Ahecha mbaʼéichapa oho porã umi ifiélvape

Che apuka hese pórke la che amígo naipíntai haʼeha peteĩ persóna rrelihiósa. Aporandu chupe: “¿Mbaʼe piko nde la reikuaáva la Bíbliagui?”. Upepete ndeʼíri chéve mbaʼeve. Upe rire haʼe omombeʼu chéve isy haʼeha testígo de Jehová ha haʼe oaprende hague algúna kósa de la Biblia chugui. Upéva chembokuriosoiterei, ha haʼe chupe omombeʼuve hag̃ua chéve umi mbaʼe haʼe oikuaáva la Bíbliagui.

Ore ningo roñemongeta pyharepyte peve. Che amígo omombeʼu chéve la Biblia heʼiha Satanás haʼeha pe ogovernáva ko múndo (Juan 14:30). Ikatu oime upéva nde reikuaáma voi nemitã guive, péro upérõ guare chéve g̃uarã haʼe peteĩ mbaʼe ipyahúva ha chembokuriósova. Che siémpre ahendúva peteĩ Dios ivuenoitereíva haʼeha la ogovernáva ko múndo, péro upéva ningo naisentidoiete chéve. Arekóramo jepe 26 áñonte kuri, ahecháma hetaiterei mbaʼe chepyʼapýva.

Che túa ningo haʼe vaʼekue pilóto pe fuérsa aérea de los Estados Unídospe. Ha upévare chemitãme aikuaa kuri en kualkiér moménto ikatuha oiko peteĩ gérra nukleár, pórke pe ehérsito oĩ kuri preparádo ojapo hag̃ua upéva. Oikórõ guare pe gérra Vietnámpe, che aime kuri universidápe, Califórniape. Che añeuni umi protésta ojapóvape umi estudiánte, upévare umi polisía oremuñamba garróte reheve ha ore rodipara chuguikuéra. Ore ndaikatúi kuri ni rorrespira ha ndorohechái mbaʼeve, opoi rupi orerehe hikuái gas lakrimóheno. Upérõ la situasión ijetuʼueterei vaʼekue umi hénte opuʼãmba rupi ojuehe. Upérõ ojejuka unos kuánto polítikope, oiko umi protésta ha sarambi. Enterovéva ningo opensa diferentepa ojuehegui mbaʼéichapa oñesolusiona vaʼerã umi provléma. Ha upévare umi hénte oĩ vaʼekue konfundído, ndoikuaái rupi mbaʼépa ojapóta.

Áño 1970-pe ajagarra che travahorã Aláskape, ha upépe agana heta pláta. Upe rire aviaha Lóndrespe, ha ajogua che motorã ha aha sur gotyo. Péro ni che ndaikuaái moõpa la aháta. Mése rire ag̃uahẽ Áfricape. Ha upépe aikuaa umi hénte chéicha avei ojeisévape ha okañyséva umi provléma oguereko asývagui chupekuéra.

Umi mbaʼe ahecháva ha ahendu vaʼekuére isentído chéve la Biblia omboʼéva: Peteĩ ánhel aña ogovernaha ko múndo. Péro che aikuaase vaʼekue mbaʼépa Ñandejára ojapo hína haʼe nogovernáiramo ko múndo.

Unos kuánto mése rire atopa la rrespuésta. Ha tiémpo rire, aikuaa ha ahayhueterei heta persóna ohechaukáva ifielha pe Ñandejára peteĩetévape ohasáramo jepe hetaiterei mbaʼe ijetuʼúvare.

