Umi mbaʼe jaikuaaséva
◼ ¿Mbaʼépa oaprende vaʼerã umi mitã ijerovia mbareteve hag̃ua?
Umi sy ha túva oservíva Jehovápe ojapo heta mbaʼe oipytyvõ hag̃ua ifamíliape oiko hag̃ua Ñandejára oipotaháicha (Efes. 6:4). Por ehémplo, káda pyhareve ohesaʼỹijo hendivekuéra pe téxto diário, ohechakuaágui upéva oipytyvõha ifamíliape. Heta túva ojapo jave ijestúdio de família, térã ótro moméntope, ohecha jepi umi vidéo ha upéi ohesaʼỹijo oñondivepa, oiporu avei pe lívro Mitãrusukuéra oñeporandúva jepi oñemongeta hag̃ua peteĩ témare, ojapo teatroʼi térã oñensaja umi mitãndi mbaʼéichapa ombohováita opaichagua situasión. Péro umi mitã ijerovia mbareteve hag̃ua, tekotevẽ oaprende umi mbaʼe hypyʼũvéva oĩva la Bíbliape (Heb. 6:1).
Ñapensamína ko mbaʼére, ¿mbaʼépa jaiporu jepi ñamboʼe hag̃ua umi hénte oĩvape territóriope? Javisita ñepyrũ guive ñañehaʼã ñamoñepyrũ peteĩ estúdio vívliko jaiporúvo pe lívro Mbaʼépa añetehápe omboʼe la Biblia? Ha ñamohuʼã rire upéva, jastudia hendivekuéra pe lívro “Jaikókena Ñandejára mborayhúpe”. ¿Mbaʼérepa jajapo upéicha? Jaikuaágui pe lívro Mbaʼépa omboʼe la Biblia? oipytyvõtaha chupekuéra oaprende hag̃ua umi mbaʼe iñimportantevéva oĩva Ñandejára Ñeʼẽme, pe lívro “Ñandejára mborayhu” katu oipytyvõta chupekuéra oikuaa hag̃ua mbaʼéichapa ára ha ára ikatu ojapo umi konsého oĩva la Bíbliape. Jastudiávo hendivekuéra koʼã mokõi puvlikasión ñaipytyvõ hína chupekuéra ijerovia mbareteve hag̃ua (Col. 2:6, 7). ¿Naiporãmoʼãipa avei jastudiáramo koʼã lívro ñane famíliandi? Haʼekuéra ningo oikuaa vaʼerã avei mbaʼérepa Jesús ou omano ñanderehehápe, mbaʼépa Ñandejára Rréino ha mbaʼépa oiko umi omano vaʼekuégui. Tekotevẽ avei oaprende mbaʼérepa Ñandejára opermiti ojehasa asy ha mbaʼérepa jaʼe jaikoha ára pahápe. Ñane família ohechakuaa vaʼerã Testígo de Jehová omboʼeha pe añetegua, ha ontende porã vaʼerã umi konsého oĩva la Bíbliape, ikatu hag̃uáicha ohechakuaa ‘mbaʼépa oĩ porã ha mbaʼépa oĩ vai’ (Heb. 5:14). Jaikuaa ningo káda mitã idiferenteha, upévare tuvakuéra ohecha vaʼerã mbaʼépa ikatúma ontende ifamília. Upéicharamo jepe, heta mitã ikatúma oaprende umi mbaʼe hypyʼũva oĩva la Bíbliape michĩete guive (Luc. 2:42, 46, 47).
Oñepytyvõ hag̃ua tuvakuérape ohekomboʼe porã hag̃ua ifamíliape, pe sítio jw.org-pe oñemoĩta peteĩ gía de estúdio, oñeguenohẽva pe lívro héravagui Mbaʼépa añetehápe omboʼe la Bíblia? Upéva ikatu jatopa pe párte heʼihápe ENSEÑANZAS BÍBLICAS > JÓVENES. Amo gotyove ojepreparáta avei peteĩ gía de estúdio oñeguenohẽtava pe lívro héravagui “Jaikókena Ñandejára mborayhúpe”. Péro oĩrõ jepe koʼã gía, ikatúnte avei jaiporu umi mokõi lívro ñamboʼe hag̃ua ñane famíliape. Avei, tuvakuéra ohecha vaʼerã mbaʼépa okonvenivéta; oiporútapa pe gía ojapo jave ijestúdio de família, omboʼe hag̃ua peteĩteĩme térã omokyreʼỹtapa chupekuéra ostudia hag̃ua haʼeñoháme.