¿Mbaʼe autoridápa oreko ansianokuéra kongregasiónpe?

1. ¿Mbaʼérepa Jehová família oĩ en unida?

ÑANDE javyʼaiterei ñaime haguére Jehová famíliape. ¿Mbaʼérepa ko família oĩ pyʼaguapýpe ha en unida? Pórke ñande ñañehaʼãmbaite jarrespeta umi Jehová omeʼẽ vaʼekuépe siérta autorida. Ha ñaimevéta unído ñantende porãvéramo ko mbaʼe Jehová oipotáva jajapo.

2. ¿Mbaʼépa jahecháta ko artíkulope?

² Ko artíkulope jahecháta mávapa oreko autorida kongregasiónpe. Ñambohováita avei koʼã porandu: ¿Mbaʼe lugárpa oreko ermanakuéra kongregasiónpe? ¿Ikatu piko jaʼe enterove ermáno omoakãha káda ermánape? ¿Peteĩcha piko hína pe autorida orekóva umi ansiáno umi ermáno ha ermanakuérare, ha pe autorida orekóva umi omoakãva hogapy hembireko ha ifamiliakuérare? Primero jahecháta mbaʼéichapa jatrata vaʼerã ermanakuérape.

¿MBAʼÉICHAPA JATRATA VAʼERÃ ERMANAKUÉRAPE?

3. ¿Mbaʼépa ñanepytyvõta ñamombaʼeve hag̃ua umi mbaʼe ojapóva ñane ermanakuéra?

³ Ñande ningo ñamombaʼeterei ñane ermanakuéra ombaʼapo jejopývape oñangareko hag̃ua ifamíliare, opredika hag̃ua umi notísia porã ha oipytyvõ hag̃ua ótrope kongregasiónpe. Péro ñamombaʼevétantema chupekuéra ñapensáramo mbaʼéichapa Jehová ha Jesús ohecha chupekuéra. Ideprovéchota avei ñandéve jahecháramo mbaʼéichapa apóstol Pablo otrata vaʼekue kuñanguérape.

4. ¿Mbaʼéichapa la Biblia ohechauka Jehová omombaʼeha peteĩcha kuimbaʼekuéra ha kuñanguérape?

⁴ La Biblia ohechauka Jehová omombaʼeha peteĩchaite kuimbaʼekuéra ha kuñanguérape. Por ehémplo, yma umi apostolkuéra tiémpope Jehová omeʼẽ vaʼekue espíritu sánto umi kuñanguérape omeʼẽháicha avei umi kuimbaʼépe. Upéicha rupi haʼekuéra ikatu vaʼekue ojapo milágro rupive heta mbaʼe ijojahaʼỹva, por ehémplo oñeʼẽ diferénte idiómape (Hech. 2:1-4, 15-18). Kuimbaʼekuérape ha avei kuñanguérape ojeporavo espíritu sánto rupive ogoverna hag̃ua Cristo ndive (Gál. 3:26-29). Mokõivépe Jehová omeʼẽta vída etérna ko yvy ape ári (Apoc. 7:9, 10, 13-15). Ha tahaʼe kuña térã kuimbaʼe oreko pe asignasión opredika ha omboʼévo umi notísia porã (Mat. 28:19, 20). Por ehémplo, pe lívro de Héchospe oñeñeʼẽ peteĩ ermána héravare Priscila. Haʼe ha iména Áquila omyesakã porãve vaʼekue pe añetegua Apólospe, peteĩ kuimbaʼe ijestúdio porãva (Hech. 18:24-26).

5. ¿Mbaʼéichapa Lucas 10:38, 39, 42 ohechauka Jesús orrespeta hague kuñanguérape?

⁵ Jesús omombaʼe ha orrespeta vaʼekue kuñanguérape. Haʼe ndosegíri vaʼekue umi fariséo kostúmbre. Haʼekuéra oapoʼi vaʼekue kuñanguérape, noñeʼẽi voi chupekuéra umi hénte renondépe ha ni núnka noñeʼẽmoʼãi hendivekuéra Ñandejára Ñeʼẽre. Péro Jesús oñeʼẽ vaʼekue umi enseñánsa hypyʼũvare umi kuñanguérandi ojapoháicha umi ótro idisípulondi (elee Lucas 10:38, 39, 42).b Haʼe opermiti vaʼekue avei umi kuñanguérape omoirũ chupe oviaha jave opredika hag̃ua (Luc. 8:1-3). Ha Jesús omeʼẽ chupekuéra pe priviléhio omombeʼúvo umi apóstolpe oñemoingove jeýma hague chupe (Juan 20:16-18).