IRLANDA DEL NÓRTE: “PE PAÍS OĨHÁME VÓMBA HA VÁLA”

Aha jeýrõ guare Lóndrespe, añemoĩ en kontákto che amígo sýndi ha haʼe omeʼẽ chéve peteĩ Biblia, upe rire aha Ámsterdampe (Paises Bajos). Peteĩ Testígo cherecha aleeha hína la che Biblia peteĩ alumbrádo púvliko guýpe, ha upépe haʼe chepytyvõ antende porãve hag̃ua la aleéva. Upe rire aha Dublín, Irlándape ha upépe aheka pe sukursál de los testigos de Jehová. Atopa rire pe sukursál, ambota pe puérta ha oñatende cherehe Arthur Matthews, peteĩ ermáno ivaleterei ha iñexperiénsia hetáva. Haʼe chupe nachembostudiaséipa la Biblia, ha haʼe heʼi chembostudiataha.

Che añemeʼẽmbaite vaʼekue voi la che estúdiope ha aleepaite voi umi lívro ha rrevísta onohẽva umi testígo de Jehová ha avei la Biblia. Upéva ningo chegustaiterei vaʼekue voi, ha umi rreunionhápe katu ahecha umi mitã mimi jepe oikuaa umi rrespuésta umi kuimbaʼe iñaranduetereíva heta tiémpore oikuaase vaʼekue. Por ehémplo, mbaʼérepa oĩ hetaite mbaʼe vai, mávapa hína Ñandejára, térã mbaʼépa oiko ñandehegui ñamano rire. Che añehunta sólamente umi testígo de Jehovándi ha upéva ifásil vaʼekue chéve, pórke ndaikuaái avavetépe pe paíspe, sólamente chupekuéra. Haʼekuéra chepytyvõ ahayhu hag̃ua Jehovápe ha ajapose hag̃ua umi mbaʼe haʼe oipotáva.

Áño 1972-pe ajevautisa ha un áño haguépe amoñepyrũ che prekursorádo ha ava peteĩ kongregasión oĩvape Newry, Irlanda del Nórtepe. Upépe aalkila peteĩ óga ojejapóva itágui oĩva peteĩ montáñape. Upégui ag̃ui oĩ vaʼekue unos kuánto vaka ha apraktika vaʼekue che diskúrso henondepekuéra. Haʼekuéra haʼetévaicha ku oñatende porãva cherehe oñaminduʼu aja. Umi vaka ningo ndaikatúiramo jepe omeʼẽ chéve ni peteĩ konsého, chepytyvõ ikatu hag̃uáicha amaña umi cherendúvare ajapo jave diskúrso. Áño 1974-pe añenombra prekursór espesiál Nigel Pitt ndive, upe guive ore oñoamigoite.

Upérõ guare ningo ijetuʼueterei la situasión Irlanda del Nórtepe, pórke oĩ hetaiterei violénsia, upévare algúno ohenói voi Irlanda del Nórtepe “pe país oĩháme vómba ha vála”. Upe tiémpope komún vaʼekue umi hénte oñorairõva kállere, umi fránko tiradór, umi tirotéo ha umi kóche vómba. Ha pyʼỹinte umi provléma oiko vaʼekue pe polítika térã rrelihión káusare. Upéicharõ jepe umi katóliko ha umi protestánte oikuaa umi testígo de Jehová noñentremeteiha polítikape, upévare ikatu ropredika lívremente. Umi ogajára oikuaa vaʼekue moõpa ha arakaʼépa oikóta umi provléma, ha oreavisa roevita hag̃ua upe pelígro.

