Aníkena jaheja pe envídia ombyai pe pyʼaguapy

1. ¿Mbaʼépa oiko vaʼekue José rogapýpe iñermanokuéra iñenvidióso rupi?

JACOB ohayhu vaʼekue enterove itaʼyrakuérape, péro ombojeroviave vaʼekue Josépe, orekóva 17 áño. ¿Mbaʼéichapa orreaksiona iñermanokuéra ohechakuaávo upéva? Haʼekuéra oñepyrũ oenvidia chupe, ha opyta ipyʼaro hese hikuái. José ningo ndojapói kuri mbaʼeve peichaite peve ndochaʼéi hag̃ua hese iñermanokuéra. Upéicharõ jepe, haʼekuéra ovende chupe esklávoramo, ha ijapu hikuái itúape. Haʼekuéra heʼi itúape peteĩ animál salváhe ojuka hague pe itaʼýra ohayhuvévape. Iñenvidióso rupi, José ermanokuéra ombyai pe pyʼaguapy oĩva hogapýpe ha omoñeñandu vaieterei itúape (Gén. 37:3, 4, 27-34).

2. ¿Mbaʼérepa ipeligrosoiterei pe envídia, ohechaukaháicha Gálatas 5:19-21?

² La Biblia omombeʼu oĩha “umi mbaʼe vai ogustáva yvypóra rete imperféktope”. Umíva ningo ipeligrosoiterei, ha upevakuére peteĩ persóna ikatu hína ndoikéi Ñandejára Rréinope. Ha umi mbaʼe vai apytépe oĩ hína pe envídiab (elee Gálatas 5:19-21). Pe envídia oñembohapóramo ñane korasõme, upe rire ikatúma hína ñandearhél, ñandepochyeterei ha ñañorairõ ótrondi.

3. ¿Mbaʼépa jahecháta ko artíkulope?

³ José ermanokuéra ehémplo ohechauka porã pe envídia káusare ikatuha hína ndajajoguerahaporãvéi ótrondi, ha ñambyai pe pyʼaguapy oĩva peteĩ ogapýpe. Ñande ningo núnka ndajajapomoʼãi la José ermanokuéra ojapo vaʼekue, péro ñane korasõ iñimperfékto ha itraisionéro hína (Jer. 17:9). Upévare sapyʼánte ikatu jaju ñaneenvidióso. Jahechamína unos kuánto ehémplo oĩva la Bíbliape, umíva ñanepytyvõta japilla hag̃ua mbaʼérepa pe envídia ikatu heñói ñane korasõme. Upéi jahecháta mbaʼéichapa ikatu jaipeʼa upéva ñandejehegui, ha mbaʼépa ikatu jajapo siémpre oĩ hag̃ua pyʼaguapy.

¿MBAʼÉICHA RUPÍPA SAPYʼÁNTE ÑANEENVIDIÓSO?

4. ¿Mbaʼérepa umi filisteo oenvidia vaʼekue Isaácpe?

⁴ Oĩramo iplatavéva ñandehegui. Isaac ningo irrikoiterei vaʼekue, ha umi filisteo oñepyrũ vaʼekue oenvidia chupe pórke oreko hetaiterei mbaʼe (Gén. 26:12-14). Upéicha rupi, haʼekuéra ojagarra voi ojatypa umi póso Isaac oipurúva omboyʼu hag̃ua hymbakuérape (Gén. 26:15, 16, 27). Umi filistéoicha avei, koʼág̃arupi oĩ umi persóna oñepyrũva oenvidia ótrope iplatave haguére chuguikuéra. Haʼekuéra ndahaʼéi ku oipotánteva umi mbaʼe orekóva pe ótra persóna, síno oipota voi upe persóna operde upe orekóva.

5. ¿Mbaʼérepa umi líder rrelihióso oenvidia vaʼekue Jesúspe?

