¿Mbaʼéichapa Jehová okontesta ñane ñemboʼe?

1, 2. ¿Mbaʼépa sapyʼánte ikatu ñañeporandu?

¿ALGÚNA véspa reñeporandúmava Jehová okontestápa hína ne ñemboʼe? Oimérõ péicha, ndahaʼéi ndénte reikuaaséva upéva. Heta ermáno orrekonose oñeporandúma hague upéva, koʼýte ohasa jave umi provléma. Jahasa asy jave ikatu ijetuʼu jahechakuaa hag̃ua Jehová okontestaha ñandéve ñane ñemboʼe.

² Ko artíkulope jahecháta mbaʼérepa ikatu ñaĩ segúro Jehová okontestaha isiervokuéra ñemboʼe (1 Juan 5:15). Avei ñambohováita koʼã porandu: ¿Mbaʼérepa sapyʼánte haʼetévaicha noñerrespondéiva ñandéve ñane ñemboʼe? ¿Mbaʼéichapa Jehová okontesta koʼág̃arupi ñane orasión?

IKATU NOÑEKONTESTÁI ÑANDE ÑAHAʼARÕHAICHAITE

3. ¿Mbaʼérepa Jehová oipota ñañemboʼe chupe?

³ La Biblia oasegura ñandéve Jehová ñandevalora ha ñanderayhuetereiha (Ageo 2:7; 1 Juan 4:10). Upévare haʼe oipota ñañemboʼe chupe jajerure hag̃ua ajúda (1 Ped. 5:6, 7). Haʼe ñanepytyvõse siémpre ñaĩ hag̃ua ijykére ha ñaaguanta hag̃ua ñane provlemakuéra.

4. ¿Mbaʼéichapa jaikuaa Jehová okontestaha isiervokuéra ñemboʼe? (Ehecha pe taʼanga).

⁴ La Biblia omombeʼu ñandéve Jehová okontesta hague heta vése isiervokuéra yma guare ñemboʼe. Por ehémplo ikatu ñapensa rréi David kásore. Oikove aja pukukue David oreko vaʼekue heta enemígo ipeligrósova, péro haʼe ojepokuaa oñemboʼe ojerure hag̃ua Jehovápe ajúda. Peteĩ vuélta heʼi Ñandejárape: “Jehová, ehendumína che orasión, cherendumína ajerure jave ndéve sokórro. Nde ningo ndehústo ha nderefallái avavéndi, upévare ekontestána che ñemboʼe” (Sal. 143:1). Jehová okontesta vaʼekue Davídpe ha osalva chupe (1 Sam. 19:10, 18-20; 2 Sam. 5:17-25). Upéicha rupi David ni ndodudái heʼi hag̃ua: “Jehová ndohejái umi hese ojeroviávape”. Ñande avei ikatu ñaĩ segúro upévare (Sal. 145:18).

5. ¿Okontestápa rakaʼe siémpre Jehová isiervokuérape haʼekuéra ohaʼarõ hagueichaite? Emoĩ peteĩ ehémplo. (Ehecha pe taʼanga).

⁵ Sapyʼánte ikatu Jehová nokontestái ñandéve ñahaʼarõ hagueichaite. Upéicha oiko vaʼekue apóstol Páblore. Haʼe heʼi vaʼekue oreko hague peteĩ ‘ñuatĩ oikutu rasýva’ chupe. Upévare 3 vése ojerure asy Jehovápe oipeʼami hag̃ua chugui upe provléma. ¿Okontestápa rakaʼe Jehová Páblope? Si, péro ndahaʼéi haʼe ohaʼarõ hagueichaite. Oipeʼa rangue Páblogui upe provléma, Jehová omeʼẽ chupe pe fuérsa oikotevẽva osegi hag̃ua oservi chupe fiélmente (2 Cor. 12:7-10).

6. ¿Mbaʼérepa sapyʼánte haʼetévaicha Jehová nokontestáiva ñane ñemboʼe?

⁶ Ñande kásope avei ikatu sapyʼánte Jehová okontesta ñandéve péro ndahaʼéi la rrespuésta ñande ñahaʼarõ vaʼekue. Péicha jave ikatu ñaĩ segúro Jehová oikuaa porãha mbaʼépa la okonvenivéva ñandéve. Añetehápe haʼe ikatu voi “ojapo hetaitereive mbaʼe ñande ikatúvagui jajerure térã ñañeimahina” (Efes. 3:20). Upéicharõ Jehová ikatu hína okontesta ñandéve ñaimoʼãʼỹháicha ha ñaimoʼãʼỹve jave.

7. ¿Mbaʼérepa sapyʼánte tekotevẽta ñakambia la jajeruréva ñane ñemboʼépe? Emoĩ peteĩ ehémplo.

