Umi israelita oho vaʼekue gerrahápe, ¿mbaʼérepa koʼág̃a ñande ndajajapói upéva?
“OIMÉRAMO pende apytépe oĩ noñorairõséiva Francia térã Inglaterra kóntrape, pemano vaʼerã”. Upéva heʼi vaʼekue peteĩ ofisiál nazi unos kuánto testígo de Jehovápe pe segunda gérra mundiál aja. Ha oĩramo jepe ijypypekuéra umi soldádo nazi, umi ñane ermanokuéra ndojapói upéva. ¡Ajépa ipyʼaguasuete hikuái! Ko mbaʼe oiko vaʼekue ohechauka porãiterei mbaʼéichapa umi testígo de Jehová ohecha la gérra. Ñande ndajahái la gerrahápe oĩramo jepe heʼíva ñandéve ñandejukataha ndajaháiramo umi gerrahápe, pórke nañañentremetéi ko múndo provlémare.
Upéicharamo jepe, naentéroi heʼíva ijehe kristianoha ohecha péicha umi gérra. Heta oĩ opensáva umi kristiáno ikatu ha odefende vaʼerãha voi ipaís. Haʼekuéra ikatu voi opensa: “Umi israelita yma guare haʼe vaʼekue Ñandejára puévlo, upéicharõ jepe oho gerrahápe, ¿mbaʼére upéicharõ umi kristiáno koʼag̃agua ndojapói upéva?”. ¿Mbaʼéichapa rerrespondéta oĩramo heʼíva ndéve upéva? Ikatu hag̃uáicha ekontesta, tekotevẽta eexplika umi israelita situasión idiferénte hague Ñandejára puévlo koʼag̃aguágui. Upévare jahechamína koʼág̃a 5 diferénsia oguerekóva hikuái.
1. ÑANDEJÁRA PUÉVLO HAʼE VAʼEKUE PETEĨ NASIÓNTE
Yma Ñandejára puévlo haʼe vaʼekue peteĩ nasiónte: Israel. Ha heʼi voi umi israelítape: “Poiporavóta che puevlorã entéro umi ótro puévlo apytégui” (Éx. 19:5). Ha Ñandejára omeʼẽ avei chupekuéra ijyvyrã, upéicharõ Ñandejára heʼírõ guare umi israelítape oho hag̃ua oñorairõ umi ótra nasión kóntrape, haʼekuéra ndohói vaʼekue oñorairõ ha ojuka umi oadorávape avei Jehovápe.a
Koʼág̃arupi umi oadoráva Ñandejárape ‘ou entéro tetã, trívu ha puévlogui, ha oñeʼẽ diferénte idióma’ (Apoc. 7:9). Upéicharõ, Ñandejára puévlo ohóramo umi gerrahápe ikatu hína oñorairõ iñermanokuéra kóntrape.
2. JEHOVÁ VOI OMANDA UMI ISRAELÍTAPE OHO HAG̃UA GERRAHÁPE
Yma Jehová odesidi vaʼekue arakaʼe ha mbaʼérepa umi israelita ohóta gerrahápe. Por ehémplo, Jehová heʼi vaʼekue umi israelítape ohundi vaʼerãha umi cananéope pórke haʼekuéra oadora vaʼekue umi demóniope, hekovaieterei vaʼekue ha omeʼẽ sakrifísioramo umi mitã. Jehová heʼi voi umi israelítape omosẽmba hag̃ua koʼã mbaʼe vai apohápe pe yvy haʼe opromete vaʼekuégui chupekuéra (Lev. 18:24, 25). Umi israelita oiko riréma pe Tiérra Prometídape, Ñandejára opermiti chupekuéra oho gerrahápe oñedefende hag̃ua iñenemigokuéragui (2 Sam. 5:17-25). Upéicharõ jepe, Jehová nopermitíri umi israelítape odesidi ijeheguiete ohótapa gerrahápe. Ha haʼekuéra oho jave Jehová opermitiʼỹre chupekuéra, ojere vaieterei chupekuéra (Núm. 14:41-45; 2 Crón. 35:20-24).
