‘Jaiporiahuverekókena’ ñande rapichakuérape
1. Mbaʼépa oikotevẽterei umi hénte?
1 Koʼág̃a rupi oĩ hetaiterei hénte ojerure asýva oñepytyvõmi hag̃ua chupekuéra. Ivaieterei rupi la situasión ko múndope opárupi oĩ oñedeprimíva, ndovyʼavéi ha ndoikuaáiva mbaʼépa ojapóta. Ñande kristiáno jaikuaa umi hénte oikotevẽtereiha pyaʼe oñepytyvõ, ha ñande ikatuhína jaiporiahuvereko chupekuéra (Mat. 22:39; Gál. 6:10). Jahechamína mbaʼéichapa ikatu jahechauka jajepyʼapy añeteha hesekuéra.
2. Mbaʼéichapa ikatu jahechauka jaiporiahuverekoha ñande rapichakuérape?
2 Japredika jaiporiahuvereko rupi ñande rapichápe. Ñandejára Jehová añoite ningo ikatu ñanekonsola (2 Cor. 1:3, 4). Haʼe ipyʼaporãiterei, upévare ñanemokyreʼỹ ‘jaiporiahuvereko’ hag̃ua ñande rapichakuérape ha ñamog̃uahẽ hag̃ua chupekuéra pe marandu porã (1 Ped. 3:8). Ñasẽ meméramo predikasiónpe ‘ñambopyʼaguapýta umi ojepyʼapývape’, jaikuaágui Ñandejára Rréino añoite oipeʼataha opa jehasa asy oĩva (Isa. 61:1). Jehová ñandeporiahuvereko rupi koʼẽrõitéma oipeʼáta opa mbaʼe ñandeguereko asýva, ha omoĩta peteĩ múndo pyahu oĩtahápe tekojoja (2 Ped. 3:13).
3. Mbaʼéichapa Jesús ohechavaʼekue umi héntepe, ha mbaʼépa ñanemboʼe upéva?
3 Jahechákena umi héntepe Jesús ohecha haguéicha. Jesús opredikáramo jepe heta hénte renondépe, omombaʼevaʼekue peteĩteĩme. Haʼe ohechakuaa mbaʼe mbaʼépa káda uno oikotevẽ oñemoag̃ui hag̃ua Ñandejárare ha ohekomboʼe chupekuéra pyʼaguapýpe porã, ohechágui koʼã héntepe ku ovecha herekuaʼỹvaicha (Mar. 6:34). Jajapóramo Jesús ojapo haguéicha ojekuaáta ñane ñeʼẽ ha ñande rováre jaiporiahuvereko añeteha ñande rapichakuérape. Avei ñamotenondéta predikasión ha ñaipytyvõta opaichagua héntepe (1 Cor. 9:19-23).
4. Mbaʼérepa ‘jaiporiahuverekovaʼerã’ ñande rapichakuérape?
4 Hetaiterei hénte opa tetãygua omombaʼeterei Ñandejára Rréino marandu, ombopyʼaguapýgui chupekuéra ha ohechakuaa rupi jajepyʼapy añeteha hesekuéra. Upévare, ‘jaiporiahuverekókena’ ñande rapichakuérape ñamombaʼeguasu ha ñambovyʼa hag̃ua Ñandejára Jehovápe (Col. 3:12).