⁷ Sapyʼánte tekotevẽta ñakambiaʼimi la jaʼéva ñane ñemboʼépe ñantende porãve rupi jahávo mbaʼépa Jehová volunta. Jahechamína ermáno Martin Poetzinger ehémplo. Omenda riremi ojegueraha chupe peteĩ kámpo de konsentrasión názipe. Ñepyrũrã haʼe ojerure Jehovápe osẽ hag̃ua upégui, ikatu hag̃uáicha oñangareko porã hembirekóre ha opredika jey hag̃ua. Péro upéi ohasáma dos semána ha ndoikói mbaʼeve. Haʼetévaicha Jehová noipytyvõmoʼãiva ko ermánope ojelivera hag̃ua chupe. Upémarõ ermáno Martin heʼi Jehovápe: “Por favór ehechaukamína chéve mbaʼépa reipota ajapo”. Upe rire ko ermáno oñemoĩ opensa la ohasávare entéro umi ótro ermáno oĩva avei pe kámpo de konsentrasiónpe. Heta oĩ ojepyʼapyetereíva hembirekóre ha ifamiliakuérare. Upémarõ ermáno Martin heʼi Jehovápe: “Grásiamante ko che asignasión pyahúre, chepytyvõmína amokyreʼỹ ha amombarete hag̃ua che ermanokuérape”. Ha upevaite la ojapo vaʼekue ko ermáno umi 9 áño oĩ aja pe kámpo de konsentrasiónpe.

8. ¿Mbaʼe rehepa iñimportánte ñanemanduʼa ñañemboʼe jave?

⁸ Ñanemanduʼáke Jehová okumplitaha ivolunta pe tiémpo haʼe odesidíma vaʼekuépe. Okumpli vove ivolunta Jehová oipeʼapaitéta pára siémpre entéro umi mbaʼe ñanembosufríva, umíva apytépe umi desástre naturál, umi mbaʼasy ha pe ñemano. Ha igoviérno rupive Jehová okumplipaitéta la opromete vaʼekue (Dan. 2:44; Apoc. 21:3, 4). Péro og̃uahẽ meve upe tiémpo Jehová opermiti gueteri hína Satanáspe ogoverna ko múndo (Juan 12:31; Apoc. 12:9).b Upévare Jehová koʼag̃aite osolusionambaitérõ umi provléma, haʼetéta ku Satanás ogoverna porãva hína ko múndo. Péro tekotevẽramo jepe ñahaʼarõ Jehová okumpli peve umi promésa, upéva ndeʼiséi haʼe nañanepytyvõiha koʼág̃a. Jahechamína unas kuánta kósa Jehová ojapóva hína ñanderehehápe.

¿MBAʼÉICHAPA JEHOVÁ OKONTESTA KOʼÁG̃ARUPI ÑANE ÑEMBOʼE?

9. ¿Mbaʼéichapa Jehová ñanepytyvõ jadesidíta jave álgo? Emoĩ peteĩ ehémplo.

⁹ Ñanemoarandu. Jehová opromete ñandéve ñanemoarandutaha jadesidi porã hag̃ua, koʼýte ñaikotevẽ upéva ñambohovái jave álgo okambiaitétava ñande rekove. Por ehémplo jadesidíta jave ñamendátapa térãpa nahániri (Sant. 1:5). Jahechamína la oiko vaʼekue peteĩ ermána soltéra héravare María.c Haʼe ningo vyʼápe oservi de prekursóra rregulár ha upéi ou oikuaa peteĩ ermánope. María heʼi: “Amedída ke oiko orehegui oñoamigoite roñepyrũ avei rojegusta ojuehe. Upépe ahechakuaa adesidi vaʼerãha mbaʼépa ajapóta. Upévare heta añemboʼe Jehovápe. Aikuaa haʼe chemoarandutaha, péro haʼe ndodesidimoʼãi kuri che vése”. María oikuaa Jehová okontesta hague iñemboʼe ha omoarandu hague chupe. ¿Mbaʼéichapa Jehová okontesta raʼe iñemboʼe? María oinvestiga ñane puvlikasiónpe ha otopa umi informasión oipytyvõva chupe okontesta hag̃ua umi porandu orekóva. Avei isy haʼéva Testígo omeʼẽ Maríape heta konsého oipytyvõva chupe oanalisa porã hag̃ua la oñandúva. Péicha María ikatu kuri odesidi porã.

