¿Mbaʼépa ñanemomýi japredika hag̃ua?

1. ¿Mbaʼépa ñanemomýi japredika hag̃ua?

¹ Ñamombeʼúramo koʼág̃a umi notísia porã ojapótava Ñandejára Rréino, jajapo hína peteĩ tembiapo iñimportantetereíva. Ha avei jahechauka ñaneñeʼẽrenduha umi mokõi mandamiénto tuichavévape: jahayhu Jehovápe ha ñande rapichakuérape (Mar. 12:29-31). Upe mborayhu ñanemomýi japredika meme hag̃ua (1 Juan 5:3).

2. ¿Mbaʼéichapa japredikávo jahechauka jahayhuha Jehovápe?

² Jahayhu Jehovápe. Jahayhu rupi ñane amígo Jehovápe ñadefende Chupe ani hag̃ua oñemongyʼa héra. Satanás ningo 6.000 áñorupima oñeʼẽ vai oikóvo Hese ha ogueroviauka voi umi héntepe Jehová, Jesús ha pe espíritu sánto peteĩnteha, Ñandejára ombohasa asyha infiérnope umi hembiapo vaívape ha ndojepyʼapyiha voi yvyporakuérare (2 Cor. 4:3, 4). Upéicha rupi, heta oĩ ogueroviáva Haʼe ndoexistiriha. ¡Ajépa javyʼaitéta umi hénte oparupigua oikuaáramo mbaʼeichaguápa ñande Ru yvagapegua! Ñañehaʼãramo jaservi porã ñande Apoharépe, ñambovyʼáta Chupe ha Satanáspe nosẽporãmoʼãi umi mbaʼe ojaposéva (Prov. 27:11; Heb. 13:15, 16).

3. ¿Mbaʼérepa japredikávo jahechauka jahayhuha ñande rapichakuérape?

³ Jahayhu ñande rapichakuérape. Japredikávo peteĩ ñande rapichápe jahechauka jahayhuha chupe. Jaikuaa ningo koʼã tiémpo ijetuʼuetévape yvyporakuéra oikotevẽtereiha ohendu umi notísia porã. Heta oĩ ojoguáva umi ninivíta oiko vaʼekuépe Jonás tiémpope. Haʼekuéra ndoikuaái vaʼekue mávapa ipo derécha ni ijasu (Jon. 4:11). Péro japredikávo umi héntepe, ikatu ñaipytyvõ chupekuéra ovyʼa ha oiko porãve hag̃ua (Is. 48:17-19). Ñameʼẽta avei chupekuéra esperánsa (Rom. 15:4). Ha ohendu ha ojapóramo umi mbaʼe oaprendéva, ikatúta ojesalva (Rom. 10:13, 14).

4. ¿Mbaʼéguipa Jehová ndahesaraimoʼãi arakaʼeve?

⁴ Peteĩ taʼýra ohayhúva itúvape manterei ohechauka chupe ohayhuha ha ndahaʼéi sapyʼapyʼánte. Upéicha avei, jahayhu rupi Jehovápe ha ñande rapichakuérape ñanemomýi ñamombeʼu hag̃ua pe notísia porã oimeha óra ha opárupi, ndahaʼéi ñasẽ javénte predikasiónpe. Upévare, akóintekena japredika kyreʼỹ (Hech. 5:42). Upéicha jajapóramo, jahechaukáta jahayhuha ñande pyʼaite guive Jehovápe. Ha haʼe ndahesaraimoʼãi upévagui arakaʼeve (Heb. 6:10).