Jasegíkena “pe mborayhu léi”

LISAa heʼi: “La ahecharamove vaʼekue mbaʼeichaitépa imbaʼeporã umi ermáno ha ermanakuéra”. Péicha haʼe imanduʼa primera ves oikuaárõ guare testígo de Jehovápe. Ha Anne rehe oiko vaʼekue avei upéicha: “Ñepyrũrã che amombaʼe vaʼekue umi testígo de Jehovápe imbaʼeporã haguére ha ndahaʼéi voi la umi mbaʼe omboʼévare”. Koʼág̃a g̃uarã koʼã mokõi ermána ovyʼa oleévo la Biblia ha ojepyʼamongeta hese. Péro tuichaiterei oipytyvõ vaʼekue chupekuéra oĩ haguére umi imbaʼeporãva hendivekuéra.

¿Mbaʼéichapa ikatu ñanembaʼeporã ñande rapichakuérandi ñamokyreʼỹ hag̃ua chupekuéra? Jahechamína koʼág̃a mbaʼéichapa ikatu ñanembaʼeporã ñande rapichándi umi mbaʼe jaʼéva ha jajapóva rupive. Jahecháta avei mávandipa la ñanembaʼeporã vaʼerã.

JAʼÉVARE JAHECHAUKA JASEGIHA “PE MBORAYHU LÉI”

Proverbios kapítulo 31-pe oñeñeʼẽ pe tembireko iguapaitévare, ha ojeʼe voi hese haʼe ohechaukaha osegiha “pe mborayhu léi” umi mbaʼe heʼívape (Prov. 31:26). Haʼe ningo osegi voi “pe léi” umi mbaʼe heʼíva ha ojapóvape. Umi tuakuéra ojapo porãta avei osegíramo ko léi umi mbaʼe heʼívape. La majoría umi tuakuéra oikuaa porã iñeʼẽ arhélramo ifamíliape ikatuha ojapo vai hesekuéra. Por ehémplo, umi tuakuéra heʼi vaíramo álgo ifamíliape ikatu olastima chupekuéra ha umi mitã ikatu nohenduséi la ojeʼéva. Upévare umi sy ha túa ohechaukáramo imbaʼeporãha la heʼíva rupive, ifasilvéta hína ifamíliape ohendu ha iñeʼẽrendu hag̃ua chupekuéra.

Nde ndahaʼéiramo jepe peteĩ túa térã sy, ¿mbaʼépa ikatu nepytyvõ rehechauka hag̃ua nembaʼeporãha umi mbaʼe eréva rupive? Proverbios 31:26 heʼi: “Umi mbaʼe heʼíva ohechauka iñaranduha”. Upearã ñapensa porã vaʼerã mbaʼépa la jaʼétava ha mbaʼéichapa jaʼéta ikatu hag̃uáicha jahechauka ñanearanduha. Iporãta avei ñañeporandúramo: “¿Ko mbaʼe haʼétava piko ombopochýta hína che rapichápe térãpa okalmáta hína la situasión?” (Prov. 15:1). Upévare iporãiterei ningo ñapensáramo jaʼe mboyve peteĩ mbaʼe.

Ótro proverbio heʼi: “Oĩ nopensáiva oñeʼẽ hag̃ua, ha umi mbaʼe heʼíva ñandekutu rasy peteĩ espádaicha” (Prov. 12:18). Ñande ñapensáramo mbaʼéichapa omoñeñandu ótrope umi mbaʼe jaʼéva ha mbaʼéichapa jaʼe hína chupekuéra, ikatu ñanepytyvõ ñañatende hag̃ua umi mbaʼe jaʼétavare. Ñande jasegíramo “pe mborayhu léi” ñañeʼẽ jave, nañaneñeʼẽarhelmoʼãi térã nañamaltratamoʼãi avavépe umi mbaʼe jaʼéva rupive (Efes. 4:31, 32). Upéva rangue ñakambiáta umi mbaʼe vai ñapensáva ha umi mbaʼe jaʼéva ohechaukáta ñanembaʼeporãha, ñanderory ha ñandepositivoha. Jehová ningo omoĩ voi ñandéve peteĩ ehémplo iporãitereíva ko mbaʼépe oipytyvõrõ guare isiérvo Elíaspe okyhyjeterei jave. Pe ánhel orrepresenta vaʼekue Jehovápe ningo oñeʼẽ voi “pyʼaguapýpe ha mbeguekatu asy” (1 Rey. 19:12). Péro ñanembaʼeporã ndeʼiséi hína ñañeʼẽtanteha mbeguekatu asy, síno heʼise avei jahechauka vaʼerãha ñanembaʼeporãha umi mbaʼe jajapóva rupive. ¿Mbaʼéichapa ikatu jajapo upéva?

