Mbaʼéichapa ikatu ñamog̃uahẽ pe mensáhe umi hénte korasõme
1. ¿Mbaʼéichapa oñeñandu vaʼekue Jesús disipulokuéra ohendúrõ guare chupe?
1 Umi mbaʼe Jesús omboʼéva ningo opokoiterei vaʼekue umi hénte korasõre. Peteĩ vuéltape idisipulokuéra heʼi voi oñandu hague ikorasõ “hendytarõguáicha” chuguikuéra ohendúvo umi mbaʼe Jesús heʼíva (Luc. 24:32). Jehová ningo oipota ñaneñeʼẽrendu chupe ñande pyʼaite guive, ¿mbaʼéichapa ikatu ñaipytyvõ ñane estudiánte okambia hag̃ua iñeʼẽrenduségui Jehovápe? (Rom. 6:17.)
2. ¿Mbaʼéichapa ikatu ñag̃uahẽ umi hénte korasõme?
2 Ñañehaʼãkena ñantende umi héntepe. Umi hénte ningo nokambiamoʼãi jaʼe haguérente chupekuéra mbaʼépa oĩ porã ha mbaʼépa oĩ vai. Ha jaleéramo chupekuéra heta téxto ohechaukáva umi mbaʼe ogueroviáva oĩ vaiha, ikatu nañanerendusevéi. Upévare, ikatu hag̃uáicha ñanerendu porã hikuái, tekotevẽ ñantende raẽ mbaʼérepa oguerovia ha ojapo heta mbaʼe. Upéi ikatu ñaporandu chupekuéra umi mbaʼe ñanepytyvõtava jaikuaa hag̃ua mbaʼépa opensa (Prov. 20:5). Upéicharõmante ikatúta jaikuaa mbaʼe téxtopa opokóta ikorasõre. Upearã tekotevẽ jajeprepara porã ha ñanepasiénsia hesekuéra (Prov. 25:15). Káda persóna ningo idiferénte, upévare ñanepasiénsia vaʼerã ha jaheja pe espíritu sánto toipytyvõ chupekuéra okambia hag̃ua opensa ha oiko lája (Mar. 4:26-29).
3. ¿Mbaʼéichapa ikatu ñaipytyvõ ñane estudiántepe oreko hag̃ua umi kualida iporãva?
3 Ñaipytyvõkena ñane estudiántepe oreko hag̃ua umi kualida iporãva. Ñaanalisáramo hendivekuéra umi téxto ohechaukáva mbaʼéichapa Jehová ñanderayhu ha imbaʼeporã, ñaipytyvõta chupekuéra osegise hag̃ua Jehová ehémplo. Ohechakuaa hag̃ua hikuái Jehová oñeinteresaha ñanderehe, ikatu jalee hendivekuéra Salmos 139:1-4 ha Lucas 12:6, 7. Umi oagradeséva Jehovápe imbaʼeporã haguére, katuete ohayhuve ha oservise chupe (Rom. 5:6-8; 1 Juan 4:19). Ñane estudiánte oikuaávo mbaʼéichapa oñeñandu Jehová umi mbaʼe jajapóvare, ojaposéta umi mbaʼe omombaʼeguasu ha ombovyʼátava chupe (Sal. 78:40, 41; Prov. 23:15).
4. ¿Mbaʼéichapa ikatu jasegi Jehová ehémplo ñamboʼe jave ñane estudiántepe?
4 Jehová ningo nañandeovligái jajapo hag̃ua haʼe oipotáva, síno ohechauka ñandéve mbaʼérepa iporã jasegi ikonsého (Is. 48:17, 18). Jasegíkena Jehová ehémplo ha jaheja ñane estudiántepe haʼete todesidi umi mbaʼe ojapótava. Péicharõmante okambiáta ipyʼaite guive ha káda día oñemoag̃uivéta Jehováre (Rom. 12:2). Jehová añoite ningo oikuaa mbaʼépa jareko ñane korasõme (Prov. 17:3).