⁵ Oĩramo umi persóna enterovénte ohayhúva. Umi líder rrelihióso judío oenvidia vaʼekue Jesúspe, pórke hetaiterei hénte ohayhu chupe (Mat. 7:28, 29). Upéicha rupi, Jesús haʼéramo jepe Ñandejára rrepresentánte ha omboʼéramo jepe la verda, umi líder rrelihióso lomímonte omosarambi heta japu Jesús kóntrape, ha otaky voi hese oheja vai hag̃ua chupe (Mar. 15:10; Juan 11:47, 48; 12:12, 13, 19). ¿Mbaʼépa ikatu ñaaprende ko rrelátogui? Ñañehaʼã vaʼerãha ani ñaenvidia ni michĩmi umi ermáno ojehayhúvape kongregasiónpe oreko haguére umi kualida iporãva. Upéva rangue, jasegi vaʼerã iñehemplokuéra (1 Cor. 11:1; 3 Juan 11).

6. ¿Mbaʼéichapa Diótrefes ohechauka vaʼekue iñenvidiosoha?

⁶ Oĩramo orekóva priviléhio kongregasiónpe. Pe primer síglope, Diótrefes oenvidia vaʼekue umi ogiávape pe kongregasión kristiána. Haʼe ningo oipota vaʼekue “pe primer lugár” umi ermanokuéra apytépe. Upévare oñepyrũ oñeʼẽ vai apóstol Juan rehe ha avei umi orekóvare rresponsavilida kongregasiónpe, anivéma hag̃ua umi ermáno orrespeta chupekuéra (3 Juan 9, 10). Ñande ningo núnka ndajajapomoʼãi la Diótrefes ojapo vaʼekue. Péro ikatu hína ñañepyrũ ñaenvidia umi ermáno orresivi vaʼekuépe peteĩ priviléhio ñande jaipotáva, ha koʼýte oimérõ ñapensa ñande avei ikatuha jareko upe priviléhio, térã ikatuha voi jajapo porãve pe traváho.

7. ¿Mbaʼépa oikóta ñanderehe ñaneenvidiósoramo?

⁷ Pe envídia haʼete peteĩ ñana vai: Oñembohapo jepérõ ñane korasõme, ijetuʼu léntoma jaipeʼaite hag̃ua upégui. Ha oĩ heta mbaʼe omongakuaáva pe envídia, por ehémplo oiméramo ñandeselóso, ñandeorgullóso térã ñandejehénte ñapensa, upéicharõ koʼytevéntema ñaneenvidiósota. Pe ñana ningo nopermitíri peteĩ plánta okakuaa porã ha ipoty, upéicha avei pe envídia káusare ndaikatumoʼãi heñói ñane korasõme umi kualida porã, por ehémplo, ndaikatumoʼãi japorohayhu, ñandepyʼaporã térã jaiporiahuvereko ñande rapichápe. Jahechakuaáramo ñañepyrũha hína ñaneenvidióso, pyaʼe porã voi jaipeʼaite vaʼerã upéva ñane korasõgui. ¿Mbaʼépa ikatu jajapo pono ipuʼaka ñanderehe pe envídia?

ÑANEUMÍLDEKENA HA ÑAÑEKONTENTA LA JAREKÓVARE

8. ¿Mbaʼe kualidápa ñanepytyvõta ani hag̃ua ñaneenvidióso?

⁸ Ñañehaʼãramo ñaneumílde ha ñañekontenta la jarekóvare, pe envídia ndaipuʼakamoʼãi ñanderehe. Por ehémplo, ñaneumílderamo nañapensamoʼãi ñaneimportantetereiha, térã ñamereseha hetave mbaʼe umi ótrogui (Gál. 6:3, 4). Ha peteĩ persóna oñekontentáva umi mbaʼe orekóvare ovyʼa la orekomívare, ha ndoikói oñekompara ótrore (1 Tim. 6:7, 8). Umi iñumíldeva ha oñekontentáva la orekóvare, ovyʼa ohecha jave hapicha ohupytyha álgo iporãva.

