Jasegíkena umi proféta ehémplo: Miqueas
1. ¿Mbaʼépa oiméne oñeporandu raʼe Miqueas opredikárõ guare ha mbaʼérepa jaʼekuaa ndojaporeíri hague hembiapo?
1 Oiméne ñañeporandúmava arakaʼépa og̃uahẽta huʼãme umi mbaʼe vai oikóva ko múndo añáme. Proféta Miqueas heʼi vaʼekue Jehová ohunditaha Israel ha Judápe, ha oiméne oikuaase avei mbaʼe tiémpopepa oñekumplíta upéva. Péro haʼe ojerovia Ñandejára okumplitaha upe profesía. Ha upeichaite oiko, áño 740-pe Jesús ou mboyve Miqueas ohecha vaʼekue mbaʼéichapa Jehová okumpli iñeʼẽ opermitívo umi asírio ohundi Samáriape (Miq. 1:6, 7). Upe rire, áño 607-pe Jerusalén oñehundi avei (Miq. 3:12). Ha ñande, ¿mbaʼéichapa ikatu jasegi proféta Miqueas ehémplo ñahaʼarõvo oñehundi ko múndo aña?
2. ¿Mbaʼérepa ñahaʼarõkuaa vaʼerã Jehová ára guasu, ha mbaʼépa jajapokuaa upe aja?
2 Ñahaʼarõkuaákena. Miqueas heʼi vaʼekue: ‘Che ajeroviáta Jehováre. Ha ahechaukáta ahaʼarõkuaaha’ (Miq. 7:7). Upéva ndeʼiséi ko proféta opyta hague ojekuʼako, heʼise guei haʼe kyreʼỹme okumpli hague Jehová rembipota. Ñande avei, ñahaʼarõ aja Jehová ára guasu kyreʼỹme ñambaʼapo vaʼerã iservísiope ha ñamombaʼeguasu chupe ñande pyʼaite guive (2 Ped. 3:11, 12). Ñanemanduʼa vaʼerã Jehová ipasiénsia rupi heta hénte ikatuha gueteri oñarrepenti ha ojesalva (2 Ped. 3:9). Upévare, ñakumplíkena la Bíbliape heʼíva jahechaukávo ñanepasiensiaha umi proféta a ojapo haguéicha (Sant. 5:10).
3. ¿Mbaʼérepa akóinte jajerure vaʼerã Jehovápe ijespíritu sánto?
3 Jehová katuete ñanemombaretéta. Miqueas ojapo vaʼerã kuri peteĩ tembiapo ijetuʼúva, upévare ojerure Jehovápe omombaretemi hag̃ua chupe (Miq. 3:8). Jehová oikuaa porã ñande avei ñaikotevẽha hese, upévare la Bíbliape heʼi voi jajerure hag̃ua chupe tañanepytyvõ. Jajúramo ñanekaneʼõ, haʼe ñanemombaretéta ikatu hag̃uáicha ñakumpli umi tembiapo omeʼẽva ñandéve (Sal. 84:5, 7; Is. 40:28-31). Heta kristiáno ohechakuaa mbaʼeichaitépa Jehová heta áñorema oipytyvõ chupekuéra oservívo chupe. Upévare, akóinte jajerure vaʼerã Ñandejárape ijespíritu sánto (Luc. 11:13).
4. ¿Mbaʼe ehémplo iporãvapa omoĩ ñandéve Miqueas?
4 Proféta Miqueas ningo siémpre omotenonde vaʼekue Ñandejára rembipota, chupe g̃uarã ndaipóri vaʼekue ambue mbaʼe iñimportantevéva upévagui. Ha umi hénte itiempopegua ojapóramo jepe heta mbaʼe vai, haʼe akóinte iñeʼẽrendu Ñandejárape. Koʼág̃arupi oĩ avei heta mbaʼe ikatúva omokangy ñande jerovia, upévare jajedesidíkena ‘jaiko Ñandejára oipotaháicha opa árare’ (Miq. 4:5).