Ñapensákena Jehová ha Jesús opensaháicha

1, 2. ¿Mbaʼéichapa jahayhu vaʼerã Jehovápe, ha mbaʼéichapa Jesús ohechauka vaʼekue ohayhuha Itúape entéro ipensamiénto reheve?

JESÚS heʼi vaʼekue pe mandamiénto iñimportantevéva haʼeha kóva: “Rehayhu vaʼerã Jehová nde Járape nde pyʼaite guive, nde rekove kompletoite reheve, ha ne mbaretekue omeʼẽmíva reheve, ha entéro ne pensamiénto reheve” (Luc. 10:27). Koʼápe jahecha jahayhu vaʼerãha Jehovápe ñande pyʼaite guive, upévape oike umi mbaʼe ñañandúva ha jaipotáva. Avei jahayhu vaʼerã Jehovápe ñande rekove kompletoite reheve ha ñane mbaretekue térã ñande fuérsa omeʼẽmíva reheve. Péro avei jahecha jahayhu vaʼerãha Jehovápe ñane pensamiénto reheve, upéva ningo ojekuaa umi mbaʼe ñapensávare. Jaikuaaháicha, núnka ndaikatumoʼãi ñantendepaite entéro mbaʼe Jehová opensáva. Péro ikatu ñantende porãve Ñandejára opensa lája ñaanalisáramo Cristo opensa lája, pórke haʼe ojoguaiterei vaʼekue Itúape (1 Cor. 2:16).

² Jesús ohayhu vaʼekue Jehovápe entéro ipensamiénto reheve. Haʼe oikuaa vaʼekue mbaʼépa Itúa oipota ojapo, ha ojedesidiete okumplitaha upéva osufrítaramo jepe. Jesús ojesareko vaʼekue Itúa rembipotáre ha ndaipóri vaʼekue ótra kósa iñimportantevéva chupe g̃uarã.

3. ¿Mbaʼépa oaprende vaʼekue apóstol Pedro Jesúsgui, ha mbaʼépa Pedro omokyreʼỹ umi kristiánope ojapo hag̃ua? (1 Pedro 4:1).

³ Pedro ha umi ótro apóstol ohasa vaʼekue heta tiémpo Jesús ndive, ha oreko rupi pe oportunida oaprende hikuái mbaʼéichapa Jesús opensa vaʼekue. Pedro oskrivírõ guare ipriméra kárta omokyreʼỹ vaʼekue umi kristiánope tojeprepara opensa hag̃ua Cristo opensa haguéicha (elee 1 Pedro 4:1). Pe idióma ojeskrivi haguépe ko téxto, Pedro oipuru peteĩ palávra oñeʼẽva umi soldádo ojepreparávare umi árma reheve oho hag̃ua gerrahápe. Upéicharõ umi kristiáno opensárõ Jesús opensa haguéicha oĩta preparádo ogerrea hag̃ua umi deséo vaíre ha Satanás múndo aña kóntrape (2 Cor. 10:​3-5; Efes. 6:12).

4. ¿Mbaʼéichapa ko artíkulo ñanepytyvõta jajapo hag̃ua la Pedro heʼi vaʼekue?

⁴ Ko artíkulope ñaanalisáta Jesús opensa lája ha mbaʼéichapa ikatu ñapensa haʼe ojapoháicha. Jahecháta mbaʼéichapa Jesús ehémplo ñanepytyvõ ñapensa hag̃ua Jehová opensaháicha, ha avei mbaʼéichapa upéva ideprovéchota ñandéve ñaĩmba hag̃ua peteĩ ñeʼẽme. Avei Jesús ehémplo ñanepytyvõta ñaneumílde hag̃ua ha jahechauka hag̃ua ñaneakãguapyha ñañemboʼévo Jehovápe.