6. ¿Mbaʼéichapa Pablo ohechauka vaʼekue orrespetaha kuñanguérape?

⁶ Apóstol Pablo omomanduʼa vaʼekue Timotéope omombaʼe hag̃ua kuñanguérape. Por ehémplo, Pablo heʼi chupe otrata hag̃ua umi kuña ijedávape isýicha, ha umi kuña imitãvape iñermánaicha (1 Tim. 5:1, 2). Pablo heta oipytyvõ vaʼekue Timotéope oiko hag̃ua chugui peteĩ kristiáno ijerovia mbaretéva. Upéicharõ jepe, haʼe orrekonose vaʼekue Timoteo sy ha ijavuéla oipytyvõ hague chupe oikuaa hag̃ua “Ñandejára Ñeʼẽ” (2 Tim. 1:5; 3:14, 15). Pablo oskrivírõ guare ikárta umi rrománope, osaluda vaʼekue umi ermanakuérape hérarupi. Haʼe ndahaʼéi ohechakuaánteva la ojapóva koʼã ermána, síno oagradese avei chupekuéra upévare (Rom. 16:1-4, 6, 12; Filip. 4:3).

7. ¿Mbaʼe porandúpa ñambohováita koʼág̃a?

⁷ Umi párrafo ñaanalisa vaʼekuépe jahecha la Biblia ndeʼiriha ermanakuéra menove iñimportanteha ermanokuéragui. Ansianokuéra ningo ojerovia umi ñane ermanakuéra oporohayhu ha imbaʼeporãitévare, pórke tuichaiterei oipytyvõ hikuái oĩ hag̃ua pyʼaguapy ha unida kongregasiónpe. Péro tekotevẽ gueteri ñambohovái koʼã porandu: ¿Mbaʼérepa Jehová ojerure sapyʼánte ermanakuérape okuvri hag̃ua iñakã? Ermanokuérapente oñenombra haguére ansiáno ha siérvo ministeriál, ¿heʼisépa upéva enterove ermáno omoakãha káda ermána oĩvape kongregasiónpe?

¿IKATÚPA JAʼE ENTEROVE ERMÁNO OMOAKÃHA KÁDA ERMÁNAPE?

8. ¿Ohechaukápa Efesios 5:23 enterove ermáno omoakãha káda ermánape?

⁸ Natekotevẽi ñambopuku ñambohovái hag̃ua upéva. La rrespuésta hína no. Peteĩ ermáno nomoakãi enterove ermána oĩvape kongregasiónpe, síno Cristo hína la omoakãva chupekuéra (elee Efesios 5:23). Peteĩ famíliape, pe ména omoakã hembirekópe, péro peteĩ mitãkuimbaʼe ojevautisáva nomoakãi hína isýpe (Efes. 6:1, 2). Ha kongregasiónpe, umi ansiáno oreko siérta autoridánte umi ermáno ha ermanakuérare (1 Tes. 5:12; Heb. 13:17). Umi ermána soltéra ndoikovéimava itúa ha isýndi osegi hína orrespeta ituakuérape ha umi ansianokuérape. Péro umi ermánoicha avei, chupekuéra omoakã Jesús añoite.

9. ¿Mbaʼérepa sapyʼánte ermanakuéra okuvri vaʼerã iñakã?

⁹ Jehová ningo oipota oñeorganisa porã pe kongregasión. Upévare onombra vaʼekue Jesúspe omoakã hag̃ua umi kuimbaʼépe. Avei onombra kuimbaʼekuérape ogia hag̃ua kongregasiónpe. Péro haʼe nomeʼẽi vaʼekue upe autorida kuñanguérape (1 Tim. 2:12). Upéicha rupi, sapyʼánte peteĩ ermána ojapótaramo peteĩ mbaʼe haʼéva ermanokuéra rresponsavilida, Jehová ojerure pe ermánape okuvri hag̃ua iñakã (1 Cor. 11:4-7).c Jehová ndojeruréi kóva ermanakuérape oapoʼi hag̃ua chupekuéra, síno péicha ohechauka hag̃ua hikuái orrespetaha umi haʼe omoĩ vaʼekuépe oporomoakã hag̃ua. Jarekomína enkuénta koʼã mbaʼe ñambohovái hag̃ua ko porandu: ¿Mbaʼe autoridápa oreko umi omoakãva hogapy ha umi ansianokuéra?

