¿Mbaʼépa nepytyvõta rejepokuaa hag̃ua ne kongregasión pyahúpe?

Nicolás ha Céline káso idiferenteʼimi. Pe sukursál oĩva Fránciape ojerure chupekuéra ova hag̃ua ótra kongregasiónpe. Haʼekuéra omombeʼu: “Primerorã rovyʼaiterei kuri, péro kon el tiémpo roñepyrũ rohechagaʼu ore amigokuérape, ha umi ermáno ore kongregasión pyahupegua neʼĩra gueteri ore amigoite kuri”.a Upéicharõ, ¿mbaʼépa ikatu nepytyvõ oimérõ reva raʼe ótra kongregasiónpe? ¿Mbaʼépa ikatu ojapo umi ermáno pe kongregasionpegua? ¿Mbaʼépa ikatu rejapo reipytyvõ hag̃ua ótrope ha rerresivi hag̃ua pe ajúda reikotevẽva?

CUATRO KONSÉHO NEPYTYVÕTAVA

1. Ejerovia Jehováre (Sal. 37: 5). Kazumi oikóva Japónpe oĩma kuri 20 áñore peteĩ kongregasiónpe, péro upéi ovámante vaʼerã kuri pórke iménape oñemondo ótro lugárpe itravahohápe. ¿Mbaʼéichapa haʼe oheja Jehová pópe opa mbaʼe? Haʼe heʼi: “Heta vése amombeʼupaite Jehovápe la añandúva, haʼe chupe añekevranta, akyhyje ha añeñanduha cheaño. Haʼe ningo siémpre chemombarete vaʼekue”.

¿Mbaʼéichapa ikatu jajeroviave Jehováre? Ñapensamíntena, peteĩ plánta okakuaa ha imbarete hag̃ua jarrega ha ñamoĩ vaʼerã chupe avóno. Péicha avei tekotevẽ jajapo álgo ñande jerovia okakuaa ha imbarete hag̃ua, upéva ndoikomoʼãi upéicha reínte. Nicolás, pe ermáno ajeʼi ñañeʼẽma vaʼekuére, ojepyʼamongeta Abrahán, Jesús ha Pablo ehémplore, haʼekuéra heta ojesakrifika vaʼekue ojapo hag̃ua Ñandejára volunta. Iñehemplokuéra oipytyvõ Nicoláspe ojeroviave hag̃ua Jehová oipytyvõtaha chupe. Nde avei restudia meméramo la Biblia rembohovái porãta umi kámbio ikatúva oiko nde rekovépe, ha avei reaprendéta heta mbaʼe porã remokyreʼỹ hag̃ua umi ermáno oĩvape ne kongregasión pyahúpe.

2. Ani ekompara (Ecl. 7: 10). Peteĩ ermáno hérava Jules oiko vaʼekue Benínpe opytáva Áfricape. Upéi ova Estados Unídospe idiferentehápe umi kostúmbre. Haʼe heʼi: “Haʼete chéve kuri káda persóna aikuaávape amombeʼu vaʼerãha entéro mbaʼe ahasa vaʼekue”. Upéva ndogustapái kuri pe ermánope pórke ndojepokuaái péicha pe oiko haguépe, upéicha rupi ou oñemomombyry umi ermanokuéragui. Péro upéi oikuaa porãve chupekuéra ha okambiaite la opensáva. Haʼe heʼi: “Koʼág̃a apilla ñande yvypóra jajojoguaha tahaʼe haʼéva pe lugár jaikoha, sólamente ñañeʼẽ diferénte ha ndajajapói entéro mbaʼe elmimoite, péro tekotevẽterei jaasepta káda únope”. Upévare aníkena ekompara ne kongregasión pyahu pe ne kongregasión yma guarére. Peteĩ prekursóra hérava Anne Lise heʼi: “Che ndavái kuri aheka hag̃ua la mísma kósa jeýnte, síno aaprende hag̃ua heta mbaʼe ipyahúva”.

