Javyʼákena jahechávo umi mbaʼe porã jahupytýva ñambaʼapo pohýi rupi
1. ¿Mbaʼérepa ikatu nañanekyreʼỹvéi predikasiónpe?
1 Ñandejára ningo ojapo yvyporakuérape ikatu hag̃uáicha ovyʼa “ohechávo umi mbaʼe porã ohupytýva ombaʼapo pohýi rupi” (Ecl. 2:24). Upévare, ndajahechái jave umi mbaʼe porã jahupytýva predikasiónpe ikatu ñanekangy ha nañanekyreʼỹvéi. ¿Mbaʼépa ikatu jajapo akóinte ñanekyreʼỹ hag̃ua?
2. ¿Mbaʼérepa jahechakuaavaʼerã naentéroi ñanerendu porãtaha?
2 Jahechakuaákena naentéroi ñanerendu porãtaha. Ndahetáiramo jepe umi hénte ohenduvaʼekue Jesúspe, ndaipóri heʼivaʼerã hese ndohupytýi hague heta mbaʼe porã predikasiónpe (Juan 17:4). Jesús oiporúrõ guare pe ehémplo oñeʼẽva peteĩ chokokue oñemitỹva rehe, heʼivaʼekue voi heta korasõme naheñoimoʼãiha pe semílla térã pe notísia porã Ñandejára Rréino rehegua (Mat. 13:3-8, 18-22). Péro jahechamína umi mbaʼe porã jahupytýva ñañehaʼã rupi predikasiónpe.
3. ¿Mbaʼérepa jaʼekuaa jahupytyha heta mbaʼe porã umi hénte nañanerenduporãiramo jepe?
3 Mbaʼérepa jaʼekuaa jahupytyha heta mbaʼe porã. Pe ehémplo oñeʼẽva peteĩ chokokue oñemitỹva rehe ohechauka umi hénte omombaʼéva guive pe mensáhe oñeʼẽva Ñandejára Rréinore ohupytytaha heta mbaʼe porã térã “hiʼa porãtaha” (Mat. 13:23). Peteĩ trígo heñói ha otyarõvévo ohóvo nosẽi imátagui ótro hakã pyahurã, síno oprodusi heta semílla. Upéicha avei ndeʼiséi peteĩ kristiáno “hiʼa porãha” oipytyvõ rupínte hapichápe oiko hag̃ua chugui Jesús remimboʼe, síno “hiʼa porã” hína oprodusíramo heta semílla térã omosarambi meméramo umi notísia porã. Japredika jave ñaipytyvõ hína oñemombaʼeguasu hag̃ua Jehová réra. Upévare ñañeñandu porãiterei ñamosarambívo pe semílla, nañanerenduporãiramo jepe umi hénte (Is. 43:10-12; Mat. 6:9). Ha tuichaiterei mbaʼe ñandéve g̃uarã ñaipytyvõ Ñandejárape (1 Cor. 3:9). Avei Jehová ovyʼaiterei ñandereheve “jaiporúramo ñande juru” ñamombaʼeguasu hag̃ua chupe (Heb. 13:15, 16).
4. ¿Mbaʼe iporãvapa ikatu jahupyty jaikuaaʼỹre?
4 Ñanemanduʼavaʼerã sapyʼánte ndajahechamoʼãiha umi mbaʼe porã jahupytýva ñambaʼapo pohýiramo jepe. Pór ehémplo, Jesús opredikavaʼekue heta héntepe, upéicharõ jepe oĩvaʼekue ijapytepekuéra ndoikoivaʼekue chugui hemimboʼe haʼe oĩ aja ko yvy ape ári. Upéicha avei pe semílla térã pe mensáhe jagueraháva peteĩ ñande rapichápe ikatu ndokakuaapyaʼéi ikorasõme, péro amo gotyove ikatu hína oiko chugui Testígo ñande jaikuaaʼỹre. Péicha jahecha ikatuha jahupyty heta mbaʼe porã japredikávo. Upévare, akóintekena “ñañehaʼã ñane rembiapo porã” ha jehechauka ñande haʼeha Jesús remimboʼe (Juan 15:8).