Jahayhúramo Jehovápe, upéva ñanemomýita jajevautisa hag̃ua

1, 2. Ohechaukaháicha Hechos 8:27-31, 35-38, ¿mbaʼépa omomýi raʼe pe ofisiál etíopepe ojevautisa hag̃ua?

¿NDÉPA rejevautisase oiko hag̃ua ndehegui Cristo disípulo? Oĩ heta odesidímava ojapo upéva. ¿Mbaʼépa omomýi raʼe chupekuéra? Haʼekuéra ohayhu Jehovápe ha oagradese umi mbaʼe haʼe ojapo vaʼekue hesehapekuéra. Ehechamína peteĩ ofisiál ehémplo, haʼe oservi vaʼekue pe rréina de Etiopíape.

² Pe etíope ningo pyaʼe voi ojevautisa oaprende rire mbaʼépa omboʼe Ñandejára Ñeʼẽ (elee Hechos 8:27-31, 35-38). ¿Mbaʼérepa haʼe ojapo upéva? Jaikuaa ningo haʼe omombaʼe hague Ñandejára Ñeʼẽ, pórke ohokuévo ikárrope haʼe olee hína kuri Isaías lívro. Ha Felipe omyesakãrõ guare chupe mbaʼépa Jesús ojapo vaʼekue hesehápe, pe etíope oagradese ha ovaloraiterei upéva. Avei jaikuaa pe etíope ohayhuetereiha Jehovápe, pórke haʼe ou hína kuri Jerusaléngui oadora rire chupe upépe. Ikatu jaʼe avei ko kuimbaʼe okambiáma hague irrelihión ha oñepyrũma hague oadora Ñandejára teépe Ipuévlondi. Ha ohayhu rupi Jehovápe, haʼe odesidi ojapo ótra kósa iñimportantetereíva: Ojevautisa ha oiko chugui Cristo disípulo (Mat. 28:19).

3. ¿Mbaʼépa ikatu ojoko algúnope ha upévare ndojevautisái? (Ehecha pe rrekuádro “¿Mbaʼeichagua yvýpepa ojogua ne korasõ?”).

³ Rehayhúramo Jehovápe, upéva nemomýita rejevautisa hag̃ua. Péro oĩ ótra kláse mborayhu ikatúva ndejoko ani hag̃ua rejevautisa. ¿Mbaʼe rehepa ñañeʼẽ hína? Por ehémplo, nde oiméne rehayhu umi ne amígo ha ne hénte ndoikuaáivape Jehovápe, ha ikatu rejepyʼapy hína ndochaʼevéiramo g̃uarã nderehe rejevautisa haguére (Mat. 10:37). Térã ikatu oĩ álgo ndegustaitereíva péro reikuaa ombojeguaruha Ñandejárape, por ehémplo peteĩ kostúmbre térã vísio vai ha ijetuʼu ndéve repoi hag̃ua chugui (Sal. 97:10). Térã ikatu hína nemichĩete guive reselevra umi fiésta oúva rrelihión fálsagui. Oiméne nemanduʼa heta mbaʼe porã rehasa vaʼekuére umi fiéstape, ha ijetuʼu ndéve remboyke hag̃ua koʼã fiésta ndogustáiva Jehovápe (1 Cor. 10:20, 21). Upévare iñimportánte reñeporandu: “¿Mbaʼépa, térã mávapepa che ahayhuve?”.

PE MBORAYHU IÑIMPORTANTEVÉVA

4. ¿Mbaʼépa hína pe rrasón iñimportantevéva rejevautisa hag̃ua?

