¿Mbaʼéichapa Jehová ñanemombaretéta?

1. ¿Mbaʼéichapa Jehová omombarete vaʼekue isiervokuéra yma guarépe?

LA Biblia oñeʼẽ jave Jehová siervokuéra yma guarére heʼi hesekuéra ipoderosoha, péro pe imbaretevéva jepe sapyʼánte ou vaʼekue ikangy. Por ehémplo, rréi David peteĩ vuéltape heʼi vaʼekue ‘imbareteha peteĩ montáñaicha’, péro upéi heʼi avei ‘ou hague ikangy ha okyhyjeterei’ (Sal. 30:7). Ñandejára espíritu sánto omombareteterei vaʼekue avei Sansónpe, péro haʼe orrekonose Ñandejára noipytyvõiramo chupe ‘ikangýta hague oimeraẽ ótro kuimbaʼéicha’ (Juec. 14:5, 6; 16:17). Jahechaháicha, Jehová hína la omombarete vaʼekue koʼã mokõi isiérvo ifiélvape.

2. ¿Mbaʼérepa Pablo heʼi vaʼekue ikangy jave ipoderosoha? (2 Corintios 12:9, 10).

² Apóstol Pablo orrekonose vaʼekue oikotevẽ hague Ñandejára omombarete chupe (elee 2 Corintios 12:9, 10). Ñandéicha avei Pablo hasy vaʼekue, ha avei sapyʼánte ijetuʼu vaʼekue chupe ojapo hag̃ua pe iporãva (Rom. 7:18, 19; Gál. 4:13, 14). Pablo avei oñekevranta ha okyhyje vaʼekue la ikatúvagui oiko hese (2 Cor. 1:8, 9). Péro haʼe heʼi vaʼekue: “Chekangy jave, chepoderóso hína”. ¿Mbaʼéicha rupípa Pablo oñandu vaʼekue upéva? Jehová omeʼẽ rupi chupe pe fuérsa oikotevẽva oaguanta hag̃ua umi mbaʼe ohasáva.

3. ¿Mbaʼe pregúntapa ñakontestáta ko artíkulope?

³ Jehová opromete ñanemombaretetaha ñandéve avei (1 Ped. 5:10). Péro ndaikatúi ñahaʼarõ omeʼẽ ñandéve la fuérsa ñaikotevẽva jajapoʼỹre mbaʼeve. Ñamoĩmína peteĩ ehémplo, peteĩ áuto okuʼe hag̃ua la imotór oarranka vaʼerã, péro pe chofér ojopýmante vaʼerã la aseleradór oho hag̃ua algún ládo. Upéicha avei Jehová ñanemombaretese, péro ñande avei jajapo vaʼerã ñande párte upearã. ¿Mbaʼépa Jehová omeʼẽ ñandéve ñanemombarete hag̃ua? ¿Ha mbaʼépa tekotevẽ ñande jajapo haʼe ñanepytyvõ hag̃ua? Jaikuaa hag̃ua la rrespuésta, ñaanalisamíta 3 ehémplo oĩva la Bíbliape: Proféta Jonás, María haʼéva Jesús sy ha apóstol Pablo. Jahecháta avei mbaʼéichapa Jehová koʼág̃arupi osegi oipytyvõ isiervokuérape.

ÑANEMBARETEVÉTA ÑAÑEMBOʼE HA JASTUDIÁRAMO

4. ¿Mbaʼéichapa Jehová ikatu ñanemombarete?

⁴ Jehová ikatu hína ñanemombarete ñañemboʼéramo chupe. Haʼe okontestáta ñane ñemboʼe omeʼẽvo ñandéve “pe podér umi ótra hénte ndorekóiva” (2 Cor. 4:7). Avei ikatu jarresivi Jehová ajúda jaleéramo Iñeʼẽ ha jajepyʼamongetárõ hese (Sal. 86:11). La Bíbliape oĩ Ñandejára mensáhe ñandéve g̃uarã, ha upéva “oreko podér” (Heb. 4:12). Ñañemboʼéramo ha jaleéramo Iñeʼẽ, haʼe ñanepytyvõta ikatu hag̃uáicha jasegi ñaaguanta ha ñakumpli umi asignasión ijetuʼúva. Jahechamína mbaʼéichapa Jehová omombarete vaʼekue proféta Jonáspe.

5. ¿Mbaʼérepa proféta Jonás tekotevẽ vaʼekue ipyʼaguasu?

