¿Mbaʼéichapa Jehová oipota pe kongregasión otrata umi opekávape?

1. ¿Mbaʼépa Jehová oipota enterovévape g̃uarã?

JEHOVÁ ñandeapórõ guare omeʼẽ ñandéve pe liverta jadesidi hag̃ua, upévare káda día jadesidi heta mbaʼe. ¿Péro mbaʼépa hína pe iñimportantevéva ikatúva jadesidi? Upéva hína ñañemeʼẽtapa Jehovápe ha ñaĩtapa ifamília apytépe jaadora hag̃ua chupe. Jehová oipota enterovéva jajapo upéva. ¿Mbaʼérepa? Pórke haʼe ñanderayhu ha oipota la iporãvéva ñandéve g̃uarã. Upévare oipota oiko ñandehegui iñamígo ha jaikove pára siémpre (Deut. 30:​19, 20; Gál. 6:​7, 8).

2. ¿Mbaʼépa Jehová oipota ojapo umi opekáva ha noñarrepentíriva? (1 Juan 2:1).

² Jehová oheja káda persóna odesidi oservítapa chupe, haʼe ni mbaʼevéicharõ nañandeovligamoʼãi jadesidi hag̃ua upéva. ¿Péro mbaʼépa oiko peteĩ kristiáno vautisádo oúramo naiñeʼẽrendúi Ñandejárape ha opeka vai? Noñarrepentíriramo oñenohẽmante vaʼerã chupe kongregasióngui (1 Cor. 5:13). Péro pe persónape oñenohẽramo jepe kongregasióngui, Jehová ipyʼaite guive oipota haʼe oñarrepenti oiko jey hag̃ua chugui iñamígo. Upévare voi Jehová omeʼẽ Itaʼýrape sakrifísioramo, ikatu hag̃uáicha operdona umi pekadór oñarrepentívape (elee 1 Juan 2:1). Ñandejára ñanderayhueterei, upévare oipytyvõseterei umi opeka vaʼekuépe oñarrepenti hag̃ua (Zac. 1:3; Rom. 2:4; Sant. 4:8).

3. ¿Mbaʼe mbaʼépa jahecháta ko artíkulope?

³ Jehová omombeʼu ñandéve mbaʼéichapa haʼe ohecha pe pekádo ha umi opeka vaívape, ha haʼe oipota ñande avei ñapensa haʼe opensaháicha. Ko artíkulo ñanepytyvõta upearã. Jastudiakuévo jahecháta koʼã mbaʼe: 1) Mbaʼépa Pablo heʼi vaʼekue umi ermáno Corintoguápe ojapo hag̃ua oĩrõ guare peteĩ ermáno opeka vaietereíva, 2) mbaʼépa Pablo heʼi vaʼekue pe kongregasiónpe ojapo hag̃ua upe opeka vaʼekue oñarrepenti riréma, ha 3) mbaʼéichapa Jehová ohecha umi kristiáno opekávape.

¿MBAʼÉPA OIKO VAʼEKUE PETEĨ ERMÁNO OPEKA VAÍRÕ GUARE?

4. ¿Mbaʼépa oiko vaʼekue pe kongregasión de Coríntope primer síglope? (1 Corintios 5:​1, 2).

⁴ (Elee 1 Corintios 5:​1, 2). Jahechamína la oiko vaʼekue Pablo ojapo aja itercér viáhe de predikasión. Upérõ guare haʼe oikuaa oikoha álgo ivaietereíva pe kongregasión pyahu oĩvape Coríntope. Oĩ vaʼekue peteĩ ermáno upepegua orekóva rrelasión sexuál itúa rembirekóndi. Upéva ningo ivaieterei ha ‘ni umi hénte ndoadoráiva Ñandejárape ndahekovaíri vaʼekue péicha’. Péro pe kongregasión ohejánte upe ermánope osegi ijapytepekuéra ha ndahaʼéi voi upévante, síno oñemombaʼeguasu hikuái upévare. Ikatu algúno umi ermáno opensa raʼe péicha ojehechaukaha Ñandejára ñandeporiahuvereko ha ontendeha ñaneimperfektoha. Péro Jehová ni michĩmi ndoaseptái ojejapo koʼãichagua mbaʼe vai ipuévlo apytépe, pórke pe kuimbaʼe hekovai rupi oiméne oĩ raʼe heta hénte oñeʼẽ vaíva pe kongregasiónre. Upe kuimbaʼe ikatu kuri avei ogueraha vai umi ermánope. Upévare, ¿mbaʼépa heʼi vaʼekue apóstol Pablo pe kongregasiónpe ojapo hag̃ua?