⁴ Oiméne oĩ heta mbaʼe porã nde rehayhúva ha reagradeséva. Por ehémplo, restudia mboyve jepe umi testígo de Jehovándi, oiméne nde rerrespeta ha remombaʼéma voi raʼe la Biblia. Ha oime vaʼerã rehayhu avei Jesúspe. Ha koʼág̃a reikuaa rire umi testígo de Jehovápe oiméne igústo ndéve rehasa hendivekuéra tiémpo. Iporã ningo ndegusta ha rehayhu koʼã mbaʼe, péro ndahaʼéi upe haguérente reñemeʼẽtamava Jehovápe ha rejevautisa. Pe rrasón iñimportantevéva rejevautisa hag̃ua haʼe hína rehayhu Ñandejára Jehovápe voi. Ha rehayhúramo Jehovápe opa mbaʼe ári, nderehejamoʼãi mbaʼeve ndejoko reservi hag̃ua chupe. Upe mborayhu nemomýita rejevautisa hag̃ua ha nepytyvõta avei resegi hag̃ua reservi fiélmente Jehovápe ág̃a rejevautisa rire.

5. ¿Mbaʼépa jahecháta ko artíkulope?

⁵ Jesús heʼi vaʼekue jahayhu vaʼerãha Jehovápe ñande pyʼaite guive, ñande rekove kompletoite reheve, entéro ñane pensamiénto reheve, ha ñane mbaretekue omeʼẽmíva reheve (Mar. 12:30). ¿Mbaʼépa rejapo vaʼerã upeichaite rehayhu ha rerrespeta hag̃ua Jehovápe? Rejepyʼamongeta vaʼerã mbaʼeichaitépa Jehová nderayhu, ha upéva nemomýita rehayhu hag̃ua avei chupe (1 Juan 4:19). Upévare ko artíkulope retopáta umi mbaʼe rejapo vaʼerã ikatu hag̃uáicha rehayhu Jehovápe ha rejevautisa.

6. ¿Mbaʼéichapa ikatu jaikuaa Jehovápe heʼiháicha Romanos 1:20?

⁶ Eikuaa Jehovápe pe kreasión rupive (elee Romanos 1:20; Apoc. 4:11). Rejepyʼamongeta vaʼerã umi animál ha plánta Jehová ojapo vaʼekuére ha mbaʼéichapa umíva ohechauka haʼe iñaranduetereiha. Eñehaʼã avei eaprende mbaʼeichaitépa ndaijojahái ñande rete (Sal. 139:14). Ejepyʼamongeta avei pe podér orekóvare pe kuarahy Ñandejára ojapo vaʼekue, hiʼarive upéva peteĩnte hína umi millones de estrélla haʼe ojapo vaʼekue apytépe (Is. 40:26).b Péicha rejepyʼamongetáramo umi mbaʼe Jehová ojapo vaʼekuére, upéva nepytyvõta rerrespetave hag̃ua chupe. Iñimportánte ningo jaikuaa Jehová iñarandu ha ipoderosoha, péro jahayhuve hag̃ua chupe ha jaiko hag̃ua iñamígoramo, tekotevẽ jaikuaa chugui hetave mbaʼe.

7. ¿Mbaʼe rehepa reime vaʼerã segúro rehayhu hag̃ua Jehovápe nde pyʼaite guive?

⁷ Reime vaʼerã segúro Jehová añetehápe ojepyʼapyha nderehe. ¿Ijetuʼúpa ndéve reguerovia hag̃ua upe ojapo vaʼekue pe yvága ha yvy, oikuaaha nde reexistiha ha oñeinteresaha nderehe? Oiméramo upéicha, ani nderesarái Jehová ‘noĩriha mombyry ñandehegui’ (Hech. 17:26-28). David heʼi haguéicha Salomónpe, “Jehová ohesaʼỹijo enterove korasõ”. Ñandejára opromete nde rehekáramo chupe, haʼe ojejuhukataha ndéve (1 Crón. 28:9). Añetehápe, nde koʼág̃a restudia hína la Biblia pórke oñekumpli nderehe upe Jehová heʼíva Jeremías 31:3-pe: ‘Che romoag̃ui cherehe’. Rentende porãvévo rehóvo umi mbaʼe Jehová ojapo vaʼekue nderehehápe, koʼýte rehayhuvéta chupe.