⁵ Proféta Jonás tekotevẽ kuri ipyʼaguasu. Haʼe okyhyje kuri oho hag̃ua pe asignasión Jehová omeʼẽ vaʼekuépe chupe. Upéicha rupi ojupi peteĩ várkope ha oho ótro ladoite. ¿Mbaʼépa oiko upéi? Peteĩ torménta káusare haimete omano haʼe ha umi ótro oĩva pe várkope. Upémarõ umi oviaháva pe várkope omombo Jonáspe pe márpe. Upéi oiko hese álgo omongyhyjevéntemava chupe: Peteĩ pira tuichaitereíva omokõ chupe. ¿Mbaʼéichapa oñeñandúne raʼe Jonás? Oiméne opensa omanotamaha ha Jehová ipochy hague hendive ha oheja reimaha chupe. Katuete oñekevrantaiténe raʼe upe moméntope.

6. Heʼiháicha Jonás 2:1, 2, 7, ¿mbaʼépa oipytyvõ raʼe Jonáspe oĩ aja pe pira guasu ryepýpe?

⁶ ¿Mbaʼépa ojapo Jonás ipyʼaguasu hag̃ua oĩrõ guare haʼeñomi pe pira ryépe? Haʼe oñemboʼe Jehovápe (elee Jonás 2:1, 2, 7). Jonás naiñeʼẽrendúi kuri, péro upéi oñarrepenti ha ndodudái Jehová ohendutaha chupe. Jonás avei ojepyʼamongeta vaʼekue Ñandejára Ñeʼẽ heʼívare. ¿Mbaʼérepa jaʼekuaa upéva? Pórke la heʼi vaʼekue iñemboʼépe, jatopáva Jonás kapítulo 2-pe, ojoguaiterei heta Sálmope (por ehémplo, ekompara Jonás 2:2, 5, Salmo 69:1; 86:7 heʼívare). Ojekuaa Jonás rehe oikuaa porãitereiha umi téxto bíblico. Ojepyʼamongeta rupi Ñandejára Ñeʼẽ heʼívare, Jonás okonfia Jehová oipytyvõta hague chupe. Upe rire Jehová osalva chupe ha Jonás oĩma okumpli hag̃uáicha pe asignasión orresivi vaʼekue (Jon. 2:10–3:4).

7, 8. ¿Mbaʼépa oipytyvõ peteĩ ermáno oikóvape Taiwánpe iprovléma hetárõ guare?

⁷ Jonás ehémplo ikatu ñanepytyvõ jahasa jave heta provlémare. Por ehémplo, peteĩ ermáno oikóva Taiwánpe, hasykatu ha hiʼarive ihentekuéra oñemoĩ mbarete hese oservi haguére Jehovápe. Péro ko ermáno imbarete jey ostudia ha oñemboʼe rupi. Haʼe heʼi: “Sapyʼánte oñepyrũ vove umi provléma, ndaikatúi ni añetrankilisa astudia hag̃ua”. Péro haʼe ojerovia Jehová oipytyvõtaha chupe. Ko ermáno heʼive: “Primeroite voi añemboʼe Jehovápe, upéi amoĩ che aurikulár ha añepyrũ ahendu umi kántiko. Avése apurahéi mbeguemi voi añetrankilisa peve, ha upéi si añepyrũma astudia”.

⁸ Umi mbaʼe oaprendéva ijestúdio personálpe oipytyvõ ko ermánope oaguanta hag̃ua. Por ehémplo, peteĩ vuéltape ojerrekupera aja peteĩ siruhía tuichávagui, peteĩ enferméra heʼi chupe iñemoglovína oguejyetereimaha, huguy kangyha ha oñemoĩ vaʼerãha chupe tuguy. Péro pe pyhare ojopera mboyve, ko ermáno olee kuri peteĩ ermána experiénsia. Ko ermánape ojejapo avei peichagua operasión ha la ikáso ijetuʼuvéntema pórke iñemoglovína tuichaitereive oguejy. Péro lomímonte haʼe ojerrekupera porã oñemoĩʼỹre chupe tuguy. Upéva oipytyvõ pe ermánope osegi hag̃ua ifiél ha iñeʼẽrendu.

9. ¿Mbaʼépa ikatu jajapo oiméramo peteĩ situasión ijetuʼúva ñanemokangy hína? (Ehecha pe taʼanga).

