Dios nos habla mediante Jeremías
1. ¿Mbaʼe puvlikasiónpa osẽraʼe ñande aty guasu tres diagua ojejapovaʼekue 2010-pe, ha mbaʼéichapa jaiporúta koʼẽrõitéma?
1 ¡Ajépa javyʼaite oñemeʼẽrõ guare ñandéve pe lívro Jeremías ñande aty guasu tres diaguápe, ojejapovaʼekue 2010-pe hérava “Ñañemoag̃uíkena Jehováre”! Ko lívro oguereko heta konsého iporãva ha ikatúva ñanepytyvõ ñande rekovépe, oñeguenohẽva Jeremías ha Lamentaciónesgui (Rom. 15:4). Ko lívro ojeprepara ojestudia hag̃ua kongregasiónpe ojejapo jave Ñandejára Ñeʼẽ Ñehesaʼỹijo, ko áñope ñañepyrũta ñahesaʼỹijo semána 5 de noviembre guive.
2. ¿Mbaʼérepa ideprovéchota jastudia pe lívro Jeremías?
2 Ideprovécho koʼã árape g̃uarã. Jeremías ohai espíritu sánto rupive pe lívro oguerekóva héra, haʼe ningo oprofetisavaʼekue Judápe peteĩ tiémpo ijetuʼúvape. Ñepyrũrã opensa ndaikatupyryiha ojapo hag̃ua ko tembiapo (Jer. 1:6). Avei heta hénte Ananotgua opersegivaʼekue chupe, umíva apytépe ikonosído ha ihentekuéra, hiʼarive umíva hína ivallegua (Jer. 11:21, 22). Koʼã mbaʼe heta vése omokangy chupe (Jer. 20:14). Ñande avei jahasa heta mbaʼe ijetuʼúvare, ha ñañeñandu jepi Jeremías oñeñandu haguéicha “ñamboʼévo umi hénte opa tetãyguápe oiko hag̃ua chuguikuéra Jesús remimboʼe” (Mat. 28:19, NM). Upévare, ñahesaʼỹijóvo umi mbaʼe Jeremías ohaivaʼekue ñanepytyvõta ñandepyʼaguasu ha ñanekyreʼỹ hag̃ua japredika jave.
3. ¿Mbaʼéichapa jaiporuvaʼerã umi mbaʼe oguerekóva pe lívro Jeremías?
3 Mbaʼe mbaʼépa oguereko ko lívro. Umi téysto oĩva kursívape ojeleevaʼerã pe estúdio aja. Oñemohuʼãvo káda párte ojestudiáva, oĩ peteĩ térã mokõi porandu létra hũvévape, umíva oñeporanduvaʼerã ermanokuérape opakuévo pe estúdio, oñemyesakãve hag̃ua umi mbaʼe iñimportantevéva. Ko lívro oguereko avei hetaiterei taʼanga umi ermáno katuete okomentasétava.
4. ¿Mbaʼépa ikatu jajapo ideprovécho hag̃ua ñandéve ko lívro?
4 Ikatu hag̃uáicha ideprovécho ndéve ko lívro voimi rejepreparavaʼerã. Eheka umi mbaʼe nepytyvõtava nde rekovépe ha avei predikasiónpe, ha eñehaʼã ekomenta meme. Jehová ohovasavaʼekue Jeremíaspe, upévare ojapo porã vaʼekue hembiapo ha ovyʼa (Jer. 15:16). Hiʼãite ningo jastudiávo ko lívro ñanepytyvõ avei vyʼapópe japredika hag̃ua.