Aníkena reheja nemokangy umi mbaʼe nemongyhyjéva
1. ¿Mbaʼérepa oĩ okyhyjéva oikuaveʼẽ hag̃ua estúdio vívliko?
1 ¿Ijetuʼúpa ndéve reikuaveʼẽ hag̃ua estúdio vívliko rekyhyjégui nereporomboʼeporãirõ g̃uarã? Yma oĩvaʼekue avei heta oservíva Jehovápe opensáva ndaikatupyryiha ojapo hag̃ua pe tembiapo oñemeʼẽva chupekuéra, umíva apytépe Moisés ha Jeremías (Éx. 3:10, 11; 4:10; Jer. 1:4-6). Upéva ohechauka ñande avei sapyʼánte ikatuha jakyhyje ha ñañeñandu haʼekuéraicha. ¿Mbaʼépa ikatu jajapo péicha jave?
2. ¿Mbaʼérepa naiporãmoʼãi japredikánte ogahárupi ha jajeko umi ótrore ojapo hag̃ua estúdio vívliko?
2 Ñepyrũraite voi ñanemanduʼavaʼerã Jehová ndojeruremoʼãiha ñandéve peteĩ mbaʼe ndaikatumoʼãiva jajapo (Sal. 103:14). Haʼe oikuaáguinte ikatuha jajapo omanda ñandéve ñamboʼe ha ñaipytyvõ hag̃ua ñande rapichakuérape oiko hag̃ua chuguikuéra Jesús remimboʼe (Mat. 28:19, 20). Jehová ningo nomeʼẽi ko tembiapo umi ikatupyry ha ijestúdio porãvapente (1 Cor. 1:26, 27). Upévare, naiporãmoʼãi japredikánte ogahárupi ha jajeko umi ótrore ojapo hag̃ua estúdio vívliko.
3. ¿Mbaʼéichapa Jehová ñanembokatupyry jajapo hag̃ua estúdio vívliko?
3 Jehová ñanembokatupyry. Jehová voi ñanerekomboʼe ñaipytyvõ hag̃ua umi héntepe oiko hag̃ua chuguikuéra Jesús remimboʼe (2 Cor. 3:5). Upearã oiporu Iñorganisasión ñanemboʼe hag̃ua heta mbaʼe ni umi iñaranduvéva ko múndope ndoikuaáiva (1 Cor. 2:7, 8). La Bíbliape jahecha mbaʼéichapa Jesús pe Mboʼehára Guasu oiporu umi ehémplo, porandu omopensáva umi héntepe ha hetave mbaʼe oporomboʼe hag̃ua. Kongregasiónpe avei pyʼỹinte ñañehekomboʼe. Hiʼarive jareko puvlikasión ideprovechoitereíva, pór ehémplo pe lívro Mbaʼépa omboʼe la Biblia? Ko lívro ningo omyesakã porãiterei la Biblia omboʼéva ha ndahasyiete oñentende hag̃ua. Sapyʼánte ikatu ñapensa ijetuʼuha jajapo estúdio vívliko, péro ndaupeichaiete hína.
4. ¿Mbaʼérepa jaʼekuaa Jehová katuete ñanepytyvõtaha?
4 Moisés ha Jeremías ojapo porã vaʼekue hembiapo Jehová oipytyvõ rupi chupekuéra (Éx. 4:11, 12; Jer. 1:7, 8). Upévare ñande avei jajerurevaʼerã Jehovápe tañanepytyvõ jajapo hag̃ua estúdio vívliko. Haʼe katuete ohendúta ñane ñemboʼe oguerohory rupi upe tembiapo, ha oipotágui ñaipytyvõ ñande rapichakuérape oikuaa hag̃ua Chupe (1 Juan 3:22). Upéicharõ, ñañehaʼãkena ñamoñepyrũ peteĩ estúdio vívliko. Upéva ñanembovyʼaitereíta ha Jehová omeʼẽta ñandéve heta mbaʼe porã.