¿Mbaʼéichapa eñemboʼe vaʼerã Ñandejára ohendu hag̃ua ne ñemboʼe?

EÑEMBOʼE JEHOVÁPE JESÚS RÉRAPE

“Pe Túa omeʼẽta peẽme oimeraẽ mbaʼe pejeruréva chupe che rérape” (Juan 16:23).

Umi mbaʼe Jesús heʼi vaʼekue ohechauka Jehová oipotaha ñañemboʼe chupe. Péro Jehová ndoipotái jajevale umi imáhen, sánto, ánhel térã ñane hentekuéra omano vaʼekuére, síno oipota jajevale Jesucrístore. Ñañemboʼe jave Ñandejárape Jesús rérape, jahechauka hína ñarrekonoseha mbaʼéichapa Jesús sakrifísio ñanepytyvõ. Jesús heʼi vaʼekue voi: “Che rupive añoite ikatu oñeg̃uahẽ pe Túa rendápe” (Juan 14:6).

EÑEʼẼ CHUPE NDE PYʼAITE GUIVE

“Pemombeʼupaite chupe umi mbaʼe oĩva pende pyʼapýpe” (Salmo 62:8).

Ñañemboʼe jave Jehovápe, ñañeʼẽ vaʼerã chupe ñañeʼẽrõguáicha peteĩ Túa ñanderayhúvape. Ñañeʼẽ vaʼerã chupe ñande pyʼaite guive ha jahechauka jarrespetaha chupe. Ndahaʼéi jaleénteva umi mbaʼe heʼíva peteĩ lívro, térã jaʼénte umi mbaʼe jaikuaáva de memória.

ÑANE ÑEMBOʼE OJOGUERAHA VAʼERÃ ÑANDEJÁRA REMBIPOTÁNDI

“Oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta” (1 Juan 5:14).

La Bíbliape, Jehová omombeʼu ñandéve mbaʼépa haʼe ojapóta ñanderehehápe. Ha omombeʼu avei mbaʼépa haʼe oipota jajapo hesehápe. Ñandejárape ogusta hag̃ua ñane ñemboʼe, umi mbaʼe jaʼéva ‘oĩ porã vaʼerã hembipotándi’. Ha upéva jajapo hag̃ua, tekotevẽ jastudia la Biblia jaikuaa porãve hag̃ua Ñandejárape. Péicha jajapóramo, ñane ñemboʼe katuete ogustáta chupe.

¿MBAʼÉPA IKATU JAJERURE ÑANE ÑEMBOʼÉPE?

Jajerurekuaa umi mbaʼe ñaikotevẽva: ikatu ñañemboʼe Ñandejárape jajerure hag̃ua chupe umi mbaʼe ñaikotevẽva káda día, por ehémplo tembiʼu, ao ha peteĩ lugár jaiko hag̃ua. Jajerurekuaa avei chupe tañanemoarandu ikatu hag̃uáicha jadesidi porã, ha tañanemombarete ñaaguanta hag̃ua umi mbaʼe ijetuʼúva. Ikatu avei jajerure chupe jajeroviave hag̃ua hese, avei tañaneperdonami, ha tañanepytyvõ entéro mbaʼe ñaikotevẽvape (Lucas 11:3, 4, 13; Santiago 1:5, 17).

Ñañemboʼekuaa umi ótrore: umi túa ohayhúva ifamíliape ovyʼa ifamiliakuéra ojoayhúrõ iñermanokuérandi. Ñandéngo haʼe Jehová família, ha haʼe oipota ñañeinteresa ojuehe ha ñañopytyvõ. Upévare, iporãta ñañemboʼéramo ñane ména térã ñane rembirekóre, ñane familiakuérare, ñane hentekuérare ha ñane amigokuérare. Disípulo Santiago heʼi vaʼekue voi ñañemboʼe vaʼerãha ojuehe (Santiago 5:16).

Ñañemboʼekuaa jaagradese hag̃ua Ñandejárape: Ñandejára ningo haʼe ñande Apohare, ha Hechos 14:17-pe la Biblia heʼi voi hese: “Haʼe osegi oikuaauka peẽme mávapa haʼe umi mbaʼe porã ojapóva rupive. Haʼe ombou peẽme ama yvágagui ha omeʼẽ peẽme hetaiterei mbaʼe pekosecha vaʼerã itiempoitépe, hetaiterei tembiʼu peʼu hag̃ua peneryg̃uatãha meve ha pevyʼa hag̃ua”. Ñapensáramo entéro mbaʼe Ñandejára ojapóvare ñanderehehápe, ñanemomýita jaagradese hag̃ua chupe ñane ñemboʼe rupive. Avei ñaneñeʼẽrendúramo Ñandejárape, jahechaukáta hína chupe jaagradeseha entéro mbaʼe ojapóva ñanderehehápe (Colosenses 3:15).

