“¡Koʼág̃a chegustaiterei voi pe predikasión!”

AJU NDAVYʼAVÉI

Ambyasyete ningo la arekórõ guare 13 áñorupi che amista Jehovándi ou hague ikangy. Che kompañerokuéra eskuelapegua oiko vaʼekue iñakãrente voi, ha che aikose avei upéicha. Añandu che tuakuéra ojopyetereimaha chendive, ha umi mbaʼe ojejeruréva kristianokuéragui haʼete chéve la ipohyietereímava. Upévare chéve g̃uarã haʼetéma vaʼekue peteĩ kárga la aservi Jehovápe. Núnka ndadudáiva Jehová oexistiha, péro ndarekovéima kuri hendive peteĩ amista iporãva.

Ndoikojepéi vaʼekue chehegui inaktíva, péro apenaiténtema apredika. Che ningo ni ndajepreparái vaʼekue voi asẽ hag̃ua predikasiónpe. Upéicha rupi ijetuʼu chéve añepyrũ hag̃ua añemongeta umi héntendi, térã añemongeta puku hag̃ua hendivekuéra. Upévare ndarekói vaʼekue ni peteĩ rrevisíta ni estúdio bíblico. Ha upépe katu koʼýte ndavyʼavéi ha ndachegustavéi pe predikasión. Che añeporandúmi vaʼerã: “¿Mbaʼéicha piko álgien ikatu osegi ojapo upéva káda semána ha káda mes?”.

Arekórõ guare 17 áño chetarovaite vaʼekue asẽse ógagui. Upémarõ ajagarra che kosakuéra ha ava Austráliape. Ijetuʼueterei vaʼekue che tuakuérape asẽrõ guare che rógagui. Haʼekuéra ojepyʼapyeterei cherehe, péro opensa hikuái asegitaha aservi Jehovápe upépe.

Austráliape katu saʼivéntema ajapo Jehová servísiope ha sapyʼapyʼántentema aha rreunionhápe. Añepyrũ ajeheʼa umi mitãrusu ha mitãkuña, chéicha un día ohóva rreunionhápe, ha al ótro día ohóva ofarrea ha omokõ umi diskotekaháre. Chemanduʼávo upe tiémpore ahechakuaa areko hague un ládo che py Jehová organisasiónpe ha pe ótro katu múndope. Péro ndavyʼái vaʼekue ni peteĩvape.

AAPRENDE PETEĨ MBAʼE IÑIMPORTÁNTEVA AHAʼARÕʼỸVE JAVE

Oiméne 2 áño upe rire, aikuaa peteĩ ermána ohechakuaaʼỹetére chemopensa vaʼekue mbaʼéichapa aipuru hína che rekove. Che aiko hína kuri 4 ermána soltérandi, ha roinvita pe superintendénte de sirkuítope ha hembireko Tamárape opyta hag̃ua orendive una semána. Iména oñatende aja umi mbaʼe kongregasionpeguáre, Tamara ohasa tiémpo orendive ha heta heta ropuka. ¡Ikalidaiterei ningo haʼe! Iñakãguapy ha ifásil ñañemongeta hendive. Ahecharamoiterei mbaʼéichapa peteĩ persóna ijerovia mbaretéva ovyʼakuaaite ha igústo ñaime hendive.

Tamara hetiaʼe ha ikyreʼỹ voi. Ova voi ñanderehe mbaʼéichapa haʼe ohayhu pe añetegua ha pe predikasión. Haʼe ovyʼaiterei omeʼẽvo Jehovápe pe iporãvéva, ha che katu apenamínte ajapo Jehová servísiope ha upévare ndavyʼái. Haʼe tuicha chepytyvõ ovyʼa ha ijaktitu porã rupi. Iñehémplo chemomanduʼa peteĩ mbaʼe iñimportánteva: Jehová oipota enterove ‘jaservi chupe vyʼápe’ ha ‘vyʼápe avei japurahéi chupe’ (Sal. 100:2).

