Ñandepiroʼýta tres día aja
1. Mbaʼépepa ñanepytyvõta pe aty guasu ko añopegua?
1 Ko múndo aña oĩva Satanás poguýpe ningo ohasa asyeterei oñemomombyry rupi Ñandejáragui, péro ñande ndaupeichaiete, Jehová voi omeʼẽ rupi ñandéve heta mbaʼe ñanembopiroʼýva (Isa. 58:11). Umíva apytépe oĩ pe aty guasu tres diagua ojejapóva káda áño. Upévare, oñemoag̃uívo upe aty ko añopegua jajepreparavaʼerã ñañomokyreʼỹ ha ñañatende hag̃ua umi mbaʼe ñanemoñeñandu porãtavare. Mbaʼéichapa ikatu jajapo upéva? (Pro. 21:5.)
2. Mbaʼe mbaʼépa jajapomavaʼerã jaha hag̃ua ág̃a ñande aty guasuhápe?
2 Iporãta ningo koʼág̃ama voi reñepyrũrõ repensa mbaʼéichapa remohendáta ne tiémpo ha nde traváho reime hag̃ua umi tres día. Rekalkulámapa mboy tiémpopa reikotevẽ káda día reg̃uahẽ hag̃ua órape ha reiporavóma hag̃ua moõpa reguapýta oñepyrũ mboyve pe prográma? Reikuaáma piko moõpa repytáta reke térã mbaʼéichapa rehóta? Ajépa iporãitéta enterove jajepreparáramo jaaprovecha hag̃ua umi hiʼupy hiʼoraitépe Jehová opreparáva ñandéve g̃uarã! (Isa. 65:13, 14.)
3. Mbaʼépa jajapovaʼerã ideprovécho hag̃ua ñandéve ha ñane famíliape umi mbaʼe ojeʼétava pe aty guasuhápe?
3 Mbaʼépa rejapovaʼerã reñatende porã hag̃ua pe prográma aja? Ikatu voimi reñeno repytuʼu porã hag̃ua, upéi reime vove upépe emaña pe omeʼẽvare diskúrso, eheka nde Bíbliape umi téysto ha eanota mimi umi mbaʼe ojeʼéva. Ha oiméramo ne família, iporãta remboguapýramo chupekuéra nendive, ikatu hag̃uáicha oñatende porã (Pro. 29:15). Avei upe pyharépe ikatu peñemongeta oñondivepa umi párte pendegustavévare. Ha ikatu hag̃uáicha penemanduʼa porãve umi mbaʼe oñehesaʼỹijovaʼekuére, ikatu peiporu pe Aty Jastudia Hag̃ua Ñande Rogayguándi pestudia hag̃ua umi mbaʼe penepytyvõtava.
4. Mbaʼéichapa ikatu ñaipytyvõ ñane ermanokuérape?
4 Mbaʼéichapa ikatu ñaporopytyvõ. Ñande ningo jaipota avei ñande rapichakuéra oho pe aty guasuhápe. Upévare iporã ñañeporandu, ikatúnepa aipytyvõ umi ermáno ijedávape térã umi ohasávape peteĩ situasión ijetuʼúva? (1 Juan 3:17, 18.) Koʼýte umi ansiáno ha superintendénte de grúpo ohechavaʼerã mbaʼéichapa oñepytyvõta koʼãichagua ermánope.
5. Mbaʼéichapa ñainvitáta ñande rapichakuérape? (Ehecha avei pe rrekuádro.)
5 Jajapo haguéicha umi áño ohasavaʼekuépe, tres semána oiko mboyve pe aty guasu ñainvitáta umi héntepe ñanemoirũ hag̃ua. Káda kongregasión oñehaʼãvaʼerã omeʼẽmbaite iterritório tuichakuére umi invitasión ojeguerahaukáva chupekuéra. Ha umi invitasión oñemeʼẽvaʼekue peẽme hembýramo, peguerahavaʼerã pe aty guasuhápe ikatu hag̃uáicha pemeʼẽ umi héntepe peikokuévo pe táva ojejapohápe pe aty guasu. Viernes oñemombeʼúta mbaʼéichapa ojejapóta upéva. Pehechakuaáramo ndaikatumoʼãiha pemeʼẽmba pene invitasión, ikatu pegueraha pe akomodadór oĩvape peikévo pe aty guasuhápe. Péro peñongatúkena peteĩ jepe peiporu hag̃ua ág̃a domingo oñeñeʼẽta vove hese.
