Jehová ñanembokatupyry jajapo hag̃ua ñane rembiapo
1. Mbaʼéichapa Jehová oipytyvõ isiervokuérape ojerurévo chupekuéra ojapo hag̃ua peteĩ mbaʼe?
1 Jehová ojerure vove isiervokuérape ojapo hag̃ua peteĩ mbaʼe, heʼi avei mbaʼéichapa ojejapovaʼerã. Pór ehémplo, ojerurérõ guare Noépe ojapo hag̃ua pe árka, heʼi avei chupe mbaʼéichapa ojapovaʼerã (Gén. 6:14-16). Ha ojerurérõ guare Moiséspe oho hag̃ua umi ansiáno Israelgua rendápe ha Faraón renondépe, heʼi chupe: “Che roipytyvõta reñeʼẽ hag̃ua, che haʼéta ndéve upe erevaʼerã” (Éxo. 4:12). Koʼág̃a rupi avei Jehová nañanderejareíri ñamoherakuãta vove pe marandu porã. Ñanembokatupyry guei jajapo porã hag̃ua ñane rembiapo pe Eskuéla Jaiporukuaa Hag̃ua la Biblia ha Aty Ñanemboʼéva Japredika Hag̃ua rupive. Mbaʼéichapa ikatu jaaprovecha koʼã mokõi aty?
2. Mbaʼéichapa ikatu ideprovechove ñandéve pe Eskuéla Jaiporukuaa Hag̃ua la Biblia?
2 Eskuéla Jaiporukuaa Hag̃ua la Biblia. Káda rreunionrã restudiavaʼerã umi informasión oñehesaʼỹijótava. Upéicha rejapóramo reñatende porãvéta umi ojapóvare iñasignasión pe eskuélape ha ndekatupyryvéta reporomboʼe hag̃ua (Pro. 27:17). Avei reguerahavaʼerã nde lívro Benefíciese reanota hag̃ua umi mbaʼe nepytyvõtava. Pe omoakãva oñeʼẽ vove pe lívrore, peteĩ maranduhára ojapopa rire iñasignasión, remarkavaʼerã umi párte ofaltávape rembaʼapove ha eanota ikostádope ambue mbaʼe. Avei nemanduʼavaʼerã tuichaiteve nepytyvõtaha nde voi rejapóramo ne rembiapo eskuélape. Reñeanotámapa rejapo hag̃ua upéva? Oñemeʼẽ vove ndéve peteĩ asignasión rejeprepara porã vaʼerã ha esegi umi konsého oñemeʼẽva ndéve. Ha upéi reiporuvaʼerã predikasiónpe umi mbaʼe reaprendevaʼekue.
3. Mbaʼéichapa ikatu ideprovechove ñandéve pe Aty Ñanemboʼéva Japredika Hag̃ua?
3 Aty Ñanemboʼéva Japredika Hag̃ua. Nemanduʼa porãve hag̃ua umi konsého oñemeʼẽvare ko atýpe tekotevẽ relee umi informasión oñehesaʼỹijótava ha ejeprepara rekomenta hag̃ua. Avei reñehaʼãvaʼerã rekomenta mbykymi, péicha rehejáta ótrope okomenta hag̃ua. Reñatende porã vaʼerã avei umi demostrasiónre ha eñehaʼã ejapo umi mbaʼe nepytyvõtava ndekatupyryve hag̃ua predikasiónpe. Avei osẽramo Ñane Marandu Porãme peteĩ artíkulo ou porãtava ndéve, reñongatuvaʼerã reiporu jey hag̃ua ág̃a reikotevẽ vove.
4. Mbaʼérepa jaaprovechavaʼerã umi mbaʼe oiporúva Jehová ñanembokatupyry hag̃ua?
4 Noé ha Moisés ohasa haguéicha heta mbaʼe ijetuʼúva, ñande avei ñambohovái heta mbaʼe ñamoherakuãvo pe marandu porã ko yvy tuichakuére (Mat. 24:14). Upéicharamo jepe ikatu ñamohuʼã porã ñane rembiapo jajeroviáramo Jehováre, pe Mboʼehára Ijojahaʼỹva, ha jaaprovecha porãramo umi mbaʼe oiporúva ñanembokatupyry hag̃ua (Isa. 30:20).