10. Heʼiháicha Filipenses 4:13, ¿mbaʼéichapa Jehová oipytyvõta isiervokuérape? Emoĩ peteĩ ehémplo. (Ehecha pe taʼanga).

¹⁰ Ñanemombarete ñaaguanta hag̃ua. Omombarete haguéicha Páblope, Jehová ñanemombaretéta avei jagueropuʼaka hag̃ua umi situasión ijetuʼúva (elee Filipenses 4:13). Jahechami mbaʼéichapa Jehová oipytyvõ peteĩ ermáno héravape Benjamín. Imitãrõ guare Benjamín ha ifamília oiko vaʼekue heta áñore umi kámpo de rrefuhiádope Áfricape. Haʼe heʼi: “Che añemboʼémi vaʼerã Jehovápe ha ajerure chupe tachemombarete ikatu hag̃uáicha ajapo la iporãva ha Jehová okontesta chéve, haʼe chembopyʼaguapy, chembopyʼaguasu apredika hag̃ua ha omeʼẽ chéve umi puvlikasión ikatu hag̃uáicha asegi amombarete che jerovia”. Benjamín avei omombeʼu: “Aleévo umi experiénsia ohasa vaʼekue umi ermanokuéra, ahecha mbaʼéichapa Jehová oipytyvõma chupekuéra ha upéva chemokyreʼỹ ani hag̃ua añentrega ha asegi hag̃ua chefiél Ñandejárape”.

11, 12. ¿Mbaʼéichapa Jehová ikatu ojevale umi ermanokuérare okontesta hag̃ua ñane ñemboʼe? (Ehecha pe taʼanga).

¹¹ Ojevale ñane ermáno ha ermanakuérare. Pe pyhare omano mboyve, Jesús oñemboʼe ipyʼaite guive Jehovápe. Haʼe ojerure asy ani hag̃ua oñepensa opuʼãha Itúare ha oñekondena chupe upévare. Jehová oipeʼa rangue Jesúspe upe situasióngui ombou peteĩ ánhel omombarete hag̃ua chupe (Luc. 22:42, 43). Péicha avei Jehová ikatu ojevale peteĩ ermáno térã ermánare ñanerenói o ñandevisita hag̃ua ha péicha ñanemokyreʼỹ. Enterovéva ikatu jaheka umi oportunida ñamombarete ha ñamokyreʼỹ hag̃ua ñane ermanokuérape (Prov. 12:25).

¹² Jahechamína la ohasa vaʼekue peteĩ ermána hérava Miriam. Unas kuánta semána iména omano rire haʼe oĩ kuri haʼeño hógape, oñeñandu yvýre ha oñembyasyeterei. Upérõ Miriam hasẽ ha ndojejokokuaavéi ha oñeʼẽseterei kuri álgiendi. Haʼe heʼi: “Ndarekói ningo fuérsa ni ajagarra hag̃ua pe teléfono aporohenói hag̃ua, upémarõ añemboʼe Jehovápe. Cherasẽ ha añemboʼe aja gueteri ipu sapyʼa la teléfono. Peteĩ ansiáno haʼéva che amigoite raʼe la cherenóiva”. Ko ansiáno ha hembireko okonsola kuri Míriampe ha haʼe oĩ segúra Jehovanteha voi la omomýi vaʼekue ko ermánope ohenói hag̃ua chupe.

13. Emombeʼu peteĩ ehémplo ohechaukáva Jehová ojevalekuaaha umi ndahaʼéivare Testígo okontesta hag̃ua ñandéve.

¹³ Ojevale umi ndoadoráivare chupe (Prov. 21:1). Sapyʼánte Jehová okontesta hag̃ua ñane ñemboʼe ikatu ojevale umi ndoadoráivare chupe. Por ehémplo omomýi vaʼekue rréi Artajérjespe omeʼẽ hag̃ua permíso Nehemíaspe oho jey hag̃ua Jerusalénpe. Péicha rupi Nehemías ikatu kuri oho omopuʼã jey hag̃ua pe siuda (Neh. 2:3-6). Koʼág̃arupi avei Jehová ikatu ojevale umi ndahaʼéivare Testígo ñanepytyvõ hag̃ua ñaikotevẽ jave.

14. ¿Mbaʼéichapa nemokyreʼỹ ermána Hing experiénsia? (Ehecha pe taʼanga).

