Ñande jahayhueterei ñande Ru Jehovápe

1, 2. ¿Mbaʼérepa Jehová omeʼẽ ñandéve la oportunida ñaime hag̃ua ifamíliape, ha mbaʼéichapa ojapo upéva?

JEHOVÁ ningo ñaneinvita ñaime hag̃ua ifamília apytépe, oĩháme isiervokuéra oadoráva chupe. ¡Ajépa iporãite ko invitasión! Enterove ñaiméva ko famíliape ñañemeʼẽma Ñandejárape ha jajerovia Itaʼýra sakrifísiore. Ko famíliape ningo enterove javyʼaiterei. Koʼág̃ama voi ñande rekove isentído, ha javyʼa jarekógui esperánsa jaikovévo pára siémpre, tahaʼe yvágape térã peteĩ paraísope ko yvy ape ári.

² Ñanderayhu rupi, Jehová ojapo vaʼekue peteĩ sakrifísio tuichaitereíva ikatu hag̃uáicha ñaime ifamília apytépe (Juan 3:16). La Biblia heʼi voi: “Haʼe opaga hepy penderehe” (1 Cor. 6:20). Pe rreskáte rupive Ñandejára omeʼẽ ñandéve la oportunida jareko hag̃ua hendive peteĩ amista iporãitereíva. Ñande jareko pe priviléhio jaʼévo pe persóna iñimportantevéva oĩva ko univérsope haʼeha ñande Túa. Ha jahecha haguéicha pe artíkulo ohasa vaʼekuépe, ndaipóri ótro túa ikatu vaʼerã oñembojoja Jehováre.

3. ¿Mbaʼe mbaʼépa ikatu hína ñañeporandu? (Ehecha avei pe rrekuádro “¿Añetehápe piko Jehová ojepyʼapy cherehe?”).

³ Oiméne ñande ñapensa avei pe salmísta opensa haguéicha: “Jehová ivuenoiterei chendive, ¿mbaʼéicha piko che apagapáta chupe?” (Sal. 116:12). Péro añetehápe núnka ndaikatumoʼãi japagapa Jehovápe entéro mbaʼe ojapóva ñanderehehápe. Upéicharõ jepe, pe mborayhu haʼe ohechaukáva ñandéve ñanemomýi jahayhu hag̃ua avei chupe. Apóstol Juan oskrivi vaʼekue: “Ñande katu japorohayhu, Ñandejára raẽve ñanderayhu rupi” (1 Juan 4:19). ¿Mbaʼéichapa ikatu jahechauka ñande Túa Jehovápe jahayhuha chupe?

ÑAÑEMOAG̃UÍKENA SIÉMPRE JEHOVÁRE

4. Heʼiháicha Santiago 4:8, ¿mbaʼérepa ñañehaʼã vaʼerã ñañemoag̃ui Jehováre?

⁴ Jehová ningo oipota ñañemoag̃ui hese ha ñañemongeta meme hendive (elee Santiago 4:8). Haʼe ñanemokyreʼỹ ‘siémpre ñañemboʼe hag̃ua’ chupe, ha haʼe katuete oñemotiémpota ñanerendu hag̃ua (Rom. 12:12). Jehová ndahaʼéi ku hembiapoitereíva térã ikaneʼõitereíva ohendu hag̃ua ñane ñemboʼe. ¿Ha mbaʼéichapa ñande ikatu ñahendu chupe? Jaleévo la Biblia ha umi puvlikasión ñanepytyvõva ñantende porãve hag̃ua upéva. Avei ñahendu chupe ñañatende porãvo umi mbaʼe ojeʼéva rreunionhápe. Umi mitã oñemongeta memérõ itúandi, oñandu oĩha ag̃uiete chugui, péicha avei ñande ñañemongeta memérõ Jehovándi ha ñahendu chupe, ñañandúta ñaimeha ag̃uiete chugui.

5. ¿Mbaʼépa jajapo vaʼerã iporãve hag̃ua umi ñane ñemboʼe?

