Enterove ñaiméva kongregasiónpe ikatu ñaipytyvõ umi estudiántepe ojevautisa hag̃ua

1, 2. ¿Mávapa ikatu oipytyvõ peteĩ estudiántepe oprogresa hag̃ua ojevautisa peve?

“CHE ningo amombaʼeterei kuri umi mbaʼe aaprendéva astudiávo la Biblia. Aikuaa kuri haʼeha la verda. Péro ahasa rire tiémpo umi ermáno ha ermanakuérandi, upépe ae ajapo umi kámbio chepytyvõtava ajevautisa hag̃ua”, heʼi Amy oikóva Fíyipe. Umi mbaʼe Amy heʼíva ohechauka peteĩ mbaʼe iñimportantetereíva: Peteĩ estudiántepe ifasilvéta osegi hag̃ua oprogresa ojevautisa peve, oipytyvõramo chupe umi ótro ermáno oĩva kongregasiónpe.

² Káda puvlikadór ikatu oipytyvõ okakuaa hag̃ua pe kongregasión (Efes. 4:16). Peteĩ prekursóra hérava Leilani oikóva Vanuátupe, heʼi: “Ojeʼe ningo oñekotevẽha peteĩ puévlo kompletoite oñemongakuaa hag̃ua peteĩ mitã. Chéverõ g̃uarã upéicha avei oñepytyvõ jave peteĩ persónape oservi hag̃ua Jehovápe: Oñekotevẽ voi peteĩ kongregasión kompletoite ojejapo hag̃ua peteĩ disípulo”. Osẽ porã hag̃ua peteĩ mitã, tekotevẽta oipytyvõ chupe ituakuéra, umi ipariénte, pe família amigokuéra ha umi iprofesór eskuelapegua. Haʼekuéra ojapo upéva omokyreʼỹvo pe mitãme ha omboʼévo chupe heta mbaʼe iñimportánteva. Upéicha avei umi ermáno ha ermanakuéra kongregasionpegua ikatu oakonseha, omokyreʼỹ ha omoĩ peteĩ ehémplo iporãva umi estudiántepe g̃uarã. Péicha oipytyvõ chupekuéra oprogresa hag̃ua pe vautísmo peve (Prov. 15:22).

3. ¿Mbaʼépa ñaaprende umi mbaʼe heʼi vaʼekuégui Ana, Diosnel, ha Leilani?

³ Pe puvlikadór ojapóva pe estúdio ovyʼa vaʼerã oĩ jave umi ermáno oipytyvõséva iñestudiántepe. ¿Mbaʼérepa? Jahechamína la heʼi vaʼekue Ana, peteĩ prekursóra espesiál oikóva Moldáviape: “Peteĩ estudiánte oñepyrũ vove oprogresa, oñepytyvõ vaʼerã chupe heta mbaʼépe, ha ijetuʼuetereíta pe iñinstruktórnte omeʼẽmba hag̃ua chupe pe ajúda oikotevẽva”. Diosnel, peteĩ prekursór espesiál oservíva avei Moldáviape, heʼi: “Pyʼỹinte umi ótro puvlikadór heʼi peteĩ mbaʼe og̃uahẽva pe estudiánte korasõme, ha heta vése che ni napensái kuri upévare”. Leilani heʼi avei: “Pe estudiánte ohecha vove umi ermáno ha ermanakuéra ohayhu ha oñeinteresaha hese, oipytyvõta chupe ohechakuaa hag̃ua ñande haʼeha Jehová puévlo” (Juan 13:35).

4. ¿Mbaʼépa jahecháta ko artíkulope?

⁴ Péro ikatu ñañeporandu: “¿Mbaʼépa ajapokuaa aipytyvõ hag̃ua peteĩ estudiántepe oprogresa hag̃ua che ndahaʼéiramo iñinstruktór?”. Jahechamína koʼág̃a mbaʼépa ikatu jajapo peteĩ ermáno ñaneinvita jave jajapo hag̃ua peteĩ estúdio hendive, ha mbaʼépa ikatu jajapo pe estudiánte oñepyrũ jave oho rreunionhápe. Jahecháta avei mbaʼéichapa umi ansiáno ikatu oipytyvõ umi estudiántepe oprogresa hag̃ua ojevautisa peve.

