‘Pehesapevaʼerã opavave renondépe’

1. Mbaʼe rresponsavilidápa jaguereko?

¹ Pyharevete guive kaʼaruete peve pe kuarahy omombaʼeguasu Jehovápe. Péro Jesús ndeʼirivaʼekue hemimboʼekuérape ohesapevaʼerãha pe kuarahýicha, síno omyesakãvaʼerãha hapichakuérape Ñandejára rembipota (Juan 8:12). Upéva ningo tuicha rresponsavilida avei ñandéve g̃uarã koʼág̃a rupi. Upévare Jesús heʼivaʼekue voi: ‘Peẽ pehesapevaʼerã opavave renondépe’, upéva heʼise ñaipytyvõvaʼerãha ñande rapichakuérape oikuaa hag̃ua Ñandejárape (Mat. 5:16, NM). Ha koʼág̃a tekotevẽtereivéntema jajapo upe tembiapo, ko múndo oĩgui pytũmbýpe. Mbaʼéichapa ikatu jahesape Cristo ojapo haguéicha?

2. Mbaʼéichapa Jesús ohechauka iñimportanteha ojehesape Ñandejára rembipota?

² Japredikávo. Jesús oiporuvaʼekue itiémpo, imbaretekue ha opa mbaʼe oguerekóva ohesape hag̃ua Ñandejára rembipota umi héntepe toĩ oĩháme hikuái, tahaʼe hógape, plásape, montáñape ha otopahápe hesekuéra. Haʼe oikuaa porã mbaʼeichaitépa pe marandu oipytyvõta umi héntepe (Juan 12:46). Oipotágui oñepytyvõ hetavépe, ombokatupyry hemimboʼekuérape ‘oporohesape hag̃ua ko yvy ape ári’ (Mat. 5:14). Ha ojapo porãiterei hikuái hembiapo, upéicha rupi hetaitereípe oipytyvõ ha omboʼe Ñandejára rembipota.

3. Mbaʼéichapa ikatu jahechauka jajapo porãha ñane rembiapo?

³ Koʼág̃a rupi, ñande Jehová siervokuéra jajapo porã avei ñane rembiapo ku japorohesaperamoguáicha; upévare japredika jatopahápe héntere (Efe. 5:8). Sapyʼánte ñañepyrũ hag̃ua ñañemongeta ñande rapichándi, jaleentevaʼerã la Biblia térã ambue puvlikasión ñanderechatahápe hikuái. Ikatu jajapo upéva japytuʼu aja ñande travahohápe térã eskuélape. Péicha ojapo rupi peteĩ mitãkuña ijeskuélape, omoñepyrũ peteĩ estúdio vívliko ha oheja doce lívro ikompañerokuérape.

4. Mbaʼérepa jajeporta porã vaʼerã?

⁴ Jajapóvo iporãva. Jahechauka hag̃ua japorohesapeha tekotevẽ jajeporta porã (Efe. 5:9). Tahaʼe ñaime jave ñande travahohápe, eskuélape térã ambue hendápe, ñande rapichakuéra ohechavaʼerã jajeporta porãha, upéicha ikatúta ñañemongeta la Biblia heʼívare (1 Ped. 2:12). Pór ehémplo peteĩ mitãʼi orekóva cinco año ojeporta porã rupi imboʼehára ohenoika ituvakuérape ha heʼi: “Ndahecháiva gueteri peteĩ mitã péicha ontendéva mbaʼépa oĩ porã ha mbaʼépa oĩ vai”. Ha upeichaite ningo, japredikávo ha jajapóvo iporãva, ñande rapichakuéra ohecháta japorohesapeha ha omombaʼeguasúta avei Ñandejárape.