Koʼág̃arupi Jehová ndeʼíri umi héntepe oho hag̃ua gerrahápe pórke haʼekuéra oñorairõ okonsegi hag̃ua la oipotávante, ha ndahaʼéi Ñandejára oipotáva. Haʼekuéra ojapo umi gérra orekoségui hetave yvy, ipláta hetasevégui térã umi hénte opensa hag̃ua avei haʼekuéraicha. Péro oĩ avei umi heʼíva ijehe haʼeha Ñandejára siérvo ha oñorairõva oprotehe hag̃ua iñadorasión ha ohundi hag̃ua Ñandejára enemigokuérape. ¿Mbaʼépa Jehová opensa hesekuéra? Haʼe ningo oprotehéta umi oadorávape chupe ha ohundietéta iñenemigokuérape peteĩ gérra oikótavape koʼẽrõite, pe gérra de Armagedónpe (Apoc. 16:14, 16). Upe gérrape Jehová ojevaléta sólamente ijehérsito yvagapeguáre, ha ndahaʼéi umi isiervokuéra oĩvare ko yvy ape ári (Apoc. 19:11-15).
3. UMI ISRAELITA OPERDONA UMI OJEROVIÁVAPE JEHOVÁRE
Oiko jave umi gérra koʼág̃arupi, ¿operdonápa hikuái umi hénte ojeroviávape Ñandejárare, Jehová operdona haguéicha Rahab ha ifamíliape umi israelita ohundírõ guare Jericó?
Yma pe ehérsito israelita pyʼỹinte operdona vaʼekue umi ohechaukávape ojeroviaha Jehováre, sólamente ohundi hikuái umi Jehová heʼíva nomereseiha oikove. Epensamíntena koʼã mokõi ehémplore. Jehová heʼíramo jepe Jericó oñehundi vaʼerãha, umi israelita operdona Rahab ha ifamíliape ohechauka rupi ojeroviaha (Jos. 2:9-16; 6:16, 17). Avei pe siuda de Gabaón ojesalva ohechauka rupi ojeroviaha Ñandejárare, ha péicha entéro umi gabaonita ojesalva (Jos. 9:3-9, 17-19).
Koʼág̃arupi umi ehérsito noperdonái avavépe ha ojuka umi ojeroviávape Ñandejárare. Ha umi hénte inosénte mimípe jepe ojuka hikuái.
4. UMI ISRAELITA TEKOTEVẼ KURI IÑEʼẼRENDU UMI LÉI JEHOVÁ OMOĨVAPE PE GERRARÃ
Yma Jehová ohaʼarõ umi israelítagui iñeʼẽrendu umi léi omoĩvape pe gerrarã. Por ehémplo Jehová heʼi vaʼekue umi israelítape ‘oporandu hag̃ua umi héntepe ndojaposéipa peteĩ tráto oiko porã hag̃ua’ (Deut. 20:10). Jehová ohaʼarõ umi soldádo israelita ipotĩ físikamente ha avei ndahekovaíri vaʼerã (Deut. 23:9-14). Péro umi ehérsito oĩ vaʼekue ijererekuéra idiferénte, haʼekuéra avése oviola umi kuñáme pe siuda okonkistávape, péro Jehová oproivi vaʼekue umi israelítagui ojapo upéicha. Jehová heʼi vaʼekue voi umi israelítape nomendái vaʼerãha peteĩ mitãkuña ojagarrávare pe siuda okonkista vaʼekuépe, síno ohaʼarõ vaʼerãha un mes okonkista rire pe siuda (Deut. 21:10-13).
Koʼág̃arupi la majoría umi país oguereko akuérdo umi ótro país ndive ha omoĩ voi hikuái umi léi ojesegi vaʼerã oiko jave peteĩ gérra. Koʼã léi oñemoĩramo jepe oprotehe hag̃ua umi hénte inoséntepe, haʼekuéra voi pyʼỹinte ndorrespetái koʼã léi.
5. JEHOVÁ OÑORAIRÕ IPUÉVLO REHEHÁPE
¿Oipytyvõpa koʼág̃arupi Jehová peteĩ nasiónpe ogana hag̃ua peteĩ gérra, oipytyvõ haguéicha umi israelítape Jericópe?