8. ¿Mbaʼéichapa ikatu rehechauka reagradeseha Jehovápe nderayhu haguére?

⁸ Peteĩ mbaʼe ikatúva rejapo rehechauka hag̃ua reagradeseha Jehovápe nderayhu haguére, haʼe hína reñemboʼe chupe. Reñemboʼe jave emombeʼu vaʼerã Ñandejárape umi mbaʼe ndepyʼapýva, ha eagradese chupe umi mbaʼe ojapóva nderehehápe. Ha eñatende porã vaʼerã mbaʼéichapa haʼe ombohovái umi ne ñemboʼe (Sal. 116:1). Péicha amás día rehayhuvéta rehóvo Jehovápe ha imbaretevéta pe amista erekóva hendive. Avei reimevéta segúro haʼe nentendeha. Péro resegi hag̃ua reñemoag̃ui hese, tekotevẽ rentende mbaʼépa ogusta térã ndogustái chupe ha mbaʼérepa haʼe ojapo peteĩ mbaʼe. Avei iñimportánte reikuaa mbaʼépa ohaʼarõ ndehegui. Ha koʼã mbaʼe reikuaáta restudiáramo añoite Iñeʼẽ, la Biblia.

9. ¿Mbaʼéichapa ikatu rehechauka remombaʼeha la Biblia?

⁹ Emombaʼe Ñandejára Ñeʼẽ la Biblia. Upépe añoite oñemombeʼu la verda Jehováre ha umi mbaʼe haʼe ojaposévare nderehehápe. ¿Mbaʼéichapa rehechaukáta remombaʼeha la Biblia? Relee vaʼerã káda día, ejeprepara porã restudia mboyve pe ermáno oúvandi nembostudia hag̃ua, ha emoĩ en práktika umi mbaʼe reaprendéva (Sal. 119:97, 99; Juan 17:17). ¿Ndépa rejapóma peteĩ prográma ikatu hag̃uáicha relee la Biblia káda día? ¿Reñehaʼãpa rekumpli upéva?

10. ¿Mbaʼeichagua rrelátopa jatopa la Bíbliape añoite?

¹⁰ Peteĩ mbaʼe ndaijojaháiva oĩva la Bíbliape, haʼe hína umi rreláto omombeʼúva umi persóna ohecha vaʼekue Jesúspe hesa teérupi. La Bíbliape añoite oñemyesakã porã mbaʼépa Jesús ojapo vaʼekue nderehehápe, ha ndaipóri ótro lívro ijexaktovéva chugui. Reaprende vove umi mbaʼe Jesús heʼi ha ojapo vaʼekue, katuete reikoséta iñamígoramo.

11. ¿Mbaʼépa nepytyvõta rehayhuve hag̃ua Jehovápe?

¹¹ Ehayhu Jesúspe ha péicha rehayhuvéta Jehovápe. ¿Mbaʼérepa jaʼe upéva? Pórke Jesús ohechauka porãiterei vaʼekue umi kualida Jehová orekóva (Juan 14:9). Upéicha rupi reikuaavévo rehóvo Jesúspe, rentende porãvéta mbaʼeichagua persónapa Jehová ha reñemoag̃uivéta hese. Por ehémplo, epensamína mbaʼeichaitépa Jesús oiporiahuvereko vaʼekue umi ojedespresiávape imboriahu rupi, hasykatu térã ikangy rupi. Avei epensamína umi konsého porãite haʼe omeʼẽvare ndéve, ha mbaʼéichapa oho porãve ndéve resegi rupi umíva (Mat. 5:1-11; 7:24-27).

