“Japredikákena hekoitépe”
1. ¿Mbaʼe ehémplo iporãvapa omoĩ ñandéve Pablo?
1 Apóstol Pablo ndojereivaʼekue heʼi hag̃ua Timotéope ojapo hag̃ua “hembiapo hekoitépe”, ¿mbaʼérepa? haʼe voi ojapo porã rupi hembiapo Jehová servísiope (2 Tim. 4:5). Pór ehémplo, áño 47 ha 56 rupi Pablo tres vése oviahavaʼekue mombyry ikatu hag̃uáicha opredika. Avei lívro de Héchospe heta vése heʼi haʼe opredika hague “hekoitépe”, térã oaprovechapaite hague umi oportunida orekóva omog̃uahẽ hag̃ua pe notísia porã hapichakuérape (Hech. 23:11; 28:23). ¿Mbaʼéichapa ñande avei ikatu jajapo hekoitépe ñane rembiapo?
2. ¿Mbaʼéichapa ikatu jajapo hekoitépe ñane rembiapo japredikávo ogahárupi?
2 Japredikávo ogahárupi. Heta hénte nohendúi gueteri pe notísia porã, upéicha rupi japredikavaʼerã peteĩ óra ikatuhápe jatopa hesekuéra. Ha ñasẽramo kaʼarukue térã fín de semanakue, ikatu ñañemongeta hína umi omoakãvandi ogapy. Ñañehaʼãmbaite vaʼerã ñañeʼẽ peteĩndi jepe káda ógape, upévare ndajatopáiramo avavére iporãitereíta ñaanota ha upéi jaha jey jahecha ótro órape. Jajapóramo koʼã mbaʼe ha lomímonte ndajatopái avavére, ñañehaʼãvaʼerã ñakonsegi pe ogajára número de teléfono térã jaheja peteĩ kárta upe ógape.
3. ¿Mbaʼéicha javépa nde ikatu reaprovecha repredika hag̃ua oĩháme jepi heta hénte térã reikohárupi?
3 Japredikávo oĩháme jepi heta hénte térã jaikohárupi. Ñande Testígo jaikuaauka pe “arandu añetegua” opavave ohendusévape. Ha upearã sapyʼánte japredika “kállere” térã “plasahárupi” (Prov. 1:20, 21). Avei ñañehaʼã ñañeʼẽ pe notísia porã rehe jajapokuévo ñane rembiapo káda diagua. Upéicha rupi ikatu jaʼe “ñañemeʼẽmbaiteha jaikuaauka hag̃ua Ñandejára Ñeʼẽ”, avei ñakumpliha ñane rembiapo “japredikávo hekoitépe” (Hech. 10:42; 17:17; 18:5; 20:20, 21, 24).
4. ¿Mbaʼéichapa ñanepytyvõta japredika hag̃ua hekoitépe ñañemboʼe ha jajepyʼamongetáramo?
4 Sapyʼánte ikatu ndajapredikaséi ñaneotĩ, jakyhyje térã ñapensa rupi nañandekatupyryiha ñañeʼẽ hag̃ua umi hénte rovake. Péro jaikuaa porã Jehová ontendeha ñane situasión (Sal. 103:14). Oiko jave ñanderehe koʼã mbaʼe jajerurevaʼerã Chupe tañanembopyʼaguasu ñañeʼẽ hag̃ua (Hech. 4:29, 31). Avei ñanepytyvõta jajepyʼamongetáramo jastudia jave ñaneañohápe mbaʼérepa iñimportánte pe marandu porã (Filip. 3:8). Jajapóramo koʼã mbaʼe ñamombaʼevéta umi notísia porã ha ñanekyreʼỹta japredika hag̃ua.
5. ¿Mbaʼépa jajapokuaa ikatu hag̃uáicha ñaipytyvõ oñekumpli hag̃ua pe profesía ohaivaʼekue Joel?
5 Proféta Joel heʼivaʼekue voi Ñandejára rembiguaikuéra heta hembiapotaha predikasiónpe og̃uahẽ mboyve Jehová ára guasu, ha mbaʼeve ndojokomoʼãiha chupekuéra (Joel 2:2, 7-9). Upévare, jajapókena hekoitépe ko tembiapo arakaʼeve ndojejapomoʼãvéimava.