Jasegíkena umi proféta ehémplo: Oseas
1. ¿Mbaʼépa iporã ñañeporandu jaikuaávo Jehová imbaʼeporã ha ñandeporiahuverekoha?
1 Jehová ningo imbaʼeporãiterei ha ñandeporiahuvereko, upévare jajepyʼamongetávo koʼã mbaʼére iporã ñañeporandu: “¿Mbaʼe sakrifísiopa ajapóne hesehápe?” (Sal. 103:2-4; 116:12). Proféta Oseas kyreʼỹme ojapo vaʼekue heta sakrifísio iñeʼẽrendu hag̃ua Jehovápe. Ha ñande, ¿mbaʼéichapa ikatu jasegi iñehémplo?
2. ¿Mbaʼéichapa ikatu jasegi proféta Oseas ehémplo?
2 Japredikákena avei “ivai jave”. Oseas omomarandu vaʼekue pe rréino de diez trívu oĩva Israélpe. Upépe avave lénto nomombaʼeguasúi vaʼekue Jehovápe. Rréi Jeroboán I omokyreʼỹ ñepyrũ vaʼekue umi héntepe omombaʼeguasu hag̃ua umi tororaʼy raʼangápe. Upéi, rréi Jeroboán II osegi avei oporomokyreʼỹ upearã ha ojapo “opa mbaʼe ivaíva Jehová renondépe” (2 Rey. 14:23, 24). Umi rréi ojupi vaʼekue upe rire ndojapói mbaʼeve oipytyvõ hag̃ua umi Israelguápe oñemoĩ porã jey hag̃ua Jehovándi. Upéicha rupi, upe rréino oñehundi vaʼekue áño 740-pe, Jesús ou mboyve. Péro Oseas oservi vaʼekue ipyʼaite guive Jehovápe 59 áño pukukue umi hénte aña apytépe. ¡Ajépa idesidído ha ipyʼaguasu ko proféta! Ñande avei jasegi vaʼerã iñehémplo ha akóinte japredika oĩramo jepe nañanerenduséiva térã oñemoĩva ñanderehe (2 Tim. 4:2).
3. ¿Mbaʼéichapa proféta Oseas ojapo vaʼekue ohechauka Jehová ñandeporiahuverekoha?
3 Jahechakuaákena mbaʼeichaitépa Jehová ñandeporiahuvereko. Jehová heʼi vaʼekue proféta Oséaspe: “Emenda peteĩ kuña rekovaíre” (Os. 1:2). Hembireko hérava Gómer imemby vaʼekue chugui peteĩ; péro upéi omoakãratĩ chupe ha oreko mokõi mitã ótrogui, upéicharõ jepe Oseas operdona chupe. Ko proféta ehémplo rupive, Jehová ohechauka mbaʼeichaitépa oiporiahuvereko pe rréino de Israélpe oñarrepenti rupi hikuái (Os. 3:1; Rom. 9:22-26). Ha ñande, ¿jajesakrifikátapa avei ñamboʼe hag̃ua “opaichagua tapichápe” Jehová ñandeporiahuverekoha? (1 Cor. 9:19-23.)
4. ¿Mbaʼe sakrifísiopa ikatu jajapo jaagradese rupi Jehovápe?
4 Heta oservíva Jehovápe ojesakrifika omboykévo iprofesión ha ohejávo peteĩ traváho porã, ikatu hag̃uáicha ombaʼapove Jehová servísiope. Ambue katu nomendái térã naifamíliai omotenonde hag̃ua Ñandejára Rréino. Sapyʼánte ningo ikatu ñapensa ndaikatumoʼãiha jajesakrifika Jehová rehehápe Oseas ojapo haguéicha. Péro jasegíramo jaagradese Jehovápe imbaʼeporã haguére ñanendive ha jajerovia ñanemombaretetaha ijespíritu sánto rupive, Haʼe ikatu hína ojevale ñanderehe jajapo hag̃ua umi mbaʼe ñaimoʼãʼỹva, ojevale haguéicha Oseas rehe (Mat. 19:26; Filip. 2:13).