⁵ ¿Mbaʼeichagua ñemboʼépa jajapo ñande Ru Jehovápe? Haʼe ningo oipota ñamombeʼupaite chupe umi mbaʼe ñapensáva ha ñañandúva (Sal. 62:8). Upévare iporã ñañeporandu: “¿Mbaʼépepa ojogua umi ñemboʼe ajapóva Jehovápe? ¿Haʼetépa peteĩ kárta chete voi askrivi vaʼekue, amoĩháme entéro mbaʼe osẽva che korasõite guive ha añomiʼỹre mbaʼeve? ¿Térãpa ojoguánte peteĩ eskelaʼípe, siémpre afotokopiáva amondo hag̃ua?”. Katuete ningo jahayhu Jehovápe ñande pyʼaite guive, ha amás día ñañemoag̃uiseve hese. Upearã pyʼỹinte ñañemongeta vaʼerã hendive. Jehová haʼe vaʼerã ñane amígo de konfiánsa. Upévare ñamombeʼu vaʼerã chupe entéro mbaʼe, umi mbaʼe ñandepyʼapýva, ñanembovyʼáva ha umi mbaʼe ijetuʼúva jepe ñandéve ñamombeʼu hag̃ua ótrope. Ñaime vaʼerã segúro ñande siémpre ikatuha jajerure chupe ajúda ñaikotevẽ jave.

6. ¿Mbaʼépa jajapo vaʼerã siémpre ñaĩséramo ag̃uiete ñande Ru Jehovágui?

⁶ Siémpre ñaĩséramo ag̃uiete ñande Ru Jehovágui tekotevẽ ñandeagradesído. Ñande jaikuaa siertoha pe salmísta heʼi vaʼekue: “Ñandejára, avave ndaikatúi oñekompara nderehe. Iporãitereíma umi ne rembiapokue ha umi mbaʼe reipotáva oréve g̃uarã. Jehová, hetaite mbaʼéma ningo rejapo, ni añehaʼãvéramo ndaikatumoʼãi amombeʼupa, pórke hetaiterei umíva” (Sal. 40:5). Péro ñande ndahaʼéi ñañandúnteva jaagradese vaʼerãha Jehovápe, síno jahechauka chupe upéva umi mbaʼe jaʼe ha jajapóvare. Upéicha rupi ñanediferénte umi ótro héntegui. Koʼág̃arupi umi hénte oikóva ko múndope ndoagradeséi Ñandejárape umi mbaʼe ojapóvare hesehapekuéra. Añetehápe ojekuaa porã jaikomaha “umi ára pahápe”, pórke umi hénte imalagradesidoiterei (2 Tim. 3:1, 2). ¡Aníkena núnka ova ñanderehe umi hénte lája!

7. ¿Mbaʼépa Jehová oipota jajapo, ha mbaʼérepa?

⁷ Tuakuéra ningo ndoipotái ifamília oiko vai, síno oipota ojogueraha porã. Ha Jehová oipota avei entéro umi oĩva ifamíliape ojogueraha porã. Pe mborayhu ñañandúva ojuehe ningo haʼe voi peteĩ márka ohechaukáva ñande haʼeha kristiáno tee (Juan 13:35). Peteĩ salmísta oskrivi vaʼekue: “Ajépa iporã ha igustoite umi ermáno oiko porãrõ oñondivepa peteĩ famíliaicha” (Sal. 133:1). ¡Ajépa ñande avei ñañeñandu upéicha! Jahayhu jave ñane ermáno ha ñane ermanakuérape jahechauka hína jahayhuha Jehovápe (1 Juan 4:20). Javyʼaite ningo ñaime haguére ko famíliape, pórke enterovénte ‘imbaʼeporã oñondive ha ojoporiahuvereko’ (Efes. 4:32).

JAHECHAUKÁKENA JAHAYHUHA JEHOVÁPE ÑANEÑEʼẼRENDÚVO CHUPE

8. Asegún 1 Juan 5:3, ¿mbaʼérepa prinsipálmente ñaneñeʼẽrendu Jehovápe?

⁸ Jehová oipota umi mitã iñeʼẽrendu ituakuérape, ha péicha avei haʼe oipota ñaneñeʼẽrendu chupe (Efes. 6:1). Haʼe omerese voi ñaneñeʼẽrendu chupe pórke haʼe hína ñande Apohare, omeʼẽ ñandéve opa mbaʼe ñaikotevẽva jasegi hag̃ua jaikove, ha haʼe hína pe túa iñaranduvéva oĩva. Péro prinsipálmente ñaneñeʼẽrendu Jehovápe jahayhúgui chupe (elee 1 Juan 5:3). Añetehápe Jehová omerese voi ñaneñeʼẽrendu chupe heta mbaʼére, péro haʼe nañandeovligái jajapo hag̃ua upéva. Jehová omeʼẽ ñandéve liverta jadesidi hag̃ua, upévare ovyʼaiterei ñandejeheguiete jadesidíramo ñaneñeʼẽrendutaha chupe jahayhúgui chupe.

