Jasegíkena umi proféta ehémplo: Habacuc
1. ¿Mbaʼérepa ñantende porãiterei mbaʼéichapa oñeñandu vaʼekue proféta Habacuc?
1 Jahechávo mbaʼéichapa káda día heta hetave mbaʼe vai oiko ko múndope, ikatu hína ñañeñandu Habacuc oñeñandu haguéicha. Haʼe ningo oporandu vaʼekue voi Jehovápe mbaʼérepa opermiti oiko hetaite mbaʼe vai (Hab. 1:3; 2 Tim. 3:1, 13). Upévare, jajepyʼamongetáramo umi mbaʼe heʼi vaʼekuére, mbaʼéichapa oaguanta ha osegi iñeʼẽrendu Jehovápe, ñanepytyvõta avei ñandéve ñaaguanta hag̃ua og̃uahẽ meve Jehová ára guasu (2 Ped. 3:7).
2. ¿Mbaʼéichapa ikatu jasegi proféta Habacuc ehémplo?
2 Jasegíkena ñaneñeʼẽrendu. Proféta Habacuc ndoikói vaʼekue oñelamenta umi mbaʼe ohasávare, upéva rangue oñatende porã ha ombaʼapo kyreʼỹ Jehová servísiope tódo el tiémpo (Hab. 2:1). Jehová oasegura vaʼekue chupe umi mbaʼe heʼíva katuete oñekumplitaha itiempoitépe ha umi oservíva chupe osegitaha oikove (Hab. 2:2-4). ¿Mbaʼépa ikatu ñaaprende upévagui? Ñande ningo jaiko hína umi ára pahápe, ha iñimportanteve ñaime segúro pe fin katuete outaha, jaiko rangue ñapensaiterei arakaʼetépa oikóta upéva. Jajeroviáramo Jehováre, ñaiméta siémpre preparádo ha ñamotenondéta pe predikasión (Heb. 10:38, 39).
3. ¿Mbaʼérepa tekotevẽ jasegi vyʼápe jaservi Jehovápe?
3 Javyʼa jaservi haguére Jehovápe. Ág̃a Gog de Magog oataka vove Jehová siervokuérape, ojekuaáta imbarete porãpa hína ñande jerovia (Ezeq. 38:2, 10-12). Oiko jave peteĩ gérra ningo opa mbaʼénte ijetuʼu, pe oganáva jepe heta osufri. Umivakuére la hénte operdepa jepi ikosakuéra, saʼive oĩ la hiʼupy ha hetave oĩ oiko asýva. ¿Mbaʼépa jajapóta jajecha vove koʼãichagua situasiónpe? Proféta Habacuc oikuaa vaʼekue ohasataha heta mbaʼe ijetuʼúva, péro haʼe ojedesidi osegitaha ovyʼa oservi haguére Jehovápe (Hab. 3:16-19). Ñandéve avei ifasilvéta ñaaguanta hag̃ua umi mbaʼe ijetuʼúva, jajedesidíramo javyʼataha jaservi haguére Jehovápe (Neh. 8:10; Heb. 12:2).
4. ¿Mbaʼe oportunidápa jareko koʼág̃ama voi ha mbaʼépa jasegíta jajapo múndo pyahúpe?
4 Jehová osegíta ohekomboʼe umi oikévape pe múndo pyahúpe (Hab. 2:14). Umi oikove jeýva oaprendéta heta mbaʼe Jehovágui. Upévare, jajedesidíkena koʼág̃a guive jaaprovechapaitetaha opaichagua oportunida ñañeʼẽ hag̃ua hese ha umi mbaʼe porãita ojapóvare (Sal. 34:1; 71:17).