¹⁴ Peteĩ ermána hérava Soo Hing oñandu Jehová oipytyvõ hague chupe peteĩ doktór rupive. Ko ermána membykuimbaʼe oreko unos kuánto enfermeda mentál, ha hiʼarive oumi oñaksidenta vai. Upémarõ ko ermána ha iména ohejámante itraváho oñatende hag̃ua ifamíliare. Péro upéi ou hikuái oreko provléma ekonómiko. La isituasionkuéra ivaieterei kuri, upévare ko ermána heʼi nomeʼẽveimaha ha ndaikatumoʼãveimaha oaguanta. Upémarõ oñemboʼe ipyʼaite guive ha ojerure Jehovápe oipytyvõmínte hag̃ua chupe. Upe rire pe doktór odesidi oipytyvõseha ko ermána ha ifamíliape. Upéicha rupi okonsegi hikuái peteĩ ajúda oúva pe goviérnogui ha peteĩ lugár varatomie oiko hag̃ua. Ko ermána heʼi: “Rohechakuaa mbaʼeichaitépa Jehová orepytyvõ ko situasiónpe. Ndorodudái haʼe ‘ohenduha entéro ñemboʼe’” (Sal. 65:2).

TEKOTEVẼ JAJEROVIA JAHECHAKUAA HA JAASEPTA HAG̃UA JEHOVÁ RRESPUÉSTA

15. ¿Mbaʼépa oipytyvõ raʼe peteĩ ermánape ohechakuaa hag̃ua Jehová okontestaha chupe?

¹⁵ Jehová ningo ndahaʼéi katuete okontestátava ñane ñemboʼe peteĩ milágro ndetuichapa jepéva rupive. Péro si omeʼẽta ñandéve la ñaikotevẽva jasegi hag̃ua ñandefiél chupe. Upévare ñañatende meme vaʼerã jahechakuaa hag̃ua mbaʼéichapa Jehová okontesta hína ñandéve. Jahechamína la ohasáva peteĩ ermána hérava Yoko. Chupe g̃uarã haʼetévaicha Jehová nokontestáiva kuri iñemboʼe, ha upémarõ oñepyrũ oanotapaite la ojeruréva guive Jehovápe. Tiémpo rire olee jey la oskrivi vaʼekue ha ohechakuaa Jehová okontesta hague la majoría umi iñemboʼe, oĩ voi umi ni haʼe naimanduʼavéimava. Péicha jahecha iporãtaha ñañemotiémporamo jepi ñapensa hag̃ua mbaʼéichapa Jehová okontesta hína ñane ñemboʼe (Sal. 66:19, 20).

16. ¿Mbaʼéicha javépa ikatu jahechauka jajeroviaha? (Hebreos 11:6).

¹⁶ Tekotevẽ ningo añete jajerovia Jehováre ñañemboʼe hag̃ua chupe. Péro avei jajerovia vaʼerã jaasepta hag̃ua tahaʼe haʼéva la irrespuésta (elee Hebreos 11:6). Jahechamína Mike ha Chrissy ehémplo. Ko matrimónio oserviseterei kuri Betélpe. Mike omombeʼu: “Heta vése romondo ore solisitu Betélpe ha kontinuadoite roñemboʼe Jehovápe upévare. Péro núnka noroñeinvitái”. Ko matrimónio siémpre okonfia Jehová oikuaa porãveha moõpa ideprovechovéta hikuái ha osegi ojapo heta mbaʼe iservísiope. Por ehémplo oho oservi de prekursór rregulár umi lugár oñekotevẽhápe ha avei oapoja umi projékto de konstruksión. Koʼág̃a oservi hikuái de superintendénte de sirkuíto. Mike heʼi: “Heta vése Jehová nokontestái oréve ore rohaʼarõ haguéicha, péro si okontesta ore ñemboʼe ha sapyʼánte la omeʼẽva oréve iporãve voi la ore roñeimahina vaʼekuégui”.

17, 18. Heʼiháicha Salmo 86:6, 7, ¿mbaʼe rehepa ikatu ñaĩ segúro?

¹⁷ (Elee Salmo 86:6, 7). David ndodudái vaʼekue ni michĩmi Jehová ohenduha iñemboʼe ha okontestaha chupe. Ñande avei ikatu ñaĩ segúro Jehová ñanerenduha. Umi ehémplo jahecha vaʼekue ko artíkulope ohechauka Jehová ñanemoarandu ha ñanemombareteha jagueropuʼaka hag̃ua umi provléma. Avei jahecháma Jehová ikatuha ojevale ñane ermanokuérare ha umi hénte ndahaʼéivare Testígo jepe ñanepytyvõ hag̃ua.

¹⁸ Jehová nokontestáiramo jepe ñandéve ñane ñemboʼe ñahaʼarõ hagueichaite, ikatu ñaĩ segúro si okontestataha. Haʼe omeʼẽta ñandéve pe ñaikotevẽva ha itiempoitépe voi. Upévare jasegíkena ñañemboʼe chupe ha ani jaduda okuidataha ñanderehe koʼág̃a ha pe múndo pyahúpe katu ‘omeʼẽtaha entérope opa mbaʼe oipotáva’ (Sal. 145:16).