ÑANEMBAʼEPORÃRAMO ÑAMOKYREʼỸTA ÓTROPE

Ñande ningo jasegi Jehová ehémplo jahechaukávo ñanembaʼeporãha umi mbaʼe jaʼéva ha jajapóva rupive (Efes. 4:32; 5:1, 2). Lísare ajeʼi ñañeʼẽ kuri, ha haʼe omombeʼu mbaʼéichapa umi Testígo imbaʼeporã vaʼekue hendive. Haʼe heʼi: “Che famíliandi rovátarõ guare derrepentete, mokõi matrimónio ore kongregasiongua onohẽ día lívre la itraváhogui oho hag̃ua orepytyvõ la ore mudánsape. Ha upe tiémpope che ni ndastudiáiti vaʼekue la Biblia”. Péicha umi ermanokuéra imbaʼeporã rupi Lísandi, haʼe oñepyrũ oikuaaseve Jehovágui.

Anne rehe ningo ñañeʼẽ kuri oñepyrũvo ko artíkulo, ha haʼe oagradeseterei avei Testigokuéra imbaʼeporã haguére hendive. Haʼe omombeʼu: “Umi hénte ndoservíriva Jehovápe ningo nañandetrataporãi, ha upévare ijetuʼu vaʼekue chéve akonfia hag̃ua hesekuéra”. Upéi haʼe heʼive: “Ajotopa ypýrõ guare Testigokuérandi che nakonfiái kuri hesekuéra ha añeporandu voi: ‘¿Mbaʼéreiko haʼekuéra ojepyʼapy cherehe?’. Péro pe chemboʼe vaʼekue la Biblia ohechauka ipyʼaite guive imbaʼeporãha, ha upéva chepytyvõ akonfia hag̃ua hese”. ¿Ha mbaʼépa oiko upe haguére? Haʼe heʼi: “Upéi che añepyrũ añekonsentrave umi mbaʼe astudiávare hína”.

Upéicharõ jahechakuaa Lisa ha Anne korasõre opokoiterei hague umi ermáno ha ermanakuéra kongregasionpegua imbaʼeporã haguére hendivekuéra. Ha upéva omomýi chupekuéra oikuaaseve hag̃ua Jehovápe. Umi ermáno imbaʼeporã rupi hendivekuéra, omomýi mokõivévape oñepyrũ hag̃ua ojerovia Jehováre ha ipuévlore.

JASEGI ÑANDEJÁRA EHÉMPLO HA ÑANEMBAʼEPORÃ ÑANDE RAPICHÁNDI

Oĩ ningo umi hénte ifasilvévape chupe ohechauka hag̃ua iñamavleha umi mbaʼe heʼíva rupive ha hory hag̃ua, pórke upéicha voi oñemongakuaa vaʼekue chupe térã péichante voi la hénte pe lugár haʼe oikohápe. Jaguerohory ningo koʼãichagua hénte hory ha imbaʼeporãvape, pórke péichante voi la ilája ha la ikostumbrekuéra avei. Péro ndajasegimoʼãi hína Ñandejára ehémplo ñanembaʼeporã ha ñaneamávleramo koʼã mbaʼe rehénte (ekompara Hechos 28:2 heʼívare).

Pe mbaʼeporã añetetéva ningo ou hína Ñandejára espíritugui (Gál. 5:22, 23). Upéva heʼise ñaikotevẽha Ñandejára espíritu sánto ñanepytyvõ añetehápe ñanembaʼeporã hag̃ua, ha jahechauka hag̃ua upéva umi mbaʼe ñapensáva ha jajapóva rupive. Péicha jajapóramo jasegíta Jehová ha Jesús ehémplo. Avei jahechauka vaʼerã jajepyʼapyha ñande pyʼaite guive ñande rapichakuérare ojapo haguéicha Jesucristo. Koʼã mbaʼe ningo jajapo jahayhúgui Ñandejára Jehovápe ha avei ñande rapichakuérape. Ñanembaʼeporãramo ningo jarekóta hína peteĩ kualida iporãitereíva, ha upéva osẽ voi ñane korasõgui ha Ñandejára oguerohoryeterei.