IGÚSTO JEY CHÉVE LA PREDIKASIÓN

Che ningo avyʼase vaʼekue avei Tamáraicha, péro upearã tuicha akambia vaʼerã. Upéva chegueraha 3 áñorupi, péro saʼi saʼípe akambia ahávo. Añepyrũma ajeprepara predikasionrã ha ajapo sapyʼapyʼa che prekursorádo auxiliár. Upéva chepytyvõ saʼivéma chenerviósa hag̃ua ha ajeroviave hag̃ua chejehe. Aipuruve rupi la Biblia apredika jave igustove chéve pe predikasión. Upe riremínte ajapóma che auxiliár de kontínuo.

Añepyrũ añamiga umi ermanokuéra de diferénte edáre, ijerovia mbaretéva ha ovyʼáva oservívo Jehovápe. Iñehemplokuéra chepytyvõ apensa hag̃ua mbaʼépa amotenonde hína che rekovépe, ha añepyrũ hag̃ua alee la Biblia káda día. Upéicha rupi avyʼavéma predikasiónpe, ha upe rire añepyrũma ajapo che prekursorádo rregulár. Hasypeve heta áño haguépe, añeñandu porã ha avyʼa jey kongregasiónpe.

ATOPA PETEĨ CHEMOIRŨTAVA SIÉMPRE CHE PREKURSORÁDOPE

Un áño haguépe aikuaa Álexpe, peteĩ ermáno imbaʼeporãva, ohayhúva Jehovápe ha avei pe predikasión. Haʼe siérvo ministeriál kuri ha oservíma 6 áñore de prekursór rregulár. Haʼe oho vaʼekue Maláuipe peteĩ tiémpore oservi hag̃ua peteĩ lugár oñekotevẽhápe hetave puvlikadór. Upépe haʼe ojeheʼa heta misionérore ha iñehemplokuéra oipytyvõ ha omokyreʼỹ chupe osegi hag̃ua omotenonde hekovépe Jehová servísio.

Áño 2003-pe, Alex ha che romenda ha rosegi roservi de tiémpo kompléto. Oñondive roaprendéma heta mbaʼe ijojahaʼỹva, ha Jehová orevendesíma hetaiterei hendáicha.

PETEĨ OPORTUNIDA ROHUPYTY HAG̃UA HETAVE VENDISIÓN

Áño 2009-pe roñeinvita roservi hag̃ua de misionéro Timor Orientálpe, peteĩ país michĩmíva ha opytáva ag̃ui Indonésiagui. Ore roñesorprende, rovyʼa ha rokyhyje avei. Upéi 5 mése haguépe rog̃uahẽma katu rohóvo Dílipe, Timor Oriental kapitálpe.

Roservi hag̃ua upe paíspe, tekotevẽ kuri rokambia heta mbaʼépe. Entéro mbaʼénte voi idiferénte upépe: Pe kultúra, pe idióma, umi tembiʼu, ha mbaʼéichapa oiko umi hénte. Upévare rojadaptámante vaʼerã. Predikasiónpe katu rotopa umi hénte imboriahúva, ijeskuelaʼíva ha oiko asyetereíva. Heta hénte opyta vaieterei físika ha emosionálmente pe gérra ha violénsia káusare.a

