Jasegíkena umi proféta ehémplo: Joel
1. ¿Mbaʼéichapa ikatu jahechauka ñaneumildeha japredika jave, proféta Joel ojapo haguéicha?
1 ¿Mávapa rakaʼe proféta Joel? Heta mbaʼe ndajaikuaái chugui, péro la Bíbliape heʼi hese haʼe hague “Petuel raʼy” (Joel 1:1). Haʼe ningo peteĩ proféta iñumíldeva, upévare noñeʼẽi voi umi mbaʼe ojapóvare, síno Jehová marandúre. Ha ñande ñañehaʼã avei jajapo upéicha. Japredika jave nañahaʼarõi umi hénte ñanemombaʼeguasu térã heʼi ñanderehe ñandevaletereiha, jaipota guei omombaʼeguasu hikuái Jehovápe ha la Biblia heʼíva (1 Cor. 9:16; 2 Cor. 3:5). Upéicha rupi, pe marandu porã jagueraháva hetápe omokyreʼỹ ha omombarete. Jahechamína koʼág̃a mbaʼéichapa umi profesía ohai vaʼekue Joel ñanemokyreʼỹ ha omeʼẽ ñandéve esperánsa.
2. ¿Mbaʼépa jajapo vaʼerã jaikuaávo hiʼag̃uimbaitemaha Jehová ára guasu?
2 “Jehová ára guasu hiʼag̃uimbaitéma.” (Joel 1:15.) Ojapómaramo jepe haimete tres mil áño ojehai hague ko mbaʼe, oñekumpli ohóvo ñane tiémpope. Koʼág̃arupi oĩ hetaitereive provléma ko múndope, ha predikasiónpe katu jatopa heta hénte nañanerenduséi ha oñembohorýva ñanderehe. Koʼã mbaʼe ohechauka porã ñaimemaha ára pahápe (2 Tim. 3:1-5; 2 Ped. 3:3, 4). Jahechaháicha hiʼag̃uimbaitéma hína Jehová ára guasu, upévare koʼýte ñamotenonde vaʼerã pe predikasión (2 Ped. 3:11, 12).
3. ¿Mbaʼérepa iñimportánte ñamotenonde pe predikasión hiʼag̃uimbaitéma rupi pe jehasa asy guasu?
3 “Jehová oñangarekóta ipuévlore.” (Joel 3:16.) Ko versíkulope heʼi avei Jehová “oityvyrotaha yvága ha yvy”, upéva heʼise ohunditaha heta mbaʼe pe jehasa asy guasu aja. ¡Ajépa javyʼaite jaikuaávo Jehová oñangarekotaha ñanderehe upe tiémpope! (Rev. 7:9, 14.) Jahechávo mbaʼéichapa Jehová ñanemombarete ha oñangareko ñanderehe ñamotenonde rupi predikasión, ñanepytyvõ ñamombarete hag̃ua ñande jerovia ha ñaaguanta hag̃ua umi mbaʼe ijetuʼúva. Upéicharõ añoite ikatúta jagueropuʼaka pe jehasa asy guasu koʼẽrõitéma og̃uahẽtava.
4. ¿Mbaʼérepa ikatu javyʼa ñahaʼarõvo umi mbaʼe oikótava tenonderãme?
4 Oĩ heta heʼíva proféta Joel ohai vaʼekue nomeʼẽiha esperánsa, péro ndahaʼeiete upéicha, ohechauka guei Jehová osalvataha ipuévlope (Joel 2:32). Upéicharõ, jajeroviákena Jehováre ñaaguanta hag̃ua umi mbaʼe ñaneraʼarõva tenonderãme, kyreʼỹme ñamombeʼu umi notísia porã oñeʼẽva Ñandejára Rréinore ha jajapo Joel 2:23-pe heʼíva: “Pevyʼa ha penderory joaitéke Jehová pende Járandi”.