⁹ Jahasa jave peteĩ mbaʼe ijetuʼuetereíva, ñañekevranta jepi ha upévare ndajaikuaái ni mbaʼépa jaʼéta ñañemboʼe jave. Ikatu avei jaiko ñanekaneʼõháre ha ndaikatúi ni jastudia. Péicha jave ñanemanduʼákena Jehová ontende porãitereiha ñane situasión. Upévare ñañemboʼe sensillomíramo jepe ikatu ñaĩ segúro Jehová omeʼẽtaha ñandéve la ñaikotevẽva (Efes. 3:20). Oimérõ ñanekaneʼõ térã ñañekevrantaiterei ha upéicha rupi ndaikatúi jastudia, ikatu hína ñahendu umi puvlikasión ha la Biblia gravasión. Ideprovechoitereíta avei ñandéve ñahendúramo umi puraheikuéra térã jahecháramo umi vidéo oĩva jw.org-pe. Jahechaukáta jaipotaha Ñandejára ñanemombarete ñañemboʼéramo ha ñañehaʼãramo jahecha irrespuésta la Biblia ha umi puvlikasión rupive.

ÑANE ERMANOKUÉRA IKATU ÑANEMOMBARETE

10. ¿Mbaʼéichapa ñane ermanokuéra ikatu ñanemombarete?

¹⁰ Jehová ikatu ojevale ñane ermanokuérare ñanemombarete hag̃ua. Haʼekuéra ikatu ‘tuichaiterei ñanekonsola’ jahasa jave peteĩ provléma, térã jareko jave peteĩ asignasión ijetuʼúva ñakumpli hag̃ua (Col. 4:10, 11). Koʼýte ñaikotevẽ ñane amigokuérare ‘jahasa asy jave’ (Prov. 17:17). Ñanekangy jave ñane ermanokuéra ikatu omeʼẽ ñandéve la ñaikotevẽva, ñanekonsola ha ñanemokyreʼỹ jasegi hag̃ua jaservi Jehovápe fiélmente. Jahechamína mbaʼéichapa ótro omokyreʼỹ vaʼekue María, Jesús sýpe.

11. ¿Mbaʼérepa María tekotevẽ vaʼekue ipyʼaguasu?

¹¹ María tekotevẽ vaʼekue ipyʼaguasu okumpli hag̃ua Jehová volunta. Ikatu ñañeimahina mbaʼeichaitépa oiméne oñemondýi raʼe ánhel Gabriel heʼírõ guare chupe hyeguasutaha. María ningo nomendáiva gueteri ha núnka nomongakuaáiva peteĩ mitã, péro koʼág̃a okuida vaʼerã pe mitã haʼétavare pe Mesías. María ndorekóiva gueteri rrelasión sexuál, péro koʼág̃a omombeʼu vaʼerã imenarã Josépe mbaʼéicha rupípa hyeguasu. ¡Ajépa ijetuʼueténe raʼe chupe upéva! (Luc. 1:26-33).

12. Heʼiháicha Lucas 1:39-45, ¿mbaʼépa oipytyvõ Maríape ipyʼaguasu hag̃ua?

¹² ¿Mbaʼépa ojapo María okumpli hag̃ua ko asignasión espesiál ha ijetuʼuetéva? María oheka ajúda. Por ehémplo, ojapo unas kuánta pregúnta ánhel Gabriélpe ontende hag̃ua iñasignasión (Luc. 1:34). Upéi haʼe oviaha oho hag̃ua Elisabet rendápe, hiʼarive haʼe oiko “peteĩ puévlo oĩva sérrope, Judápe”. Péro María ndoviahareíri, ¿mbaʼére jaʼe upéva? Pórke Elisabet ofelisita chupe, ha Jehová ojevale hese heʼi hag̃ua peteĩ profesía oñeʼẽva pe mitã oĩvare María retepýpe (elee Lucas 1:39- 45). María heʼi Ñandejára ojapoha “heta mbaʼe tuichaitereíva ipodér rupive” (Luc. 1:46-51). Jahechaháicha, Jehová ojevale ánhel Gabriel ha Elisabet rehe omombarete hag̃ua Maríape.

13. ¿Mbaʼéichapa peteĩ ermána oikóva Bolíviape orresivi pe ajúda oikotevẽva?