¿MÁVANDIPA ÑANEMBAʼEPORÃ VAʼERÃ?

Ikatu ningo ifásil ñandéve ñanembaʼeporã hag̃ua umi imbaʼeporã vaʼekuéndi voi ñanendive térã umi persóna jaikuaávandi voi (2 Sam. 2:6). Ha upearã ikatu jaagradese chupekuéra (Col. 3:15). ¿Péro mbaʼépa jajapo vaʼerã ñapensáramo peteĩ persóna nomereseiha ñanembaʼeporã hendive?

Ñapensamína ko mbaʼére: Jehová ningo omoĩ ñandéve pe ehémplo iporãvéva, pórke haʼe imbaʼeporãiterei ñanendive. Ha Iñeʼẽ la Bíbliape ñanemboʼe voi peteĩ mbaʼe iñimportantetereíva jaikuaa hag̃ua mbaʼéichapa ñanembaʼeporã vaʼerã avei ñande. Pe ñeʼẽ “mbaʼeporãiterei” térã “mbaʼeporã nañamereséiva” ojepuru hetaiterei vése pe Escrituras Griegas Cristiánaspe. ¿Mbaʼéichapa Ñandejára ohechauka imbaʼeporãitereiha ñanendive?

Ñapensamíntena: Jehová ningo ohechauka imbaʼeporãitereiha enterove hénte oikóvandi ko yvy ape ári omeʼẽvo chupekuéra umi mbaʼe oikotevẽva osegi hag̃ua oikove (Mat. 5:45). Jehová ningo ohechaukáma vaʼekue imbaʼeporãha ñanendive jaikuaa mboyve jepe chupe (Efes. 2:4, 5, 8). Por ehémplo, haʼe omeʼẽ vaʼekue ñanderehehápe pe iporãvéva orekóva, Itaʼýra peteĩete. Apóstol Pablo oskrivi vaʼekue voi Jehová omeʼẽ hague pe rreskáte pórke haʼe “imbaʼeporãiterei” (Efes. 1:7). Avei ñande japeka ha ñadesepsiona jave Jehovápe, haʼe osegi ñandegia ha ñanemboʼe. Umi mbaʼe ñanemboʼéva ha heʼíva ñandéve jajapo hag̃ua omog̃uahẽ voi ñandéve amarayvícha (Deut. 32:2). Ha añetehápe ñande jaikuaa Jehová ndohechaukáiramo ñandéve imbaʼeporãitereiha ñanendive, ndajarekomoʼãi voi esperánsa amo gotyove g̃uarã (ekompara 1 Pedro 1:13 heʼívare).

¡Ajépa Jehová imbaʼeporã rupi ñanemoag̃ui ijehe ha ñanemokyreʼỹ jajapo hag̃ua iporãva! Upévare jaiko rangue jaiporavo mávandipa ñanembaʼeporãta, ikuentave ñañehaʼã jasegi Jehová ehémplo ha siémpre ñanembaʼeporã ñande rapichakuérandi káda día voi (1 Tes. 5:15). Ha kontinuadoite ñanembaʼeporãramo ñande rapichakuérandi, haʼetéta voi jajatapýva jajepeʼe hag̃ua roʼy tiémpope. Péicha jajapóramo ñamoñeñandu porãta umi ñande rogayguápe, ermanokuérape, umi ñane kompañéro de traváho, de eskuéla ha ñane vesinokuérape.

Ñapensamína oĩpa hína ñane famíliape térã ñane kongregasiónpe peteĩ ideprovéchotava chupe ñande ñanembaʼeporã hendive umi mbaʼe jaʼe ha jajapóva rupive. Katuete ningo ñane kongregasiónpe oĩta peteĩ oikotevẽtereíva hína ñaipytyvõ chupe omyatyrõ hag̃ua álgo hógape, térã omopotĩ hag̃ua ihardín, térã oho hag̃ua ombaʼejogua. Avei jatopáramo predikasiónpe peteĩ persóna oikotevẽva hína ñaipytyvõ chupe, ikatu avei jajeofrese jajapomi hag̃ua álgo hesehápe.

Upéicharõ, jasegíkena Jehová ehémplo, ha umi mbaʼe jaʼe ha jajapóva rupive siémprekena jahechauka jasegiha “pe mborayhu léi”.