ÑAMOIRŨ JAVE PETEĨ ERMÁNOPE IJESTÚDIOPE

5. ¿Mbaʼépa jajapo vaʼerã peteĩ ermáno ñaneinvita jave jajapo hag̃ua hendive ijestúdio?

⁵ Ojejapo jave peteĩ estúdio bíblico, pe instruktór kárgope oĩ hína oipytyvõ iñestudiántepe ontende hag̃ua Ñandejára Ñeʼẽ. Pe instruktór ñaneinvitáramo ñamoirũ hag̃ua chupe, ñande ñaime upépe ñaipytyvõ hag̃ua pe instruktórpe (Ecl. 4:9, 10). ¿Péro mbaʼépa ikatu jajapo ñaipytyvõ porã hag̃ua pe estúdio aja?

6. Ñamoirũta jave peteĩ ermánope ojapo hag̃ua ijestúdio, ¿mbaʼéichapa ikatu jajapo pe konsého jatopáva Proverbios 20:18-pe?

⁶ Jajeprepara pe estudiorã. Jajerure pe instruktórpe teʼi ñandéve umi mbaʼe ñanepytyvõtava jaikuaave hag̃ua pe estudiántepe (elee Proverbios 20:18). Ikatu ñaporandu chupe: “¿Mbaʼe mbaʼépa reikuaa pe estudiántegui? ¿Mbaʼe témapa restudiáta hína hendive? ¿Mbaʼépa reipota haʼe oaprende ko estúdiope? ¿Oĩpa álgo ndovaléiva haʼe térã ajapo pe estúdio aja? ¿Mbaʼépa ikatu haʼe térã ajapo aipytyvõ hag̃ua chupe oprogresa hag̃ua?”. Jaikuaa ningo pe instruktór nomombeʼumoʼãiha ñandéve umi mbaʼe natekotevẽiva jaikuaa pe estudiántegui, péro umi mbaʼe heʼíva ñandéve ikatu ideprovechoiterei hína. Peteĩ misionéra hérava Joy, oñeʼẽ koʼã mbaʼére umi omoirũvandi chupe ojapo hag̃ua ijestúdio. Haʼe heʼi: “Añemongeta rupi koʼã mbaʼére pe chemoirũvandi, upéva oipytyvõ chupe oñeinteresa hag̃ua pe estudiántere, ha oikuaa hag̃ua mbaʼépa heʼíta pe estúdio aja”.

7. ¿Mbaʼérepa iñimportánte jajeprepara ñamoirũta jave peteĩ ermánope ijestúdiope?

⁷ Peteĩ ermáno ñaneinvitáramo jajapo hag̃ua hendive ijestúdio, iporãta jajepreparáramo pe leksión ojestudiátava (Esd. 7:10). Diosnel, pe ermáno ñañeʼẽma hague, heʼi: “Amombaʼeterei ningo umi chemoirũva ojeprepara jave pe estudiorã. Upéicharõ, haʼekuéra ikatúta heʼi umi mbaʼe ideprovéchotava pe estudiántepe”. Péicha jajapórõ, pe estudiánte ohechakuaáta avei mokõivéva jajeprepara porã hague, ha ñamoĩta chupe peteĩ ehémplo porã. Ndaikatúiramo jepe jastudiapaite pe informasión, ñañemotiémpo vaʼerã jatopa hag̃ua umi idéa iñimportantevéva oĩva pe leksiónpe.

8. ¿Mbaʼépa ñanepytyvõta ideprovécho hag̃ua umi orasión jajapóva peteĩ estúdio bíblico jave?