Upéicharõ jepe, rohasa umi situasión ipeligrósovare. Peteĩ díape Denis Carrigan ndive, haʼéva avei peteĩ prekursór, ropredika peteĩ puévlo oĩvape ag̃ui ógagui. Upépe ndaipóri testígo de Jehová, ha unave ramo ropredika upe lugárpe. Upépe peteĩ kuña heʼi orerehe ore haʼeha soldádo británico, oiméne heʼi upéva pórke mokõivévante ndoroguerekói pe asénto irlandés. Upéva oremondýi kuri, pórke neamávle haguérente umi soldádondi haʼekuéra ikatu ndejuka o ndejapi ne retymáme. Rohaʼarõ aja kolektívo kállepe oreroʼy ha roime kuri oreaño. Upéi rohecha peteĩ áuto oñembojaha pe kafetería oĩ haguépe pe kuña oreakusa vaʼekue. Pe kuña osẽ pe kafeteríagui ha oñemboja umi mokõi kuimbaʼe oĩva pe áuto rendápe ha oseñea orerehe. Umi kuimbaʼe mbeguekatu oñemboja ore rendápe ha oporandu oréve mbaʼe órapa oúta pe kolektívo. Upe rire, og̃uahẽrõ guare pe kolektívo, oñemongeta hikuái pe chofér ndive. Ore ndaikatúi vaʼekue rohendu la heʼíva hikuái. Péro pe kolektívo ndorekói vaʼekue ótro pasahéro, upévare ore roikuaa oñeʼẽha orerehe, ha oplanea ojapotaha orerehe álgo. Péro upéva ndoikói kuri, ha roguejykuévo aporandu pe choférpe: “¿Umi kuimbaʼe oñeʼẽ vaʼekue nendive piko oporandu raʼe ndéve orerehe?”. Ha haʼe heʼi oréve: “Che ningo poikuaa porãiterei peẽme ha haʼe chupekuéra mávapa peẽ, upévare ani pejepyʼapy”.

Áño 1976-pe oiko vaʼekue peteĩ asambléa de distrítoa Dublínpe, ha upépe aikuaa Pauline Lomáxpe, peteĩ prekursóra espesiál oikóva Inglatérrape. Haʼe ningo peteĩ ermána ifiélva, iñumíldeva ha ijukyetereíva. Haʼe ha iñermáno Ray oikuaa pe añetegua imitã guive. Un áño upe rire, Pauline ha che romenda ha ore roservi oñondive de prekursór espesiál Ballyménape (Irlanda del Nórte).

Peteĩ tiémpore roservi kómo superintendénte de sirkuíto Bélfastpe, Londonderry ha umi ótro lugár ipeligrosohápe. Oréve ningo oremokyreʼỹeterei rohechávo mbaʼeichaitépa umi ermáno ha umi ermána ijerovia mbarete. Haʼekuéra oheja umi kreénsia rrelihiósa omombaʼe vaʼekue, pe ódio ha umi mbaʼe haʼekuéra opensáva hapichakuérare oservi hag̃ua Jehovápe. Ha ahechakuaa mbaʼeichaitépa Jehová ovendesi ha oprotehe chupekuéra.

Ore roiko vaʼekue Irlándape 10 áñore. Ha upe rire áño 1981-pe roñeinvita roasisti hag̃ua pe kláse 72 de Galaádpe. Ha upe rire roñeasigna Sierra Leónape, oĩva oéste de Áfricape.

SIERRA LEONA: UMI ERMANOKUÉRA IJEROVIA MBARETE, IMBORIAHÚRAMO JEPE

Ore roiko vaʼekue pe kása misionálpe éntre 11 persóna. Ha upépe rokomparti peteĩ kosina, mbohapy váño, mokõi dúcha, peteĩ teléfono, peteĩ lavarrópa ha peteĩ sekarrópa. Pe elektrisida pyʼỹinte oho vaʼekue, ha umi anguja katu oguatapa pe téchore, ha umi mbói katu okorrepa pe sótanore.

Roikóramo jepe upeichagua lugárpe, ore rovyʼaiterei la predikasiónpe. Umi hentekuéra orrespeta ha ohendu porã oñeñeʼẽramo chupekuéra la Bíbliare. Ha heta voi oñepyrũ oasepta pe añetegua ha oiko chuguikuéra testígo de Jehová. Ha umi hénte upepegua katu cherenói “Señór Robert” ha Paulínepe katu “Señóra Robert”. Upe tiémpope che añepyrũma vaʼekue ambaʼapove sukursál ndive ha saʼivéma ahasa tiémpo predikasiónpe. Upévare umi hénte ohenóima Paulínepe “Señóra Pauline” ha chéve katu “Señór Pauline”. Ha Paulínepe ogusta voi upéva.