Yma Jehová oñorairõ vaʼekue umi israelita rehehápe, ha upearã heta vése ojapo umi milágro ogana hag̃ua umi israelita. Por ehémplo, ¿mbaʼéichapa Jehová oipytyvõ vaʼekue umi israelítape ohundi hag̃ua pe siuda de Jericó? Haʼekuéra osegi umi instruksión Jehová omeʼẽva chupekuéra, ha upévare umi israelita osapukáirõ guare oñorairõ hag̃uáicha, upepete hoʼa pe siuda murálla ha péicha ojagarra hikuái upe siuda (Jos. 6:20). ¿Ha mbaʼéichapa ogana vaʼekue hikuái pe ñorairõ oreko vaʼekue umi amorreo kóntrape? “Jehová ombou hiʼarikuéra amandáu tuichaicháva [...]. Umi israelita hetápe ojuka espádape, péro umi amandáu guasu hetaitereivépe ojuka” (Jos. 10:6-11).
Koʼág̃arupi Jehová noñorairõi ni peteĩ país favórpe pórke Irréino, Jesús haʼehápe Rréi, “ndahaʼéi ko mundopegua” (Juan 18:36). Upéva rangue Satanás hína la orekóva ipoguýpe ko múndo kompletoite. Ha umi gérra oikóva koʼág̃arupi ohechauka porãiterei mbaʼeichaguápa haʼe (Luc. 4:5, 6; 1 Juan 5:19).
UMI KRISTIÁNO AÑETETÉVA OIKOSE PYʼAGUAPÝPE ENTEROVÉNDI
Jahecháma haguéicha umi kristiáno añete idiferentete voi umi israelita yma guarégui. Péro ndahaʼéi koʼã mbaʼérente la ndajaháiva gerrahápe. Hetave mbaʼe oĩ la ñandejokóva ani hag̃ua jajapo upéva. Por ehémplo, Jehová heʼi vaʼekue voi umi ára pahápe, umi oservíva chupe ‘noñemboʼemoʼãveimaha chupekuéra mbaʼéichapa oñorairõ vaʼerã’, ha menovéntema oho hag̃ua gerrahápe (Is. 2:2-4). Jesús heʼi vaʼekue voi idisipulokuéra ndoikomoʼãiha “umi hénte ko mundopegua oikoháicha”, upéva heʼise noñentremetemoʼãiha ko múndo provlémare ha ndohomoʼãiha gerrahápe (Juan 15:19).
Jesús omokyreʼỹ vaʼekue isegidorkuérape ojapo hag̃ua hetave mbaʼe. Por ehémplo, heʼi chupekuéra oipeʼa hag̃ua ijehegui pe pyʼaro, pochy ha ani hag̃ua oñorairõ (Mat. 5:21, 22). Avei Jesús heʼi isegidorkuérape oñehaʼã vaʼerãha “oĩ hag̃ua pyʼaguapy” ha ohayhu vaʼerãha iñenemigokuérape (Mat. 5:9, 44).
¿Ha mbaʼéichapa ñande ikatu jajapo upéva? Katuete ningo ndajahasemoʼãi la gerrahápe, ¿péro eñandúmavapa peteĩ oĩva kongregasiónpe haʼeha ne enemígo? Oiméramo upéicha, eipeʼaitékena umichagua sentimiénto nde pyʼapýgui (Sant. 4:1, 11).
Jaiko rangue jaapoja umi ñorairõ oikóva ko yvy ape ári, ñande jaiko pyʼaguapýpe ha jahayhu ñane ermanokuérape (Juan 13:34, 35). Jajedesidíkena ndajaapojamoʼãiha mbaʼevetépe umi gérra oikóva koʼág̃arupi, jaikuaágui koʼẽrõitéma Jehová oipeʼapaitetaha pára siémpre umi gérra oikóva ko yvy ape ári (Sal. 46:9).
a Avése umi israelita oñorairõ vaʼekue oñondive ha upéva ndogustaiete Jehovápe (1 Rey. 12:24). Péro algúna vése Jehová opermiti vaʼekue koichagua ñorairõ, pórke umi israelita omboyke chupe térã opeka vaieterei ikóntrape (Juec. 20:3-35; 2 Crón. 13:3-18; 25:14-22; 28:1-8).