1 | Eñemboʼe “Pemoĩ ipópe entéro mbaʼe pendepyʼapýva”

LA BIBLIA HEʼI: ‘Pemoĩ Ñandejára pópe entéro mbaʼe pendepyʼapýva, pórke haʼe ojepyʼapy penderehe’ (1 PEDRO 5:7).

¿Mbaʼépa heʼise upéva?

Ñandejára Jehová ñaneinvita ñañeʼẽ hag̃ua hendive oimeraẽ mbaʼe ñanekevrantávare (Salmo 55:22). Ani ñapensa ñane provléma tuichaitereimaha térã sonseraitereiha ñamombeʼu hag̃ua Ñandejárape. Pe ñanekevrantáva iñimportánterõ ñandéve g̃uarã, Jehovápe g̃uarã iñimportánte avei. Ñañemboʼéramo Ñandejárape heʼise ñañepyrũmaha jajapo álgo ñandepyʼaguapy hag̃ua (Filipenses 4:6, 7).

¿Mbaʼéichapa ñanepytyvõ?

Jarekóramo ansieda, depresión térã ótro provléma emosionál, ikatu ñapensa ñaĩha ñaneaño peteĩ. Ijetuʼu jepi umi ótra héntepe ontende hag̃ua mbaʼépa la jahasáva térã mbaʼéichapa ñañeñandu (Proverbios 14:10). Péro ñamombeʼu jave Ñandejárape la ñañandúva, jahechakuaa haʼe ñanentendeha, oñemoĩha ñande lugárpe ha siémpre orekoha tiémpo ñanerendu hag̃ua. Jehová ohecha mbaʼeichaitépa jasufri ha mboýmapa jalucha pe mbaʼasy kóntrape. Haʼe oipota ñamombeʼu chupe umi mbaʼe ñanekevrantáva (2 Crónicas 6:29, 30).

Amáske ñañemboʼe Jehovápe, ñaĩvéta segúro ojepyʼapyha ñanderehe. Ikatúta ñañeñandu peteĩ oskrivi vaʼekue la Biblia heʼi haguéicha iñemboʼépe: “Ñandejára, nde rehecha mbaʼeichaitépa ahasa asy, ha mbaʼéichapa aiko añelamenta” (Salmo 31:7). Jaikuaa haguérente voi Jehová orekoha enkuénta umi mbaʼe jahasáva, ñanepytyvõta ñaaguanta hag̃ua oimehaichagua situasión ijetuʼúva. Péro Jehová ndahaʼéi oikuaánteva la jahasáva, haʼe ñanentende porãve oimeraẽ ótra persónagui, ha Iñeʼẽ rupive ñanekonsola ha ñanemokyreʼỹ.

La Biblia oipytyvõ Juliánpe

Mbaʼéichapa cheafekta pe ansieda

“Che areko ansieda ha transtórno obsesívo kompulsívo. Chéve degolpeténte cheataka pe ansieda, aime porãháguinte ensegidami ajepyʼapyeterei ha ni ndaikuaái mbaʼérepa. Koʼýte añeñandu jepi péicha aime jave heta hénte apytépe, chepreokupaiterei mbaʼépa opensáta cherehe hikuái.

Umi che amigokuéra oikuaáva arekoha ko mbaʼasy ojapo ikatúva entéro chepytyvõ hag̃ua. Ndahaʼéi ningo siémpre heʼíva hikuái la ahenduséva, péro avalora ha aagradeseterei chepytyvõse haguére hikuái.

Sapyʼánte areko rupi ko provléma ijetuʼu chéve añemboʼe hag̃ua, heta añehaʼã vaʼerã ikatu hag̃uáicha añekonsentra la haʼétavare Jehovápe. Ndaikatúi añekontrola, apensahágui peteĩ mbaʼére apensáma ótra kósare ha añekonfundipa. Péicha che akã tavyraipa jave, ndaikatúi amombeʼu Jehovápe mbaʼéicha añeñandu térã mbaʼépa apensa”.

Mbaʼéichapa la Biblia chepytyvõ

“La Biblia rupive aaprende ke Ñandejára oguerohory hag̃ua che ñemboʼe natekotevẽi ipukueterei ni aipuru palávra ne porãmba jepéva. Sapyʼánte ndaikatúi jave amombeʼu Jehovápe mbaʼéichapa añeñandu, haʼénte chupe: ‘Jehová chepytyvõmína por favór’. Ha umichagua situasiónpe jepe añandu mbaʼéichapa Jehová chentende ha orresponde che ñemboʼe, omeʼẽ chéve la aikotevẽva upe moméntope. Pe ñemboʼe chepytyvõiterei, péro avei aha doktórpe ha asegi peteĩ tratamiénto. Avyʼaiterei ningo pórke koʼã mokõi mbaʼe chepytyvõ, ha koʼág̃a tuichaiterei amehora. Ovale la péna pe esfuérso ajapóva amombeʼu hag̃ua Jehovápe mbaʼéichapa añeñandu, pórke ahechakuaa haʼe cherayhuha ha chepytyvõsetereiha”.