¿Mbaʼérepa heta hénte ndochaʼevéi ojuehe?
¿Mbaʼéicha rupi umi hénte ou ndaijaʼevéi ojuehe? Jaikuaa hag̃ua upéva ñantende raẽ vaʼerã mbaʼépa heʼise pe ódio, mbaʼéicha rupípa umi hénte oñepyrũ ndochaʼevéi hapicháre ha mbaʼérepa ko sentimiénto vai ojagarrapa ohóvo opárupi.
¿Mbaʼépa hína pe ódio?
Upéva heʼise peteĩ persóna ndochaʼeieteha voi ótrore, ndahaʼéi ku sapyʼaiténte ipochýva hese, síno noaguantái chupe ha tódo el tiémpo ipyʼaro hese. Ikatu oñandu upéva ndahaʼéi peteĩ persónarente síno peteĩ grúpo de persónare.
¿MBAʼÉREPA UMI HÉNTE OÑEPYRŨ NDOCHAʼÉI HAPICHÁRE?
La hénte ou jepi ndochaʼéi ótrore heta mbaʼére. Por ehémplo, oĩ jepi ndochaʼeietéva peteĩ grúpo de persónare ha ndahaʼéi katuete ojapo haguére álgo ivaíva. Ikatu oime oñepensa koʼã hénte iñañaha, térã operhudikaha ótrope ha nokambiamoʼãiha voi. Upévare ojeapoʼi chupekuéra ha ojeʼe voi haʼekuéra omoñepyrũha la provléma. Sapyʼánte avei oĩ hénte ndochaʼéiva hapicháre pórke yma ojejapo vaʼekue hese peteĩ inhustísia, oñemaltrata chupe, térã oiko hese algúna kósa ivaíva, ha upéicha rupi pe ódio ndaikatuvéi ojei ikorasõgui.
¿MBAʼÉREPA OPÁRUPI OĨ NDOCHAʼÉIVA OJUEHE?
Oĩ persóna ndochaʼéiva ótrore ndoikuaáiramo jepe chupe. Por ehémplo, álgien ikatu ohendu iñamigokuéra térã ihentekuéra ndochaʼeiha peteĩ grúpo de persónare, ha haʼe ou opensa la mísma kósa avei. Upéicha pe ódio ojagarrapa ohóvo ha oĩ hetave hénte ndochaʼéiva ótrore.
Ikatu voi jaʼe ko sentimiénto vai pyaʼeterei ovaha, upéicha rupi hetaite hénte ou ndochaʼevéi ojuehe. Péro jaikuaa hag̃ua mbaʼérepa hetaite hénte ni noaguantái hapichápe, ñantende vaʼerã moõpa oñepyrũ vaʼekue pe ódio. Ha la Biblia omombeʼu ñandéve upéva.
LA BIBLIA OMBOʼÉVA KO TÉMARE
NDAHAʼÉI VAʼEKUE UMANOKUÉRA LA OÑEPYRŨVA NDOCHAʼÉI ÓTRORE. Oñepyrũ vaʼekue yvágape, peteĩ ánhel opuʼãrõ guare Ñandejára kóntrape. Ko ánhelpe upéi oñehenói Satanás el Diablo. Haʼe oñepyrũrõ guare opuʼã Ñandejárare oiko chugui peteĩ asesíno. “Haʼe ijapueterei ha haʼe voi pe japu ruvicha”, ha oiko omomýi umi héntepe ndochaʼéi hag̃ua ojuehe ha iviolénto hag̃ua (Juan 8:44; 1 Juan 3:11, 12). La Biblia heʼi voi hese iñañaha, ipochyháre oikoha ha noponderaiha avavére (Job 2:7; Apocalipsis 12:9, 12, 17).
ÑANEIMPERFÉKTO RUPI IKATU SAPYʼAITÉPE JAJU NDAJACHAʼÉI ÓTRORE. Pe primer umáno oexisti vaʼekue, Adán, ojapo avei la Satanás ojapo vaʼekue ha ou opeka. Upéicha rupi pe pekádo ha pe imperfeksión ohupyty entéro persónape (Romanos 5:12). Adán raʼy ypykue hérava Caín ndochaʼeiete vaʼekue iñermáno Abélre ha upéi ojuka chupe (1 Juan 3:12). Oĩ ningo añete heta persóna oporohayhúva ha ipyʼaporãva, péro ñanase rupi pekadór ifasilve ñandéve ñapensa ñandejehénte, ñaneenvidióso ha ñandeorgullóso, upévare oĩ hetaiterei hénte ndochaʼéiva hapicháre (2 Timoteo 3:1-5).
KO MÚNDOPE NDOJEHAYHÚI UMI IDIFERÉNTEVAPE. Ko múndo ningo omomýi voi umi héntepe ojotrata vai hag̃ua ha oapoʼi hag̃ua hapichápe, upévare hetavéntema umi hénte ndochaʼéiva ojuehe. “Ko múndo kompletoite oĩ pe aña poguýpe”, haʼéva hína Satanás el Diablo, upévare oĩ hetave persóna omboykéva ótrope, iñeʼẽ arhélva, oñembohorýva hapicháre ha ivioléntova (1 Juan 5:19).
Péro la Biblia nomombeʼúi sólamente mbaʼéichapa oñepyrũ vaʼekue pe ódio, síno ohechauka avei ñandéve mbaʼéichapa oñesolusionáta upe provléma.