ÑAPENSÁKENA JEHOVÁ OPENSAHÁICHA

5. ¿Mbaʼéichapa peteĩ vuéltape Pedro ohechauka nopensái hague Jehová opensaháicha?

⁵ Peteĩ vuéltape Pedro ohechauka vaʼekue nopensái hague Jehová opensaháicha. Jesús heʼi vaʼekue ijapostolkuérape oho vaʼerãha Jerusalénpe, upépe umi líder rrelihióso ojagarráta kuri chupe, haʼe ohasa asýta ha amo ipahápe ojejukáta kuri chupe (Mat. 16:21). Pedro oikuaa vaʼekue Jesús haʼe hague pe Mesías oñepromete vaʼekue osalva hag̃ua Jehová puévlope. Upévare oiméne ijetuʼu raʼe chupe orovia hag̃ua Jehová ohejataha ojejuka Jesúspe (Mat. 16:16). Upévare Pedro omohaʼeño Jesúspe ha heʼi chupe: “Che Ruvicha, ejeporiahuverekomína nde avei. Ni mbaʼevéicharõ koʼã mbaʼe ndoikomoʼãi nderehe” (Mat. 16:22). Jesús noĩri vaʼekue peteĩ ñeʼẽme Pédrondi. ¿Mbaʼérepa? Pórke Pedro nopensái vaʼekue Jehová opensaháicha.

6. ¿Mbaʼéichapa Jesús ohechauka vaʼekue opensa hague Jehová opensaháicha?

⁶ Jesús oikuaa porã vaʼekue mbaʼéichapa Itúa opensa ha osegi iñehémplo. Upévare heʼi vaʼekue Pédrope: “¡Eñemoĩ che kupépe Satanás! Nde peteĩ estórvo hína che raperãme, pórke nerepensái Ñandejára opensaháicha, síno repensa la hénte opensaháicha” (Mat. 16:23). Oiméne Pedro oipytyvõsénte raʼe Jesúspe, péro Jesús orrechasa la ikonsého. Haʼe oikuaa porã vaʼekue ojapo hag̃ua Ñandejára volunta tekotevẽha osufri ha omano. Upérõ guare Pedro oaprende oñehaʼã vaʼerãha opensa Ñandejára opensaháicha. Ha upéva peteĩ mbaʼe iñimportantetereíva tekotevẽva ñande avei ñaaprende.

7. ¿Mbaʼéichapa Pedro kon el tiémpo ohechauka vaʼekue oñehaʼãha opensa Jehová ojapoháicha? (Ehecha pe taʼanga).

⁷ Kon el tiémpo Pedro ohechauka oñehaʼã hague opensa Jehová opensaháicha. ¿Mbaʼéichapa ojapo upéva? Og̃uahẽ vaʼekue pe tiémpo Jehová opermiti hague umi hénte ótro tetãyguápe oĩ ipuévlo apytépe. Upérõ guare Ñandejára ogia vaʼekue Pédrope opredika hag̃ua Cornéliope. Haʼe ndahaʼéi vaʼekue judío, péro upéi haʼe oĩ vaʼekue pe primer grúpo oñepyrũ vaʼekuépe oadora Jehovápe. Umi judío ndojeheʼaiete vaʼekue voi umi ndahaʼéivare hetãygua. Upévare ñantende porã mbaʼérepa Pedro tekotevẽ vaʼekue okambia opensa lája opredika hag̃ua umi ndahaʼéivape judío. Pedro ohechakuaárõ guare mbaʼépa Ñandejára opensa umi ndahaʼéivare judío, oñehaʼã okambia la opensáva. Upéicha rupi, ojejerurérõ guare chupe oho hag̃ua Cornelio rendápe ‘ni ndodudái oho hag̃ua’ (Hech. 10:​28, 29). Pedro opredika vaʼekue Cornelio ha hogayguápe ha haʼekuéra ojevautisa (Hech. 10:​21-23, 34, 35, 44-48).