⁸ Pe orasión ningo iñimportanteterei ojejapóta jave peteĩ estúdio bíblico. Upévare ñapensáma vaʼerã mbaʼépa jaʼéta ojejeruréramo ñandéve ñañemboʼe hag̃ua. Upéicharõ, umi mbaʼe jaʼéva ñañemboʼe jave ideprovechovéta pe estudiántepe (Sal. 141:2). Hanae, oikóva Japónpe, koʼág̃a peve imanduʼa umi orasión ojapo vaʼekuére pe ermána omoirũ vaʼekue iñinstruktórape. Haʼe heʼi: “Ahechakuaa haʼe orekoha peteĩ amista imbaretéva Jehovándi, ha che asegise iñehémplo. Añandu avei haʼe cherayhuha, pórke oñemboʼe jave imanduʼa che rérare”.

9. Heʼiháicha Santiago 1:19, ¿mbaʼépa ikatu jajapo ñamoirũ porã hag̃ua pe instruktórpe ijestúdio aja?

⁹ Ñaipytyvõ pe instruktórpe ijestúdio aja. Omamuyovbi, peteĩ prekursóra espesiál Nigeriapegua, heʼi: “Peteĩ ñanemoirũ porãva ojapysaka umi mbaʼe ojeʼévare pe estúdio aja. Haʼe ningo saʼimínte oñeʼẽ, pórke ohechakuaa pe instruktór oñenkargaha pe estúdiore, péro umi mbaʼe heʼíva ideprovechoiterei”. ¿Mbaʼéichapa ikatu jaikuaa mbaʼépa jaʼe vaʼerã, ha mbaʼe moméntopepa? (Prov. 25:11). Jajapysaka porã vaʼerã pe instruktór ha pe estudiánte heʼívare (elee Santiago 1:19). Upéicharõ ñaimétama preparádo ñaipytyvõ hag̃ua opyta porãve jave. Péro jaikuaaháicha ñapensa porã vaʼerã ñañeʼẽ mboyve. Por ehémplo, ndajaikoséi ñaneñeʼẽngatu, ñañeʼẽjoko pe instruktórpe oexplika aja peteĩ mbaʼe, térã ñañepyrũ ñañeʼẽ ótra kósare. Péro ñande ikatu ñaipytyvõ oñemyesakã porãve hag̃ua peteĩ mbaʼe jajapóramo peteĩ komentário mbykymi, peteĩ porandu térã ñamoĩramo peteĩ ehémplo. Sapyʼánte ikatu ñapensa: “Chéko ndarekói mbaʼeve guasu haʼe vaʼerã aipytyvõ hag̃ua pe estudiántepe”. Péro jafelisitáramo chupe ha jahechauka ñañeinteresaha hese, tuichaiterei ñaipytyvõta chupe oprogresa hag̃ua.

10. ¿Mbaʼéichapa umi mbaʼe jahasa vaʼekue ikatu oipytyvõ peteĩ estudiántepe?

¹⁰ Ñamombeʼu umi mbaʼe jahasa vaʼekue. Oiméramo oipytyvõta pe estudiántepe, ñamombeʼu chupe mbykymi mbaʼéichapa jaikuaa vaʼekue Jehovápe, mbaʼéichapa jagueropuʼaka raʼe peteĩ situasión ijetuʼúva, ha mbaʼéichapa ñandete voi jahecháma Jehová ñanepytyvõ hague ñande rekovépe (Sal. 78:4, 7). Umi mbaʼe ñamombeʼúva ikatu hína kavalete pe estudiánte oikotevẽva. Upéva ikatu omombarete ijerovia ha omokyreʼỹ chupe osegi hag̃ua oprogresa ojevautisa peve. Ha ikatu oipytyvõ chupe ogueropuʼaka hag̃ua peteĩ provléma ombohováiva hína (1 Ped. 5:9). Gabriel, oikóva Brasílpe ha koʼág̃a oservíva de prekursór, imanduʼa mbaʼépa oipytyvõ vaʼekue chupe ostudiárõ guare la Biblia. Haʼe heʼi: “Umi ermáno omombeʼúrõ guare chéve umi mbaʼe ohasa vaʼekue, aaprende Jehová oikuaaha mbaʼe provlémapa jareko. Ha haʼekuéra ikatúrõ ogueropuʼaka umi provléma, upéicharõ che avei ikatúta”.