12. Reaprende rire hetave mbaʼe Jesúsgui, ¿mbaʼépa upéva nemomýita rejapo hag̃ua?

¹² Katuete ningo rehayhuvéta Jesúspe rejepyʼamongetáramo pe sakrifísio haʼe ojapo vaʼekuére, omeʼẽvo hekove ikatu hag̃uáicha oñeperdona ñandéve ñande pekadokuéra (Mat. 20:28). Rehechakuaa vove haʼe oĩ hague dispuésto omanóvo nderehehápe, upéva nemomýita reñarrepenti ha rejerure hag̃ua Jehovápe taneperdona (Hech. 3:19, 20; 1 Juan 1:9). Amáske rehayhu Jesús ha Jehovápe, koʼýte reimesevéta umi ohayhúvandi avei chupekuéra.

13. ¿Mbaʼépa omeʼẽ ndéve Jehová?

¹³ Ehayhu umi ohayhúvape Jehovápe. Umi ne hentekuéra ndojeroviáiva Jehováre ha amigokuéra ereko vaʼekue anteve, ikatu hína nontendéi mbaʼérepa nde reñemeʼẽse Jehovápe. Ha upéicha rupi ikatu voi oñemoĩ nderehe hikuái. Péro Jehová nepytyvõta, haʼe omeʼẽ ndéve kongregasiónpe umi ermáno ha ermána haʼetétava peteĩ família ndéve g̃uarã. Resegíramo reime ko famíliape, reñandúta haʼekuéra nderayhuha ha oĩtaha nde ykére reikotevẽ jave (Mar. 10:29, 30; Heb. 10:24, 25). Ha tiémpo rire ikatu voi hína ne hentekuéra oñepyrũ avei oservi Jehovápe ha oiko haʼe oipotaháicha (1 Ped. 2:12).

14. Heʼiháicha 1 Juan 5:3, ¿mbaʼépa rehechakuaa Jehová konsehokuérare?

¹⁴ Emombaʼe umi konsého Jehová omeʼẽva ha emoĩ en práktika. Reikuaa mboyve Jehovápe oiméne nde rejepokuaáma rakaʼe redesidi ndejeheguínte mbaʼépa iporã ha mbaʼépa ivai. Péro koʼág̃a rehechakuaáma Jehová konsehokuéra iporãveha (Sal. 1:1-3; elee 1 Juan 5:3). Epensamíntena umi konsého la Biblia omeʼẽvare umi ména, tembireko, túa ha taʼyrakuérape g̃uarã (Efes. 5:22–6:4). ¿Rehechakuaápa peiko porãveha nde rogapýpe rekumpli rupi umi konsého? ¿Omehorápa nde rekove resegi rupi umi konsého Jehová omeʼẽva ha heʼíva mbaʼeichagua amígopa reiporavo vaʼerã? ¿Rehechakuaápa revyʼaveha koʼág̃a? (Prov. 13:20; 1 Cor. 15:33). Katuete oiméne rembohovái “si” koʼã pregúnta.

15. ¿Mbaʼépa ikatu rejapo ijetuʼúramo ndéve repilla hag̃ua mbaʼéichapa ikatu remoĩ en práktika umi konsého oĩva la Bíbliape?

¹⁵ Sapyʼánte oiméne ijetuʼu ndéve repilla hag̃ua mbaʼéichapa ikatu reipuru umi konsého reaprendéva la Bíbliagui. Upearã Jehová iñorganisasión rupive omeʼẽ ndéve umi informasión oñeguenohẽva la Bíbliagui, ha nepytyvõva rehechakuaa hag̃ua mbaʼépa iporã ha mbaʼépa ivai (Heb. 5:13, 14). Relee ha restudia vove koʼã informasión, rehecháta mbaʼéichapa ideprovécho ndéve umi konsého ha mbaʼéichapa ikatu remoĩ en práktika, ha upéva nemomýita reĩse hag̃ua Jehová organisasiónpe.

16. ¿Mbaʼéichapa Jehová oorganisa ipuévlope?

