Umi tratádo pyahu iporãiterei
1. ¿Mbaʼe puvlikasión pyahúpa jareko jaiporu hag̃ua predikasiónpe?
1 Pe áño ohasa vaʼekuépe ojejapo kuri pe asambléa de distríto hérava “Ñandejára Ñeʼẽ hína pe añetegua”, upépe oñepresenta cinco tratádo pyahu ha upéi osẽ avei pe Notísia Rréino Rehegua número 38 hérava ¿Añetehápepa oikove jeýta umi omanóva? Koʼã seis tratádo pyahu ningo ojejapo porãiterei ha katuete ogustáta umi héntepe. ¿Mbaʼérepa idiferénte? ¿Mbaʼéichapa ikatu jaiporu porãve ñaikuaveʼẽ jave ogahárupi?
2. ¿Mbaʼépepa ñanepytyvõta koʼã tratádo pyahu?
2 Mbaʼérepa idiferénte. Japredika hag̃ua hekoitépe ogahárupi tekotevẽ jajapo koʼã mbaʼe: 1) jajapo peteĩ porandu ikatu hag̃uáicha pe ogajára omombeʼu ñandéve mbaʼépa opensa, 2) jahechauka chupe mbaʼépa heʼi la Biblia, 3) ñaikuaveʼẽ peteĩ puvlikasión ha 4) jajapo peteĩ porandu ñambohováitava pe ótra visítape ha ñaporandu chupe arakaʼépa ikatu jaha jey hendápe. Koʼã tratádo pyahu ojeprepara ikatu hag̃uáicha ñanepytyvõ jajapo hag̃ua hekoitépe koʼã mbaʼe.
3. ¿Mbaʼéichapa ikatu jaiporu predikasiónpe koʼã tratádo pyahu?
3 Mbaʼéichapa ikatu jaiporu. Jasaluda rire pe ogajárape, 1) jahechaukakuaa chupe pe pregúnta oĩva pe tratádo apére ikatúva hína oñembohovái mbohapy hendáicha ha ñaporandu chupe mbaʼépa opensa, 2) jaavri pe tratádo ha jahechauka chupe pe párte “Mbaʼépa heʼi la Biblia”, ha ijáma guive jalee la Bíbliagui voi pe téxto oĩva upépe. Pe ogajára itiémporamo ikatu avei ñahesaʼỹijo hendive pe párte heʼíva “Mbaʼéichapa upéva nepytyvõ”, 3) ñaikuaveʼẽ pe tratádo ha ñamokyreʼỹ chupe olee hag̃ua ikatu vove, 4) jaha mboyve, jahechauka chupe pe párte heʼíva “Mbaʼépa nde repensa” ha ñaporandu pe ogajárape arakaʼépa opyta porãta jaha jey hag̃ua hendápe, ikatu hag̃uáicha ñambohovái upe porandu la Biblia rupive.
4. ¿Mbaʼéichapa ikatu jaiporu koʼã tratádo jajapo hag̃ua rrevisíta?
4 Ndahasyiete avei jaiporu koʼã tratádo jajapo hag̃ua rrevisíta. Por ehémplo, ñambohovái hag̃ua pe porandu jajapo vaʼekue pe primera visítape, jaleekuaa umi téxto oĩva pe párte heʼihápe “Mbaʼépa nde repensa” ha jahechauka chupe pe tratádope pe folléto Notísia porã raʼanga. Upéi ñanohẽkuaa ñande folléto, jaavri pe leksión oñeʼẽhápe pe téma ñahesaʼỹijóvare ha ñaikuaveʼẽ pe ogajárape. Ojagarráramo ñandehegui, ñaporandukuaa chupe arakaʼépa ikatu jaha jey hendápe jalee hag̃ua hendive pe folléto. Térã ikatu avei ñaikuaveʼẽ rangue pe folléto, jahejánte ótro tratádo ha jaʼe chupe ñahesaʼỹijotaha hendive jaha jey vove. ¡Péicha ñamoñepyrũma jahávo peteĩ estúdio!
5. ¿Maʼerãpa ideprovécho umi tratádo?
5 Ciento treinta áñorema jaiporu hague umi tratádo predikasiónpe. Ha ojejapóramo jepe diferénte kláse, tahaʼe michĩva térã tuichavéva, koʼag̃aite peve ideprovechoiterei ñandéve predikasiónpe. Ñañehaʼãkena jaiporu koʼã tratádo porãite ñamosarambi hag̃ua ko yvy tuichakuére la Biblia omboʼéva (Prov. 15:7a).