PE ESTUDIÁNTE OÑEPYRŨVO OHO RREUNIONHÁPE

11, 12. ¿Mbaʼérepa mborayhúpe jarresivi vaʼerã peteĩ estudiánte oúvape rreunionhápe?

¹¹ Ikatu hag̃uáicha pe estudiánte oprogresa ojevautisa peve, tekotevẽta oho kontinuadoite rreunionhápe. Upéva tuichaiterei oipytyvõta chupe (Heb. 10:24, 25). Katuete oiméne pe iñinstruktór oinvitáta chupe rreunionrã. Ha pe estudiánte ou vove primera ves Salón del Réinope, enterove ñamokyreʼỹse chupe osegi hag̃ua ou umi rreunionhápe. ¿Mbaʼéichapa ikatu jajapo upéva?

¹² Mborayhúpe jarresivi pe estudiántepe (Rom. 15:7). Pe estudiánte oñandúramo ojerresivi porãha chupe rreunionhápe, katuete osegíne ouse Salónpe. Jadesahusiaʼỹre chupe, jasaluda torýpe pe estudiántepe, ha ñapresenta chupe umi ermanokuéra. Ani ñapensa oñeñatendemaha hese, pórke oiméne pe iñinstruktór nog̃uahẽiti térã hembiapo heta hína pe Salón del Réinope. Jajapysaka porã vaʼerã pe estudiántere, ha jahechauka ñañeinteresaha hese. ¿Mbaʼéichapa ikatu oipytyvõ pe estudiántepe jarresivi porãramo chupe? Jahechamína Dimitri ohasa vaʼekue. Ojapo unos kuánto áñonte haʼe ojevautisa hague, ha koʼág̃a oikóma chugui siérvo ministeriál. Haʼe imanduʼávo primera ves ohórõ guare rreunionhápe, heʼi: “Chéngo ahaʼarõ kuri pe Salón renondépe, akyhyje ha atĩeterei hína upépe. Péro peteĩ ermáno cherecha ha mborayhúpe chegueraha hendive pe Salón ryepýpe. Upépe heta ermáno ou chesaluda, ha añetehápe ahecharamoiterei upéva. Chegustaitereígui, aipota voi oiko la rreunión káda día. Upe lugárpe añandu vaʼekue peteĩ mbaʼe núnka nañandúiva ótro hendápe”.

13. ¿Mbaʼéichapa ñane ehémplo ikatu oipytyvõ peteĩ estudiántepe?

¹³ Ñamoĩ ehémplo porã. Ñane ehémplo porã ikatu oipytyvõ pe estudiántepe ohechakuaa hag̃ua ñande haʼeha kristiáno tee (Mat. 5:16). Vitali, peteĩ prekursór oservíva Moldáviape, heʼi: “Che ahecha mbaʼéichapa oiko, opensa ha oñekomporta umi ermáno oĩva kongregasiónpe. Upéva chekonvense umi testígo de Jehová haʼeha pe rrelihión verdadéra”.

14. ¿Mbaʼéichapa ñane ehémplo ikatu oipytyvõ peteĩ estudiántepe osegi hag̃ua oprogresa?

¹⁴ Pe estudiánte ojevautisa mboyve, tekotevẽta ojapo umi mbaʼe oaprendéva. Upéva ningo ndahaʼéi siémpre la ifasilpáva. Péro pe estudiánte ohechávo mbaʼéichapa ideprovécho ñandéve jasegi umi konsého oĩva la Bíbliape, omomýita chupe osegise hag̃ua ñane ehémplo (1 Cor. 11:1). Jahechamína Hanae ohasa vaʼekue, pe ermána ajeʼi ñañeʼẽ hague. Haʼe heʼi: “Umi ermáno ha ermanakuéra ojapóma kuri oikóvo umi mbaʼe che aaprendéva ajapo vaʼerãha. Amañávo hesekuéra aaprende mbaʼéichapa ikatu amokyreʼỹ ha aperdona ótrope, ha mbaʼéichapa ikatu ahechauka aporohayhuha. Haʼekuéra ningo siémpre heʼi umi mbaʼe iporãva hapichakuérare, ha che asegise iñehemplokuéra”.