Ndovaléi avei umi ansiáno okompara pe kongregasión pyahu pe ótro ikongregasiónre. Ojejapo haguérente diferénte la kósa ndeʼiséi ojejapo vaiha. Upévare iporãta reikuaa porã raẽrõ pe situasión oĩva upépe emeʼẽ hag̃ua peteĩ suherénsia (Ecl. 3:​1, 7b). Siémpre okonvenivéta emboʼérõ ne ehémplo porã rupive, ha ani ejopy umi ótrope opensa hag̃ua nde repensaháicha (2 Cor. 1: 24).

3. Embaʼapókena ne kongregasión pyahúpe (Filip. 1: 27). Pe mudánsa oiméne hoʼupa lénto ndehegui ne tiémpo ha nemokaneʼõ, upéicharõ jepe iñimportanteterei ensegídama voi reho rreunionhápe ha ikatúramo presensiál. Amo ipahápe, ¿mbaʼéicha piko umi ermáno ikatúta nepytyvõ avésente nderechárõ térã nanderechaietérõ voi hikuái? Jahechamína la ojapo vaʼekue Lucinda, haʼe ha umi mokõi imemby kuña ova kuri peteĩ siuda tuicháva oĩvape Sudáfricape. Lucinda heʼi: “Che amigokuéra heʼi kuri chéve ambaʼapo jejopy hag̃ua pe kongregasión pyahúpe. Upévare asẽ diferénte ermánondi predikasiónpe ha akomenta meme rreunionhápe, avei roofrese ore róga ojejapo hag̃ua upépe umi aty predikasionrã”.

Embaʼapóramo umi ermanokuérandi oñondivepa ne kongregasión pyahúpe nembaretéta nde, ha emokyreʼỹta avei chupekuéra. Por ehémplo Anne Lise pe ermána ñañeʼẽma vaʼekuére, omombeʼu umi ansianokuéra oakonseha hague chupe opredika hag̃ua enterovéndi. ¿Mbaʼépa ohupyty ojapo rupi upéicha? Haʼe heʼi: “Ensegída apilla upéva haʼeha la sekréto evyʼáma hag̃ua ne kongregasión pyahúpe”. Avei oñemopotĩ ha ojejapo jave mantenimiénto pe Salónpe iporãta ejeofresérõ eipytyvõ hag̃ua, péicha umi ermáno ohecháta nde eñandumaha nde upepeguaha. Amedída ke ejeheʼa pe kongregasiónre umi ermáno ovyʼáta nendive ha nde eñandúta haʼekuéra haʼeha ne família.

4. Eñehaʼã ereko hag̃ua amígo pyahu (2 Cor. 6: 11-13). Umi ermáno ohechakuaárõ nde reñeinteresaha hesekuéra ifasilvéta oiko hag̃ua chuguikuéra ne amígo. Upévare ikatu reaprovecha pe rreunión oñepyrũ mboyve ha opa rire eñemongeta hag̃ua umi ermanokuérandi eikuaa porã hag̃ua chupekuéra. Eñehaʼã avei eikuaa hag̃ua mbaʼéichapa héra káda uno. Nderory, neamávle ha nemanduʼárõ herakuérare umi ermáno oñeñandu porãta nendive ha oñemoag̃uiséta nderehe.

Ani eipotaitereíguinte enterovéva ndeasepta eju rekambiaite voi, síno eheja umi ermáno oikuaa porã mbaʼéichapa nde. Por ehémplo Lucinda heʼi: “Koʼág̃a roreko heta ore amigoite, pórke ore voi roinvita chupekuéra ou hag̃ua ore rógape”.

“PEJORRESIVI PORÃKENA”

Heta ermánope ijetuʼueterei oike hag̃ua peteĩ Salón del Reino ndoikuaaihápe avavépe. Upéicharõ, ¿mbaʼéichapa ikatu eipytyvõ oimérõ oĩ ova ramóva ne kongregasiónpe? Apóstol Pablo heʼi vaʼekue: “Pejorresivi porãkena Cristo ñanderresivi porã haguéicha” (Rom. 15: 7). Umi ansianokuéra ikatu osegi Cristo ehémplo ha oipytyvõ umi ermáno ova ramóvape oñeñandu porã hag̃ua pe kongregasiónpe. (Ehecha pe rrekuádro “¿Mbaʼéichapa ojejapo peteĩ kámbio de kongregasión?”). Péro enterove ermáno ha umi mitã jepe ikatu ojapo álgo umi ova ramóva ovyʼa hag̃ua kongregasiónpe.