Umi ermáno ningo imboriahueterei, péro Jehová siémpre omeʼẽ chupekuéra umi mbaʼe oikotevẽmíva oñeimoʼãʼỹháicha (Mat. 6:33). Chemanduʼa peteĩ vuéltape, peteĩ ermána sólamente oguereko hague pláta ojogua hag̃ua tembiʼu upe díape ijupe ha imembykuérape g̃uarã. Péro omeʼẽ peteĩ ermáno hasykatúvape oguerekóva malária ojogua hag̃ua ipohãrã. Upe riremínte upe díape voi, peteĩ kuñakarai oho pe ermána rendápe ha ojerure chupe oarregla hag̃ua chupe iñakãrangue ha opaga chupe upe haguére. Oĩ kuri heta experiénsia upeichagua.

NIGERIA: ROAPRENDE PETEĨ KULTÚRA PYAHU

Ore ningo roservi kuri 9 áño Sierra Leónape. Upe rire roñeasigna pe Betel oĩva Nigériape. Upépe roĩ peteĩ sukursál tuichávape. Che ningo ambaʼapo pe mísmo traváho ajapo vaʼekuépe voi Sierra Leónape. Péro Paulínepe haʼe vaʼekue peteĩ kámbio tuichaitereíva, pórke haʼe ningo ohasa vaʼekue 130 óra káda mes predikasiónpe ha avei oguereko vaʼekue umi estudiánte oprogresáva. Chupe oñeasigna pe kostúrape, upépe tódo el día ombovyvy ha oarregla umi ao oñembyaíva. Ijetuʼu kuri chupe ojadapta hag̃ua pe iñasignasión pyahúpe, péro ohechávo umi ermanokuéra omombaʼetereiha itraváho, oaprovechapaite umi oportunida oguerekóva omokyreʼỹ hag̃ua umi ikompañerokuéra betelítape.

Pe kultúra Nigeriagua ipyahu oréve g̃uarã, upévare roguereko heta mbaʼe roaprende vaʼerã kuri. Peteĩ vuéltape peteĩ ermáno ou che ofisínape opresenta hag̃ua chéve peteĩ ermána oike ramóva Betélpe, ha ambohasárõ guare chupe che po asaluda hag̃ua chupe, haʼe oñesũ che renondépe. Upéva chesorprendeterei, ha upepete ou che akãme mokõi téxto voi, haʼéva Hechos 10:25, 26 ha Apocalipsis 19:10. Ha añeporandu: “¿Haʼe vaʼerã piko chupe anive hag̃ua ojapo upéva?”. Péro avei apensa chupe ojeasepta hague oservi hag̃ua Betélpe ha katuete oikuaa porãha la Biblia omboʼéva.

Che apyta atĩeterei kuri upérõ, ha upe rire ainvestigave. Upépe apilla pe ermána osegiha hína peteĩ kostúmbre ojejapóitiva unos kuánto lugárpe upe paíspe. Umi kuimbaʼe ojapónte avei upéicha, ha upéva ndahaʼéi kuri peteĩ adorasión. Ha la Bíbliape jatopa umi ojapo vaʼekue avei upéicha (1 Sam. 24:8). Avyʼaiterei akirirĩnte haguére ha ndaʼéi haguére mbaʼeve ikatútava omotĩ che ermánape.

Ore roikuaa heta ermáno Nigériape, ohechaukáva ifielha heta áñore. Umíva apytépe oĩ Isaiah Adagbona.b Haʼe oaprende la verda imitãrõ guare. Upéi ojepilla haʼe oguereko hague lépra ha oñemondo chupe peteĩ kolóniape oñemondohápe umi hasývape. Upépe haʼeñomi la Testígova, ha upépe haʼe oipytyvõ mas de 30 persónape oikuaa hag̃ua pe añetegua ha oñeforma voi peteĩ kongregasión upe kolóniape.

