¡Cien áñoma japredika Ñandejára Rréino!
1. ¿Mbaʼépa heʼi vaʼekue ermáno Rutherford tekotevẽha ojapo Jehová siervokuéra?
1 “¡Péina, pe Rréi ogovernáma! Peẽ peñeʼẽ vaʼerã hérape. Upévare, tapeho peikuaauka, peikuaauka, peikuaauka mávapa pe Rréi ha irréino”. Haimetéma cien áño ermáno Rutherford omokyreʼỹ hague Jehová siervokuérape omombeʼu hag̃ua ko yvy tuichakuére mbaʼépa ojapóta Ñandejára Rréino. ¡Ha ojejapóma upéva! Umi kristiáno síglo primérope guare ojapo haguéicha, koʼág̃a avei ñamog̃uahẽma pe marandu porã Ñandejára Rréino rehegua “oparupiete ko múndope” (Col. 1:23). ¿Mbaʼe mbaʼépa ojejapo koʼã cien áñope oñeñeʼẽ hag̃ua opárupi Ñandejára Rréinore? ¿Mbaʼépa ikatu jajapo jasegi hag̃ua ñañeʼẽ Ñandejára Rréinore oñekumpli potávo koʼã cien áño de goviérno?
2. ¿Mbaʼépa oikuaauka ñane puvlikasionkuéra ymaite guive?
2 Umi mbaʼe ojejapo vaʼekue. Ñane puvlikasionkuéra ningo ymaite guive oñeʼẽ Ñandejára Rréinore. Por ehémplo, pe rrevísta Ñemañaha. Oikuaauka Jehová Sãmbyhy, áño 1939 guive oñeʼẽ meme umi mbaʼe porã ojapótavare Ñandejára goviérno. Ha pe rrevísta ¡Despertad! ohechauka porã upe Rréino añoite ikatuha osolusiona umi provléma oĩva ko múndope. ¡Ajépa javyʼaite koʼã rrevísta ojetradusi haguére hetaiterei idiómape ha avei oñemosarambi haguére oparupiete ko yvy ape ári! (Apoc. 14:6)
3. Emombeʼu mbaʼe mbaʼépa ojejapo ojekuaauka hag̃ua oparupiete pe marandu porã.
3 Ymaite guive, ojejevale heta mbaʼére ojekuaauka hag̃ua opárupi pe marandu porã. Por ehémplo, yma ojeporu umi áuto iparlánte tuichaicháva, avei oñetransmiti vaʼekue rrádiope umi diskúrso vívliko, ha ojegueraha predikasiónpe peteĩ aparáto hérava gramófono. Upe tiémpope ndahetái vaʼekue la puvlikadór, upévare koʼã mbaʼe tuicha oipytyvõ oñemog̃uahẽ hag̃ua heta héntepe umi notísia porã (Sal. 19:4). Ñane tiémpope katu oñeguenohẽ heta puvlikasión pe sítio jw.org-pe, ikatu hag̃uáicha ojekuaauka Ñandejára Rréino hetaiterei héntepe. Koʼã informasión og̃uahẽ avei umi lugár ojeproivihápe jepe ñane predikasión.
4. ¿Mbaʼépa ojejapo avei ojekuaauka hag̃ua Ñandejára Rréino hetave héntepe?
4 Jehová siervokuéra ndahaʼéi ogahárupinte opredikáva. Por ehémplo, áño 1985 rupi, ojepredika umi plásape, paráda de kolektívo ha negosiohárupi. Ndaʼareiete katu, umi sukursál oorganisa avei peteĩ predikasión umi siuda tuichávape, upearã omoĩ karríto térã mesíta umi lugár hetahápe hénte. Ha heta kongregasión ojapo avei upéva iterritóriope. Péro ojejapóramo jepe koʼã mbaʼe, jasegi gueteri japredika ogahárupi, upéicha ñaipytyvõ porãve rupi umi héntepe (Hech. 20:20).
5. ¿Mbaʼépa ikatu jajapo oñepyrũvo pe áño de servísio 2015?
5 Umi mbaʼe ikatúva jajapo. Septiémbrepe oñepyrũta hína pe áño de servísio 2015, ha heta ermáno ojapóta iprekursorádo rregulár upe mes guive. Ha nde, ¿rejapótapa avei nde prekursorádo rregulár? Péro oimérõ ndaikatumoʼãi, ¿repensápa rejapóvo sapyʼapyʼa jepe nde prekursorádo auxiliár? Ikatu ningo oime ndaijamoʼãi ndéve rejapo hag̃ua nde prekursorádo rregulár ni nde auxiliár. Upéicharõ jepe, rejapóramo ikatúva guive rembaʼapove hag̃ua Jehová servísiope, haʼe katuete nevendesíta (Mal. 3:10).
6. ¿Mbaʼérepa jaʼe octubre de 2014 haʼeha peteĩ fécha iñimportánteva?
6 Octubre 2014-pe oñekumplíta cien áño Ñandejára Rréino oñepyrũ hague ogoverna. Upéicha rupi pe Ñemañaha púvliko octubrepegua oñeʼẽta exclusívamente Ñandejára Rréinore. Upévare, ñañehaʼãmbaitékena jakoloka ko rrevísta heta héntepe. Ha jajapókena ikatúva guive ñamog̃uahẽ hag̃ua “pe marandu porã oñeʼẽva Ñandejára Rréinore” opavave ñanerendusévape (Hech. 8:12).