8. ¿Mbaʼéichapa jahechaukáta ñapensaha Jehová opensaháicha? (1 Pedro 3:8 ha pe nóta).

⁸ Heta tiémpo upe rire Pedro omokyreʼỹ vaʼekue umi kristiánope oiko hag̃ua peteĩ ñeʼẽme térã opensa hag̃ua peteĩchapa (elee 1 Pedro 3:8 ha pe nóta). Ñande avei jaikóta peteĩ ñeʼẽme ermanokuérandi ñañehaʼãramo ñapensa Jehová ojapoháicha. Iñeʼẽ rupive ikatu ñaaprende mbaʼépa haʼe opensa, por ehémplo Jesús omokyreʼỹ vaʼekue idisipulokuérape omotenonde meme hag̃ua Ñandejára Rréino (Mat. 6:33). Upévare ñapensamína, peteĩ ermáno heʼíramo ñandéve oñepyrũseha oservi Jehovápe de tiémpo kompléto, ni mbaʼevéicharõ ndajaʼemoʼãi chupe natekotevẽiha ojeforsaiterei ha ikatuha oiko trankilomiénte. Upéva rangue ñamokyreʼỹta chupe ohupyty hag̃ua iméta ha ñaĩta ñaipytyvõ hag̃uáicha chupe.

ÑAÑEHAʼÃKENA ÑANEUMÍLDE

9, 10. ¿Mbaʼéichapa Jesús ohechauka vaʼekue iñumildetereiha?

⁹ Pe pyhare Jesús omano mboyve omboʼe vaʼekue Pédrope ha umi ótro apóstolpe iñimportantetereiha iñumílde. Upe mboyve Jesús omondo vaʼekue Pedro ha Juánpe oprepara hag̃ua entéro mbaʼe oñekotevẽtava osena hag̃ua hikuái, pórke upérõ última ves Jesús oĩta kuri hendivekuéra omano mboyve. Umi apóstol oiméne ojasegura raʼe oĩha peteĩ palangána ha umi toálla oñembojepyhéi hag̃ua umi osenátavape. ¿Péro mávapa ohechaukáta iñumildeha ha ombojepyhéita umi ótrope?

¹⁰ Odudaʼỹre Jesús opuʼã ojapo upe traváho ha péicha ohechauka iñumildetereiha. Oiméne ijapostolkuéra oñesorprendepa ohechávo Jesús ojapoha pe traváho ojapóva jepi umi sirviénte, péro Jesús opuʼã oipeʼa ijao joʼaha, ojagarra peteĩ toálla ha olia ikuʼáre. Upéi omoĩ y peteĩ palangánape ha ojohéi idisipulokuérape ipy (Juan 13:​4, 5). Oiméne Jesús heta ombaʼapo ombojepyhéi hag̃ua umi 12 apóstolpe voi, hiʼarive umíva apytépe oĩ vaʼekue Judas, pe otraisionátava chupe upe rire. Péro Jesús iñumílde ha ojohéi enterovéva idisipulokuéra py. Upéi haʼe heʼi chupekuéra: “¿Peikuaápa mbaʼérepa che ajohéi peẽme pende py? Peẽ peje chéve: ‘Mboʼehára’, ha ‘che Ruvicha’, ha siérto la pejéva. Che ningo pene Mboʼehára ha pende Ruvicha, ha upéicharõ jepe ajohéi peẽme pende py. Upéicharõ peẽ koʼýte pejohéi vaʼerã ojupe pende py” (Juan 13:​12-14).

11. ¿Mbaʼéichapa Pedro ohechauka vaʼekue iñumílde hague? (1 Pedro 5:5). (Ehecha pe taʼanga).