5. ¿Mbaʼépa heʼi Pablo pe kongregasiónpe ojapo hag̃ua ha mbaʼépa heʼise vaʼekue upéva? (1 Corintios 5:13). (Ehecha pe taʼanga).

⁵ (Elee 1 Corintios 5:13). Espíritu sánto rupive Pablo oskrivi peteĩ kárta heʼihápe tekotevẽha oñenohẽ kongregasióngui pe kuimbaʼe noñarrepentírivape. ¿Mbaʼéichapa umi kristiáno otrata vaʼerã kuri chupe? Pablo heʼi chupekuéra ‘anive hag̃ua ojeheʼa hese’. ¿Mbaʼépa heʼise vaʼekue upéva? Pablo oexplika vaʼekue upe mandáto heʼiseha ‘ni ndokarúi vaʼerãha umichaguándi’ (1 Cor. 5:11). Jaikuaa ningo jaguapy jave jakaru peteĩ persónandi, ndahasyiete upéi ñañepyrũ hag̃ua ñañemongeta hendive ha jahasa tiémpo upe persónandi. Upéicharõ, Pablo ontendekase kuri pe kongregasiónpe ndovaleiha ohasa tiémpo pe kuimbaʼéndi. Ojejapóvo péicha oñeñangarekóta umi ermáno oĩvare kongregasiónpe ani hag̃ua pe kuimbaʼe oraha vai chupekuéra (1 Cor. 5:​5-7). Avei péicha pe kuimbaʼe ikatúta kuri ohecha ivaieterei hague la ojapóva Jehovápe g̃uarã, ha ikatu voi upéi otĩ ha oñarrepenti.

6. Pablo omondo rire ikárta, ¿mbaʼépa ojapo pe kongregasión ha pe kuimbaʼe opeka vaʼekue?

⁶ Pablo omondo rire ikárta umi kristiáno Corintoguápe oñepyrũ oñeporandu mbaʼéichapa pe kongregasión orreaksionáta. Ohasávo pe tiémpo, Tito omeʼẽ Páblope peteĩ notísia iporãitereíva. Pe kongregasión ojagarra porãiterei kuri la Pablo heʼi vaʼekue upe kártape (2 Cor. 7:​6, 7). Umi ermáno ojapopaite vaʼekue la Pablo heʼíva chupekuéra. Hiʼarive unos kuánto mése Pablo omondo rire ikárta, pe kuimbaʼe opeka vaʼekue oñarrepenti la ojapo vaʼekuégui. Upe kuimbaʼe okambia oiko lája, opensa lája ha oñepyrũ jey ojapo umi mbaʼe Jehovápe ogustáva (2 Cor. 7:​8-11). ¿Mbaʼépa upémarõ Pablo heʼi pe kongregasiónpe ojapo hag̃ua?

¿MBAʼÉICHAPA OJETRATA VAʼERÃ KURI PE PEKADÓR OÑARREPENTÍVAPE?

7. ¿Mbaʼépa ojapo pe kuimbaʼe oñenohẽ rire chupe kongregasióngui? (2 Corintios 2:​5-8).

⁷ (Elee 2 Corintios 2:​5-8). Pablo heʼi vaʼekue umi ermánope haʼekuéra ‘okorrehíma hague pe kuimbaʼe opeka vaʼekuépe, ha ja ovalemaha upéva’. Pe kuimbaʼe oñarrepentíma kuri oñenohẽ rupi chupe kongregasióngui, ha oñarrepentíma rupi natekotevẽvéima osegi ojekorrehi chupe (Heb. 12:11).

8. ¿Mbaʼépa Pablo heʼive pe kongregasiónpe ojapo hag̃ua?

⁸ Pe kuimbaʼe oñarrepentíma rupi, Pablo heʼi pe kongregasiónpe oheja jey hag̃ua chupe oĩ jey ijapytepekuéra. Péro ndahaʼéi upévante, haʼe heʼi umi ermánope: “Peẽ pyʼaporãme peperdona vaʼerã pe kuimbaʼépe, ha pekonsola chupe”. Avei heʼi: ‘Peipytyvõ pe kuimbaʼépe ohechakuaa hag̃ua pehayhuha chupe’. Pablo oipota vaʼekue umi ermáno ohechauka la ojapóva ha heʼíva rupive operdona ha ohayhuha pe ermáno oñarrepenti vaʼekuépe. Upéicha pe ermáno ohechakuaáta kuri pe kongregasión ovyʼaitereiha haʼe ou jey haguére.