PE AUTORIDA OREKÓVA UMI OMOAKÃVA HOGAPY HA UMI ANSIÁNO

10. ¿Mbaʼérepa ikatu peteĩ ansiáno omoĩse umi rrégla kongregasiónpe?

¹⁰ Umi ansianokuéra ningo ohayhu Crístope, ha ohayhu avei umi ovechakuéra Jehová ha Jesús oheja vaʼekuépe ikargopekuéra (Juan 21:15-17). Peteĩ ansiáno ojepyʼapy rupi pe kongregasiónre, ikatu oñeñandu haʼeramoguáicha umi ermanokuéra túa. Haʼe ikatu opensa peteĩ omoakãva hogapy orekóramo derécho omoĩ hag̃ua umi rrégla oprotehe hag̃ua ifamília, peteĩ ansiáno ikatuha avei omoĩ umi rrégla haʼe oimoʼãva oprotehetaha ermanokuérape. Ha ikatu voi oĩ umi ermáno ha ermanakuéra omokyreʼỹva ansianokuérape ojapo hag̃ua upéva, ojerurévo chupekuéra odesidi hag̃ua ivése. ¿Péro umi ansianokuérapa oreko la mísma autorida orekóva umi omoakãva hogapy?

11. ¿Mbaʼépepa ojojogua pe autorida orekóva umi omoakãva hogapy ha umi ansianokuéra?

¹¹ Apóstol Pablo ontendeka vaʼekue pe autorida orekóva peteĩ omoakãva hogapy ha umi ansiáno ojojoguaha unas kuánta kósape (1 Tim. 3:4, 5). Por ehémplo, Jehová oipota umi família iñeʼẽrendu umi omoakãvape chupekuéra (Col. 3:20). Ha oipota avei umi oĩva kongregasiónpe iñeʼẽrendu ansianokuérape. Jehová ohaʼarõ umi omoakãvagui hogapy ha umi ansianokuéragui oipytyvõ umi oĩvape ipoguýpe ohayhu hag̃ua Jehovápe, ha oñandu hag̃ua ojehayhuha chupekuéra. Ha umi omoakãvaicha avei hogapy, ansianokuéra ojasegura oipytyvõ hag̃ua umi oĩvape kongregasiónpe ohasa asy jave (Sant. 2:15-17). Avei Jehová ohaʼarõ umi ansianokuéra ha umi omoakãva hogapy oipytyvõ umi ótrope okumpli hag̃ua umi léi haʼe omeʼẽva, péro oavisa chupekuéra ‘ojesegi vaʼerãha Ñandejára Ñeʼẽ heʼívarente’ (1 Cor. 4:6).

12, 13. Ohechaukaháicha Romanos 7:2, ¿mbaʼépepa idiferénte pe autorida orekóva umi omoakãva hogapy ha umi ansianokuéra?

¹² Péro pe autorida orekóva umi ansiáno tuicha avei idiferénte pe autorida orekóvagui umi omoakãva hogapy. Por ehémplo, Jehová oasigna ansianokuérape oporohusga hag̃ua, ha omeʼẽ chupekuéra pe autorida omosẽ hag̃ua kongregasióngui umi pekadór noñarrepentírivape (1 Cor. 5:11-13).