¹¹ Pedro osegi vaʼekue Jesús ehémplo ha iñumílde. Jesús oho riréma yvágape Pedro ojapo vaʼekue peteĩ milágro ha omonguera peteĩ kuimbaʼe ikarẽvape onase guive (Hech. 1:​8, 9; 3:​2, 6-8). La haʼe ojapo vaʼekue tuichaiterei mbaʼe, upévare heta hénte ohecharamoiterei upe milágro ha ojerepa vaʼekue Pédrore (Hech. 3:11). Jareko vaʼerã enkuénta Pedro oĩ hague peteĩ kultúra umi hénte oñehaʼãhápe iñimportánte oñemombaʼe hag̃ua chupekuéra. Upéicharõ jepe Pedro ndoipotái vaʼekue umi hénte omombaʼeguasu chupe, upéva rangue haʼe iñumílde ha heʼi umi héntepe omombaʼeguasu hag̃ua Jehová ha Jesúspe. Pedro heʼi vaʼekue: “Jesús réra rupive ha rojerovia rupi hérare, ko kuimbaʼe peẽ pehecha ha peikuaáva okueraite” (Hech. 3:​12-16). Tiémpo rire Pedro oskrivi vaʼekue peteĩ kárta heʼihápe umi kristiánope tekotevẽtereiha iñumílde hikuái. Upérõ guare haʼe oipuru vaʼekue peteĩ palávra heʼiséva ñamonde vaʼerãha peteĩ aóicha pe umilda. Upéva ikatu ñanemomanduʼa Jesús ojagarrárõ guare peteĩ toálla, olia ikuʼáre ha ojohéi ijapostolkuérape ipy (elee 1 Pedro 5:5).

12. ¿Mbaʼéichapa ikatu jasegi Pedro ehémplo ha ñaneumílde?

¹² Ñande avei ikatu jasegi Pedro ehémplo ha ñañehaʼã ñaneumílde. Ñanemanduʼa vaʼerã ndahaʼeiha umi mbaʼe jaʼévapente jahechaukátava ko kualida. Apóstol Pedro oñeʼẽrõ guare pe umildáre oipuru vaʼekue peteĩ palávra heʼiséva ñaneumílde vaʼerãha ñande pyʼaite guive, ha upéva ojekuaáta la ñapensávare ñandejehe ha ñande rapicháre. Ñande ñañehaʼã jajapo heta mbaʼe porã jahayhúgui Jehovápe ha ñande rapichápe, ha ndahaʼéi jaipotágui ótro ñanderecharamo. Jahechaukáta ñaneumildeha jaservíramo vyʼápe Jehovápe ha ñane ermanokuérape ndaipóriramo jepe avave ohecháva la jajapóva (Mat. 6:​1-4).

ÑAÑEHAʼÃKENA ÑANEAKÃGUAPY

13. ¿Mbaʼéichapa ikatu jahechauka ñaneakãguapyha?

¹³ ¿Mbaʼéichapa ikatu jahechauka ñaneakãguapyha? (1 Ped. 4:7). Ñaneakãguapýramo jarekóta enkuénta Jehová opensáva jadesidíta jave peteĩ mbaʼe. Avei iñimportantetereíta ñandéve g̃uarã ñane amista Jehovándi, ndajaikomoʼãi ñañemombaʼeguasu ha ñarrekonoséta oĩha heta mbaʼe ndajaikuaáiva. Ñaneakãguapýramo ñakonfiáta Jehováre ha jahechaukáta upéva ñañemboʼe memévo chupe ikatu hag̃uáicha ñandegia.

14. ¿Mbaʼéichapa peteĩ vuéltape Pedro ohechauka ndojeroviaiha Jehováre?