KENIA: UMI ERMANOKUÉRA IPASIÉNSIA CHEREHE

Áño 1996-pe roñeasigna vaʼekue roho hag̃ua roservi pe sukursál oĩva Kéniape. Amombeʼu haguéicha iñepyrũme che aháma vaʼekue voi upe paíspe ha koʼág̃a primera ves la aha jey upépe tiémpo rire. Betélpe umi orevisitáva apytépe oĩ vaʼekue umi kaʼi, ha haʼekuéra omonda umi ermanakuéra frúta. Peteĩ díape peteĩ ermána oheja aviérto la iventána, ha haʼe ou jeývo otopa unos kuánto kaʼi ikotýpe odisfrutáva hína umi tembiʼu otopáva upépe. Haʼe osapukái ha odipara osẽ pe okẽrupi ha umi kaʼi osapukái avei ha odiparapa osẽ pe ventánarupi.

Pauline ha che roñerreuni pe kongregasión oñeʼẽvape idióma suajili. Ha tiémpo riremi otoka chéve akondusi pe Estúdio de lívro de la kongregasión, koʼág̃a oñehenóiva Estúdio bíblico kongregasionpegua. Upéicharõ jepe che nañeʼẽporãiti upéva upe idióma. Astudia porã umi puvlikasión ha upéicha rupi ikatu alee porã umi porandu oĩva upépe. Péro umi ermanokuéra okomentáramo iñeʼẽtépe, michĩmínteramo idiferénte oĩvagui pe puvlikasiónpe, che ja nantendevéima chupekuéra. Upéva chemoñeñandu vaiʼimi kuri, ha che ambyasyeterei kuri umi ermanokuéra ha ermanakuérape. Péro cheimpresiona mbaʼéichapa haʼekuéra ipasiénsia ha iñumílde oaseptávo umi arréglo oĩva.

ESTADOS UNIDOS: UMI ERMANOKUÉRA IJEROVIA MBARETE IPLÁTARAMO JEPE

Ore ningo roime vaʼekue Kéniape ménos de un áño. Upéi 1997-pe roñeinvita roho hag̃ua roservi Betel oĩvape Brooklyn, Nueva Yórkpe. Upérõ roĩ peteĩ país oĩháme heta hénte oguerekóva heta mbaʼerepy ha iplátava, ha upéva ikatúnte avei kuri ogueru provléma (Prov. 30:8, 9). Upéicharõ jepe umi ermanokuéra ohechauka ijerovia mbareteha. Ñane ermanokuéra oipuru itiémpo ha imbaʼerepy ndahaʼéi irríko hag̃ua hikuái, síno oapoja hag̃ua umi traváho ojapóva Jehová organisasión.

Heta áñorema rohecha mbaʼéichapa umi ermanokuéra ijerovia mbarete ohasáramo jepe diferénte situasión. Por ehémplo Irlándape, ahecha mbaʼeichaitépa ijerovia mbarete umi ermanokuéra oĩramo jepe heta violénsia. Áfricape umi ermanokuéra ijerovia mbarete imboriahúramo jepe. Estados Unídospe umi ermanokuéra ijerovia mbarete oĩramo jepe heta iplátava. Katuete Jehová ovyʼaiterei ohechávo mbaʼéichapa isiervokuéra ohechauka ohayhuha chupe diferénte situasiónpe.

Heʼiháicha Job 7:6: “Chéve g̃uarã umi día pyaʼeterei ohasa, umi otehéva pyaʼe ombaʼapoháicha”. Koʼág̃a rombaʼapo pe sentrál mundiál Warwick, Nueva Yórkpe, ha rovyʼa ikatu haguére rombaʼapo umi persóna ojoayhu añetévandi. Ore rovyʼa ha roĩ konténto ikatu haguére roipytyvõ Jesucrístope haʼéva pe Rréi koʼẽrõite omyengoviapaitétava umi ifiélvape (Mat. 25:34).