¹³ Maríape oipytyvõ haguéicha ótro, ñandéve ikatu avei ñanemombarete umi ermanokuéra. Peteĩ ermána hérava Dasuri, oikóva Bolíviape, omombeʼu la oikóva hese: Itúa ou kuri hasyete, oñeinterna ha ndaiporivéi solusión ikásope g̃uarã. Pe ermána odesidi okuidataha itúare (1 Tim. 5:4). Péro upéva sapyʼánte ijetuʼu vaʼekue chupe. Dasuri omombeʼu: “Heta vése añandu vaʼekue nameʼẽveimaha”. Primerorã ko ermána ndojeruréi ajúda avavépe. Haʼe heʼi: “Namolestaséi vaʼekue umi ermanokuérape. Apensa Jehovánte chepytyvõtaha. Péro upéi ahechakuaa añehaʼãha amaneha cheaño umi che provlemakuéra” (Prov. 18:1). Upémarõ Dasuri odesidi oskrivitaha unos kuánto ermánope omombeʼu hag̃ua la isituasión. Upéi Dasuri omombeʼu: “Ndaikatumoʼãi haʼepa mbaʼeichaitépa chepytyvõ vaʼekue umi ermanokuéra. Haʼekuéra oguerahámi chéve che karurã ospitálpe, ha okomparti chendive umi téxto bíblico chemokyreʼỹva. Javyʼaite jaikuaávo nañaimeiha ñaneaño. Ñaĩ ningo Jehová família apytépe. Ha ko família ñanepytyvõ, oñeinteresa ñanderehe, hasẽ ñanendive ha ñanemopuʼã jasegi hag̃ua jaservi Jehovápe oñondivepa”.

14. ¿Mbaʼérepa jaasepta vaʼerã umi ansiáno ajúda?

¹⁴ Jehová omeʼẽ ñandéve umi ansiáno ñanemombarete ha ñanemokyreʼỹ hag̃ua (Is. 32:1, 2). Upévare jajepyʼapy jave algúna kósare, ñamombeʼúkena umi ansiánope. Ha haʼekuéra ñanepytyvõse jave, jaaseptákena vyʼápe pe ajúda. Jehová ikatu hína ojevale hesekuéra ñanemombarete hag̃ua.

ÑANE ESPERÁNSA IKATU ÑANEMOMBARETE

15. ¿Mbaʼe esperánsapa jareko entéro kristiáno?

¹⁵ Pe esperánsa jatopáva la Bíbliape ñanemombarete jasegi hag̃ua jaservi Jehovápe (Rom. 4:3, 18-20). Oĩ kristiáno orekóva la esperánsa oikovévo pára siémpre yvágape, ótro katu oikóta opa ára g̃uarã ko yvy ape ári peteĩ paraíso iporãitereívape. Ñane esperánsa ñanepytyvõ ñaaguanta hag̃ua umi situasión ijetuʼúva, japredika hag̃ua umi notísia porã ha ñakumpli hag̃ua umi asignasión jarekóva kongregasiónpe (1 Tes. 1:3). Upe esperánsa omombarete vaʼekue avei apóstol Páblope.

16. ¿Mbaʼérepa Pablo tekotevẽ vaʼekue ipyʼaguasu ha imbarete?

¹⁶ Pablo tekotevẽ vaʼekue imbarete ha ipyʼaguasu. Oskrivírõ guare ikárta umi Corintoguápe, haʼe heʼi ojoguaha peteĩ kambuchi ojejapóvape ñaiʼũgui ikatúva ojeka rei. Haʼe omombeʼu vaʼekue umi provléma ‘ojeliapaha hese’, ‘sapyʼánte ndoikuaaiha mbaʼépa ojapóta’, ‘oĩha opersegíva chupe’ ha ‘oipetéva chupe yvýre’. Avése ‘ojapeligra vaʼekue voi ha haimete mete omano’ (2 Cor. 4:8-10). Pablo oskrivírõ guare umi mbaʼe oikóva hese oĩ vaʼekue itercér viáhe de misionérope. Péro upéi oñepresenta chupe hetaiteve provléma: Peteĩ hénte aty oataka Páblope, ojeapresa chupe, haimete ojahoga márpe ha avei ojegueraha chupe de prisionéro.

17. Heʼiháicha 2 Corintios 4:16-18, ¿mbaʼépa oipytyvõ vaʼekue Páblope imbarete jey hag̃ua?

¹⁷ Apóstol Pablo imbarete jey vaʼekue opensa meme rupi pe esperánsa orekóvare (elee 2 Corintios 4:16-18). Haʼe heʼi vaʼekue umi Corintoguápe noñentregamoʼãiha, ‘hete ikaneʼõ ha ikangýramo jepe ohóvo’. Pablo ojesareko vaʼekue pe ‘prémio tuicha ha iporãitereíva’ ohaʼarõvare chupe ha omombaʼeterei vaʼekue upe esperánsa. Upéicha rupi ndahaʼéi vaʼekue mbaʼevete chupe g̃uarã oaguanta oimehaichagua provléma ohupyty hag̃ua pe prémio. Pablo siémpre ojepyʼamongeta vaʼekue iñesperánsare, ha upéva oipytyvõ chupe oñandu hag̃ua ‘umi mbaʼe orekóva iñakãme ha ikorasõme ipyahuveha ohóvo káda día’.