¡Péro igustoiterei ningo la predikasión upépe! Por ehémplo, peteĩ jey atopa peteĩ mitãkuñaʼi de 13 áñore, hérava María.b Itristeterei ningo haʼe la hekove. Unos kuánto áñonte ojapo isy omano hague, ha ndohechaguasúi voi itúape. Oikoháicha heta mitã ijaveguávare, haʼe ndoikuaái vaʼekue mbaʼépa ojapóta hekovégui. Chemanduʼa peteĩ jey haʼe hasẽ asy hague omombeʼúvo chéve mbaʼéichapa oñeñandu. Péro che nantendéi la heʼi vaʼekue chéve, pórke nañeʼẽporãiti la iñidióma. Añemboʼe ningo Jehovápe, ha ajerure chupe chepytyvõ hag̃ua ikatu hag̃uáicha amokyreʼỹ Maríape. Upémarõ añepyrũ alee umi téxto okonsolátava chupe. Umi áño sigiéntepe ahecha mbaʼéichapa pe añetegua okambia Maríape, haʼe oñepyrũ ovyʼave, okambia ipínta ha hekove kompletoite. Haʼe ojevautisa kuri ha koʼág̃a haʼeháma omboʼe la Biblia ótrope. Koʼág̃a g̃uarã María orekóma peteĩ família tuichaitereíva oĩ rupi Jehová puévlope, ha oñandu ojehayhuha chupe.

Jehová ovendesi pe traváho ojejapóva Timor Orientálpe. Ojapóramo jepe 10 áñonte ojevautisa hague la majoría umi puvlikadór, heta ijapyteguikuéra haʼéma prekursór, siérvo ministeriál térã ansiáno. Oĩ avei umi ombaʼapóva pe ofisína rremóta de traduksiónpe, ha oipytyvõ ojetradusi hag̃ua umi puvlikasión oñeʼẽva la Bíbliare umi idióma upepeguápe. Igustoiterei ningo chéve ahendu mbaʼéichapa opurahéi hikuái rreunionhápe, opukavy joa, ha ahecha mbaʼéichapa oprogresa hikuái Jehová organisasiónpe.

NAÑEIMAHINÁI MBAʼÉICHAPA AVYʼAVÉNE

Roiko lája Timor Orientálpe tuicha idiferénte vaʼekue upe roiko lájagui Austráliape, péro nañeimahinái mbaʼéichapa avyʼavéne. Sapyʼánte roviaha jepi ojoʼaripa peteĩ minivusʼípe, umi hénte oguerúvandi pe merkádogui pira oñemboseko pyre vaʼekue ha atyraite verdurakuéra. Ótro día katu oreryʼaipa rojapóvo estúdio bíblico umi ogaʼi hakuetereívape ha ndaipísoivape, oĩháme umi ryguasu odiparáva ape ha pépe. Ijetuʼúramo jepe che pyʼỹinte apensa jepi: “¡Igustoite ningo koʼápe!”.

Apensávo umi mbaʼe ahasa vaʼekuére, aagradeseterei che tuakuérape ojapo haguére ikatumíva guive aservi hag̃ua Jehovápe ha cheapoja haguére siémpre, ikangýrõ guare jepe che amista Jehovándi. Oñekumpli porãiterei cherehe la Proverbios 22:6 heʼíva. Papa ha mama ningo oĩ orgullóso chereheve ha avei Alex reheve, ha ovyʼaiterei ohechávo mbaʼéichapa Jehová orepuru hína. Áño 2016 guive roservi de superintendénte de sirkuíto pe território oĩvape sukursál de Australasia kárgope.

¡Koʼág̃a chegustaiterei voi pe predikasión!, ha ni ndaroviaséi yma ahecha hague upéva peteĩ kárgaicha. Tahaʼe haʼéva la oikóva ñande rekovépe, che ahechakuaa javyʼa añete hag̃ua jaservi vaʼerãha Jehovápe ñande pyʼaite guive, ha ndaiporiha ótra kósa ñanembovyʼavétava upévagui. Ojapóma ningo 18 áño roservi hague Jehovápe Alex ndive, ha núnka ndavyʼái vaʼekue la peichaite peve. Koʼág̃a antende David ndojavýi hague heʼírõ guare Jehovápe: “Umi oñemoag̃uíva nderehe ojeprotehe hag̃ua ovyʼáta, haʼekuéra siémpre oikóta tory ha vyʼápe. [...] Umi omombaʼéva nde réra, katuete oikóta vyʼapópe” (Sal. 5:11).