9. ¿Mbaʼérepa ijetuʼúne rakaʼe algúnope operdona hag̃ua pe ermáno oñarrepenti vaʼekuépe?

⁹ ¿Ijetuʼúnepa raʼe algúno ermánope orresivi porã hag̃ua pe pekadór oñarrepenti vaʼekuépe? La Biblia ndeʼíri, péro ikatu oime oiko raʼe upéva. Amo ipahápe ñapensa porãrõ, pe kuimbaʼe ojapóva ogueru kuri provléma kongregasiónpe. Ikatu oime la haʼe ojapo vaʼekue omotĩ raʼe algúnope. Epensamíntena, umi ermáno kongregasionpegua oñehaʼãmbaiténe raʼe hekopotĩ hag̃ua. Upévare ikatu oime orrenega raʼe hikuái, ha opensa mbaʼére guaʼu la orresivi porãite vaʼerã pe opeka vaʼekuépe (ekompara Lucas 15:​28-30 heʼívare). ¿Péro mbaʼérepa iñimportantete vaʼekue pe kongregasión orresivi mborayhúpe pe ermáno oñarrepentívape?

10, 11. ¿Mbaʼépa oiko vaʼerãmoʼã umi ansiáno noperdonáirire pe oñarrepenti vaʼekuépe?

¹⁰ Ñapensamíntena mbaʼépa oiko vaʼerãmoʼã umi ansiáno ndohejáirire pe kuimbaʼe oñarrepenti vaʼekuépe oĩ jey kongregasiónpe. Térã jakalkulami mbaʼépa ikatu vaʼerãmoʼã oiko umi ermáno ndohechaukáirire ohayhuha chupe. Provávlemente pe kuimbaʼe ikatu kuri ‘oñembyasyeterei ha oñentregántema’ openságui núnka ndaikatumoʼãveimaha oservi jey Jehovápe. Amo ipahápe haʼe ikatu kuri noñehaʼãvéintema oĩ porã jey Ñandejárandi.

¹¹ Péro oĩ ótra kósa ivaivéntemava. Umi ermáno ha ermána noperdonáirire pe kuimbaʼe oñarrepenti vaʼekuépe, haʼekuéra voi ombyaíta iñamista Jehovándi. ¿Mbaʼérepa jaʼe upéva? Haʼekuéra noporoperdonáiramo ohechaukáta ndosegiriha Jehová ehémplo porãite, pórke haʼe operdona umi pekadór oñarrepentívape. Upéva rangue ohechaukáta hikuái ojoguaha Satanáspe, pórke haʼe ipyʼahatã ha ndoiporiahuverekói avavépe. Jaʼe porãsérõ g̃uarã Satanás ikatu kuri ojevale umi ermánore omomombyry hag̃ua pe kuimbaʼépe Jehovágui (2 Cor. 2:​10, 11; Efes. 4:27).

12. ¿Mbaʼéichapa pe kongregasión Corintogua ohechaukáta kuri osegiha Jehová ehémplo?

¹² ¿Mbaʼéichapa umi ermáno ha ermána Corintogua ohechaukáta kuri osegiha Jehová ehémplo ha ndojoguaiha Satanáspe? Upearã otrata vaʼerã umi oñarrepentívape Jehová ojapoháicha. La Biblia heʼi ñandéve mbaʼépa Jehová ojapo. Por ehémplo David heʼi vaʼekue: “Jehová, nde ningo nevuenoiterei ha reime oreperdona hag̃uáicha” (Sal. 86:5). Miqueas avei heʼi vaʼekue: “Ñandejára, ¿máva piko ótro Dios ndeichagua? Nde ningo reperdona umi mbaʼe vai ojapóva umi hembýva nde puévlogui, ha rembohasa rei ipekádo” (Miq. 7:18). Ha Isaías heʼi vaʼekue: “Pe iñañáva toheja hembiapo vai, ha anive opensa ivaívare. Tou jey Jehová rendápe, pórke haʼe oiporiahuverekóta chupe. Toñemoag̃ui Ñandejárare, pórke haʼe operdonambaitéta chupe hembiapo vaikue” (Is. 55:7).

