Mbaʼépa ohechaukavaʼerã peteĩ mboʼehára ikatupyrýva?
1. Mbaʼépa ojapovaʼerã peteĩ mboʼehára ikatupyry hag̃ua?
1 Mbaʼépa ojapovaʼerã peteĩ mboʼehára ikatupyry hag̃ua? Ijestúdio porã, heta áñorema oporomboʼevaʼerã térãpa ivaletereivaʼerã oporomboʼévo? Nahániri, oporohayhuvaʼerã. Pe mborayhu rupive ningo oñekumplipaite umi Léi ha ojekuaa mávapa Cristo remimboʼe; avei upéva iporãve ha ojeguerohoryve Jehová rehe (Juan 13:35; Gál. 5:14; 1 Juan 4:8). Upéicharõ, oiko hag̃ua ñandehegui peteĩ mboʼehára ikatupyrýva japorohayhuvaʼerã.
2. Mbaʼérepa iñimportánte jahayhu ñande rapichakuérape?
2 Jahayhu umi héntepe. Pe Mboʼehára Guasu ohayhuvaʼekue umi héntepe, upévare ohendu chupe hikuái (Luc. 5:12, 13; Juan 13:1; 15:13). Ñande avei jahayhúramo ñande rapichakuérape, jaaprovecháta japredika hag̃ua oimehápe. Mbaʼeve nañandejokomoʼãi, toĩ jepe nañanerenduséiva, ñandepersegíva térã ambue mbaʼe ñandejokoséva. Ñahendu porãta umi japredikávape ha ñañeʼẽta umi mbaʼe oipyʼapývare chupekuéra. Avei ñañemotiémpota jastudia hag̃ua ñande rapichándi, ha jajepreparáta jaha mboyve ñamboʼe chupe.
3. Mbaʼéichapa ñanepytyvõta predikasiónpe jahayhúramo la Biblia omboʼéva?
3 Jahayhu la Biblia omboʼéva. Jesús ningo ohayhuvaʼekue Ñandejára Ñeʼẽ omboʼéva ha ombojoja voi peteĩ tesóro rehe (Mat. 13:52). Ñande avei jajapóramo upéicha, kyreʼỹme japredikáta ha upéva ojapo porãta umi ñanerendúvare. Avei jahechakuaáta iñimportanteveha pe marandu porã ha ñandepyʼaguasuvéta japredika hag̃ua, ñapensa rangue umi mbaʼe ndajajapokuaáivare.
4. Mbaʼépa ikatu jajapo japorohayhu hag̃ua?
4 Mbaʼéichapa ikatu japorohayhu. Jahayhúta ñande rapichakuérape jahechakuaáramo oĩ vaiha hikuái Ñandejára renondépe, ha mbaʼeichaitépa Jehová ha Jesús ohayhu chupekuéra (Mar. 6:34; 1 Juan 4:10, 11). Avei jahayhuvéta la Biblia omboʼéva jastudia meméramo ñaneañoháme, jajepyʼamongeta hese ha ñanemanduʼávo pe mborayhu ouha Ñandejára espíritugui (Gál. 5:22). Upévare, jaipotáramo upe mborayhu heñói ñane korasõme jajerurevaʼerã Jehovápe tañanepytyvõ ha tomeʼẽ ñandéve ijespíritu (Luc. 11:13; 1 Juan 5:14). Enterovégui, tahaʼe ñande estúdio porã, heta áñorema ñaporomboʼe, ñandevaleterei ñaporomboʼe hag̃ua térã nahániri, ikatu oiko peteĩ mboʼehára katupyry japorohayhúramo.