6. Mbaʼéichapa ikatu jahechauka japororrespetaha pe aty guasu aja?
6 Japororrespetákena. Ko ára pahápe heta oĩ opensáva ijehénte ha ndojepyʼapýiva voi hapicháre. Péro ajépa javyʼaite ñande ñaime haguére ñane ermanokuéra opororrespetáva apytépe! (2 Tim. 3:2.) Mbaʼéichapa ikatu káda uno jahechauka jarrespetaha ñande rapichakuérape? Pór ehémplo, pyhareve las ocho ojeavrívo pe lokál oikotahápe pe aty ndovaléi jajapura ha ñañomyañamba jaike hag̃ua. Avei ñañongatuvaʼerã asiénto ñande rogaygua, ñane estudiánte ha umi ohóvape g̃uarãnte ñanendive ñane mbaʼyrúpe, ñaneñeʼẽrenduvaʼerã pe omoakãvape ñande aty ojerure vove jaguapy hag̃ua ñahendu musikapu, ha avei ñamoĩvaʼerã ñande selulár kirirĩháme térã ñamboguete voi ani hag̃ua oporomolesta. Ndovaléi avei ñañemongeta, ñamondo mensáhe, jakaru térã jaguata pasíllore pe prográma aja.
7. Mbaʼéichapa ikatu ñañomokyreʼỹ ermanokuérandi?
7 Ñañomokyreʼỹkena. Umi aty guasuhápe ikatu ñañomokyreʼỹ ha jahechakuaa ñaimembaha ñane ermanokuéra ndive peteĩ ñeʼẽme (Sal. 133:1-3). Upévare iporãta reñehaʼãramo reikuaa hetave ermáno ha ermána ambue kongregasionguápe, ha péicha ne amígo hetave (2 Cor. 6:13). Ikatu voi reñemongeta peteĩ ermáno térã peteĩ família ndive káda día ojepytuʼu aja asajekue. Upearã ikatu regueraha tembiʼu ivevyimívante heʼu hag̃ua pe lokálpe, rehorangue rejogua okápe térã rekaru peteĩ várpe. Upéicha rejapóramo retopáta ne amígo pyahurã ikatúva oĩ nendive opa ára g̃uarã.
8. Mbaʼérepa iporã ñambaʼapo ñande aty guasuhápe, ha mbaʼépepa ikatu ñaipytyvõ?
8 Ñanembovyʼaiterei ningo ñambaʼapóramo Jehovápe g̃uarã ñane ermanokuérandi. Upévare, ikatu reñekuaveʼẽ rembaʼapo hag̃ua oñekotevẽhápe ñande aty guasuhápe, térã reipytyvõ ne kongregasiónpe pemopotĩ hag̃ua pe párte oñenkargavaʼekue peẽme (Sal. 110:3). Ha oiméramo ndereguerekóiti rejapovaʼerã, ikatu reho reñeʼẽ Departamento de Servicio Voluntáriope rembaʼapo hag̃ua. Jaikuaa ningo ñañopytyvõmbáramo umi traváho ivevuiveha ha javyʼave jajapóvo.
9. Mbaʼérepa tekotevẽ ñanderekoporã ha ñañemonde hekoitépe?
9 Ñanderekoporãramo umi hénte ñanemoirũséta. Ñande ningo ñanderekoporãvaʼerã umi tres día aja ndahaʼéi ñaime javénte ñande aty guasuhápe. Upéva heʼise umi hénte oĩva pe táva ojejapohápe pe aty ohechakuaavaʼerãha ñanediferenteha (1 Ped. 2:12). Avei ikatu ñamombaʼeguasu Jehovápe ñañemonde lájare, tahaʼe ñaime jave ñande aty guasuhápe, japytahápe jake térã ñasẽ jave jajepasea (1 Tim. 2:9, 10). Jagueraháramo ñandejehe ñande solápa, umi hénte ohechakuaáta ñande testígo de Jehovaha, ha péicha ikatúta japredika ha ñañeʼẽ chupekuéra ñande aty guasúre.
10. a) Mbaʼéichapa jajeportavaʼerã mamo ñaimehápe? b) Mbaʼépa ojejapovaʼerã peteĩ ermáno ojeruréramo opyta hag̃ua oke pe aty guasu ojejapoha ypy rupi?
10 Mbaʼéichapa jajeportavaʼerã jaháramo rrestauránpe térã japytáramo jake peteĩ otélpe ỹrõ ermáno rógape? Ojehechavaʼerã ñandeagradesidoha, ñanepasiénsia ha ñanembaʼerechakuaaha (Col. 4:6). Ha mbaʼépa ojejapovaʼerã peteĩ ermáno ojeruréramo opyta hag̃ua oke pe aty guasu ojejapoha ypy rupi? Pe comité de servicio kongregasionpegua ohechavaʼerã ikatúnepa oñepytyvõ pe maranduhárape, oñemeʼẽ mboyve chupe pe formulário Solicitud de alojamiento para los que tienen necesidades especiales. Avei sekretário omondo mboyve pe solicitud Departamento de Alojamiento de la Asambléape, umi ermáno comitepegua ohechavaʼerã mbaʼépa heʼi pe formulário ha pe kárta oñemondovaʼekue chupekuéra 14 de diciembre 2010.