9, 10. ¿Mbaʼérepa iñimportánte jaikuaa ha ñakumpli umi mandamiénto omeʼẽva Ñandejára?

⁹ Tuakuéra ningo oipota ifamília osẽ porã. Upéicha rupi haʼekuéra heʼi ifamíliape mbaʼépa ovale térã ndovaléi ojapo, ha péicha oprotehe chupekuéra. Umi mitã okumplíramo umi mbaʼe ojeruréva ituakuéra, ohechauka okonfiaha hesekuéra ha orrespetaha ituakuérape. Ha ñande kásope koʼýte iñimportanteve jaikuaa ha ñakumpli umi mandamiénto omeʼẽva ñande Ru yvagapegua. Péicha jahechauka jahayhu ha jarrespetaha Jehovápe, ha añetehápe ou porãiterei ñandéve ñakumplíramo umi mandamiénto (Is. 48:17, 18). Péro umi orrechasáva Jehovápe ha umi imandamientokuéra, tuichaiterei ojeperhudika (Gál. 6:7, 8).

¹⁰ Jaikóramo Jehovápe ogustaháicha, jajeprotehe umi mbaʼe ikatúvagui ñanemoñeñandu vai, operhudika ñande salu, térã ombyai pe amista jarekóva hendive. Jehová ningo oikuaa mbaʼépa iporãve ñandéve g̃uarã. Aurora, peteĩ ermána oikóva Estados Unídospe heʼi: “Che aikuaa cheñeʼẽrendúramo Jehovápe, siémpre avyʼa ha aiko porãvetaha”. Ha upéva enterovévare ikatu oñekumpli. ¿Mbaʼe iporãvapa nde rehupytýma rekumplívo umi mbaʼe Jehová omandáva ñanderayhu rupi?

11. ¿Mbaʼéichapa ñanepytyvõ pe ñemboʼe?

¹¹ Pe ñemboʼe ningo ñanepytyvõ ñaneñeʼẽrendu hag̃ua Ñandejárape, sapyʼánte ijetuʼúramo jepe upéva. Enterovéva ningo pekadór, upéicha rupi sapyʼánte ñañehaʼãmbaite vaʼerã ñaneñeʼẽrendu hag̃ua Jehovápe. Péro aníkena ñañentrega, upéva rangue jasegi vaʼerã jajapo ikatúva entéro ñakumpli hag̃ua Jehová ojeruréva ñandehegui. Peteĩ salmísta ojerure asy vaʼekue Ñandejárape: “Chepytyvõna cheñeʼẽrenduse hag̃ua ndéve” (Sal. 51:12). Peteĩ prekursóra rregulár hérava Denise omombeʼu: “Ijetuʼúramo chéve akumpli peteĩ mbaʼe Jehová omandáva, ajerure chupe tachemombarete ajapo hag̃ua pe iporãva”. Aníkena jaduda Jehová katuete okontestataha peichagua ñemboʼe (Luc. 11:9-13).

ÑAIPYTYVÕKENA ÓTROPE OHAYHU HAG̃UA AVEI ÑANDE RÚPE

12. ¿Mbaʼépa ñande jajapo vaʼerã, heʼiháicha Efesios 5:1?

¹² (Elee Efesios 5:1). Ñande ningo Jehová família “haʼe ohayhuetéva”, upévare ñañehaʼãmbaite jasegi iñehémplo. Ñande jahechauka jajoguaseha chupe japorohayhúvo, ñanembaʼeporãvo ha ñaporoperdonávo. Umi persóna ndoikuaáiva Ñandejárape ohecha jave ñanekondúkta porãha, ikatu hína oaprendeseve chugui (1 Ped. 2:12). Umi tuakuéra kristiáno oñehaʼã vaʼerã otrata ifamiliakuérape Jehová ñandetrataháicha. Upéva ikatu omomýi umi mitãme orekose hag̃ua avei peteĩ amista ñande Ru Jehovándi.

