Ñanepasiénsiakena Ñandejára servísiope
1. Mbaʼéichapa Jehová ohechauka ipasiensiaha yvyporakuérare?
1 Ñandejára ymaite guive ipasiensiaiterei yvyporakuérare (Éxo. 34:6; Sal. 106:41-45; 2 Ped. 3:9). Ha upéva ojekuaa hese, ohejágui ojepredika ko múndo tuichakuére pe marandu porã. Ojapóma dos mil áño rupi oheka hague umi hénte ipyʼaporãvape oñemoag̃ui hag̃ua hese, ha koʼag̃aite peve ojapo gueteri upéva (Juan 6:44). Mbaʼéichapa ikatu ñahaʼanga Ñandejárape ha jahechauka ñanepasiensiaha iservísiope?
2. Mbaʼéichapa jahechauka ñanepasiensiaha japredikávo ñande territóriope?
2 Japredikávo ogahárupi. Jahechauka ñanepasiensiaha Jehová ojapoháicha ‘japredika memévo’ umi território nañanerenduseihápe avave (Hech. 5:42). Ñamog̃uahẽ pe marandu porã opavavépe, oĩramo jepe heta nopenái ha oñembohorýva ñanderehe térã ñandetrata vaíva (Mar. 13:12, 13). Avei jahechauka ñanepasiensiaha jaha jeývo javisita umi ñanerendu porã vaʼekuépe, ijetuʼúramo jepe jatopa hesekuéra hógape.
3. Mbaʼérepa ñanepasiensiavaʼerã jajapo vove estúdio vívliko?
3 Ñambostudiávo ñande rapichápe. Jaipotáramo peteĩ plánta okakuaa porã ñanepasiensiavaʼerã hese. Ikatu ñaavona, péro ndaikatúi ñambyapura okakuaa pyaʼeve hag̃ua (Sant. 5:7). Upéicha avei, jaipotáramo ñane estudiánte oñakãrapuʼã Ñandejára servísiope ñanepasiensiavaʼerã hese (Mar. 4:28). Ikatu ijetuʼuhína chupe oheja hag̃ua umi mbaʼe vai ojepokuaáva ojapo térã omboyke umi mbaʼe oñemboʼevaʼekue chupe rrelihión japúpe. Upévare ani ñambyapura chupe okambiáma hag̃ua, síno ñanepasiensiavaʼerã ha ñahaʼarõ Ñandejára espíritu og̃uahẽ ikorasõme (1 Cor. 3:6, 7).
4. Mbaʼérepa ñanepasiénsiaramo ñaipytyvõ porãvéta ñane hentekuérape oikuaa hag̃ua Ñandejárape?
4 Japredikávo ñane hentekuérape. Jaipotaitereíramo jepe ñane hentekuéra oikuaa Jehovápe, ñanepasiensiavaʼerã ha jahecha mbaʼéicha javépa opyta porãvéta ñañeʼẽ hag̃ua hendivekuéra umi mbaʼe jagueroviávare, péro ñañehaʼãvaʼerã ani jadesahusia chupekuéra (Ecl. 3:1, 7). Upéicharõ jepe, umi mbaʼe jajapóva rupive ohechakuaavaʼerã hikuái ñande jaserviha Ñandejárape, ha ñaimevaʼerã japredika hag̃uáicha chupekuéra ija vovéntema. Jahechaukavaʼerã ñamombaʼeha opensáva hikuái ha ñañeʼẽ pyʼaguapýpe porãnte hendivekuéra (1 Ped. 3:1, 15). Ñanepasiénsiakena predikasiónpe, upéicharõmante ñaipytyvõta hetavépe ha ñande Ru yvagapegua oguerohorýta ñane rembiapo.