11. Emombeʼu umi ehémplo ohechaukáva ñanderekoporãramo ñamombaʼeguasuha Jehovápe.
11 Mbaʼépa opensa jepi ñanderehe umi hénte ndahaʼéiva testígo ohechávo ñanderekoporãha? Pór ehémplo, peteĩ diário omombeʼu mbaʼépa heʼi pe herénte oalkilavaʼekue peteĩ lokál ojejapo hag̃ua pe aty guasu: “Umi testígo ningo irrespetuosoiterei. Ha rovyʼaiterei voi káda áño roalkila haguére chupekuéra pe lokál”. Pe áño ohasavaʼekuépe peteĩ kuimbaʼégui hoʼa ivilletéra pe otél opytahápe jepi ñane ermanokuéra. Ha pe herénte omeʼẽvo pe villetéra ijárape, heʼi chupe: “Haʼetépe umi testígo de Jehová ojapo ag̃ui koʼágui pe aty guasu, ha hetaiterei opyta ko otélpe. Upéicha rupieténte oñemeʼẽ jey ndéve nde villetéra”.
12. Mbaʼépa jajapovaʼerã koʼág̃a og̃uahẽmbaite rupi pe aty guasu tres diagua, ha mbaʼérepa?
12 Umi aty guasu tres diagua ojejapótava ko áñope ningo og̃uahẽmbaitéma hína. Ha heta oñembaʼapo hese ikatu hag̃uáicha igústo ha oporomokyreʼỹ. Upévare eñehaʼãkena eho umi tres día ha ejapysaka porã Jehová ha iñorganisasión opreparávare ndéve g̃uarã. Eñehaʼãkena avei epororrespeta, nderekoporã ha eikuaa hetave ermánope ñande aty guasu aja. Péicha ikatúta ere heʼi haguéicha peteĩ ermána pe áño ohasavaʼekuépe: “Ndavyʼáiva gueteri peichaite peve!”.
[Nóta oĩva taʼanga ndive páhina 4]
Jajapo haguéicha umi áño ohasavaʼekuépe, tres semána oiko mboyve pe aty guasu ñainvitáta umi héntepe ñanemoirũ hag̃ua
[Nóta oĩva taʼanga ndive páhina 5]
Mbaʼéichapa ñainvitáta ñande rapichakuérape?
Ikatu hag̃uáicha jarreparti umi invitasión ñande território tuichakuére ñañeʼẽ mbykymintevaʼerã. Ikatu jaʼe: “Mbaʼéichapa. Ko múndo tuichakuére ningo ojerrepartihína ko invitasión ha ahejase avei ndéve peteĩ nembaʼerã. Ipype retopavéta informasión”. Pe invitasión apére oĩ heta mbaʼe ogustátava ñande rapichakuérape, upévare ñambohasakuévo ñamoĩvaʼerã ikatu hag̃uáicha ohecha. Kyreʼỹmekena jaha ñainvita ñande rapichakuérape. Ha ñasẽvo predikasiónpe fín de semanakue ikatu ñaikuaveʼẽ avei umi rrevísta oiméramo jahechakuaa tekotevẽha.
[Nóta oĩva taʼanga ndive páhina 6]
Ikatu ñamombaʼeguasu Jehovápe ñañemonde lájare, tahaʼe ñaime jave ñande aty guasuhápe, japytahápe jake térã ñasẽ jave jajepasea
[Nóta oĩva taʼanga ndive páhina 7]
Eñehaʼãkena avei epororrespeta, nderekoporã ha eikuaa hetave ermánope ñande aty guasu aja
[Nóta oĩva taʼanga ndive páhina 4]
Marandukuéra Aty Guasu 2011 rehegua
◼ Mbaʼe órapa oñepyrũta. Pe portón ojeavríta las 8:00, ha las 9:20 oñepyrũta ñande aty guasu káda pyhareve. Ñahendu vove pe musikapu, enterove jaguapymavaʼerã oñepyrũ hag̃ua hekoitépe pe prográma. Viernes ha sábado ñande aty guasu opáta kaʼaru 4:55, ha domingo opáta las 3:40.