18. ¿Mbaʼéichapa pe esperánsa omombarete peteĩ ermáno ha ifamíliape?

¹⁸ Peteĩ ermáno oikóva Bulgáriape ohasa kuri álgo ijetuʼuetereíva, péro pe esperánsa orekóva omombarete jey chupe. Ojapo unos kuánto áño iñermáno imitãvéva omano hague peteĩ aksidéntepe. Upéicha rupi ko ermáno oñembyasyháre oiko kuri un tiémpo. Péro upéi haʼe ha ifamília ogueropuʼaka porãve kuri la oikóva oñeimahina rupi mbaʼéichatapa pe rresurreksión. Haʼe heʼi: “Por ehémplo roñeʼẽ moõpa rojotopáta che ermánondi, mbaʼe tembiʼúpa ropreparáta chupe g̃uarã, mávapepa roinvitáta pe primera fiestíta rojapótavape ha avei romombeʼúta chupe la oiko vaʼekue koʼã ára pahápe”. Ko ermáno Bulgariagua omombeʼu haʼe ha ifamília ojesareko rupi iñesperánsare, ikatu oaguanta la oiko vaʼekue ha ifasilve chupekuéra ohaʼarõ hag̃ua pe día Jehová omoingove jeytahápe iñermánope.

19. ¿Mbaʼépa ikatu jajapo ñamombarete hag̃ua ñane esperánsa? (Ehecha pe taʼanga).

¹⁹ ¿Mbaʼéichapa ikatu ñamombarete ñane esperánsa? Oiméramo jareko pe esperánsa jaikóvo ko yvy ape ári peteĩ paraísope, ikatu jajapo koʼã mbaʼe: Jalee umi téxto bíblico oñeʼẽva pe paraísore ha jajepyʼamongeta hese (Is. 25:8; 32:16-18). Ñapensa mbaʼéichapa jaikóta pe múndo pyahúpe, mávapepa jahecháta, mbaʼépa ñahendúta ha mbaʼéichapa ñañeñandúta ñaĩ vove upépe. Ifasilve hag̃ua ñandéve ñañeimahina ñaĩmaha upépe, ikatu ñamaña umi taʼanga osẽvare ñane puvlikasiónpe ohechaukáva mbaʼéichatapa pe paraíso. Avei ikatu jahecha koʼã vidéo musikál: Pe múndo pyahu apetéma oĩ, Pe paraíso oĩma apete ha Eñeimahina paraísope. Siémpre ñañemotiémporamo jajepyʼamongeta hag̃ua pe múndo pyahúre, jahechakuaáta ‘umi sufrimiénto jahasáva koʼág̃a ivevýi ha sapyʼami g̃uarãnteha’ (2 Cor. 4:17). Pe esperánsa Jehová omeʼẽva ñandéve ikatu ñanepytyvõ ñaaguanta hag̃ua oimehaichagua provléma.

20. Ñanekangýramo jepe, ¿mbaʼéichapa ikatu ñanembarete jey?

²⁰ Ñanekangy jave ‘Ñandejára omeʼẽta ñandéve podér’ (Sal. 108:13). Jehová omeʼẽma voi ñandéve umi mbaʼe ñanemombaretétava. Upévare, ¿mbaʼépa jajapóta ñaikotevẽ jave ajúda ñakumpli hag̃ua peteĩ asignasión, ñaaguanta hag̃ua peteĩ situasión ijetuʼúva térã jasegi hag̃ua javyʼa? Ñañemboʼékena Jehovápe ñande pyʼaite guive ha jaheka igía jastudiávo Iñeʼẽ. Jaaseptákena avei pe ajúda omeʼẽva ñandéve ñane ermanokuéra ha ñapensa meme umi mbaʼe porã ñaneraʼarõvare amo gotyove. Jajapóramo koʼã mbaʼe, ‘Ñandejára ñanemombaretéta ipodér tuichaitéva rupive, péicha ikatúta ñanepasiénsia ha javyʼa jagueropuʼakávo entéro mbaʼe’ (Col. 1:11).