9. Heʼiháicha Gálatas 5:16 ha Filipenses 2:3, 4, ¿mbaʼéichapa ñanepytyvõta pe espíritu sánto?

⁹ Ñande ningo ñaikotevẽ Jehová espíritu sánto ani hag̃ua ñaneenvidióso, ha avei ñaneumílde ha ñañekontenta hag̃ua la jarekóvare (elee Gálatas 5:16; Filipenses 2:3, 4). Pe espíritu sánto Ñandejára omeʼẽva ñanepytyvõta jaikuaa hag̃ua mbaʼépa añetehápe ñapensa, ha mbaʼépa ñanemomýi hína jajapo hag̃ua peteĩ mbaʼe. Jehová ñanepytyvõ rupi, ñande ikatu ñakambia umi mbaʼe ñapensáva térã ñañandúva oimérõ umíva naiporãi, ha péicha opyta hag̃ua ivése umi mbaʼe iporãva (Sal. 26:2; 51:10). Jahechamína koʼág̃a mbaʼe ehémplopa oheja ñandéve Moisés ha Pablo, mokõi kuimbaʼe oñehaʼãmbaite vaʼekue pono iñenvidióso.

10. ¿Mbaʼe situasiónpa ohasa vaʼekue Moisés ohechaukáva haʼe ndaiselósoi hague? (Ehecha pe taʼanga oĩva ko rrevísta apére).

¹⁰ Moisés oreko vaʼekue tuicha autorida Ñandejára puévlope, péro haʼe nahakateʼỹi vaʼekue upe autoridáre. Por ehémplo, peteĩ vuéltape Jehová oipeʼa kuri michĩmi ijespíritu sánto Moisésgui, ha omeʼẽ upéva unos kuánto kuimbaʼe omoakãvape, oĩ vaʼekue pe tavernákulo jerére. Upe riremínte, Moisés oikuaa oñemeʼẽ hague avei pe espíritu sánto mokõi kuimbaʼe oporomoakãvape, ndohói vaʼekue pe tavernákulope, ha umíva oñepyrũ hague oñekomporta umi profétaicha. ¿Mbaʼépa ojapo raʼe Moisés, Josué heʼírõ guare chupe ojoko hag̃ua umi mokõi kuimbaʼépe? Moisés ndaiselósoi vaʼekue Jehová omeʼẽ haguére avei upe priviléhio umi kuimbaʼépe. Upéva rangue, haʼe iñumílde ha ovyʼaiterei hendivekuéra (Núm. 11:24-29). ¿Mbaʼépa ñanemboʼe Moisés ehémplo?

11. ¿Mbaʼéichapa umi ansiáno ikatu osegi Moisés ehémplo?

¹¹ Oiméramo nde peteĩ ansiáno, ha ereko peteĩ asignasión rehayhuetereíva, ¿mbaʼépa rejapóta ojejeruréramo ndéve rentrena hag̃ua ótro ermánope ojapo hag̃ua upéva? Por ehémplo, ikatu oime ndegustaiterei redirihi káda semána pe Ñemañaha Ñehesaʼỹijo. Péro neumílderamo Moisés iñumílde haguéicha, nerepensamoʼãi reñemboykemaha ojejeruréramo ndéve remboʼe hag̃ua ótro ermánope okumpli hag̃ua upe asignasión. Upéva rangue, vyʼápe reipytyvõta upe ermánope.

12. ¿Mbaʼéichapa koʼág̃arupi heta ermáno ohechauka oñekontentaha pe orekóvare ha iñumildeha?

¹² Jahechamína avei mbaʼépa ohasa hína heta ermáno ijedáva. Oĩ ningo umi ermáno hetaiterei áñore oĩ vaʼekue kómo koordinadór del kuérpo de ansiáno, péro ohupytývo 80 áño, haʼekuéra vyʼápe oheja upe asignasión ótro kárgope. Umi superintendénte de sirkuíto avei iñumílde ha oheja upe asignasión ombotývo 70 áño, ha vyʼápe oasepta pe asignasión pyahu oñemeʼẽva chupekuéra. Ha umi áño ohasa vaʼekuépe, hetaiterei betelítagui oñekambia iñasignasión ha upévare osẽ hikuái Betélgui. Péro entéro koʼã ermáno ha ermána ifiélva ndopytái ipyʼaro umi ermáno koʼág̃a okumplívare umi asignasión haʼekuéra oreko vaʼekue.

