Jasegíkena umi proféta ehémplo: Sofonías
1. ¿Mbaʼe tiémpopepa Sofoníasgui oiko proféta, ha mbaʼépa ñanemboʼe iñehémplo?
1 Áño 650 rupi heta hénte oikóva Judápe omombaʼeguasu vaʼekue ñandejára guaʼu Baálpe. Upe tiémpope ojejuka vaʼekue pe rréi iñañaitévape hérava Amón, ha ojupi hendaguépe Josías, peteĩ mitãʼi orekóva 8 áño (2 Crón. 33:21–34:1). Upe tiémpope avei Jehová omanda Sofoníaspe oprofetisa hag̃ua mbaʼépa ojehúta umi naiñeʼẽrendúivape. Haʼe ningo amalisia ou rréi Ezequías familiarégui, ha oiméne umi mburuvicha apytépe oĩ raʼe heta ipariénte, upéicharõ jepe ndokyhyjéi vaʼekue heʼi hag̃ua mbaʼépa oikóta hesekuéra ndojapóiramo Jehová heʼíva (Sof. 1:1; 3:1-4). Ñande avei ñandepyʼaguasu vaʼerã proféta Sofonías ojapo haguéicha, ha ani jakyhyje ñane hentekuéragui jaservi hag̃ua Jehovápe (Mat. 10:34-37). Jahechamína mbaʼépa oprofetisa vaʼekue Sofonías ha mbaʼépa ohupyty ojapo rupi upe tembiapo.
2. ¿Mbaʼépa jajapo vaʼerã jajesalva hag̃ua ág̃a Jehová ohundi vove umi iñañávape?
2 “Pehekákena Jehovápe.” Jehová añoite ningo ikatu osalva umi héntepe og̃uahẽ vove pe día ohunditahápe umi naiñeʼẽrendúivape. Upéicha rupi, proféta Sofonías heʼi porã umi héntepe oheka hag̃ua Jehovápe, oiko hag̃ua hekopete ha iñeʼẽrendu hag̃ua Ñandejárape oĩ reheve tiémpo (Sof. 2:2, 3). Koʼág̃arupi, ñande avei jajapo Sofonías ojapo haguéicha ñamokyreʼỹvo umi héntepe oheka hag̃ua Ñandejárape. Péro ñande voi jaheka vaʼerã Jehovápe ha jajedesidi ñaneñeʼẽrendutaha chupe toiko la oikóva (Sof. 1:6). Jahechaukáta jahekaha Jehovápe jastudia porãramo la Biblia ha jajeruréramo chupe tañanepytyvõ jaguata hag̃ua hapére. Ha ojekuaáta ñanderehe jaikoseha hekópe ndajahejáiramo ko múndo ñanemongyʼa. Ha jahechauka hína ñaneñeʼẽrenduha jajapóramo kyreʼỹme umi instruksión oúva Jehová organisasióngui.
3. ¿Mbaʼe iporãvapa ikatu jahupyty ñanekyreʼỹramo predikasiónpe?
3 Umi mbaʼe porã ojehupytýva. Heta hénte nopenái vaʼekue Sofoníasre, péro oĩ avei heta ohendúva chupe, umíva apytépe oĩ kuri rréi Josías. Haʼe oñepyrũ oservi Jehovápe imitã guive. Ha ndoguerohoryiete vaʼekue pe idolatría oĩva Judápe, upévare ohundikapaite umi ñandejára guaʼu raʼanga ha umi lugár oñemombaʼeguasuha koʼãvape (2 Crón. 34:2-5). Ñane tiémpope, oĩ avei okambiáva ohendúvo umi mbaʼe porã ojapótava Ñandejára Rréino. Umíva hína umi semílla hoʼáva yvy porãme. Péro heta hénte korasõme ndokakuaái pe semílla térã pe mensáhe jagueraháva (Mat. 13:18-23). Upéicharõ jepe Jehová osegíta ñanepytyvõ ñamosarambi hag̃ua opárupi pe semílla térã pe mensáhe oñeʼẽva Irréinore (Sal. 126:6).
4. ¿Mbaʼépa jajapo vaʼerã ñahaʼarõ aja Jehová ára guasu, ha mbaʼérepa?
4 Heta hénte oikóva Judápe opensa vaʼekue Jehová arakaʼeve ndojapomoʼãiha mbaʼeve. Péro Haʼe heʼi porã kuri chupekuéra hiʼag̃uimbaitemaha pe ára ohundi hag̃ua umi hénte añáme (Sof. 1:12, 14). Ha umi iñeʼẽrendúva añoite ikatúta kuri ojesalva (Sof. 3:12, 17). Ñande avei ñahaʼarõ hína og̃uahẽ Jehová ára guasu, ha upe aja tekotevẽterei jaservi kyreʼỹme Ñandejárape ñane ermanokuérandi (Sof. 3:8, 9).