Oĩpa ne família odefende hag̃uáicha ijerovia?
1. Mbaʼérepa mitãrusukuéra oĩvaʼerã odefende hag̃uáicha ijerovia?
1 Koʼág̃a rupi umi mitãrusu ohóva koléhiope ombohovái heta mbaʼe ijetuʼúva ha ikatúva omokangy ijerovia, péro avei oguereko oportunida omombeʼu hag̃ua “umi mbaʼe añeteguáva” Ñandejára Ñeʼẽgui (Juan 18:37). Upévare iporã reñeporandu: “Oĩpa che família odefende hag̃uáicha ijerovia?”.
2. Mbaʼe mbaʼépa oikuaavaʼerã ne família oñedefendekuaa hag̃ua?
2 Ohechakuaápa ne família mbaʼéicha javépa oñemombaʼeguasuhína peteĩ tetãme térã ojefestehahína peteĩ mbaʼe ndogustáiva Jehovápe? Mbaʼépa heʼíta imboʼehára térã ikompañerokuéra ojopýramo chupe oho hag̃ua universidápe? Oikuaa piko mbaʼépa ojapovaʼerã oñemboligáramo chupe ichíko térã ichíkama hag̃ua, térã hoʼu hag̃ua káña ha dróga? Heʼíntepa hikuái: “Che rrelihión nopermitíri chéve”, térãpa ombohovaikuaa mbaʼérepa ndojapói umi mbaʼe? (1 Ped. 3:15.)
3. Mbaʼéichapa tuvakuéra ikatu oaprovecha pe Aty Jastudia Hag̃ua Ñande Rogayguándi?
3 Peaprovechákena pe Aty Jastudia Hag̃ua Ñande Rogayguándi. Tuvakuéra, umi mitãrusu ningo ohasa heta mbaʼe koléhiope, péro peñehaʼãramo peipytyvõ chupekuéra oñeñandu porãvéta hikuái ha odefendéta hekoitépe ijerovia. Upearã ikatu peiporu pe Aty Jastudia Hag̃ua Ñande Rogayguándi, ha peporandukuaa voi mbaʼépa oipyʼapy térã ojopy chupekuéra. Avei iporãta pehecha jeýramo umi mbaʼe ohasavaʼekue koléhiope ymave, ha mbaʼépa opensa koʼág̃a upe situasión ombohovaivaʼekuére (Sal. 119:95). Ikatu avei pemoñensaja chupekuéra oñedefendekuaa hag̃ua, ha ikatu voi peteĩva oiko imboʼehára térã ikompañéroramo. Pemboʼe pene famíliape oiporuvaʼerãha Ñandejára Ñeʼẽ ha ambue puvlikasión, pór ehémplo lívro Razonamiento ha Los jóvenes preguntan volumen 1 ha 2, ombohovái hag̃ua umi mbaʼe oñeporandúva chupekuéra. Peteĩ ermána ojapómi péicha omoñensajávo imembykuérape oñeʼẽ hag̃ua imboʼeharakuérandi ha omombeʼu hag̃ua haʼeha testígo de Jehová. (Ehecha Ñemañaha 15 de diciembre de 2010, páhina 3-5.)
4. Mbaʼépa ojapovaʼerã umi sy ha túva iñarandúva?
4 Ko ára pahápe umi mitãrusu ombohovái heta mbaʼe ijetuʼúva (2 Tim. 3:1). Ha umi sy ha túva iñarandúva oñehaʼãmbaite oipytyvõ ifamíliape oñedefendekuaa hag̃ua (Pro. 22:3). Upéicharõ tuvakuéra, peipytyvõkena pene famíliape oñedefendekuaa hag̃ua oñepresenta mboyve chupekuéra umi mbaʼe ijetuʼúva.