¹⁶ Ehayhu ha eapoja Jehová organisasión. Oorganisa hag̃ua ipuévlope, Jehová omoĩ umi kongregasión, ha Itaʼýra Jesús omoakã entéro umi kongregasión (Efes. 1:22; 5:23). Jesús oiporavo vaʼekue unos kuánto unhídope oorganisa hag̃ua pe traváho haʼe oipotáva ojejapo ñane tiémpope. Koʼã kristiánope Jesús ohenói kuri “pe esklávo de konfiánsa ha iñarandúva”, ha haʼekuéra ojagarra en sério pe rresponsavilida oñemeʼẽva chupekuéra: Nepytyvõ reñemoag̃ui hag̃ua Ñandejárare ha ojapo ikatúva guive oprotehe hag̃ua pe amista erekóva Jehovándi (Mat. 24:45-47). ¿Mbaʼéichapa ojapo upéva pe esklávo de konfiánsa? Peteĩ fórma hína onombrávo ansiáno umi kuimbaʼe ikatupyrývape. Koʼã ansiáno ningo oĩ ndegia ha ndeprotehe hag̃ua (Is. 32:1, 2; Heb. 13:17; 1 Ped. 5:2, 3). Umi ansiáno oĩ hína dispuésto ojapóvo ikatúva guive nderehehápe, nekonsola ha nepytyvõ ikatu hag̃uáicha resegi reñemoag̃ui Jehováre. Haʼekuéra nepytyvõ hína remboʼe hag̃ua ótrope Jehovágui, ha péva ningo peteĩ mbaʼe iñimportantetereíva haʼekuéra ikatúva ojapo nderehehápe (Efes. 4:11-13).

17. Asegún Romanos 10:10, 13, 14, ¿mbaʼérepa ñamboʼe umi héntepe oikuaa hag̃ua Jehovápe?

¹⁷ Eipytyvõ ótrope ohayhu hag̃ua Jehovápe. Jesús heʼi vaʼekue idisipulokuérape omboʼe vaʼerãha umi héntepe oikuaa hag̃ua Jehovápe (Mat. 28:19, 20). Añetehápe ningo ñande ikatu jajapo upéva jajapo vaʼerãgui reínte. Péro amáske rehayhuve Jehovápe, reñeñandúta apóstol Pedro ha Juan oñeñandu haguéicha. Haʼekuéra heʼi vaʼekue: “Ore ndaikatúi roguerokirirĩ umi mbaʼe rohecha ha rohendu vaʼekue” (Hech. 4:20). Javyʼaiterei ningo ñaipytyvõ jave ótrope ohayhu hag̃ua Jehovápe. Epensamíntena Felipe kásore, haʼe oiméne ovyʼaiterei raʼe oipytyvõrõ guare pe etíopepe oikuaa hag̃ua mbaʼépa omboʼe Ñandejára Ñeʼẽ ha ojevautisa. Resegi vove Felipe ehémplo ha rekumpli pe mandáto omeʼẽ vaʼekue Jesús, rehechaukáta reipotaha oiko ndehegui testígo de Jehová (elee Romanos 10:10, 13, 14). Upe vove, katuete oiméne reñeporandúta avei pe etíopeicha: “¿Mbaʼéiko chejoko ajevautisa hag̃ua?” (Hech. 8:36).

18. ¿Mbaʼépa jahecháta pe artíkulo oúvape?

¹⁸ Redesidi vove rejevautisataha, redesidíta hína pe mbaʼe iñimportantevéva nde rekovépe. Ha iñimportánte rupi upéva, tekotevẽ repensa porã mbaʼépa heʼise upéva. ¿Mbaʼe mbaʼépa reikuaa vaʼerã pe vautísmogui? ¿Mbaʼépa rejapo vaʼerã rejevautisa mboyve ha avei upe rire? Koʼã pregúnta oñembohováita pe artíkulo oúvape.