15. Heʼiháicha Proverbios 27:17, ¿mbaʼérepa ñañamiga vaʼerã umi estudiántere?

¹⁵ Ñañamiga pe estudiántere. Pe estudiánte okontinuáramo oho rreunionhápe, jasegi vaʼerã jahechauka ñañeinteresaha hese (Filip. 2:4). Ñande ikatu ñañehaʼã jaikuaa porãve chupe. Por ehémplo, jafelisita pe estudiántepe umi kámbio iporãva ojapóvare, ha ñaporandu chupe mbaʼetekópa oho hese la ijestúdio, ifamília ha itraváho. Péro ñañatende vaʼerã ani jahasa la rrája ha ñaporandu umi mbaʼe omoñeñandu vaítava chupe. Upéicharõ, ñañemongetáramo hendive ñañamigavéta hese, ha ñaipytyvõta chupe oprogresa ha ojevautisa hag̃ua (elee Proverbios 27:17). Hanae koʼág̃a oservíma de prekursóra rregulár, ha imanduʼávo pe tiémpo oho ñepyrũrõ guare rreunionhápe, heʼi: “Añamiga heta rehe kongregasiónpe, ha upépe koʼýte ahase vaʼekue umi rreuniónpe, ha aha chekaneʼõ jave jepe. Avyʼaiterei ningo aime jave umi che amigokuéra pyahúndi, ha upéva chepytyvõ aheja hag̃ua umi che amigokuéra yma guarépe ndoservíriva Jehovápe. Che añemoag̃uiseve kuri Jehováre ha avei umi ermáno ha ermanakuérare, upévare adesidi ajevautisa”.

16. ¿Mbaʼépa avei ikatu jajapo ñaipytyvõ hag̃ua peteĩ estudiántepe oñeñandu porã hag̃ua kongregasiónpe?

¹⁶ Pe estudiánte osegíramo oprogresa ha okambia, ñaipytyvõ vaʼerã chupe oñandu hag̃ua orekoha peteĩ lugár kongregasiónpe. Ñande ikatu jajapo upéva jarresivi porãvo chupe ñande rógape, ha jahasávo tiémpo hendive (Heb. 13:2). Denis, oikóva Moldáviape, imanduʼávo pe tiémpo ostudiárõ guare la Biblia, heʼi: “Umi ermáno heta vése oreinvita chéve ha che rembirekópe rohasa hag̃ua tiémpo hendivekuéra. Haʼekuéra omombeʼu oréve mbaʼéichapa Jehová oipytyvõma chupekuéra, ha upéva oremokyreʼỹeterei. Koʼã mbaʼe orekonvense roserviseha Jehovápe, ha oreraʼarõha heta mbaʼe iporãva”. Pe estudiántegui oiko vove puvlikadór, ñande ikatu ñainvita chupe ñanemoirũ hag̃ua predikasiónpe. Diego, peteĩ puvlikadór Brasilpegua, heʼi: “Heta ermáno cheinvita vaʼekue asẽ hag̃ua apredika hendivekuéra. Péicha ifasilve chéve aikuaa porãve hag̃ua chupekuéra. Aaprende kuri heta mbaʼe chuguikuéra, ha añandu añemoag̃uiveha Jehová ha Jesús rehe”.

¿MBAʼÉICHAPA IKATU OIPYTYVÕ UMI ANSIÁNO?

17. ¿Mbaʼéichapa ansianokuéra ikatu oipytyvõ umi estudiántepe?