13. ¿Mbaʼe mbaʼépa ikatu kuri oraha Páblope oenvidia hag̃ua umi 12 apóstolpe?

¹³ Apóstol Pablo avei ehémplo porã ñandéve g̃uarã, pórke haʼe iñumílde ha oñekontenta vaʼekue pe orekóvare. Pablo ndohejái vaʼekue pe envídia okakuaa ikorasõme. Haʼe ombaʼapo jejopy vaʼekue predikasiónpe, péro iñumílde vaʼekue ha upévare heʼi: “Che ningo pe michĩvéva umi apóstol apytépe ha namereséi voi ojeʼe cherehe haʼeha apóstol” (1 Cor. 15:9, 10). Umi 12 apóstol ningo omoirũ vaʼekue Jesúspe haʼe opredika aja ko yvy ape ári, péro Páblogui oiko vaʼekue kristiáno Jesús orresusita rire ae. Tiémpo rire, oñenombráramo jepe chupe “apóstol” opredika hag̃ua umi nasiónpe, haʼe noĩri vaʼekue umi 12 apóstol apytépe (Rom. 11:13; Hech. 1:21-26). Péro Pablo ndoikói vaʼekue oenvidia umi 12 apóstolpe ha pe amista oreko vaʼekue hikuái Jesúsndi, upéva rangue haʼe oñekontenta vaʼekue pe priviléhio orekóvare.

14. ¿Mbaʼépa jajapóta ñaneumílde ha ñañekontentáramo umi mbaʼe jarekóvare?

¹⁴ Ñande ñaneumílde ha ñañekontentáramo umi mbaʼe jarekóvare, jasegíta Pablo ehémplo ha jahechaukáta jarrespetaha pe autorida Jehová omeʼẽ vaʼekue umi ótro ermánope (Hech. 21:20-26). Jehová onombra vaʼekue koʼã kuimbaʼépe ikatu hag̃uáicha ogia pe kongregasión. Ha iñimperféktoramo jepe hikuái, Jehová ohecha “koʼã kuimbaʼépe rregáloramo” (Efes. 4:8, 11). Jarrespetáramo koʼã ermánope ha ñaneumílde jasegívo pe gía haʼekuéra omeʼẽva, jarekóta peteĩ amista iporãva Jehovándi ha jaikóta pyʼaguapýpe ñane ermanokuérandi.

“JASEGÍKENA JAJAPO ENTÉRO MBAʼE IKATÚVA OIPYTYVÕ OĨ HAG̃UA PYʼAGUAPY”

15. ¿Mbaʼépa iñimportanteterei jajapo?

¹⁵ Ñande ñaenvidiáramo ótrope térã oĩramo ñaneenvidiáva, ndaiporimoʼãi pyʼaguapy ñande apytépe. Upévare jahapoʼo vaʼerã pe envídia ñane korasõgui ha ani jajapo mbaʼeve omomýitava ótrope ñaneenvidia hag̃ua. Iñimportánte ningo jajapo koʼã mbaʼe, péicha ñakumplíta Jehová mandamiénto, heʼíva jasegi vaʼerãha “jajapo entéro mbaʼe ikatúva oipytyvõ oĩ hag̃ua pyʼaguapy ha omombaretétava ñane ermanokuérape” (Rom. 14:19). ¿Mbaʼe mbaʼépa jajapo vaʼerã ñaipytyvõ hag̃ua ótrope ani hag̃ua iñenvidióso, ha mbaʼépa ikatu jajapo siémpre oĩ hag̃ua pyʼaguapy?