NEPASIÉNSIAKENA HA ESEGI EÑEMBOʼE

Avése ikatu ñañedesanima pórke ñañemboʼéramo jepe ñande pyʼaite guive noñerrespondepyaʼéi ñandéve ñane ñemboʼe. ¿Ñapensa vaʼerãpa upéicharõ Ñandejára noñeinteresaiha voi ñanderehe? Nahániri. Jahechamíta koʼág̃a unos kuánto ehémplo ohechauka porãva ñandéve jasegínte vaʼerãha ñañemboʼe.

Steve, pe kuimbaʼe ñañeʼẽ hague oñepyrũvo ko rrevísta heʼi: “Che asegínte kuri añemboʼe, ha ndajapói rire upéicha ymáma aperdéta kuri la esperánsa ikatutaha avyʼa jey”. ¿Mbaʼérepa Steve okambia opensa lája? Pórke haʼe oñepyrũ ostudia la Biblia, ha oaprende iñimportanteha oñemboʼe meme. Steve heʼi avei: “Añemboʼe Ñandejárape ha aagradese chupe entéro mbaʼe ojapo vaʼekue cherehehápe che amigokuéra ahayhuetéva. Koʼág̃a ningo avyʼaiterei, núnka ndavyʼáiva peichaite peve”.

¿Ha mbaʼépa oiko raʼe Jénnygui? Haʼe ningo oñandu kuri ndovaleiha mbaʼeverã ha nomereseiha Ñandejára ohendu iñemboʼe. Jenny heʼi: “Apensa jave ndavaleiha mbaʼeverã, ajerure asy Ñandejárape tachepytyvõmi antende hag̃ua mbaʼérepa añeñandu péicha”. ¿Mbaʼéichapa upéva oipytyvõ Jénnype? Haʼe heʼi: “Añeʼẽvo Ñandejárandi chepytyvõ ajehecha hag̃ua haʼe cherechaháicha, ha chepytyvõ avei antende hag̃ua ke chekorasõ chekondenáramo jepe, haʼe ndojapoiha péicha. Upéva chepytyvõ asegi hag̃ua añehaʼã”. ¿Mbaʼépa ohupyty Jenny ojapo rupi péicha? Haʼe heʼi: “Pe ñemboʼe chepytyvõ aĩ hag̃ua segúra Jehová oexistiha. Haʼe ningo che Jára, che Túa ha che amígo. Haʼe ojepyʼapy cherehe ha cherayhu, upévare siémpre oĩ chéve g̃uarã ha chepytyvõ añehaʼã jave hína ajapo umi mbaʼe haʼe oipotáva”.

Jahechamína koʼág̃a mbaʼépa ohasa vaʼekue peteĩ kuñakarai hérava Isabel. Haʼe hyeguasúrõ guare umi doktór heʼíma chupe imemby onasetaha diskapasitádo. Péva ningo oheja kuri chupe yvýre. Algúno heʼi voi chupe oitykántema hag̃ua imemby. Isabel heʼi: “Upérõ ningo añeñandu vaieterei, ha haʼete voi chéve pe kevránto chejukátava”. ¿Mbaʼépa ojapo Isabel? Haʼe heʼi: “Añemboʼe jey jey Ñandejárape chepytyvõ hag̃ua”. Tiémpo rire Isabel imemby, ha la imemby onase diskapasitádo. ¿Péro opensápa raʼe Isabel Ñandejára orrespondeha chupe iñemboʼe? Si. ¿Mbaʼérepa? Haʼe heʼi: “Ahechávo che memby koʼág̃a orekómava 14 áño, lomímonte ovyʼaha haʼéramo jepe diskapasitádo, ahechakuaa Ñandejára orresponde hague chéve che ñemboʼe. Añetehápe, che memby Gerard haʼe pe vendisión tuichavéva arresivi vaʼekue Ñandejáragui”.

Koʼã persóna heʼi vaʼekue ningo ñanemopensa peteĩ salmísta heʼi vaʼekuére: “Jehová, nde katuete rehendúta umi ivuénova ñemboʼe. Nde regia porãta umi ivuénova korasõ, ha rejapysaka porãta hesekuéra” (Salmo 10:17). ¡Ajépa koʼã mbaʼe ñanemokyreʼỹete ñañemboʼe meme hag̃ua!

La Bíbliape ningo jatopa heta ñemboʼe Jesús ojapo vaʼekue. Ha pe ikonosidovéva haʼe hína pe omboʼe vaʼekue idisipulokuérape. ¿Mbaʼépa ikatu ñaaprende upévagui?