Nínivepe oĩ vaʼekue umi edifísio ha monuménto tuichaitereíva
Jaikuaave hag̃ua
¿Mbaʼépa oiko rakaʼe Nínivegui?
ASIRIA haʼe vaʼekue peteĩ nasión tuichaitereíva, ha 670 áñorupi Jesús ou mboyve oiko voi chugui pe poténsia mundiál tuichavéva oĩva ko múndope. Pe páhina de Internet orekóva pe Muséo Británico heʼi voi: “Asiria território oñepyrũ voi oéste gotyo Chipre guive ha oho hese éste gotyo Irán peve, ha un tiémpore katu ohupyty voi Egipto peve”. Asiria kapitál haʼe vaʼekue Nínive, ha upe siuda haʼe vaʼekue pe siuda tuichavéva oĩva ko múndope. Upépe oĩ vaʼekue umi monuménto tuichaitereíva, umi hardín ndaijojaháiva, umi palásio iporãitereíva, ha umi vivliotéka ndetuichapa jepéva. Nínivepe ojetopa vaʼekue algúna eskritúra oĩva umi pare rehe, ha umíva omombeʼu pe rréi Asurbanipal, ha avei umi ótro rréi, oñehenói hague voi ijupe “rréi del múndo”. Upe tiémpope haʼete voi ku ndaipóriva ipuʼaka vaʼerã Asiria ha Nínive rehe.
Asiria haʼe vaʼekue pe poténsia tuichavéva oĩ vaʼekue upe tiémpope
Péro Asiria orekóramo jepe ko múndo ipoguýpe, proféta Sofonías omombeʼu mbaʼépa Jehová ojapóta hese: “Ñandejára oipysóta ijyva nórte gotyo ha ohundíta Asíriape. Omoperõta Nínivepe, opytáta séko vera peteĩ desiértoicha”. Ha ótro Jehová proféta hérava Nahúm heʼi avei: “Peipeʼapa upe siudágui pe óro, peipeʼapa chuguikuéra pe pláta. [...] Upe siuda opyta nandi vera, oñehundi ha mbaʼevete nahembýi upépe. [...] Umi hénte nderecháva guive odiparáta ndehegui ha heʼíta: ‘Nínive opyta nandi vera’” (Sof. 2:13; Nah. 2:9, 10; 3:7). Ohendúvo koʼã profesía umi hénte oiméne oñeporandu raʼe: “¿Ikatu piko oiko koʼã mbaʼe? ¿Oĩne piko ipuʼakáva ko Asiria ipoderosoitévare?”. Oiméne ijetuʼu rakaʼe chupekuéra oguerovia hag̃ua upéva.
Nínive opyta nandi vera ha iperõ peteĩ desiértoicha
Péro haʼetéramo jepe núnka ndoikomoʼãiva, pe profesía oñekumpli, pórke 600 áñorupi Jesús ou mboyve, umi tetã Babilonia ha Media ipuʼakáma Asiria rehe. Ha kon el tiémpo Nínive ojeheja rei ha opytáma tesaráipe. Peteĩ puvlikasión onohẽva pe Museo de Arte Metropolitano de Nueva York heʼi voi: “Heta tiémpo ohasa rire, pe lugárpe ndaiporivéima avavete ha pe yvy ojahoʼipáma chupe. Ha Nínivepe ojekuaa la Biblia heʼíva rupivéntema”. Peteĩ informasión heʼi avei pe áño 1800 rupi, “avave ndoikuaái hague oexistípa raʼe pe Asiria kapitál tuichaitéva” (Biblical Archaeology Society Online Archive). Péro 1845-pe, pe arkeólogo Austen Henry Layard oñepyrũ ojoʼo pe lugár ha otopa pe siuda de Nínive. Ha umi mbaʼe ojetopáva ohechauka Nínive haʼe hague peteĩ siuda tuichaitereíva.
Jahechávo oñekumplipaiteha umi profesía oñeʼẽva Nínive rehe, omombarete ñande jerovia, ha upévare jaguerovia oñekumplitaha avei umi profesía oñeʼẽva umi poténsia mundiál oĩvare ñane tiémpope (Dan. 2:44; Apoc. 19:15, 19-21).