¹⁴ Pe pyhare Jesús omano mboyve haʼe oavisa vaʼekue idisipulokuérape: “Ko pyharépe enterove peẽ chereja reíta”. Pedro ojerovia vaʼekue ijehe ha heʼi Jesúspe: “¡Enterove umi ótro ndereja reíramo jepe, che núnka ndorohejamoʼãi!”. Upe pyharépe Jesús omeʼẽ vaʼekue avei algúno idisípulope ko konsého: “Peñatende porãke siémpre ha peñemboʼe meme” (Mat. 26:​31, 33, 41). Pedro ndosegíri kuri upe konsého, ojapo rire upéva provávlemente ipyʼaguasúta heʼi hag̃ua kuri haʼeha Jesús disípulo. Péro upéva rangue haʼe onega Jesúspe ha upéi ombyasyeterei la ojapóva (Mat. 26:​69-75).

15. ¿Mbaʼéichapa Jesús ohechauka vaʼekue iñakãguapyha upe pyhare omano mboyve?

¹⁵ Jesús ojerovia vaʼekue Jehováre ipyʼaite guive. Jaikuaa haʼe iperfékto hague, péro lomímonte oñemboʼe vaʼekue heta vése upe pyhare omano mboyve. Upéicha rupi Jesús ipyʼaguasu vaʼekue ojapo hag̃ua Jehová volunta (Mat. 26:​39, 42, 44; Juan 18:​4, 5). Katuete ningo Pedro núnka ndahesaráiri vaʼekue Jesús oñemboʼe hague heta vése upe pyharépe.

16. ¿Mbaʼéichapa ojekuaa Pedro oñehaʼã hague iñakãguapy hag̃ua? (1 Pedro 4:7).

¹⁶ Kon el tiémpo Pedro ojeroviave vaʼekue Jehováre ha ohechauka upéva oñemboʼévo chupe. Jesús orresusita rire oasegura vaʼekue Pedro ha umi ótro apóstolpe oñemeʼẽtaha chupekuéra pe espíritu sánto opredika hag̃ua umi notísia porã. Péro Jesús ojerure chupekuéra ohaʼarõ hag̃ua Jerusalénpe oñemeʼẽ peve chupekuéra pe espíritu sánto (Luc. 24:49; Hech. 1:​4, 5). ¿Mbaʼépa ojapo Pedro ohaʼarõ aja? Pedro ha umi ótro kristiáno “osegi oñemboʼe meme hikuái oñondivepa” (Hech. 1:​13, 14). Upe rire pe ipriméra kártape, Pedro omokyreʼỹ vaʼekue umi kristiánope ikatu hag̃uáicha iñakãguapy ha oñemboʼe meme ohechauka hag̃ua ojeroviaha Jehováre (elee 1 Pedro 4:7). Jahecha mbaʼéichapa Pedro oaprende ojerovia vaʼerãha Jehováre, ha oiko chugui peteĩ kolúmna kongregasiónpe g̃uarã (Gál. 2:9).

17. Ñapensáramo jepe ñandekatupyryha, ¿mbaʼépa jasegi vaʼerã jajapo? (Ehecha pe taʼanga).

¹⁷ Ñaneakãguapy hag̃ua ñañemoag̃ui vaʼerã Jehováre ñañemboʼévo chupe. Ñapensáramo jepe ñandekatupyryetereiha, tekotevẽ jasegi ñañemboʼe Jehovápe koʼýte jadesidíta jave peteĩ mbaʼe iñimportánteva. Péicha jave ñañemboʼe Jehovápe ñandegia hag̃ua, pórke ñaĩ segúro haʼe oikuaa porãitereiha mbaʼépa la okonvenivéva ñandéve.

18. ¿Mbaʼépa ikatu jajapo ñapensave hag̃ua Jehová oipotaháicha?

¹⁸ Javyʼaite ningo Jehová ñandeapo haguére ijoguaháramo ikatu hag̃uáicha jahechauka umi kualida haʼe orekóva (Gén. 1:26). Jaikuaa ningo ndaikatumoʼãiha jajogua Jehovápe entéro mbaʼépe (Is. 55:9). Péro Pedro ojapo haguéicha, ñande avei ñañehaʼãse ñapensave Jehová opensaháicha, ñaneumílde ha ñaneakãguapy.