◼ Moõpa jahejakuaa ñane mbaʼyru. Peteĩ ermáno ohechaukáta moõpa ikatu ñamohenda ñane mbaʼyru. Sapyʼánte ndatuichái pe estasionamiénto, upévare ñañemongetakuaa ñane ermanokuérandi jaha hag̃ua ikatúva guive peteĩ áutopente. Aníkena jaheja ñane mbaʼyru óga ahéno renondépe térã upérupi reínte.
◼ Jaguapy hag̃ua. Ñañongatukuaa lugár ñande rogayguakuérape, umi ohóvape ñanendive ñane mbaʼyrúpe térã ñane estudiántepe g̃uarãnte (1 Cor. 13:5).
◼ Hiʼupyrã. Jaguerahákena ñane rembiʼurã, ani ág̃a ñasẽ jajogua. Upéicha jajapóramo ndaiporimoʼãi ombaʼevendéva ñande aty guasu jerére. Ikatu jagueraha ñane rembiʼurã peteĩ mbaʼyrúpe ñamoĩ hag̃uáicha ñane asiénto guýpe. Jaguerahákena peteĩ mbaʼyru michĩvante ha ñanemanduʼa avei ndovaleiha jagueraha mbaʼeveichagua mbaʼyru de vídrio.
◼ Kontrivusión. Ikatu jahechauka ñamombaʼeha ñande aty guasu ñamoĩvo ñane kontrivusión pe káha heʼihápe “Obra mundial”, oĩva ñande aty guasu oikohápe.
◼ Oĩramo hasýva térã oñeñandu vaíva. Oĩramo peteĩ hasyetéva asambleahápe oñehenoivaʼerã peteĩ akomodadórpe ha haʼe oavisáta pyaʼe porã Primeros Auxilios-pe. Haʼekuéra oñatendéta upe hasývare ha tekotevẽramo ohenóita peteĩ ambulánsia. Upéicharõ natekotevẽmoʼãi enterove ñahenoijoa emerhénsiape.
◼ Pohã. Oiméramo reguereko pohã reʼuvaʼerã, aníkena nderesarái regueraha hag̃ua ñande aty guasuhápe ndaiporimoʼãi rupi.
◼ Ñande pyrehegua. Jaguerahavaʼerã ñande pyrehegua jaguata porã hag̃uáicha heseve oimehápe ha ani umi ikatuvaʼerãichagua ñandereity ha jajegolpea.
◼ Umi nohenduporãivape g̃uarã. Ikatúta oñehedu avei pe prográma rrádio rupive (FM). Ha umi nohenduporãiva oguerahavaʼerã peteĩ rrádio ha audífono.
◼ Karríto mitãme g̃uarã ha sílla. Ndojeguerahaivaʼerã aty guasuhápe sílla ha karríto mitãme g̃uarã. Péro ikatu ojegueraha pe mitã oguapyha oñemoĩva sílla ári.
◼ Formulário Sírvase visitar (S-43). Iporãta jagueraha peteĩ térã mokõi formulário Sírvase visitar ñamyenyhẽ hag̃ua oĩramo ñanerendu porãva japredika jave upe jaikohárupi. Upéi ñameʼẽvaʼerã Departamento de Publicaciones-pe térã sekretário ñane kongregasionguápe jaha rire ñande aty guasuhágui (ehecha Ñane Marandu Porã noviembre 2009, páhina 4).
◼ Akomodadór. Oñemokyreʼỹ umi ermáno ikatupyrývape, koʼýte umi ansiáno ha siérvo ministeriálpe, ombaʼapo hag̃ua ko departaméntope ha oipytyvõ hag̃ua ermanokuérape. Upéva ningo Jehová omombaʼetereíta.
◼ Ipotĩ hag̃ua ñande lokál. Ikatuhína javyʼave ñande aty guasuhápe ñaipytyvõramo osẽ porãmba hag̃ua opa mbaʼe (Hech. 20:35). Umi ermáno ha ermána ombaʼaposéva ohovaʼerã Departamento de Servicio Voluntáriope. Umi ndoguerekóiva gueteri 16 áño ikatu avei oipytyvõ ohóramo hendive itúva, isy, térã peteĩ enkargádo.
◼ Ñag̃uahẽkena órape. Jahupytýta heta mbaʼe porã ñañehaʼãramo ñag̃uahẽ órape ñande aty guasuhápe. Ikatúta ñañemongeta ermanokuérandi, ñahendu pe musikapu, japurahéi pe kántiko, ñahendu pe ñemboʼe ha pe ermáno omoakãva ñanemomaiteívo. Avei nañamolestamoʼãi ñane ermanokuérape ha jahechaukáta ñamombaʼe ha jarrespetaha Ñandejára Jehovápe (1 Cor. 14:40).