¹⁷ Oñemotiémpo vaʼerã umi estudiantekuérape g̃uarã. Umi ansiáno ohechaukáramo ohayhu ha ojepyʼapyha umi estudiántere, ikatu oipytyvõ chupekuéra oprogresa hag̃ua ojevautisa peve. Ansianokuéra, ¿ikatúpa peñemotiémpo jepi peñemongeta hag̃ua umi estudiántendi rreunionhápe? Haʼekuéra ohechakuaáta peẽ peñeinteresaha hesekuéra penemanduʼárõ hérare, koʼýte oñepyrũ vove okomenta hikuái. ¿Ikatúpa avei peñemotiémpo pemoirũ hag̃ua peteĩ puvlikadórpe ojapo hag̃ua ijestúdio bíblico? Peẽ ni napeñeimahinái mbaʼeichaitépa ikatu peipytyvõ peteĩ estudiántepe. Peteĩ prekursóra hérava Jackie, oikóva Nigériape, heʼi: “Heta estudiánte ningo oñesorprende oikuaávo peteĩ ansiáno chemoirũ hague ajapo hag̃ua pe estúdio. Peteĩ estudiánte heʼi: ‘Che pastór arakaʼeve ndojapomoʼãi upéva. Haʼe ovisita umi irríkovapente ha ojepagárõ añoite chupe’”. Upe estudiánte koʼág̃a oho meme rreunionhápe.

18. ¿Mbaʼéichapa ansianokuéra ikatu okumpli pe heʼíva Hechos 20:28?

¹⁸ Omboʼe ha omokyreʼỹ vaʼerã umi orekóvape estúdio. Ansianokuéra, peẽ ningo pereko peteĩ rresponsavilida iñimportantetereíva: Peipytyvõ umi puvlikadórpe opredika ha oporomboʼe porã hag̃ua la Biblia (elee Hechos 20:28). Peteĩ ermáno otĩramo ojapo hag̃ua ijestúdio penendive, ikatu peẽ voi pejeofrese pedirihi hag̃ua pe estúdio. Jackie, pe ermána ñañeʼẽma hague, heʼi: “Umi ansiáno pyʼỹinte oporandu chéve che estudiantekuérare. Ha ijetuʼu jave chéve ajapo hag̃ua peteĩ estúdio, haʼekuéra omeʼẽ chéve umi konsého ideprovechoitereíva”. Ansianokuéra, peẽ tuichaiterei ikatu pemokyreʼỹ umi orekóvape estúdio bíblico ani hag̃ua oñentrega (1 Tes. 5:11). Jackie heʼive: “Avyʼaiterei umi ansiáno chemokyreʼỹ ha heʼi jave omombaʼetereiha pe traváho ajapóva. Umi mbaʼe heʼíva chéve chembopiroʼy, ha haʼete voi oñemeʼẽva chéve un váso y roʼysã arahaku jave. Umi mbaʼe porã heʼíva chepytyvõ añandu hag̃ua ajapo porãha hína umi estúdio bíblico, ha avei avyʼave hag̃ua” (Prov. 25:25).

19. ¿Mbaʼépa enterovépe ikatu ñanembovyʼa?

¹⁹ Koʼág̃a ñande ndajarekóiramo jepe peteĩ estúdio bíblico, lomímonte ikatu ñaipytyvõ ótrope oprogresa ha ojevautisa hag̃ua. Por ehémplo, ñaipytyvõ hag̃ua pe instruktórpe ijestúdio aja, japrepara porã vaʼerã umi mbaʼe jaʼétava ha ani ñañeʼẽterei. Ñande ikatu ñañamiga umi estudiántere ou vove Salónpe, ha ñamoĩ chupekuéra ehémplo porã. Umi ansianokuéra ikatu omokyreʼỹ umi estudiántepe oñemotiémpovo chupekuéra g̃uarã, ha avei umi orekóvape estúdio omboʼe ha oguerohorývo chupekuéra. Javyʼaiterei ningo ikatu haguére jajapo michĩmi jepe ñaipytyvõ hag̃ua peteĩ persónape ohayhu ha oservi hag̃ua Jehovápe. Ndaipóri voi ótra kósa ñanembovyʼavéva upévagui.