16. ¿Mbaʼéichapa ikatu ñaipytyvõ ótrope ani hag̃ua iñenvidióso?

¹⁶ Umi mbaʼe jajapóva ha ñapensa lája tuichaiterei ikatu oafekta ótrope. Ko múndo ningo oipota ñande “jaiko jajechaukase umi mbaʼe jarekóvare” (1 Juan 2:16). Péro upéva omomýi umi héntepe iñenvidióso hag̃ua. Ñande ikatu ñaipytyvõ ótrope ani hag̃ua iñenvidióso ndajaikóiramo manterei ñañeʼẽ umi mbaʼe jarekóva térã jajoguasévare. Avei ndajaikóiramo ñañemombaʼeguasu jareko haguére priviléhio kongregasiónpe. Manterei ñañeʼẽramo umi priviléhio jarekóvare, ñande ñamomýi hína ótrope iñenvidióso hag̃ua. Péro jahechaukáramo añetehápe ñañeinteresaha ñande rapicháre, ha ñamombaʼe umi mbaʼe porã ojapóva hikuái, ñaipytyvõ chupekuéra oñekontenta hag̃ua la orekóvare, ha jajapo hína ñande párte oĩ hag̃ua unida ha pyʼaguapy kongregasiónpe.

17. ¿Mbaʼépa ohupyty vaʼekue José ermanokuéra, ha mbaʼérepa?

¹⁷ ¡Ñande ningo ikatu jaipeʼaite ñandejehegui pe envídia! Jahechami jeýna José ermanokuéra ehémplo. Ohasa rire heta áño omaltrata hague hikuái Josépe, haʼekuéra ojotopa hendive Egíptope. Péro omombeʼu mboyve chupekuéra mávapa haʼe, José omoĩ a pruéva iñermanokuérape oikuaa hag̃ua okambiámapa raʼe hikuái. Upearã oinvita chupekuéra okaru hag̃ua hendive, ha upépe José oservika iñermáno pahague Benjamínpe, hetave tembiʼu umi ótrogui (Gén. 43:33, 34). Péro ndajatopái mbaʼeve ohechaukáva haʼekuéra oenvidia hague Benjamínpe upe haguére. Upéva rangue, ojekuaa hesekuéra añetehápe ojepyʼapyha iñermánore ha avei itúa Jacob rehe (Gén. 44:30-34). José ermanokuéra ohupyty kuri peteĩ mbaʼe iporãitereíva: Haʼekuéra oipytyvõ oĩ jey hag̃ua pyʼaguapy hogapýpe. ¿Mbaʼéicha rupípa oiko upéva? Pórke naiñenvidiosovéima hikuái (Gén. 45:4, 15). Upéicha avei ñande jaipeʼaitéramo ñandejehegui pe envídia, ñaipytyvõta siémpre oĩ hag̃ua pyʼaguapy ñande rogapýpe ha avei kongregasiónpe.

18. Heʼiháicha Santiago 3:17, 18, ¿mbaʼépa oikóta ñañehaʼãramo oĩ hag̃ua pyʼaguapy?

¹⁸ Jehová ningo oipota ñañehaʼã ani hag̃ua ñaneenvidióso, ha oipota avei ñaipytyvõ oĩ hag̃ua pyʼaguapy. Péro upearã ñañehaʼãmante vaʼerã, pórke jahecháma haguéicha ko artíkulope, enterovénte ñaneenvidiosose sapyʼánte (Sant. 4:5). Hiʼarive ko múndope ojejapo heta mbaʼe omomýiva umi héntepe iñenvidióso hag̃ua. Péro ñande ñaneumílderamo, ñañekontenta umi mbaʼe jarekóvare ha ñamombaʼe ha jaguerohorýramo ñande rapicha ojapóva, ndajahejamoʼãi pe envídia heñói ñande apytépe. Upéva rangue jaikóta pyʼaguapýpe entérondi ha ikatúta jahechauka umi kualida porã (elee Santiago 3:17, 18).