13. ¿Mbaʼérepa oĩ porã kuri ojeheja pe kuimbaʼe oñarrepenti vaʼekuépe ovolve jey kongregasiónpe? (Ehecha pe rrekuádro “¿Arakaʼépa oñerreadmiti raʼe Coríntope pe kuimbaʼe opeka vaʼekuépe?”).

¹³ Pe kongregasión Corintogua osegi hag̃ua Jehová ehémplo ohechauka vaʼerã operdona ha ohayhuha pe kuimbaʼe oñarrepenti vaʼekuépe. Pe kongregasión ojapopaite kuri Pablo heʼi vaʼekue chupekuéra, péicha ohechauka ‘iñeʼẽrenduha hikuái entéro mbaʼépe’ (2 Cor. 2:9). Añetehápe pe kuimbaʼe oñenohẽ rire kongregasióngui, unos kuánto mése haguépente haʼe ohechaukáma kuri oñarrepentiha. Upévare natekotevẽi kuri umi ansiáno ohaʼarõiterei orreadmiti hag̃ua chupe kongregasiónpe.

JEHOVÁ OPOROPORIAHUVEREKO HA IHÚSTO

14, 15. ¿Mbaʼépa ikatu ñaaprende la oiko vaʼekuégui Coríntope? (2 Pedro 3:9). (Ehecha pe taʼanga).

¹⁴ La oiko vaʼekue Coríntope ojeskrivi Ñandejára Ñeʼẽme “ñanerekomboʼe hag̃ua” (Rom. 15:4). ¿Mbaʼe mbaʼépa ñaaprende? Jahecha Jehová nopermitiriha umi hembiapo vaíva ha noñarrepentírivape osegi ipuévlo apytépe. Ikatu oĩ opensáva Jehová oporoporiahuvereko haguére ohejatanteha peteĩ pekadór noñarrepentírivape osegi kongregasiónpe. Péro Jehová ndohechaukái péicha oiporiahuverekoha la héntepe. Haʼe ndohejái ipuévlo apytépe káda uno ojapo ojaposévante, ni ndoikói okambiapa jey umi mbaʼe heʼíma vaʼekue oĩ vaiha (Jud. 4). Legálmente Jehová opermitíramo peteĩ pekadór noñarrepentíriva osegi kongregasiónpe, ohechaukáta naimbaʼeporãiha pórke amo ipahápe pe kongregasión kompletoite ikatu oñembyai hína (Prov. 13:20; 1 Cor. 15:33).

¹⁵ Péro ñaaprende avei Jehová ndoipotaiha avave oñehundi síno ikatúma guive osalvase umi héntepe. Haʼe ohechauka oiporiahuverekoha umi hénte okambiávape ha oservise jeývape chupe (Ezeq. 33:11; elee 2 Pedro 3:9). Upévare pe kuimbaʼe Corintogua oñarrepenti ha okambiárõ guare, Jehová ojevale Páblore heʼi hag̃ua pe kongregasiónpe operdona ha orresivi jey vaʼerãha pe kuimbaʼépe.

16. ¿Mbaʼéichapa reñeñandu reanalisa rire la oiko vaʼekue Coríntope?

¹⁶ Pe oiko vaʼekue kongregasión de Coríntope ohechauka Jehová oporohayhuetereiha, oipotaha ojehusga porã ha oĩ hustísia (Sal. 33:5). Rehechapa rire koʼã mbaʼe, ¡ajépa koʼytevéntema remombaʼeguasuse Ñandejárape! Amo ipahápe ñande enterovéva ningo pekadór ha ñaikotevẽ Jehová ñaneperdona. Avei jaagradeseterei Jehovápe omeʼẽ haguére Itaʼýrape sakrifísioramo ikatu hag̃uáicha ñaneperdona. Ha tuicha ñandepyʼaguapy jaikuaávo Jehová ohayhuetereiha ipuévlope ha oipotaha la iporãvéva ñandéve g̃uarã.

17. ¿Mbaʼe mbaʼépa jahecháta umi artíkulo oúvape?

¹⁷ Koʼág̃arupi oĩramo álgien opeka vaíva kongregasiónpe, ¿mbaʼépa ojejapo? ¿Mbaʼéichapa umi ansiáno ikatu osegi Jehová ehémplo ha mborayhúpe oipytyvõ pe persónape oñarrepenti hag̃ua? ¿Mbaʼéichapa pe kongregasión orreaksiona vaʼerã umi ansiáno odesidírõ oñenohẽ térã oñerreadmititaha peteĩ persónape? Koʼã porandu ñaanalisáta umi artíkulo oúvape.