Jajeroviave hag̃ua
1. ¿Mbaʼépa jastudiáta kongregasiónpe semána 19 de octubre guive?
1 Semána 19 de octubre guive jastudiáta kongregasiónpe pe lívro Jajeroviave hag̃ua. Ko puvlikasiónpe oñeñeʼẽ 14 kuimbaʼe ha kuña ijerovia mbarete vaʼekuére. Jaleévo ko lívro jahechakuaáta mbaʼe mbaʼépa ohasa vaʼekue káda uno iñeʼẽrendu rupi Jehovápe. Upéicha haʼetéta voi jaikuaáva chupekuéra en persóna ha ñaaprendéta chuguikuéra heta mbaʼe porã (Heb. 6:12).
2. Emombeʼu mbaʼe mbaʼépa oreko pe lívro Jajeroviave hag̃ua.
2 Umi mbaʼe orekóva ko lívro. Ko lívrope jatopáta peteĩ línea de tiémpo ha avei peteĩ mápa ohechaukáva arakaʼe ha moõpa oiko vaʼekue Ñandejára siervokuéra. Káda kapítulo opakuévo oĩ peteĩ párte heʼíva “Jajepyʼamongeta hag̃ua”, upéva ñanepytyvõta ñapensa hag̃ua umi istóriare ha jahecha hag̃ua mbaʼéichapa ikatu ñamoĩ en práktika umi mbaʼe ñaaprendéva chuguikuéra. Oreko avei umi divúho iporãitereíva orekóva heta detálle, koʼãva ojeprepara ikatu hag̃uáicha ñañeimahina ha jahechapa voi umi mbaʼe oikóva.
3. ¿Mbaʼéichapa jastudia vaʼerã ko lívro ñañevenefisia hag̃ua chugui?
3 Mbaʼéichapa ikatu ñañevenefisia ko lívrogui. Ko lívro oñepyrũvo oĩ peteĩ kárta oskrivi vaʼekue Kuérpo Governánte, ha peteĩ párte heʼi: “Peleévo ko lívro, peñehaʼã peñatende porã, peñeimahina peimerõguáicha upépe ha pepensa mbaʼépa peẽ pejapo vaʼerãmoʼã peimérire upe situasiónpe. Upéicha pejapóramo, haʼetéta voi peñandúva umi mbaʼe ohasa vaʼekue hikuái”. Upéva heʼise ñañemotiémpo vaʼerãha jajepyʼamongeta hag̃ua umi rrelátore (Neh. 8:8). Pe párte ojestudiátava peteĩ semánape oñepyrũrõ pe kapítulo mbytérupi, pe ermáno odirihíva pe estúdio ikatu omombeʼu mbaʼépa ñaaprende pe semána pasáda, péro ndohasái vaʼerã un minúto. Ha peteĩ semánape, pe ojestudiátava ndorekóiramo pe párte heʼíva “Jajepyʼamongeta hag̃ua”, opakuévo pe estúdio ikatu ojapo peteĩ térã mokõi pregúnta de rrepáso.
4. ¿Mbaʼérepa iñimportánte jastudia ko lívro?
4 Ko múndo oĩva Satanás poguýpe ningo omokangyse ñande jerovia ha ñanemomombyryse Jehovágui. Péro ani hag̃ua oiko upéva, Jehová orregala ñandéve ko lívro ha umi artíkulo osẽva jepi Ñemañaháme, hérava avei Jajeroviave hag̃ua (Sant. 1:17). Aníkena jafalta rreunionhápe ojestudia vove ko lívro ha ñañehaʼã ñakomenta, péicharõmante ñañevenefisiáta umi mbaʼe omboʼévagui.