Ñaipytyvõkena ñande rapichápe ontende hag̃ua la Biblia

1. Mbaʼépa iporãvéta jajapo predikasiónpe?

¹ Mbaʼépa iporãvéta jajapo predikasiónpe: ñamog̃uahẽ mbaretépe pe marandu umi héntepe térãpa ñaipytyvõ chupekuéra opensa ha ontende porã hag̃ua la Biblia omboʼéva? Apóstol Pablo omopensavaʼekue umi hudío Tesalonicayguápe, ‘upéicha rupi una partídagui oiko Jesús remimboʼe’ (Hech. 17:2-4, NM). Péro, mbaʼéichapa ikatu ñaipytyvõ ñande rapichakuérape ontende hag̃ua peteĩ mbaʼe?

2. Mbaʼéichapa ikatu jasegi Pablo ehémplo japredika jave?

² Jahechakuaa mbaʼépa oguerovia ñande rapichakuéra. Ñaipytyvõ hag̃ua ñande rapichakuérape predikasiónpe jaikuaavaʼerã mbaʼépa opensa hikuái. Pór ehémplo, Pablo opredikárõ guare umi griégo oĩvape Areópagope, oñeʼẽ umi hénte oikuaa ha omombaʼévare (Hech. 17:22-31). Upéicha avei ñande jajeprepara jave predikasionrã tekotevẽ ñapensa mbaʼépa oguerovia ha mbaʼe rehépa ndaijaʼéi umi hénte ñande territoriopegua (1 Cor. 9:19-22). Ha pe ogajárape ndogustáiramo peteĩ mbaʼe ñamboʼéva, iporãta jahecha peteĩ mbaʼe mokõive jagueroviáva ha ñañeʼẽ hendive upévare.

3. Mbaʼérepa ñapensa porã vaʼerã ñambaʼeporandu hag̃ua?

³ Ñapensa porãkena ñambaʼeporandu hag̃ua. Ndaikatúi ningo jaʼe pór teléfono ñande rapichápe moõ rupípa ohovaʼerã og̃uahẽ hag̃ua peteĩ lugárpe ndajaikuaáiramo moõitépa oĩ. Upéicha avei, ndaikatumoʼãi ñaipytyvõ umi ñanerendúvape ndajaikuaáiramo mbaʼépa opensa hikuái. Jesús ningo ombaʼeporandúmi vaʼekue hapichakuérape oikuaa hag̃ua mbaʼépa opensa, ha upépe ae ohekomboʼe chupekuéra. Pór ehémplo, oĩrõ guare peteĩ oporandúva chupe ‘mbaʼépa ojapovaʼerã oikove hag̃ua opa ára g̃uarã’, Jesús ombaʼeporandu raẽ ombohovái hag̃ua chupe (Luc. 10:25-28). Avei, Pedro heʼírõ guare peteĩ mbaʼe noĩporãiva, Jesús ombaʼeporandu chupe okorrehi hag̃ua opensa lája (Mat. 17:24-26). Upéicharõ, umi ñanerendúva heʼi jave peteĩ mbaʼe noĩporãiva térã ontende vaíva, ñapensa porã vaʼerã ñaporandu hag̃ua umi mbaʼe oipytyvõtava chupekuéra ontende hag̃ua.

4. Mbaʼérepa ñaipytyvõvaʼerã ñande rapichakuérape ontende hag̃ua peteĩ mbaʼe?

⁴ Ñaipytyvõ jave ñande rapichakuérape ontende hag̃ua peteĩ mbaʼe, jasegiñaína pe Mboʼehára Guasu ha umi kristiáno ypykue ehémplo. Avei jahechaukañaína ñamombaʼeha umi ñanerendúvape (1 Ped. 3:15). Ñañehaʼãmbaitékena jajapo upéicha ha katuete oipotáta hikuái jaha jey hendapekuéra.