13. ¿Mbaʼépa jajapo vaʼerã ñandepyʼaguasu hag̃ua?

¹³ Peteĩ mitã oĩva orgullóso itúare ningo omombeʼuse enterovépe mbaʼeichaguápa itúa. Upéicha avei ñande ñaĩ orgullóso ñande Túa Jehováre, ha jaipota umi ótro oikuaa avei chupe. Ñande ñañeñandu rréi David oñeñandu haguéicha oskrivírõ guare: “Cheorgullósota amombaʼeguasúvo Jehovápe” (Sal. 34:2). ¿Péro mbaʼépa ikatu jajapo ñaneotĩramo? ¿Mbaʼépa ñanepytyvõta pyʼaguasúpe ñañeʼẽ hag̃ua Jehováre? Upearã ñapensa vaʼerã mbaʼeichaitépa ñambovyʼáta Jehovápe jajapóramo upéva, ha avei mbaʼéichapa oipytyvõta umi héntepe oikuaáramo chupe. Jehová ningo katuete ñanembopyʼaguasúta. Ñanemanduʼa vaʼerã haʼe oipytyvõma hague péicha umi kristiáno oiko vaʼekuépe síglo primérope, ha ñandéve avei katuete ñanepytyvõta (1 Tes. 2:2).

14. ¿Mbaʼérepa iñimportánte japredika?

¹⁴ Jehovápe g̃uarã ningo enterove ñande peteĩchapa, upévare ovyʼa ñande jahechauka jave jahayhuha ñande rapichápe, tahaʼe haʼéva la hetã, moõpa okakuaa vaʼekue térã mbaʼeichagua persónapa (Hech. 10:34, 35). ¿Mbaʼéichapa ikatu jahechauka jahayhuha umi héntepe? Prinsipálmente jajapo upéva japredikávo chupekuéra umi notísia porã (Mat. 28:19, 20). Pe predikasión ningo iñimportanteterei pórke umi ñanerendúva ikatu oiko porãve koʼág̃ama voi, ha oreko hikuái la esperánsa oikóvo pára siémpre pe paraísope (1 Tim. 4:16).

JAHAYHÚRAMO ÑANDE TÚAPE KATUETE JAVYʼÁTA

15, 16. ¿Mbaʼe mbaʼépa ñanembovyʼa ñandéve?

¹⁵ Ñande Ru Jehová ningo ñanderayhueterei, upévare oipota entéro umi oĩva ifamíliape ovyʼa (Is. 65:14). Jahasáramo jepe heta mbaʼe ijetuʼúva, jareko avei heta mbaʼe ñanembovyʼáva koʼág̃ama voi. Por ehémplo, jaikuaa porã ñande Ru yvagapegua ñanderayhuetereiha. Jaikuaa avei mbaʼépa añetehápe omboʼe la Biblia (Jer. 15:16). Ha ñaime peteĩ família ndaijojaháivape, oĩháme persóna ohayhúva Jehovápe, imandamientokuéra ha avei ojoayhúva (Sal. 106:4, 5).

¹⁶ Javyʼa avei jaikuaa rupi amo gotyove iporãvetantemaha la situasión. Jaikuaa porã Jehová koʼẽrõitéma ohunditaha umi iñañávape, ha ojevaletaha Irréinore oiko jey hag̃ua peteĩ paraíso ko yvýgui. Jareko avei pe esperánsa iporãitéva oikove jeytaha umi jahayhúva omano vaʼekue, ha ikatutaha ñaime jey hendivekuéra (Juan 5:28, 29). ¡Ajépa iporãite umi mbaʼe ñaneraʼarõva! Ha iñimportanteveha, ñaime segúro koʼẽrõitéma enterove umi oikóva yvágape ha avei ko yvy ape ári, jaadora ha ñamombaʼeguasutaha ñande Ru ñanderayhuetévape haʼe omereseháicha.