépa ikatu ojapo tuvakuéra igustove hag̃ua pe estúdio? Pene familiakuéra hetave mbaʼe oaprendéta oĩramo mborayhu ha pyʼaguapy pe estúdio aja. Tiémpo porã jave ikatu voi pesẽ pestudia okápe ha pepytuʼu mimi jepi tekotevẽ jave. Oĩ avei opreparáva hiʼupy hoʼu hag̃ua hikuái opa rire pe estúdio. Sapyʼánte tuvakuéra heʼise mbaʼépepa tekotevẽ ombaʼapove ifamília, péro noiporãmoʼãi ojaʼo térã okorrehíramo chupe pe estúdio aja. Ha oiméramo ofalla vai raʼe ifamília, iporãta oñemongeta hendive haʼeñoháme. Upéicharõ nomotĩmoʼãi chupe iñermanokuéra rovake. Pe Aty Jastudia Hag̃ua Ñande Rogayguándi natekotevẽi iserioiterei ni ikaigue, síno ojejapovaʼerã ojevyʼa hag̃ua, ñamombaʼeguasu rupi Ñandejára ovyʼávape (1 Tim. 1:11).

8, 9. Mbaʼéichapa ikatu ojeprepara pe omoakãva?

⁸ Mbaʼépa ikatu ojapo pe omoakãva ogapy? Enterovépe ideprovechovéta pe omoakãva ojepreparáramo voimi reheve oikuaa porã hag̃ua mbaʼépa oñehesaʼỹijóta pe estúdio aja (Pro. 21:5). Iporãta pe ména oporandúramo hembirekópe mbaʼépa ikatu ohesaʼỹijo hikuái (Pro. 15:22). Oporandukuaa avei ifamíliape mbaʼépa ostudiase. Upéicha ojapóramo tuvakuéra oikuaa porãvéta mbaʼépa oikuaaseve térã oipyʼapy ifamíliape.

⁹ Pe omoakãva natekotevẽi oiporu hetaiterei tiémpo ojeprepara hag̃ua. Ifamília ostudiaséramo peteĩ puvlikasión káda semána, ndaifaltamoʼãi okambia jepi pe prográma. Avei ikatúma ojeprepara ótra semanarã opa rire pe estúdio, upéicha imanduʼa porãvéta mbaʼépepa ifamília tekotevẽ ombaʼapove. Oĩ avei oanotáva mbykymi mbaʼe mbaʼépa ojestudiáta pe ótra semána, ha omoĩ eladérare térã peteĩ lugár opavave ohecha hag̃uáme. Upéicha orekóta hikuái iñakãme umi mbaʼe ojestudiátava ha ikatútama ojeprepara tekotevẽramo.

10. Mbaʼépa ikatu ojapo umi oĩva haʼeño ojaporangue pe Aty Jastudia Hag̃ua Ñande Rogayguándi?

¹⁰ Mbaʼépa ikatu ojapo umi oĩva haʼeño? Ojaporangue pe Aty Jastudia Hag̃ua Ñande Rogayguándi ikatu oiporu upe tiémpo ostudia hag̃ua haʼeñoháme. Ha ojapo porã hag̃ua upéva ikatu olee Ñandejára Ñeʼẽ, ojeprepara rreunionrã, olee Ñemañaha ha ¡Despertad! Oĩ avei ohekavéva informasión ontende porãve hag̃ua umi mbaʼe hypyʼũvéva oĩva la Bíbliape. Ha sapyʼánte oinvita ambue maranduhárape térã peteĩ famíliape ostudia hag̃ua hendive la Biblia ha péicha oñomokyreʼỹ.

11, 12. Emombeʼu mbaʼe mbaʼépa jahupytýta akóinte jajapóramo pe Aty Jastudia Hag̃ua Ñande Rogayguándi.

¹¹ Mbaʼe mbaʼépa jahupytýta akóinte jajapóramo pe Aty Jastudia Hag̃ua Ñande Rogayguándi? Ñamombaʼeguasúramo Jehovápe ñande pyʼaite guive ñanemoag̃uivéta hese ha avei ñane família ojoayhuvéta. Peteĩ omendáva heʼivaʼekue voi: “Ore ningo prekursór, ha ndoroguerekói mitã. Upéicha rupi roipotaiterei jepi og̃uahẽ pe día rojapoha pe Aty Jastudia Hag̃ua Ñande Rogayguándi. Rohechakuaa orepytyvõha rojoayhu ha roñemoag̃uive hag̃ua ore Ru yvagapeguáre. Ore estúdio árape ropáyvo roʼe ojupe: ‘Nemanduʼápa mbaʼe jajapovaʼerã koestedia? Jastudiáta oñondive ko pyharépe!’”.

¹² Tuicha oipytyvõta avei umi família hembiapo hetávape orekóramo peteĩ día ojapo hag̃ua pe Aty Jastudia Hag̃ua Ñande Rogayguándi. Peteĩ prekursóra rregulár omongakuaáva haʼeño mokõi mitã omombeʼu: “Yma ndorostudiaguasúi oñondive chekaneʼõitereígui térã nachetiémpoi rupi. Upévare aagradese peẽme pemokyreʼỹ haguére enterovépe akóinte ojapo hag̃ua pe Aty Jastudia Hag̃ua Ñande Rogayguándi. Koʼág̃a roguerekóma peteĩ día rostudia hag̃ua oñondive ha rohechakuaa upéva tuicha orepytyvõha”.