Jarresivi porã hag̃ua ñane ermanokuérape ikatu ñainvita chupekuéra ñande rógape, péro avei oĩ jepi ótra kósa ikatúva jajapo hesehapekuéra. Por ehémplo peteĩ vuéltape peteĩ ermána oñemotiémpo ohechauka hag̃ua pe siuda peteĩ ermána ova ramóvape, ha oexplika chupe mbaʼéicha ombaʼapo upépe umi kolektívo ha tren. Pe ermána ova ramóva ovaloraiterei kuri pe ótra ermána ojapóva hesehápe ha upéva oipytyvõ chupe ojepokuaa pyaʼeve hag̃ua pe lugárpe.

PETEĨ OPORTUNIDA JAPROGRESA HAG̃UA

Oimérõ reváta hína ótra kongregasiónpe, ikatu rejepyʼapy ha rekyhyje, péro epensamíntena ko ehémplore. Oĩ ningo umi vichoʼi heta vése tekotevẽva ojepireʼo ikatu hag̃uáicha upéi oveve. Péicha avei tekotevẽ eipeʼa ndejehegui umi mbaʼe nemongyhyjéva ha ndepyʼapýva ikatu hag̃uáicha upéi revevéma Jehová servísiope. Nicolás ha Céline heʼi: “Reva jave tekotevẽ ejepokuaa ótra persónare ha peteĩ lugár pyahúre, upéicha rupi eñepyrũ rembaʼapo ereko hag̃ua umi kualida porã ndereguerekóiva gueteri”. Pe ermáno Jean Charles ñañeʼẽ vaʼekuére oñepyrũvo ko artíkulo, omombeʼu mbaʼéichapa ou porã ifamíliape ova haguére ótra kongregasiónpe. Haʼe heʼi: “Rohechakuaa pe kongregasión pyahúpe ore família oñepyrũ hague ojeroviave Jehováre ha oñemoag̃uive hese. Unos kuánto mése haguépente che rajy oñepyrũma oreko ipárte pe rreunión éntre semanaguápe, ha che raʼýgui katu oikóma puvlikadór no vautisádo”.

¿Ha oimérõ koʼag̃aite ndaikatúi hína reva ótro kongregasiónpe, por ehémplo oĩvehápe nesesida? Oimérõ upéicha lomímonte ikatu hína resegi umi konsého oĩvape ko artíkulope, péicha haʼetéta ku reñepyrũ jeýva pe kongregasión reĩhápema voi. Ejerovia Jehováre, eñehaʼã ejeheʼa kongregasiónre, por ehémplo esẽ epredika umi ermanokuérandi, eñehaʼã ereko amígo pyahu térã eñemoag̃uive umi erekómavare voi. Ikatu avei rekalkula mbaʼéichapa reipytyvõkuaa umi ipyahúvape kongregasiónpe térã umi oikotevẽvape hína oñepytyvõ chupe. La Bíbliape heʼi umi kristiáno verdadérope ojekuaataha ojoayhu rupi, upéicharõ eporohayhúrõ katuete eñemoag̃uivéta Jehováre (Juan 13:35). Ikatu reĩ segúro entéro sakrifísio rejapóva haʼeha ‘peteĩ ofrénda Ñandejárape g̃uarã ha ombovyʼaitereiha chupe’ (Heb. 13: 16).

Ndahaʼéiramo jepe la ifasilpáva java ótra kongregasiónpe, heta ermáno ovyʼa upéi ikongregasión pyahúpe. ¡Ha nde kásope oikóta avei upéicha! Anne Lise heʼi: “Ava rupi ótra kongregasiónpe ahayhuve enterove ermánope che pyʼaite guive”. Kazumi avei oĩ segúra “reváramo ótra kongregasiónpe Jehová nepytyvõtaha arakaʼeve ojapoʼỹ haguéicha”. Pe ermáno hérava Jules heʼi avei: “Heta che amígo pyahu ha añeñandu porãiterei hendivekuéra, ajepokuaaitéma voi che kongregasión pyahúpe upévare tekotevẽ mbaʼérõ ava, ambyasyetereíta voi”.