¹³ Péro Jehová omeʼẽ umi omoakãvape hogapy siérta autorida nomeʼẽiva umi ansianokuérape. Por ehémplo, omeʼẽ chupekuéra autorida omoĩ hag̃ua umi rrégla ifamíliape g̃uarã, ha ojasegura hag̃ua oñekumpliha umíva (elee Romanos 7:2). Por ehémplo, peteĩ omoakãva hogapy oreko derécho odesidívo mbaʼe órapa pyharekue og̃uahẽ vaʼerã ifamiliakuéra hógape. Ha oreko avei pe autorida okorrehi hag̃ua ifamiliakuérape nokumplíri jave upe rrégla (Efes. 6:1). Jaikuaaháicha, peteĩ túa oporohayhúva oñemongeta raẽta hembirekóndi omoĩ mboyve umi rrégla hogapýpe, pórke haʼekuéra “peteĩntema” hína (Mat. 19:6).d

JARRESPETA CRÍSTOPE HAʼE RUPI PE OMOAKÃVA KONGREGASIÓN

14. a) Ohechaukaháicha Marcos 10:45, ¿mbaʼérepa oĩ porã Jehová onombra hague Jesúspe omoakã hag̃ua pe kongregasión? b) ¿Mbaʼe rresponsavilidápa oreko pe Kuérpo Governánte? (Ehecha pe rrekuádro “Pe rresponsavilida orekóva pe Kuérpo Governánte”).

¹⁴ Jesús sakrifísio rupive, Jehová opaga káda uno oĩvare kongregasiónpe, ha enterove umi ohechaukávare ojeroviaha Jesúsre (elee Marcos 10:45; Hech. 20:28; 1 Cor. 15:21, 22). Upévare oĩ porãiterei la onombra Jesúspe omoakã hag̃ua kongregasión, pórke haʼe omeʼẽ vaʼekue hekove ñanderehehápe. Upévare Jesús oreko pe autorida omoĩ hag̃ua umi rrégla heʼíva mbaʼépa ojapo vaʼerã umi persóna, umi família ha pe kongregasión kompletoite. Ha oreko avei derécho ojasegurávo oñekumpliha hína umi rrégla (Gál. 6:2). Péro Jesús ndahaʼéi omoĩnteva umi rrégla, haʼe ningo oñangareko porã ñanderehe ha ñanderayhu (Efes. 5:29).

15, 16. ¿Mbaʼépa nde reaprende umi mbaʼe heʼi vaʼekuégui ermána Marley ha ermáno Benjamín?

¹⁵ Ermanakuéra ohechauka orrespetaha Crístope osegívo pe gía omeʼẽva umi ermanokuéra oñenombra vaʼekue oñangareko hag̃ua hesekuéra. Peteĩ ermána hérava Marley, oikóva Estados Unídospe, heʼi: “Amombaʼeterei ningo pe rresponsavilida arekóva kongregasiónpe, che haʼe rupi peteĩ tembireko ha peteĩ ermána. Chéngo asegi vaʼerã añehaʼãmbaite arrespeta hag̃ua pe autorida Jehová omeʼẽ vaʼekue che ménape ha umi ansianokuérape. Péro che ména ha umi ermáno oĩva kongregasiónpe ombofasilve chéve, pórke haʼekuéra cherrespeta ha oagradese umi mbaʼe ajapóva”. Katuete ningo heta ermána oñeñandu avei Marley oñeñanduháicha.

¹⁶ Umi ermáno orrespeta ha omombaʼe jave ermanakuérape, ohechauka ontendeha Jehová omeʼẽ hague autorida algúnope oporomoakã hag̃ua. Peteĩ ermáno hérava Benjamín, oikóva Inglatérrape, heʼi: “Aaprendéma heta mbaʼe umi komentário omeʼẽvagui ermanakuéra rreunionhápe, ha umi suherénsia omeʼẽvagui mbaʼéichapa jastudia vaʼerã, ha mbaʼéichapa ikatu japredika ha ñaporomboʼe porãve. Che apensa pe traváho haʼekuéra ojapóva ideprovechoitereiha”.

17. ¿Mbaʼérepa ñantende ha jarrespeta vaʼerã Jehová omeʼẽ hague siérta autorida algúnope?

¹⁷ Kongregasiónpe enterove, tahaʼe umi kuimbaʼe, kuña, umi omoakãva hogapy ha umi ansianokuéra, ontende ha orrespetáramo Jehová omeʼẽ hague siérta autorida ótrope, oĩta pyʼaguapy kongregasiónpe. Ha iñimportanteveha, ótro ohechávo ñane kondúkta omombaʼeguasúta Jehovápe, ñande Ru yvagapegua ñanderayhuetévape (Sal. 150:6).