13. Mbaʼépa jajapovaʼerã ñanepytyvõ hag̃ua pe Aty Jastudia Hag̃ua Ñande Rogayguándi?

¹³ Yma ningo pe sábado haʼevaʼekue peteĩ jopói iporãitereíva umi isrraelítape g̃uarã, péicha avei koʼág̃a ñandéve g̃uarã pe Aty Jastudia Hag̃ua Ñande Rogayguándi (Sant. 1:17). Yma umi isrraelíta oiporu porãva pe sábado oñemoag̃uive Jehováre. Upéicha avei tuicha ñanepytyvõta koʼág̃a jaiporu porãramo pe tiémpo oñemeʼẽva ñandéve jajapo hag̃ua pe Aty Jastudia Hag̃ua Ñande Rogayguándi (2 Cor. 9:6; Gál. 6:7, 8; Col. 3:23, 24). Ha peẽ pejapóramo upéicha pene família ndive ikatúta peje pe salmísta heʼi haguéicha: ‘Chéve g̃uarã iporã añemoag̃ui Ñandejárare. Jehová haʼehína upe chemoʼãva’ (Sal. 73:28).

[Nóta oĩva taʼanga ndive páhina 5]

Pe Aty Jastudia Hag̃ua Ñande Rogayguándi natekotevẽi iserioiterei ni ikaigue, síno ojejapovaʼerã ojevyʼa hag̃ua, ñamombaʼeguasu rupi Ñandejára ovyʼávape

[Nóta oĩva taʼanga ndive páhina 6]

JAIPORU MEME HAG̃UA

Mbaʼéichapa ikatu jastudia ñande rogayguándi

Biblia:

• Jaleee michĩmi la Biblia pe semánape g̃uarã. Ha opyta porãramo ikatu jalee ojejapoháicha pe audiodráma: peteĩva omombeʼu pe istória ha umi ótro katu olee haʼeramoguáicha umi personáhe.

• Ñarrepresenta umi personáhe ojejaporamoguáicha peteĩ dráma.

• Jalee rire ñaneañoháme umi kapítulo ñahesaʼỹijótava, káda uno jahai peteĩ térã mokõi mbaʼe jaikuaasevéva ha upéi ñañembyaty jahecha hag̃ua mbaʼéichapa ñambohováita umi porandu.

• Káda semána jahai peteĩ téysto vívliko kuatiáre, ñañehaʼã jaikuaa de memória ha upéi ñamyesakã. Ñambyaty umi kuatia ha jahecha jey káda semána jaikuaa hag̃ua mboýrepa ñanemanduʼa.

• Ñahendu pe gravasión de la Biblia ha jasegi ñande Bíbliape.

Rreunión:

• Jajepreparaʼimi oñondive rreunionrã.

• Ñañensaja umi kántiko ojepurahéitava.

• Oĩramo ojapótava diskúrso Eskuéla Jaiporukuaa Hag̃ua la Bíbliape térã orekótava peteĩ demostrasión, ikatu jaʼe chupe mbaʼéichapa ojapokuaa térã toñensaja ñane renondépe.

Ñane família oikotevẽva:

• Ikatu jaiporu umi informasión oĩva koʼã lívrope: Ñaaprende Mboʼehára Guasúgui térã Los jóvenes preguntan.

• Ñañensaja mbaʼépa ikatu ojapo umi mitã oñepresentáramo chupekuéra peteĩ situasión ijetuʼúva eskuélape.

• Mitãnguéra ikatu oiko guaʼu túvaramo ha tuvakuéra taʼýraramo. Umi mitã ohekavaʼerã informasión ha upéi omyesakã itúvape.

Predikasión:

• Ñañensaja mbaʼéichapa ñaikuaveʼẽta umi puvlikasión fín de semanakue.

• Jahecha ñande rogayguakuérandi mbaʼépa ikatu jajapo ñasẽve hag̃ua japredika Conmemoración tiémpope térã vakasión aja.

• Káda uno jahechakuaa sapyʼami mbaʼéichapa ñambohováita umi mbaʼe ikatúva oñeporandu predikasiónpe, ha upéi ñañensaja oñondivepa.

Ikatúva avei jajapo:

• Jalee oñondive peteĩ artíkulo osẽva umi rrevísta ipyahuvévape.

• Káda uno jaleekuaa peteĩ artíkulo pyahu ñandegustavéva, ha upéi ñamombeʼu mbaʼépa ñaaprendéraʼe.

• Ñainvita sapyʼapyʼa peteĩ maranduhára térã ambue famíliape ostudia hag̃ua ñanendive, ha ikatu voi ñaporandu chupekuéra mbaʼéichapa oñepyrũvaʼekue oservi Jehovápe ha umícha.

• Ikatu jahecha ha ñahesaʼỹijo umi vidéo pyahu.

• Ñahesaʼỹijo oñondive umi artíkulo “Los jóvenes preguntan” térã “Actividades para la familia” osẽva rrevísta ¡Despertad!-pe.

• Ñahesaʼỹijo oñondive umi artíkulo “Tuvakuéra omboʼe hag̃ua ifamíliape” térã “Imitãvape g̃uarã” osẽva rrevísta Ñemañaháme.

• Jalee ha ñahesaʼỹijo pe Anuario térã peteĩ puvlikasión pyahu oñepresentavaʼekue Aty Guasuhápe.

• Opa rire peteĩ Aty Guasu ñanemanduʼa jey umi mbaʼe iñimportantevéva ñahenduvaʼekuére.

• Ñasẽ ñamaña oñondive umi mbaʼe Jehová ojapovaʼekuére tahaʼe umi plánta, mymba térã mbyjakuéra. Upéi jaʼe mbaʼépa ñanemboʼe umíva ñande Apoharégui.

• Jajapo oñondivepa peteĩ mápa, jadivuha, jajapo peteĩ árka raʼanga kartóngui térã ambue mbaʼe.